Read Библия Церковнославянская Чи́сла 7 Bible Online

Чи́сла 7 - Библия Церковнославянская bible

Чи́сла 7

¹И҆ бы́сть въ де́нь въ ѻ҆́ньже сконча̀ мѡѷсе́й, ѩ҆́коже поста́вити ски́нїю, и҆ пома́за ю҆̀, и҆ ѡ҆свѧтѝ ю҆̀ и҆ всѧ҄ сосѹ́ды є҆ѧ̀, и҆ ѻ҆лта́рь и҆ всѧ҄ сосѹ́ды є҆гѡ̀, и҆ пома́за ѧ҆̀, и҆ ѡ҆свѧтѝ ѧ҆̀.

²И҆ приведо́ша кнѧ҄зи ї҆и҃лтестїи двана́десѧть, кнѧ҄зи домѡ́въ ѻ҆те́чествъ свои́хъ, сі́и кнѧ҄зи коегѡ́ждо пле́мене, сі́и предстоѧ́щїи над̾ соглѧ́данїемъ:

³и҆ приведо́ша да́ры своѧ҄ пред̾ гд҇а ше́сть колесни́цъ покры́тыхъ и҆ двана́десѧть волѡ́въ: колесни́цѹ є҆ди́нѹ ѿ двои́хъ кнѧзе́й, и҆ телца̀ ѿ коегѡ́ждо и҆ приведо́ша пред̾ ски́нїю.

⁴И҆ речѐ гд҇ь къ мѡѷсе́ю, гл҃ѧ:

⁵возмѝ ѿ ни́хъ, и҆ да бѹ́дѹтъ на дѣла̀ слѹжє́бнаѧ ски́нїи свидѣ́нїѧ: и҆ да́си ѧ҆̀ леѵі́тѡмъ, коемѹ́ждо по є҆гѡ̀ слѹже́нїю.

⁶И҆ взе́мъ мѡѷсе́й колєсни́цы и҆ волы̀, дадѐ ѧ҆̀ леѵі́тѡмъ:

⁷двѣ̀ колєсни́цы и҆ четы́ри волы̀ дадѐ сынѡ́мъ гирсѡ҄нимъ по слѹ́жбамъ и҆́хъ,

⁸и҆ четы́ри колєсни́цы и҆ ѻ҆́смь волѡ́въ дадѐ сынѡ́мъ мера҄рїнымъ по слѹ́жбамъ и҆́хъ, чрез̾ ї҆ѳама́ра, сы́на а҆арѡ́на жерца̀:

⁹и҆ сынѡ́мъ каа́ѳѡвымъ не дадѐ, ѩ҆́кѡ слѹ҄жбы свѧта́гѡ и҆мѣ́ютъ: на ра́менахъ да воздвиза́ютъ ѧ҆̀.

¹⁰И҆ принесо́ша кнѧ҄зи на ѡ҆бновле́нїе ѻ҆лтарѧ̀ въ де́нь, въ ѻ҆́ньже пома́за є҆го̀, и҆ принесо́ша кнѧ҄зи да́ры своѧ҄ пред̾ ѻ҆лта́рь.

¹¹И҆ речѐ гд҇ь къ мѡѷсе́ю: кнѧ́зь є҆ди́нъ на де́нь, кнѧ́зь на де́нь да принесѹ́тъ да́ры своѧ҄ на ѡ҆бновле́нїе ѻ҆лтарѧ̀.

¹²И҆ бѧ́ше приносѧ́й да́ръ сво́й въ пе́рвый де́нь наассѡ́нъ сы́нъ а҆мїнада́вль, кнѧ́зь пле́мене ї҆ѹ́дина:

¹³и҆ принесѐ да́ръ сво́й, блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

¹⁴ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

¹⁵телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

¹⁶и҆ козла̀ ѿ ко́зъ є҆ди́наго грѣха̀ ра́ди:

¹⁷и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ наассѡ́на сы́на а҆мїнада́влѧ.

¹⁸Во вторы́й де́нь принесѐ наѳанаи́лъ сы́нъ сѡга́ровъ, кнѧ́зь пле́мене ї҆ссаха́рѧ:

¹⁹и҆ принесѐ да́ръ сво́й, блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

²⁰ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

²¹телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

²²и҆ козла̀ ѿ ко́зъ є҆ди́наго грѣха̀ ра́ди:

²³и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ наѳанаи́ла сы́на сѡга́рова.

