Read Библия Церковнославянская Наѹ́мъ 2 Bible Online

Наѹ́мъ 2 - Библия Церковнославянская bible

Наѹ́мъ 2

¹Взы́де вдыха́ѧй въ лицѐ твоѐ, ѿе́млѧй ѿ ѡ҆скорбле́нїѧ: ѹ҆смотрѝ пѹ́ть, ѹ҆крѣпѝ чрє́сла, возмѹжа́й крѣ́постїю ѕѣлѡ̀:

²поне́же ѿвратѝ гд҇ь ѹ҆кори́знѹ ї҆а́кѡвлю, ѩ҆́коже ѹ҆кори́знѹ ї҆и҃левѹ: занѐ ѡ҆трѧса́ющїи ѡ҆трѧсо́ша ѧ҆̀ и҆ ло́зы и҆́хъ растли́ша.

³Ѻ҆рѹ҄жїѧ си́лы и҆́хъ ѿ человѣ҄къ, мѹ́жы си҄льныѧ и҆гра́ющыѧ во ѻ҆гнѝ: брѡзды̀ колесни́цъ и҆́хъ въ де́нь ѹ҆гото́ванїѧ є҆гѡ̀, и҆ кѡ́нницы возмѧтѹ́тсѧ на пѹте́хъ,

⁴и҆ смѧтѹ́тсѧ колєсни́цы и҆ сплетѹ́тсѧ на сто́гнахъ: ви́дъ и҆́хъ ѩ҆́кѡ свѣщы̀ ѻ҆́гнєнны, и҆ ѩ҆́кѡ мо́лнїѧ протека́ющаѧ.

⁵И҆ помѧнѹ́тсѧ старѣ҄йшины и҆́хъ, и҆ побѣ́гнѹтъ въ де́нь, и҆ и҆знемо́гѹтъ въ пѹтѝ свое́мъ, и҆ потща́тсѧ на забра҄ла є҆гѡ̀, и҆ ѹ҆гото́вѧтъ прє́днїѧ стражбы҄ своѧ҄.

⁶Врата̀ гра҄днаѧ ѿверзо́шасѧ, и҆ ца҄рства падо́ша, и҆ и҆мѣ́нїе ѿкры́сѧ.

⁷Сїѧ́ же восхожда́ше, и҆ рабы҄ни є҆ѧ̀ ведѧ́хѹсѧ, ѩ҆́кѡ голѹби҄цы воркѹ́ющѧ въ сердца́хъ свои́хъ:

⁸и҆ нїнеѵі́а, а҆́ки кѹпѣ́ль водна́ѧ во́ды є҆ѧ̀, и҆ ті́и бѣжа́ще не ста́ша, и҆ не бѣ̀ взира́ющагѡ.

⁹Расхища́хѹ сребро̀, расхища́хѹ зла́то, и҆ не бѧ́ше конца̀ и҆мѣ́нїѧ є҆ѧ̀: ѡ҆тѧготи́шасѧ па́че всѣ́хъ сосѹ́дѡвъ вожделѣ҄ннаѧ є҆ѧ̀.

¹⁰И҆стрѧсе́нїе и҆ вострѧсе́нїе, и҆ воскипѣ́нїе и҆ се́рдца сокрѹше́нїе, и҆ разслабле́нїе колѣ́нъ и҆ бѡлѣ́зни по всѣ҄мъ чре́слѡмъ, и҆ лицѐ всѣ́хъ, а҆́ки ѡ҆пале́нїе котла̀.

¹¹Гдѣ̀ є҆́сть вита́лище львѡ́въ и҆ па́жить сѹ́щаѧ льви́чищємъ; ка́мѡ и҆́де ле́въ, є҆́же влѣ́зти та́мѡ льви́чищѹ, и҆ не бѧ́ше ѹ҆страша́ющагѡ.

¹²Ле́въ восхи́ти довѡ́лнаѧ льви́чищємъ свои҄мъ и҆ ѹ҆давѝ льви́цамъ свои҄мъ, и҆ напо́лни лови́твы гнѣздо̀ своѐ и҆ вита́лище своѐ похище́нїѧ.

¹³Сѐ, а҆́зъ на тѧ̀, гл҃етъ гд҇ь вседержи́тель, и҆ пожгѹ̀ ды́момъ мно́жество твоѐ, и҆ львы̀ твоѧ҄ поѧ́стъ ѻ҆рѹ́жїе: и҆ потреблю̀ ѿ землѝ лови́твѹ твою̀, и҆ не ѹ҆слы́шатсѧ ктомѹ̀ дѣла̀ твоѧ҄.