Read Библия Церковнославянская Чи́сла 6 Bible Online

Чи́сла 6 - Библия Церковнославянская bible

Чи́сла 6

¹И҆ речѐ гд҇ь къ мѡѷсе́ю, гл҃ѧ:

²глаго́ли сынѡ́мъ ї҆и҃лєвымъ и҆ рече́ши къ ни҄мъ: мѹ́жъ и҆лѝ жена̀, и҆́же а҆́ще ѡ҆бѣща́етсѧ ѕѣлѡ̀ ѡ҆бѣ́томъ, є҆́же ѡ҆чи́ститисѧ чистото́ю гд҇ѹ,

³да воздержи́тсѧ ѿ вїна̀ и҆ сїке́ра, и҆ ѻ҆́цта ві́нна и҆ ѻ҆́цта ѿ сїке́ра да не пїе́тъ: и҆̀, є҆ли҄ка дѣ́лаютсѧ ѿ грѡ́здъ ві́нныхъ, да не пїе́тъ, и҆ гро́здїѧ свѣ́жагѡ и҆ сѹха́гѡ да не снѣ́стъ.

⁴Во всѧ҄ дни҄ ѡ҆бѣ́та своегѡ̀ ѿ всѣ́хъ, є҆ли҄ка быва́ютъ ѿ ві́нничины вїна̀, ѿ ко́сти и҆ до скорлѹпы̀ да не пїе́те, нижѐ ѩ҆́сте ѿ всегѡ̀.

⁵Во всѧ҄ дни҄ ѡ҆бѣ́та ѡ҆чище́нїѧ своегѡ̀ бри́тва да не взы́детъ на главѹ̀ є҆гѡ̀, до́ндеже сконча́ютсѧ дні́е, є҆ли҄ки ѡ҆бѣща́лъ є҆́сть гд҇ѹ: ст҃ъ бѹ́детъ растѧ́й власы̀ главы̀ своеѧ̀.

⁶Во всѧ҄ дни҄ ѡ҆бѣ́та своегѡ̀ гд҇ѹ, ко всѧ́кой дѹшѣ̀ сконча́вшейсѧ да не вни́детъ.

⁷Над̾ ѻ҆тце́мъ и҆ над̾ ма́терїю, и҆ над̾ бра́томъ и҆ над̾ сестро́ю, да не ѡ҆скверни́тсѧ над̾ ни́ми, ѹ҆ме́ршымъ и҆̀мъ, ѩ҆́кѡ ѡ҆бѣ́тъ бг҃а є҆гѡ̀ на главѣ̀ є҆гѡ̀.

⁸Всѧ҄ дни҄ ѡ҆бѣ́та є҆гѡ̀ ст҃ъ бѹ́детъ гд҇ѹ.

⁹А҆́ще же кто̀ сме́ртїю внеза́пѹ ѹ҆́мретъ ѹ҆ негѡ̀, а҆́бїе ѡ҆скверни́тсѧ глава̀ ѡ҆бѣ́та є҆гѡ̀, и҆ ѡ҆брі́етъ главѹ̀ свою̀, въ ѻ҆́ньже де́нь ѡ҆чи́ститсѧ, въ де́нь седмы́й да ѡ҆брі́етсѧ,

¹⁰и҆ въ де́нь ѻ҆смы́й да принесе́тъ два̀ гѡ́рличища и҆лѝ два̀ птєнца̀ гѡлѹби́на къ жерцѹ̀ пред̾ двє́ри ски́нїи свидѣ́нїѧ:

¹¹и҆ да сотвори́тъ жре́цъ є҆ди́нѹ грѣха̀ ра́ди, и҆ дрѹгѹ́ю во всесожже́нїе, и҆ да помо́литсѧ ѡ҆ не́мъ жре́цъ, ѡ҆ ни́хже согрѣшѝ, ѡ҆ дѹшѝ, и҆ ѡ҆свѧти́тъ главѹ̀ свою̀ въ то́й де́нь, въ ѻ҆́ньже ѡ҆свѧти́сѧ гд҇ѹ, во дни҄ ѡ҆бѣ́та своегѡ̀.

¹²И҆ да приведе́тъ а҆́гнца є҆динолѣ́тна въ престѹпле́нїе, и҆ дні́е пре́жнїи да не бѹ́дѹтъ є҆мѹ̀ въ число̀, поне́же ѡ҆скверни́сѧ глава̀ ѡ҆бѣ́та є҆гѡ̀.

