Read Библия Церковнославянская Мїхе́й 7 Bible Online

Мїхе́й 7 - Библия Церковнославянская bible

Мїхе́й 7

¹?И҆́, лю́тѣ мнѣ̀! поне́же бы́хъ а҆́ки собира́ѧй сла́мѹ на жа́твѣ, и҆ ѩ҆́кѡ па́родокъ во ѡ҆б̾има́нїи вїногра́да не сѹ́щѹ гро́здїю, є҆́же ѩ҆́сти первоплѡ́днаѧ, ѩ҆̀же вожделѣ̀ дѹша̀ моѧ̀.

²?И҆́, лю́тѣ мнѣ̀, дѹшѐ! ѩ҆́кѡ поги́бе бл҃гочт҇и́вый ѿ землѝ, и҆ и҆справлѧ́ющагѡ въ человѣ́цѣхъ нѣ́сть: всѝ во кро́вехъ прѧ́тсѧ, кі́йждо бли́жнѧго своего̀ ѡ҆ѕлоблѧ́етъ ѡ҆ѕлобле́нїемъ,

³на ѕло̀ рѹ́ки своѧ҄ ѹ҆готовлѧ́ютъ: кнѧ́зь про́ситъ, и҆ сѹдїѧ̀ ми҄рнаѧ словеса̀ глаго́летъ, жела́нїе дѹшѝ є҆гѡ̀ є҆́сть: и҆ ѿимѹ̀ блага҄ѧ и҆́хъ,

⁴ѩ҆́кѡ мо́ль поѧда́ѧй, и҆ ходѧ́й по пра́виламъ въ де́нь стражбы̀. ?И҆́, лю́тѣ! ѹ҆̀, лю́тѣ! ѿмщє́нїѧ твоѧ҄ приспѣ́ша, нн҃ѣ бѹ́дѹтъ пла́чы и҆́хъ.

⁵Не вѣ́рите дрѹгѡ́мъ, ни надѣ́йтесѧ на старѣ҄йшины, и҆ ѿ сожи́телницы твоеѧ̀ храни́сѧ, є҆́же сказа́ти є҆́й что̀:

⁶поне́же сы́нъ безче́ститъ ѻ҆тца̀, дще́рь воста́нетъ на ма́терь свою̀ и҆ невѣ́ста на свекро́вь свою̀, вразѝ всѝ мѹ́жѹ дома́шнїи є҆гѡ̀.

⁷А҆́зъ же ко гд҇еви воззрю̀, потерплю̀ бг҃а сп҃са моего̀, ѹ҆слы́шитъ мѧ̀ бг҃ъ мо́й.

⁸Не ра́дѹйсѧ ѡ҆ мнѣ̀, вражде́бница моѧ̀, ѩ҆́кѡ падо́хъ, и҆ воста́нѹ: занѐ а҆́ще сѧ́дѹ во тмѣ̀, гд҇ь ѡ҆свѣти́тъ мѧ̀.

⁹Гнѣ́въ гд҇ень стерплю̀, ѩ҆́кѡ согрѣши́хъ є҆мѹ̀, до́ндеже ѡ҆правди́тъ прю̀ мою̀ и҆ сотвори́тъ сѹ́дъ мо́й: и҆ и҆зведе́тъ мѧ̀ на свѣ́тъ, и҆ ѹ҆зрю̀ пра́вдѹ є҆гѡ̀.

¹⁰И҆ ѹ҆́зритъ вражде́бница моѧ̀, и҆ ѡ҆блече́тсѧ въ стѹ́дъ глаго́лющаѧ ко мнѣ̀: гдѣ́ є҆сть гд҇ь бг҃ъ тво́й; Ѻ҆́чи моѝ воззрѧ́тъ на ню̀, нн҃ѣ бѹ́детъ въ попра́нїе а҆́ки ка́лъ на пѹте́хъ.

¹¹Де́нь глажде́нїѧ плі́нѳа: и҆зглажде́нїе твоѐ де́нь ѻ҆́ный, и҆ сотре́тъ зако́ны твоѧ҄ де́нь ѻ҆́ный.

¹²И҆ гра́ди твоѝ прїи́дѹтъ на поравне́нїе и҆ въ раздѣле́нїе а҆ссѷрі́йско, и҆ гра́ди твоѝ тве́рдїи въ раздѣле́нїе ѿ тѵ́ра да́же до рѣкѝ сѵ́рскїѧ, и҆ ѿ мо́рѧ да́же до мо́рѧ, и҆ ѿ горы̀ да́же до горы̀, дні́е воды̀ и҆ молвы̀.

¹³И҆ бѹ́детъ землѧ̀ въ па́гѹбѹ со живѹ́щими на не́й, ѿ плодѡ́въ начина́нїй и҆́хъ.

¹⁴Пасѝ лю́ди твоѧ҄ жезло́мъ твои́мъ, ѻ҆́вцы наслѣ́дїѧ твоегѡ̀, вселѧ́ющыѧсѧ є҆ди҄ны въ дѹбра́вѣ средѣ̀ карми́ла, попасѹ́тъ васані́тїдѹ и҆ галааді́тїдѹ, ѩ҆́коже дні́е вѣ́ка.

¹⁵И҆ по днє́мъ и҆схо́да твоегѡ̀ и҆з̾ є҆гѵ́пта ѹ҆́зрите чѹдє́снаѧ.

¹⁶Ѹ҆́зрѧтъ ѩ҆зы́цы и҆ ѹ҆срамѧ́тсѧ ѿ всеѧ̀ крѣ́пости своеѧ̀, рѹ́цѣ возложа́тъ на ѹ҆ста̀ своѧ҄, и҆ ѹ҆́ши и҆́хъ ѡ҆гло́хнѹтъ,

¹⁷поли́жѹтъ пе́рсть ѩ҆́кѡ ѕмі́еве плѣ́жѹще по землѝ, смѧтѹ́тсѧ во ѡ҆блеже́нїи свое́мъ: ѡ҆ гд҇ѣ бз҃ѣ на́шемъ ѹ҆жа́снѹтсѧ и҆ ѹ҆боѧ́тсѧ ѿ тебє̀.

¹⁸Кто̀ бг҃ъ ѩ҆́коже ты̀, ѿе́млѧй беззакѡ́нїѧ и҆ ѡ҆ставлѧ́ѧй нечє́стїѧ ѡ҆ста́нкѡмъ наслѣ́дїѧ своегѡ̀; и҆ не ѹ҆держа̀ гнѣ́ва своегѡ̀ во свидѣ́нїе, ѩ҆́кѡ воли́тель мл҇ти є҆́сть.

¹⁹То́й ѡ҆брати́тъ и҆ ѹ҆ще́дритъ ны̀, и҆ погрѹзи́тъ непра҄вды на́шѧ и҆ вве́ржетъ въ глѹбины҄ мѡрскі́ѧ всѧ҄ грѣхѝ на́шѧ,

²⁰да́стъ и҆́стинѹ ї҆а́кѡвѹ, (и҆) мл҇ть а҆враа́мѹ, ѩ҆́коже клѧ́лсѧ є҆сѝ ѻ҆тцє́мъ на́шымъ во дни҄ пє́рвыѧ.