Read Библия Церковнославянская Софо́нїа 2 Bible Online

Софо́нїа 2 - Библия Церковнославянская bible

Софо́нїа 2

¹Собери́тесѧ и҆ свѧжи́тесѧ, ѩ҆зы́къ ненака́занный,

²пре́жде не́же бы́ти ва́мъ ѩ҆́коже цвѣ́тѹ мимоходѧ́щѹ въ де́нь, пре́жде не́же прїитѝ на вы̀ гнѣ́вѹ гд҇ню, пре́жде не́же прїитѝ на вы̀ дню̀ ѩ҆́рости гд҇ни.

³Взыщи́те гд҇а, всѝ смире́ннїи землѝ, сѹ́дъ содѣва́йте и҆ пра́вды взыщи́те, (взыщи́те кро́тости) и҆ ѿвѣща́йте ѧ҆̀, ѩ҆́кѡ да покры́етесѧ въ де́нь гнѣ́ва гд҇нѧ.

⁴Занѐ га́за расхище́на бѹ́детъ, и҆ а҆скалѡ́нъ во и҆зчезнове́нїе бѹ́детъ: и҆ а҆зѡ́тъ въ полѹ́дни ѿве́ржетсѧ, и҆ а҆ккарѡ́нъ и҆скорени́тсѧ.

⁵Го́ре живѹ́щымъ на ѹ҆́жи морстѣ́мъ, прише́лцы кри́тстїи: сло́во гд҇не на ва́съ, ханаа́не, землѐ и҆ноплеме́нникѡвъ, и҆ погѹблю́ вы ѿ жили́ща:

⁶и҆ бѹ́детъ кри́тъ па́жить стада́мъ и҆ ѡ҆гра́да ѻ҆вца́мъ,

⁷и҆ бѹ́детъ ѹ҆́же морско́е ѡ҆ста́вшымъ до́мѹ ї҆ѹ́дина: на ни́хъ пожирѹ́ютъ въ домѣ́хъ а҆скалѡ́нихъ, къ ве́черѹ вита́ти и҆́мѹтъ ѿ лица̀ сынѡ́въ ї҆ѹ́диныхъ, ѩ҆́кѡ присѣтѝ и҆̀хъ гд҇ь бг҃ъ и҆́хъ и҆ возвратѝ плѣ́нъ и҆́хъ.

⁸Слы́шахъ поношє́нїѧ мѡа҄влѧ и҆ ѹ҆кори҄зны сынѡ́въ а҆ммѡ́нихъ,ѡ҆ ни́хже поноша́хѹ лю́демъ мои҄мъ и҆ велича́хѹсѧ на предѣ́лы моѧ҄.

⁹Сегѡ̀ ра́ди живѹ̀ а҆́зъ, гл҃етъ гд҇ь си́лъ, бг҃ъ ї҆и҃левъ: занѐ мѡа́въ ѩ҆́кѡ содо́ма бѹ́детъ, и҆ сы́нове а҆ммѡ҄ни ѩ҆́кѡ гомо́рра, и҆ дама́скъ ѡ҆ста́вленъ ѩ҆́кѡ сто́гъ гѹме́нный и҆ разоре́нъ во вѣ́къ: и҆ про́чїи люді́й мои́хъ расхи́тѧтъ ѧ҆̀, и҆ ѡ҆ста́вшїи ѩ҆зы́ка моегѡ̀ наслѣ́дѧтъ и҆̀хъ.

¹⁰Сїѐ и҆̀мъ за досажде́нїе и҆́хъ, занѐ поноси́ша и҆ возвели́чишасѧ на лю́ди гд҇а вседержи́телѧ.

¹¹ѩ҆ви́тсѧ гд҇ь на ни́хъ и҆ потреби́тъ всѧ҄ бо́ги ѩ҆зы́кѡвъ земны́хъ: и҆ покло́нѧтсѧ є҆мѹ̀ кі́йждо ѿ мѣ́ста своегѡ̀, всѝ ѻ҆́строви ѩ҆зы́честїи.

¹²И҆ вы̀, мѹ́рини, ѩ҆́звени ѻ҆рѹ́жїемъ мои́мъ бѹ́дете.

¹³И҆ простре́тъ рѹ́кѹ свою̀ на сѣ́веръ и҆ погѹби́тъ а҆ссѷрі́анина, и҆ положи́тъ нїнеѵі́ю во и҆зчезнове́нїе безво́дно, ѩ҆́кѡ пѹсты́ню:

¹⁴и҆ пожирѹ́ютъ посредѣ̀ є҆ѧ̀ стада̀ и҆ всѝ ѕвѣ́рїе земні́и, и҆ хамелео́ны и҆ є҆́жеве во гнѣ́здахъ є҆ѧ̀ вогнѣздѧ́тсѧ: и҆ ѕвѣ́рїе возвы́ютъ въ разсѣ́линахъ є҆ѧ̀, и҆ вра́нове во вратѣ́хъ є҆ѧ̀, занѐ ке́дръ возноше́нїе є҆ѧ̀.

¹⁵Се́й гра́дъ презо́рливый, живѧ́й на ѹ҆пова́нїи, глаго́лѧй въ се́рдцы свое́мъ: а҆́зъ є҆́смь, и҆ нѣ́сть по мнѣ̀ є҆щѐ: ка́кѡ бы́сть во и҆зчезнове́нїе, па́жить ѕвѣрє́мъ; всѧ́къ мимоходѧ́й сквозѣ̀ є҆го̀ позви́ждетъ и҆ воздви́гнетъ рѹцѣ̀ своѝ.