Read Библия Церковнославянская Заха́рїа 10 Bible Online

Заха́рїа 10 - Библия Церковнославянская bible

Заха́рїа 10

¹Проси́те ѿ гд҇а дождѧ̀ во вре́мѧ ра́ннѧгѡ и҆ по́зднѧгѡ: гд҇ь сотворѝ привидѣ҄нїѧ, и҆ до́ждь зи́менъ да́стъ и҆̀мъ, комѹ́ждо ѕла́къ на селѣ̀.

²Занѐ провѣща́ющїи глаго́лаша трѹды̀, и҆ вражби́телїе видѣ҄нїѧ лѡ́жна и҆ сѡ́нїѧ лжи҄ва глаго́лахѹ, сѹ́етными ѹ҆тѣша́хѹ: сегѡ̀ ра́ди и҆зсхо́ша ѩ҆́кѡ ѻ҆́вцы, и҆ ѡ҆ѕло́блени бы́ша, поне́же не бѣ̀ и҆зцѣле́нїѧ.

³На па́стырей прогнѣ́васѧ ѩ҆́рость моѧ̀, и҆ на а҆́гнцы посѣщѹ̀: и҆ посѣти́тъ гд҇ь бг҃ъ вседержи́тель ста́до своѐ, до́мъ ї҆ѹ́динъ, и҆ ѹ҆чини́тъ ѧ҆̀ а҆́ки конѧ̀ благолѣ́пна своего̀ во бра́ни.

⁴И҆ ѿ негѡ̀ призрѣ̀, и҆ ѿ негѡ̀ ѹ҆чинѝ, и҆ ѿ негѡ̀ лѹ́къ въ дѹ́сѣ ѩ҆́рости, и҆ ѿ негѡ̀ и҆зы́детъ всѧ́къ и҆згонѧ́ѧй въ то́мъ.

⁵И҆ бѹ́дѹтъ ѩ҆́кѡ ра́тницы попира́юще бре́нїе на пѹте́хъ во бра́ни, и҆ ѡ҆полча́тсѧ, ѩ҆́кѡ гд҇ь съ ни́ми, и҆ постыдѧ́тсѧ вса́дницы ко́ннїи.

⁶И҆ ѹ҆крѣплю̀ до́мъ ї҆ѹ́довъ и҆ до́мъ ї҆ѡ́сифовъ сп҃сѹ̀, и҆ вселю̀ ѧ҆̀, поне́же возлюби́хъ ѧ҆̀, и҆ бѹ́дѹтъ а҆́ки бы не ѿврати́хъ и҆́хъ: занѐ а҆́зъ гд҇ь бг҃ъ и҆́хъ и҆ ѹ҆слы́шѹ ѧ҆̀.

⁷И҆ бѹ́дѹтъ ѩ҆́кѡ ра́тницы є҆фре́мѡвы, и҆ возра́дѹетсѧ се́рдце и҆́хъ а҆́ки ѿ вїна̀: и҆ ча҄да и҆́хъ ѹ҆ви́дѧтъ и҆ возвеселѧ́тсѧ, и҆ возра́дѹетсѧ се́рдце и҆́хъ ѡ҆ гд҇ѣ.

⁸Возвѣщѹ̀ и҆̀мъ и҆ прїимѹ̀ ѧ҆̀, занѐ и҆скѹплю̀ и҆́хъ, и҆ ѹ҆мно́жатсѧ, ѩ҆́коже бѧ́хѹ мно́зи:

⁹и҆ всѣ́ю ѧ҆̀ въ лю́дехъ, и҆ да́льнїи помѧнѹ́тъ мѧ̀, и҆ воспита́ютъ ча҄да своѧ҄, и҆ ѡ҆братѧ́тсѧ:

¹⁰и҆ возвращѹ̀ ѧ҆̀ ѿ землѝ є҆гѵ́петскїѧ и҆ ѿ а҆ссѷрі́анъ прїимѹ̀ ѧ҆̀, и҆ въ галааді́тъ и҆ въ лїва́нъ введѹ̀ ѧ҆̀, и҆ не и҆́мать ѡ҆ста́ти ѿ ни́хъ ни є҆ди́нъ.

¹¹И҆ про́йдѹтъ мо́ремъ ѹ҆́зкимъ и҆ поразѧ́тъ въ мо́ри вѡ́лны, и҆ и҆зсѧ́кнѹтъ всѧ҄ глѹбины҄ рѣчны҄ѧ, и҆ ѿи́метсѧ всѧ́ко досажде́нїе а҆ссѷрі́йско, и҆ ски́птръ є҆гѵ́петскъ ѿи́метсѧ.

¹²И҆ ѹ҆крѣплю̀ ѧ҆̀ ѡ҆ гдѣ̀ бз҃ѣ и҆́хъ, и҆ ѡ҆ и҆́мени є҆гѡ̀ восхва́лѧтсѧ, гл҃етъ гд҇ь.