Read Библия Церковнославянская А҆ввакѹ́мъ 3 Bible Online

А҆ввакѹ́мъ 3 - Библия Церковнославянская bible

А҆ввакѹ́мъ 3

¹Моли́тва а҆ввакѹ́ма про҇ро́ка съ пѣ́снїю. Гд҇и, ѹ҆слы́шахъ слѹ́хъ тво́й и҆ ѹ҆боѧ́хсѧ:

²гд҇и, разѹмѣ́хъ дѣла̀ твоѧ҄ и҆ ѹ҆жасо́хсѧ: посредѣ̀ двою̀ живѡ́тнѹ позна́нъ бѹ́деши: внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, ѩ҆ви́шисѧ: внегда̀ смѹти́тисѧ дѹшѝ мое́й во гнѣ́вѣ, мл҇ть (твою̀) помѧне́ши.

³Бг҃ъ ѿ ю҆́га прїи́детъ, и҆ ст҃ы́й и҆з̾ горы̀ приѡсѣне́нныѧ ча́щи: покры̀ небеса̀ добродѣ́тель є҆гѡ̀, и҆ хвале́нїѧ є҆гѡ̀ и҆спо́лнь землѧ̀.

⁴И҆ сїѧ́нїе є҆гѡ̀ ѩ҆́кѡ свѣ́тъ бѹ́детъ: ро́зи въ рѹка́хъ є҆гѡ̀, и҆ положѝ любо́вь держа́внѹ крѣ́пости своеѧ̀.

⁵Пред̾ лице́мъ є҆гѡ̀ пред̾и́детъ сло́во, и҆ и҆зы́детъ на по́ле при ногѹ̀ є҆гѡ̀.

⁶Ста̀, и҆ подви́жесѧ землѧ̀: призрѣ̀, и҆ раста́ѧша ѩ҆зы́цы: стры́шасѧ го́ры нѹ́ждею, и҆ раста́ѧша хо́лми вѣ́чнїи, шє́ствїѧ вѣ́чнаѧ є҆гѡ̀,

⁷за трѹ́дъ ви́дѣша селє́нїѧ є҆ѳїѡ́пскаѧ, ѹ҆боѧ́тсѧ и҆ кро́вы землѝ мадїа́мскїѧ.

⁸Е҆да̀ въ рѣка́хъ прогнѣ́ваешисѧ, гд҇и; є҆да̀ въ рѣка́хъ ѩ҆́рость твоѧ̀; и҆лѝ въ мо́ри ѹ҆стремле́нїе твоѐ; ѩ҆́кѡ всѧ́деши на ко́ни твоѧ҄, и҆ ѩ҆жде́нїе твоѐ спасе́нїе.

⁹Налѧца́ѧ налѧче́ши лѹ́къ тво́й на ски́птры, гл҃етъ гд҇ь: рѣка́ми разсѧ́детсѧ землѧ̀.

¹⁰Ѹ҆́зрѧтъ тѧ̀ и҆ поболѧ́тъ лю́дїе, расточа́ѧ во́ды ше́ствїѧ є҆гѡ̀: дадѐ бе́здна гла́съ сво́й, высота̀ привидѣ҄нїѧ своѧ҄:

¹¹воздви́жесѧ со́лнце, и҆ лѹна̀ ста̀ въ чи́нѣ свое́мъ: во свѣ́тѣ стрѣ́лы твоѧ҄ по́йдѹтъ, въ блиста́нїи мо́лнїй ѻ҆рѹ́жїй твои́хъ.

¹²Преще́нїемъ ѹ҆ма́лиши зе́млю и҆ ѩ҆́ростїю низложи́ши ѩ҆зы́ки.

¹³И҆зше́лъ є҆сѝ во сп҇нїе люді́й твои́хъ, сп҇тѝ пома҄занныѧ твоѧ҄, вложи́лъ є҆сѝ во главы҄ беззако́нныхъ сме́рть, воздви́глъ є҆сѝ ѹ҆́зы да́же до вы́и въ коне́цъ:

¹⁴разсѣ́клъ є҆сѝ во и҆зстѹпле́нїи главы҄ си́льныхъ, сотрѧсѹ́тсѧ въ не́й: разве́рзѹтъ ѹ҆зды҄ своѧ҄ ѩ҆́кѡ снѣда́ѧй ни́щїй та́й.

¹⁵И҆ наве́лъ є҆сѝ на мо́ре ко́ни твоѧ҄, смѹща́ющыѧ во́ды мнѡ́ги.

¹⁶Сохрани́хсѧ, и҆ ѹ҆боѧ́сѧ се́рдце моѐ ѿ гла́са моли́твы ѹ҆сте́нъ мои́хъ, и҆ вни́де тре́петъ въ кѡ́сти моѧ҄, и҆ во мнѣ̀ смѧте́сѧ крѣ́пость моѧ̀: почі́ю въ де́нь ско́рби моеѧ̀, да взы́дѹ въ лю́ди прише́лствїѧ моегѡ̀.

¹⁷Занѐ смо́ковь не плодопринесе́тъ, и҆ не бѹ́детъ ро́да въ лоза́хъ: солже́тъ дѣ́ло ма́слинное, и҆ полѧ̀ не сотворѧ́тъ ѩ҆́ди: ѡ҆скѹдѣ́ша ѻ҆́вцы ѿ пи́щи, и҆ не бѹ́детъ волѡ́въ при ѩ҆́слехъ.

¹⁸А҆́зъ же ѡ҆ гд҇ѣ возра́дѹюсѧ, возвеселю́сѧ ѡ҆ бз҃ѣ сп҃сѣ мое́мъ.

¹⁹Гд҇ь бг҃ъ мо́й си́ла моѧ̀, и҆ ѹ҆чини́тъ но́зѣ моѝ на соверше́нїе, и҆ на высѡ́каѧ возво́дитъ мѧ̀, є҆́же побѣди́ти мѝ въ пѣ́сни є҆гѡ̀.