Read Библия Церковнославянская Наѹ́мъ 3 Bible Online

Наѹ́мъ 3 - Библия Церковнославянская bible

Наѹ́мъ 3

¹Ѽ, гра́де крове́й, ве́сь лжи́вый, по́лнъ непра́вды! не ѡ҆сѧ́жетсѧ лови́тва.

²Гла́съ биче́й и҆ гла́съ трѹ́са коле́съ, и҆ конѧ̀ текѹ́ща и҆ колесни́цы шѹмѧ́щїѧ,

³и҆ ко́нника ѣ҆́дѹща, и҆ блиста́юща меча̀ и҆ блиста́ющихъ ѻ҆рѹ́жїй, и҆ мно́жества ѩ҆́звеныхъ и҆ тѧ́жкагѡ паде́нїѧ, и҆ не бѧ́ше конца̀ ѩ҆зы́кѡмъ є҆ѧ̀: и҆ и҆знемо́гѹтъ въ тѣлесѣ́хъ свои́хъ ѿ мно́жества блѹже́нїѧ.

⁴Блѹдни́ца добра̀ и҆ прїѧ́тна, нача́лница волхвова́нїй, продаю́щаѧ ѩ҆зы́ки во блѹже́нїи свое́мъ и҆ племена̀ въ чародѣѧ́нїихъ свои́хъ.

⁵Сѐ, а҆́зъ на тѧ̀, гл҃етъ гд҇ь бг҃ъ вседержи́тель, и҆ ѿкры́ю за҄днѧѧ твоѧ҄ къ лицѹ̀ твоемѹ̀, и҆ покажѹ̀ ѩ҆зы́кѡмъ срамотѹ̀ твою̀ и҆ ца́рствамъ безче́стїе твоѐ,

⁶и҆ возве́ргѹ на тѧ̀ ѡ҆гнѹше́нїе по нечистота́мъ твои҄мъ, и҆ положѹ́ тѧ въ при́тчѹ.

⁷И҆ бѹ́детъ, всѧ́къ ви́дѧй тѧ̀ сни́детъ съ тебє̀ и҆ рече́тъ: ѡ҆каѧ́ннаѧ нїнеѵі́а, кто̀ постене́тъ по не́й; ѿкѹ́дѹ взыщѹ̀ ѹ҆тѣше́нїе є҆́й;

⁸Ѹ҆гото́вити ча́сть, ѹ҆стро́ити стрѹнѹ̀, ѹ҆гото́вити ча́сть а҆ммѡ́нѹ, живѹ́щаѧ въ рѣка́хъ, вода̀ ѡ҆́крестъ є҆ѧ̀, є҆́йже нача́ло мо́ре, и҆ вода̀ забра҄ла є҆ѧ̀:

⁹и҆ є҆ѳїо́пїа крѣ́пость є҆ѧ̀ и҆ є҆гѵ́петъ, и҆ нѣ́сть конца̀ бѣ́гствѹ твоемѹ̀: и҆ фѹ́дъ и҆ лївѵ́ане бы́ша помѡ́щницы є҆ѧ̀.

¹⁰И҆ сїѧ̀ въ преселе́нїе по́йдетъ плѣ́нница, и҆ младе́нцы є҆ѧ̀ разбїю́тъ въ нача́лѣхъ всѣ́хъ пѹті́й є҆ѧ̀, и҆ ѡ҆ всѣ́хъ сла́вныхъ є҆ѧ̀ ве́ргѹтъ жрє́бїѧ, и҆ всѝ воевѡ́ды є҆ѧ̀ свѧ́жѹтсѧ пѹ҄ты.

¹¹И҆ ты̀ ѹ҆пїе́шисѧ и҆ бѹ́деши презрѣ́на, и҆ ты̀ сама̀ себѣ̀ взы́щеши по́мощи ѿ вра҄гъ.

¹²Всѧ҄ твердѣ҄ли твоѧ҄ ѩ҆́кѡ смокви́чїе стра́жѹ и҆мѹ́щее: а҆́ще поколе́блютсѧ, впадѹ́тъ во ѹ҆ста̀ ѩ҆дѹ́щагѡ.

¹³Сѐ, лю́дїе твоѝ, ѩ҆́кѡ жєны̀ въ тебѣ̀: врагѡ́мъ твои҄мъ ѡ҆творѧ́єма ѡ҆творѧ́тсѧ врата̀ землѝ твоеѧ̀, и҆ поѧ́стъ ѻ҆́гнь верєѝ твоѧ҄.

¹⁴Во́дѹ ѡ҆держа́нїѧ восхи́ти себѣ̀ сама̀ и҆ ѹ҆твердѝ твердѣ҄ли твоѧ҄: влѣ́зи въ бре́нїе и҆ попери́сѧ въ пле́вахъ, ѹ҆твердѝ па́че плі́нѳа.

¹⁵Та́мѡ поѧ́стъ тѧ̀ ѻ҆́гнь, потреби́тъ тѧ̀ ме́чь, поѧдѧ́тъ тѧ̀ а҆́ки прѹ́зи, и҆ ѡ҆тѧгча́еши а҆́ки мши́ца.

¹⁶Ѹ҆мно́жила є҆сѝ кѹ҄пли твоѧ҄ па́че ѕвѣ́здъ небе́сныхъ: мши҄цы ѹ҆стреми́шасѧ и҆ возлетѣ́ша.

¹⁷Возскочѝ а҆́ки прѹ́гъ смѣ́сникъ тво́й, а҆́ки а҆крі́да восходѧ́щаѧ на ѡ҆гра́дѹ въ де́нь стѹде́ный: со́лнце взы́де, и҆ ѿлетѣ̀, и҆ не позна́сѧ мѣ́сто є҆ѧ̀: лю́тѣ и҆̀мъ!

¹⁸Воздрема́шасѧ пастѹсѝ твоѝ, ца́рь а҆ссѷрі́йскъ ѹ҆спѝ си҄льныѧ твоѧ҄, воздвиго́шасѧ лю́дїе твоѝ на го́ры, и҆ не бѧ́ше прїе́млющагѡ.

¹⁹Нѣ́сть цѣльбы̀ сокрѹше́нїю твоемѹ̀, разгорѣ́сѧ ѩ҆́зва твоѧ̀: всѝ слы́шащїи вѣ́сть твою̀ воспле́щѹтъ рѹка́ми ѡ҆ тебѣ̀: поне́же на кого̀ не на́йде ѕло́ба твоѧ̀ всегда̀;