²⁴Въ тре́тїй де́нь кнѧ́зь сынѡ́въ завѹлѡ́нихъ, є҆лїа́въ сы́нъ хелѡ́новъ:

²⁵да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

²⁶ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

²⁷телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

²⁸и҆ козла̀ ѿ ко́зъ є҆ди́наго грѣха̀ ра́ди:

²⁹и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ є҆лїа́ва сы́на хелѡ́нова.

³⁰Въ четве́ртый де́нь кнѧ́зь сынѡ́въ рѹви́млихъ, є҆лїсѹ́ръ сы́нъ седїѹ́ровъ:

³¹да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

³²ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

³³телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

³⁴и҆ козла̀ ѿ ко́зъ є҆ди́наго грѣха̀ ра́ди:

³⁵и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ є҆лїсѹ́ра сы́на седїѹ́рова.

³⁶Въ пѧ́тый де́нь кнѧ́зь сынѡ́въ сѷмеѡ́нихъ, саламїи́лъ сы́нъ сѹрїсада́иль:

³⁷да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

³⁸ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

³⁹телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

⁴⁰и҆ козла̀ ѿ ко́зъ є҆ди́наго грѣха̀ ра́ди:

⁴¹и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ саламїи́ла сы́на сѹрїсада́илѧ.

⁴²Въ шесты́й де́нь кнѧ́зь сынѡ́въ га́довыхъ, є҆лїса́фъ сы́нъ рагѹи́левъ:

⁴³да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

⁴⁴ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

⁴⁵телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

⁴⁶и҆ козла̀ ѿ ко́зъ є҆ди́наго грѣха̀ ра́ди:

⁴⁷и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ є҆лїса́фа сы́на рагѹи́лева.

⁴⁸Въ седмы́й де́нь кнѧ́зь сынѡ́въ є҆фре́млихъ, є҆лїсама̀ сы́нъ є҆мїѹ́довъ:

⁴⁹да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

⁵⁰ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

⁵¹телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

⁵²и҆ козла̀ ѿ ко́зъ є҆ди́наго грѣха̀ ра́ди:

⁵³и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ є҆лїсамы̀ сы́на є҆мїѹ́дова.

⁵⁴Въ ѻ҆смы́й де́нь кнѧ́зь сынѡ́въ манассі́иныхъ, гамалїи́лъ сы́нъ фадассѹ́ровъ:

⁵⁵да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

⁵⁶ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

⁵⁷телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

⁵⁸и҆ козла̀ ѿ ко́зъ є҆ди́наго грѣха̀ ра́ди:

⁵⁹и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ гамалїи́ла сы́на фадассѹ́рова.

⁶⁰Въ девѧ́тый де́нь кнѧ́зь сынѡ́въ венїамі́нихъ, а҆вїда́нъ сы́нъ гадеѡ́нинъ:

⁶¹да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

⁶²ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

⁶³телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

⁶⁴и҆ козла̀ ѿ ко́зъ є҆ди́наго грѣха̀ ра́ди:

⁶⁵и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ а҆вїда́на, сы́на гадеѡ́нина.

⁶⁶Въ десѧ́тый де́нь кнѧ́зь сынѡ́въ да́новыхъ, а҆хїе́зеръ сы́нъ а҆мїсада́инъ:

⁶⁷да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

⁶⁸ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

⁶⁹телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

⁷⁰и҆ козла̀ ѿ ко́зъ є҆ди́наго грѣха̀ ра́ди:

⁷¹и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ а҆хїе́зера сы́на а҆мїсада́ина.

⁷²Въ первыйна́десѧть де́нь кнѧ́зь сынѡ́въ а҆си́ровыхъ, фагаїи́лъ сы́нъ є҆хра́нь:

⁷³да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

⁷⁴ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

⁷⁵телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

⁷⁶и҆ козла̀ ѿ ко́зъ є҆ди́наго грѣха̀ ра́ди:

⁷⁷и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ фагаїи́ла сы́на є҆хра́нѧ.

