Read Библия Церковнославянская А҆гге́й 2 Bible Online

А҆гге́й 2 - Библия Церковнославянская bible

А҆гге́й 2

¹Въ два́десѧть четве́ртый де́нь мц҇а шеста́гѡ, во второ́е лѣ́то, при да́рїи царѝ,

²въ седмы́й мц҇ъ, въ два́десѧть пе́рвый мц҇а, гл҃а гд҇ь рѹко́ю а҆гге́а про҇ро́ка гл҃ѧ:

³рцы̀ нн҃ѣ къ зорова́велю салаѳїи́левѹ ѿ колѣ́на ї҆ѹ́дова и҆ ко ї҆исѹ́сѹ сы́нѹ ї҆ѡседе́ковѹ, ї҆ере́ю вели́комѹ, и҆ ко всѣ҄мъ про́чїимъ лю́демъ, глаго́лѧ:

⁴кто̀ ѿ ва́съ, и҆́же ви́дѣ хра́мъ се́й въ сла́вѣ є҆гѡ̀ пре́жней; и҆ ка́кѡ вы̀ ви́дите є҆го̀ нн҃ѣ ѩ҆́коже не сѹ́ща пред̾ ва́ми;

⁵И҆ нн҃ѣ ѹ҆крѣплѧ́йсѧ, зорова́велю, гл҃етъ гд҇ь, и҆ ѹ҆крѣплѧ́йсѧ, ї҆исѹ́се, сы́не ї҆ѡседе́ковъ, ї҆ере́ю вели́кїй, и҆ да ѹ҆крѣплѧ́ютсѧ всѝ лю́дїе землѝ, гл҃етъ гд҇ь (вседержи́тель), и҆ твори́те: занѐ а҆́зъ съ ва́ми є҆́смь, гл҃етъ гд҇ь вседержи́тель:

⁶сло́во, є҆́же завѣща́хъ съ ва́ми, є҆гда̀ и҆сходи́сте и҆з̾ землѝ є҆гѵ́петскїѧ, и҆ дх҃ъ мо́й настои́тъ посредѣ̀ ва́съ: дерза́йте, занѐ си́це гл҃етъ гд҇ь вседержи́тель:

⁷є҆щѐ є҆ди́ною а҆́зъ потрѧсѹ̀ не́бомъ и҆ земле́ю, и҆ мо́ремъ и҆ сѹ́шею,

⁸и҆ сотрѧсѹ̀ всѧ҄ ѩ҆зы́ки, и҆ прїи́дѹтъ и҆збра҄ннаѧ всѣ́хъ ѩ҆зы́кѡвъ: и҆ и҆спо́лню хра́мъ се́й сла́вы, гл҃етъ гд҇ь вседержи́тель.

⁹Моѐ сребро̀ и҆ моѐ зла́то, гл҃етъ гд҇ь вседержи́тель:

¹⁰занѐ ве́лїѧ бѹ́детъ сла́ва хра́ма сегѡ̀ послѣ́днѧѧ па́че пе́рвыѧ, гл҃етъ гд҇ь вседержи́тель: и҆ на мѣ́стѣ се́мъ да́мъ ми́ръ, гл҃етъ гд҇ь вседержи́тель, и҆ ми́ръ дѹшѝ въ снабдѣ́нїе всѧ́комѹ зи́ждѹщемѹ, є҆́же возста́вити це́рковь сїю̀.

¹¹Въ два́десѧть четве́ртый девѧ́тагѡ мц҇а, во второ́е лѣ́то при да́рїи царѝ, бы́сть сло́во гд҇не ко а҆гге́ю про҇ро́кѹ гл҃ѧ:

¹²си́це гл҃етъ гд҇ь вседержи́тель: вопросѝ ї҆ере́євъ зако́на глаго́лѧ:

¹³а҆́ще прїи́метъ человѣ́къ мѧ́со ст҃о вскра́й ри́зы своеѧ̀, и҆ ко́снетсѧ кра́й ри́зы є҆гѡ̀ хлѣ́ба, и҆лѝ ва́рива, и҆лѝ вїна̀, и҆лѝ ма́сла, и҆лѝ всѧ́кагѡ бра́шна, є҆да̀ ѡ҆ст҃и́тсѧ; И҆ ѿвѣща́ша свѧще́нницы и҆ рѣ́ша: нѝ.

