Read Библия Церковнославянская Мїхе́й 6 Bible Online

Мїхе́й 6 - Библия Церковнославянская bible

Мїхе́й 6

¹Слы́шите, ѩ҆̀же гл҃а гд҇ь: воста́ни, сѹди́сѧ съ гора́ми, и҆ да слы́шатъ хо́лми гла́съ тво́й.

²Слы́шите, го́ры, сѹ́дъ гд҇ень, и҆ дє́бри ѡ҆снова҄нїѧ землѝ, ѩ҆́кѡ сѹ́дъ гд҇ень къ лю́демъ є҆гѡ̀, и҆ со ї҆и҃лемъ прѣ́тисѧ и҆́мать.

³Лю́дїе моѝ, что̀ сотвори́хъ ва́мъ, и҆лѝ чи́мъ ѡ҆скорби́хъ ва́съ, и҆лѝ чи́мъ стѹжи́хъ ва́мъ; ѿвѣща́йте мѝ.

⁴Занѐ и҆зведо́хъ ва́съ и҆з̾ землѝ є҆гѵ́петскїѧ и҆ и҆з̾ до́мѹ рабо́ты и҆зба́вихъ ва́съ, и҆ посла́хъ пред̾ ва́ми мѡѷсе́а и҆ а҆арѡ́на и҆ марїа́мъ.

⁵Лю́дїе моѝ, помѧни́те ѹ҆̀бо, что̀ совѣща̀ на вы̀ вала́къ ца́рь мѡаві́тскїй, и҆ что̀ є҆мѹ̀ ѿвѣща̀ валаа́мъ сы́нъ веѡ́ровъ, ѿ сїті́ѧ до галга҄лъ; ѩ҆́кѡ да позна́етсѧ пра́вда гд҇нѧ.

⁶Въ че́мъ пости́гнѹ гд҇а, срѧ́щѹ бг҃а моего̀ вы́шнѧго; срѧ́щѹ ли є҆го̀ со всесожже́нїемъ, телцы҄ є҆динолѣ́тными;

⁷є҆да̀ прїи́метъ гд҇ь въ ты́сѧщахъ ѻ҆внѡ́въ, и҆лѝ во тма́хъ ко́злищъ тѹ́чныхъ; да́мъ ли пе́рвенцы моѧ҄ ѡ҆ нече́стїи мое́мъ, пло́дъ ѹ҆тро́бы моеѧ̀, за грѣхѝ дѹшѝ моеѧ̀;

⁸Возвѣсти́сѧ бо тебѣ̀, человѣ́че, что̀ добро̀, и҆лѝ чесогѡ̀ гд҇ь и҆́щетъ ѿ тебє̀, ра́звѣ є҆́же твори́ти сѹ́дъ и҆ люби́ти ми́лость и҆ гото́вѹ бы́ти є҆́же ходи́ти съ гд҇емъ бг҃омъ твои́мъ;

⁹Гла́съ гд҇ень гра́дѹ призове́тсѧ, и҆ сп҃се́тъ боѧ́щыѧсѧ и҆́мене є҆гѡ̀: послѹ́шай, пле́мѧ, и҆ кто̀ ѹ҆краси́тъ гра́дъ;

¹⁰Е҆да̀ ѻ҆́гнь и҆ до́мъ беззако́ннагѡ собира́ѧ и҆мѣ҄нїѧ беззакѡ́ннаѧ и҆ со ѹ҆кори́зною непра҄вды;

¹¹Е҆да̀ ѡ҆правди́тсѧ въ мѣ́рилѣ беззако́нникъ и҆ во вре́тищи мѣ́ры непра́выѧ,

¹²ѿ ни́хже бога́тство своѐ нече́стїѧ напо́лниша; и҆ живѹ́щїи въ не́й глаго́лахѹ лжѹ̀, и҆ ѧ҆зы́къ и҆́хъ вознесе́сѧ во ѹ҆стѣ́хъ и҆́хъ.

¹³И҆ а҆́зъ начнѹ̀ поража́ти тѧ̀ и҆ погѹблю̀ тѧ̀ во грѣсѣ́хъ твои́хъ.

¹⁴Ты̀ ѩ҆́сти бѹ́деши и҆ не насы́тишисѧ, и҆ поме́ркнетъ въ тебѣ̀, и҆ соврати́шисѧ, и҆ не спасе́шисѧ: и҆ є҆ли́цы а҆́ще и҆збѹ́дѹтъ, ѻ҆рѹ́жїю предадѧ́тсѧ.

¹⁵Ты̀ посѣ́еши, но не по́жнеши: ты̀ и҆згнете́ши ма́сличїе, но не пома́жешисѧ ма́сломъ: и҆ насадитѐ вїно̀, и҆ не и҆спїетѐ: и҆ поги́бнѹтъ зако́ны люді́й мои́хъ.

¹⁶И҆ храни́лъ є҆сѝ ѡ҆правда҄нїѧ замврї҄ина и҆ всѧ҄ дѣла̀ до́мѹ а҆хаа́влѧ, и҆ ходи́сте въ совѣ́тѣхъ и҆́хъ, ѩ҆́кѡ да преда́мъ тѧ̀ въ па́гѹбѹ, и҆ живѹ́щыѧ въ не́й во звизда́нїе, и҆ ѹ҆кѡри́зны люді́й прїи́мете.