Read Библия Церковнославянская Мїхе́й 5 Bible Online

Мїхе́й 5 - Библия Церковнославянская bible

Мїхе́й 5

¹Нн҃ѣ ѡ҆гради́тсѧ дщѝ є҆фре́мова ѡ҆гражде́нїемъ, ра́ть ѹ҆чинѝ на вы̀, жезло́мъ поразѧ́тъ ѡ҆ че́люсть племе́нъ ї҆и҃левыхъ.

²И҆ ты̀, виѳлее́ме, до́ме є҆фра́ѳовъ, є҆да̀ ма́лъ є҆сѝ, є҆́же бы́ти въ ты́сѧщахъ ї҆ѹ́диныхъ; и҆з̾ тебє́ бо мнѣ̀ и҆зы́детъ старѣ́йшина, є҆́же бы́ти въ кнѧ́зѧ во ї҆и҃ли, и҆схо́ди же є҆гѡ̀ и҆з̾ нача́ла ѿ дні́й вѣ́ка.

³Сегѡ̀ ра́ди да́стъ ѧ҆̀, до вре́мене ражда́ющїѧ породи́тъ, и҆ про́чїи ѿ бра́тїи и҆́хъ ѡ҆братѧ́тсѧ къ сынѡ́мъ ї҆и҃лєвымъ.

⁴И҆ ста́нетъ, и҆ ѹ҆́зритъ, и҆ ѹ҆пасе́тъ па́ствѹ свою̀ крѣ́постїю гд҇ь, и҆ въ сла́вѣ и҆́мене гд҇а бг҃а своегѡ̀ пребѹ́дѹтъ: занѐ нн҃ѣ возвели́читсѧ да́же до конє́цъ землѝ.

⁵И҆ бѹ́детъ се́й ми́ръ, є҆гда̀ а҆ссѹ́ръ прїи́детъ на зе́млю ва́шѹ, и҆ є҆гда̀ взы́детъ на странѹ̀ ва́шѹ, и҆ воста́нѹтъ на́нь се́дмь па́стырей и҆ ѻ҆́смь ѩ҆́звъ человѣ́ческихъ,

⁶и҆ ѹ҆пасѹ́тъ а҆ссѹ́ра ѻ҆рѹ́жїемъ и҆ зе́млю неврѡ́довѹ ко́пїѧми є҆ѧ̀, и҆ и҆зба́витъ ѿ а҆ссѹ́ра, є҆гда̀ прїи́детъ на зе́млю ва́шѹ и҆ є҆гда̀ встѹ́питъ на предѣ́лы ва́шѧ.

⁷И҆ бѹ́детъ ѡ҆ста́нокъ ї҆а́кѡвль въ ѩ҆зы́цѣхъ средѣ̀ люді́й мно́гихъ, а҆́ки роса̀ ѿ гд҇а па́дающи и҆ ѩ҆́кѡ а҆́гнцы на ѕла́цѣ, ѩ҆́кѡ да не собере́тсѧ ни є҆ди́нъ, нижѐ постои́тъ въ сынѣ́хъ человѣ́ческихъ.

⁸И҆ бѹ́детъ ѡ҆ста́нокъ ї҆а́кѡвль въ ѩ҆зы́цѣхъ средѣ̀ люді́й мно́гихъ, а҆́ки ле́въ въ скотѣ́хъ въ дѹбра́вѣ и҆ ѩ҆́кѡ льви́чищь въ ста́дѣхъ ѻ҆́вчихъ, ѩ҆́коже є҆гда̀ про́йдетъ, и҆ ѿлѹчи́въ восхи́титъ, и҆ не бѹ́детъ и҆з̾има́ющагѡ.

⁹Вознесе́тсѧ рѹка̀ твоѧ̀ на ѡ҆скорблѧ́ющыѧ тѧ̀, и҆ всѝ вразѝ твоѝ потребѧ́тсѧ.

¹⁰И҆ бѹ́детъ въ то́й де́нь, гл҃етъ гд҇ь, потреблю̀ ко́ни твоѧ҄ и҆з̾ среды̀ твоеѧ̀ и҆ погѹблю̀ колєсни́цы твоѧ҄,

¹¹и҆ потреблю̀ гра́ды землѝ твоеѧ̀ и҆ разве́ргѹ всѧ҄ тверды҄ни твоѧ҄,

¹²и҆ ѿве́ргѹ волхвова҄нїѧ твоѧ҄ ѿ рѹкѹ̀ твоє́ю, и҆ волхвѹ́ющїи не бѹ́дѹтъ въ тебѣ̀:

¹³и҆ потреблю̀ и҆зва҄ѧннаѧ твоѧ҄ и҆ кѹмі́ры твоѧ҄ и҆з̾ среды̀ тебє̀, и҆ посе́мъ да не поклони́шисѧ дѣлѡ́мъ рѹ́къ твои́хъ:

¹⁴и҆ посѣкѹ̀ дѹбра҄вы ѿ среды̀ тебє̀ и҆ погѹблю̀ гра́ды твоѧ҄:

¹⁵и҆ сотворю̀ со гнѣ́вомъ и҆ съ ѩ҆́ростїю ме́сть ѩ҆зы́кѡмъ, поне́же не послѹ́шаша менѐ.