¹⁴И҆ речѐ а҆гге́й: а҆́ще прико́снетсѧ ѡ҆скверне́ный и҆лѝ нечи́стый дѹше́ю всѧ́комѹ си́хъ, є҆да̀ ѡ҆скверни́тсѧ; И҆ ѿвѣща́ша ї҆ере́є и҆ рѣ́ша: ѡ҆скверни́тсѧ.

¹⁵И҆ ѿвѣща̀ а҆гге́й и҆ речѐ: си́це лю́дїе сі́и, и҆ си́це ѩ҆зы́къ се́й предо мно́ю, гл҃етъ гд҇ь, и҆ си́це всѧ҄ дѣла̀ рѹ́къ и҆́хъ: и҆ и҆́же а҆́ще прибли́житсѧ та́мѡ, ѡ҆скверни́тсѧ за прїѧ҄тїѧ и҆́хъ ѹ҆́трєннѧѧ, поболѧ́тъ ѿ лица̀ лѹка́вствъ свои́хъ, и҆ ненави́дѣсте во вратѣ́хъ ѡ҆блича́ющаго.

¹⁶И҆ нн҃ѣ положи́те на сердца́хъ ва́шихъ ѿ днѐ сегѡ̀ и҆ вы́ше, пре́жде не́же положи́ти ка́мень на ка́мени въ хра́мѣ гд҇ни.

¹⁷Кто̀ бы́сте, є҆гда̀ влага́сте въ мѣ́хъ ѩ҆чме́не два́десѧть са҄тъ, и҆ бы́ша ѩ҆чме́не де́сѧть са҄тъ; и҆ входи́сте въ подточи́лїе че́рпати пѧтьдесѧ́тъ мѣ́ръ, и҆ бы́ша два́десѧть.

¹⁸Порази́хъ вы̀ непло́дїемъ и҆ вѣтротлѣ́нїемъ и҆ гра́домъ всѧ҄ дѣла̀ рѹ́къ ва́шихъ, и҆ не ѡ҆брати́стесѧ ко мнѣ̀, гл҃етъ гд҇ь.

¹⁹Ѹ҆стро́йте же сердца̀ ва҄ша ѿ сегѡ̀ днѐ и҆ да́лѣе, ѿ два́десѧть четве́ртагѡ днѐ девѧ́тагѡ мц҇а и҆ ѿ днѐ, въ ѻ҆́ньже ѡ҆снова́сѧ це́рковь гд҇нѧ: положи́те въ сердца́хъ ва́шихъ,

²⁰а҆́ще є҆щѐ позна́етсѧ на гѹмнѣ̀, и҆ а҆́ще є҆щѐ вїногра́дъ, и҆ смѡ́кви, и҆ ѩ҆́блонь, и҆ древа̀ ма҄сличнаѧ не творѧ҄щаѧ плода̀; ѿ днѐ сегѡ̀ блг҇влю̀.

²¹И҆ бы́сть сло́во гд҇не втори́цею ко а҆гге́ю про҇ро́кѹ въ два́десѧть четве́ртый мц҇а гл҃ѧ:

²²рцы̀ къ зорова́велю сы́нѹ салаѳїи́левѹ ѿ колѣ́на ї҆ѹ́дова глаго́лѧ: а҆́зъ потрѧсѹ̀ не́бомъ и҆ земле́ю, и҆ мо́ремъ и҆ сѹ́шею,

²³и҆ превращѹ̀ престо́лы царе́й, и҆ потреблю̀ си́лѹ царе́й ѩ҆зы́ческихъ, и҆ превращѹ̀ колєсни́цы и҆ вса́дники, и҆ сни́дѹтъ ко́ни и҆ вса́дницы и҆́хъ, кі́йждо во ѻ҆рѹ́жїи на бра́та своего̀.

²⁴Въ то́й де́нь, гл҃етъ гд҇ь вседержи́тель, прїимѹ́ тѧ, зорова́велю салаѳїи́левъ, ра́бе мо́й, гл҃етъ гд҇ь, и҆ положѹ́ тѧ ѩ҆́кѡ печа́ть, поне́же тѧ̀ и҆збра́хъ, гл҃етъ гд҇ь вседержи́тель.