⁷⁸Во вторыйна́десѧть де́нь кнѧ́зь сынѡ́въ нефѳалі́млихъ, а҆хїре́й сы́нъ є҆на́нь:

⁷⁹да́ръ є҆гѡ̀ блю́до сре́брѧно є҆ди́но, вѣ́съ є҆гѡ̀ сто̀ и҆ три́десѧть сї҄кль: ча́шѹ є҆ди́нѹ сре́брѧнѹ се́дмьдесѧтъ сї҄кль, по сі́клю свѧто́мѹ: ѻ҆боѧ̀ пѡ́лны мѹкѝ пшени́чны спрѧ́жены съ є҆ле́емъ на же́ртвѹ:

⁸⁰ѳѷмїа́мникъ є҆ди́нъ десѧтѝ златни҄къ, по́лнъ ѳѷмїа́ма:

⁸¹телца̀ є҆ди́наго ѿ волѡ́въ, ѻ҆вна̀ є҆ди́наго, а҆́гнца є҆ди́наго є҆динолѣ́тна во всесожже́нїе:

⁸²и҆ козла̀ ѿ ко́зъ є҆ди́наго грѣха̀ ра́ди:

⁸³и҆ на же́ртвѹ спасе́нїѧ ю҆́ницы двѣ̀, ѻ҆внѡ́въ пѧ́ть, козлѡ́въ пѧ́ть, а҆́гницъ є҆динолѣ́тныхъ пѧ́ть: се́й да́ръ а҆хїре́а сы́на є҆на́нѧ.

⁸⁴Сїѐ ѡ҆бновле́нїе ѻ҆лтарѧ̀, въ ѻ҆́ньже де́нь пома́за є҆го̀, ѿ кнѧзе́й сынѡ́въ ї҆и҃левыхъ, блю́дъ сре́брѧныхъ двана́десѧть, ча́шъ сре́брѧныхъ двана́десѧть, ѳѷмїа́мникѡвъ златы́хъ двана́десѧть:

⁸⁵по ст҃ѹ и҆ три́десѧти сї҄кль въ ко́емждо блю́дѣ, и҆ по седми́десѧти сї҄кль ча́ша є҆ди́на: всегѡ̀ сребра̀ въ сосѹ́дѣхъ двѣ̀ ты́сѧщы четы́реста сі́клєвъ, по сі́клю свѧто́мѹ:

⁸⁶ѳѷмїа́мникѡвъ златы́хъ двана́десѧть по́лныхъ ѳѷмїа́ма, по десѧтѝ златни҄къ въ ко́емждо ѳѷмїа́мникѣ, по сі́клю свѧто́мѹ: всегѡ̀ зла́та въ ѳѷмїа́мницѣхъ сто̀ и҆ два́десѧть златни҄къ.

⁸⁷Всѣ́хъ говѧ́дъ во всесожже́нїе, телцѡ́въ двана́десѧть, ѻ҆внѡ́въ двана́десѧть, а҆́гнцєвъ є҆динолѣ́тныхъ двана́десѧть, и҆ жє́ртвы и҆́хъ и҆ возлїѧ҄нїѧ и҆́хъ: и҆ козлѡ́въ ѿ ко́зъ двана́десѧть, грѣха̀ ра́ди:

⁸⁸всѣ́хъ говѧ́дъ на же́ртвѹ спасе́нїѧ, ю҆́ницъ два́десѧть четы́ре, ѻ҆внѡ́въ шестьдесѧ́тъ, козлѡ́въ є҆динолѣ́тныхъ шестьдесѧ́тъ, а҆́гницъ є҆динолѣ́тныхъ непоро́чныхъ шестьдесѧ́тъ. Сїѐ ѡ҆бновле́нїе ѻ҆лтарѧ̀, по и҆сполне́нїи рѹ́къ є҆гѡ̀ и҆ по пома́занїи є҆гѡ̀.

⁸⁹Є҆гда̀ вхожда́ше мѡѷсе́й въ ски́нїю свидѣ́нїѧ глаго́лати є҆мѹ̀, и҆ ѹ҆слы́ша гла́съ гд҇а, гл҃юща къ немѹ̀ свы́ше ѡ҆чисти́лища, є҆́же є҆́сть над̾ ковче́гомъ свидѣ́нїѧ междѹ̀ двѣма̀ херѹвї҄мы: и҆ гл҃аше къ немѹ̀.