¹³И҆ се́й зако́нъ ѡ҆бѣща́вшагѡсѧ, въ ѻ҆́ньже де́нь сконча́етъ дни҄ ѡ҆бѣ́та своегѡ̀, да принесе́тъ са́мъ къ две́ремъ ски́нїи свидѣ́нїѧ:

¹⁴и҆ да приведе́тъ да́ръ сво́й гд҇ѹ а҆́гнца є҆динолѣ́тна непоро́чна є҆ди́наго во всесожже́нїе, и҆ а҆́гницѹ є҆динолѣ́тнѹ є҆ди́нѹ непоро́чнѹ грѣха̀ ра́ди, и҆ ѻ҆вна̀ є҆ди́наго непоро́чна во спасе́нїе,

¹⁵и҆ ко́шъ ѡ҆прѣсно́кѡвъ ѿ мѹкѝ пшени́чны, хлѣ́бы смѣ҄шаны съ є҆ле́емъ, и҆ ѡ҆прѣсно́ки пома҄заны є҆ле́емъ, и҆ же́ртвѹ и҆́хъ и҆ возлїѧ́нїе и҆́хъ.

¹⁶И҆ да принесе́тъ жре́цъ пред̾ гд҇а, и҆ да сотвори́тъ є҆́же грѣха̀ ра́ди є҆гѡ̀, и҆ всесожже́нїе є҆гѡ̀,

¹⁷и҆ ѻ҆вна̀ сотвори́тъ же́ртвѹ спасе́нїѧ гд҇ѹ на ко́шницѣ ѡ҆прѣсно́кѡвъ, и҆ да сотвори́тъ жре́цъ же́ртвѹ є҆гѡ̀ и҆ возлїѧ́нїе є҆гѡ̀.

¹⁸И҆ да ѡ҆брі́етъ ѡ҆бѣща́вый пред̾ две́рьми ски́нїи свидѣ́нїѧ главѹ̀ ѡ҆бѣ́та своегѡ̀, и҆ да возложи́тъ власы̀ на ѻ҆́гнь, и҆́же є҆́сть под̾ же́ртвою спасе́нїѧ:

¹⁹и҆ да во́зметъ жре́цъ ра́мо варе́но ѿ ѻ҆вна̀, и҆ хлѣ́бъ є҆ди́нъ ѡ҆прѣсно́чный ѿ ко́шницы, и҆ ѡ҆прѣсно́къ є҆ди́нъ, и҆ да возложи́тъ на рѹ́ки ѡ҆бѣща́вшемѹсѧ, по ѡ҆бри́тїи главы̀ є҆гѡ̀,

²⁰и҆ да принесе́тъ ѧ҆̀ жре́цъ возложе́нїе пред̾ гд҇а: ст҃о да бѹ́детъ жерцѹ̀ на грѹ́дехъ возложе́нїѧ и҆ на ра́мѣ ѹ҆ча́стїѧ: и҆ по си́хъ ѡ҆бѣща́выйсѧ да пїе́тъ вїно̀.

²¹Се́й зако́нъ ѡ҆бѣща́вшагѡсѧ, и҆́же а҆́ще ѡ҆бѣща́етъ да́ръ гд҇ѹ ѡ҆ ѡ҆бѣ́тѣ, кромѣ̀ си́хъ ѩ҆̀же ѡ҆брѧ́щетъ рѹка̀ є҆гѡ̀: по си́лѣ ѡ҆бѣ́та є҆гѡ̀, є҆го́же а҆́ще ѡ҆бѣща́етъ, по зако́нѹ ѡ҆чище́нїѧ.

²²И҆ речѐ гд҇ь къ мѡѷсе́ю, гл҃ѧ:

²³рцы̀ а҆арѡ́нѹ и҆ сынѡ́мъ є҆гѡ̀, глаго́лѧ: си́це благослови́те сы́ны ї҆и҃лєвы, глаго́люще и҆̀мъ:

²⁴да блг҇ви́тъ тѧ̀ гд҇ь и҆ сохрани́тъ тѧ̀:

²⁵да просвѣти́тъ гд҇ь лицѐ своѐ на тѧ̀ и҆ поми́лѹетъ тѧ̀:

²⁶да воздви́гнетъ гд҇ь лицѐ своѐ на тѧ̀ и҆ да́стъ тѝ ми́ръ:

²⁷и҆ да возложа́тъ и҆́мѧ моѐ на сы́ны ї҆и҃лєвы, и҆ а҆́зъ гд҇ь блг҇влю̀ ѧ҆̀.