Read Библия Церковнославянская Заха́рїа 11 Bible Online

Заха́рїа 11 - Библия Церковнославянская bible

Заха́рїа 11

¹Разве́рзи, лїва́не, двє́ри твоѧ҄, и҆ да поѧ́стъ ѻ҆́гнь ке́дры твоѧ҄:

²да плачево́пльствитъ пі́тѷсъ, занѐ падѐ ке́дръ, ѩ҆́кѡ вельмѡ́жи вельмѝ ѡ҆бѣднѣ́ша. Восплачево́пльствите, дѹ́би васанїті́дстїи, ѩ҆́кѡ посѣче́сѧ дѹбра́ва насажде́ннаѧ.

³Гла́съ пла́чѹщихъ па́стырей, ѩ҆́кѡ возбѣ́дствова вели́чїе и҆́хъ: гла́съ рыка́ющихъ львѡ́въ, ѩ҆́кѡ ѡ҆ѕло́блено бы́сть шата́нїе ї҆ѻрда́ново.

⁴Си́це гл҃етъ гд҇ь вседержи́тель: паси́те ѻ҆́вцы заколе́нїѧ,

⁵ѩ҆̀же стѧжа́вшїи закала́хѹ и҆ не раскаѧва́хѹсѧ, и҆ продаю́щїи ѧ҆̀ глаго́лахѹ: блг҇ве́нъ гд҇ь, и҆ ѡ҆богати́хомсѧ: и҆ па́стырїе и҆́хъ не печа́хѹсѧ ни чи́мже ѡ҆ ни́хъ.

⁶Сегѡ̀ ра́ди не пощаждѹ̀ ктомѹ̀ на живѹ́щихъ на землѝ, гл҃етъ гд҇ь: и҆ сѐ, а҆́зъ преда́мъ человѣ́ки, коего́ждо въ рѹ́цѣ и҆́скреннемѹ є҆гѡ̀ и҆ въ рѹ́цѣ царю̀ своемѹ̀: и҆ и҆зсѣкѹ́тъ зе́млю, и҆ не и҆́мамъ и҆з̾ѧ́ти ѿ рѹкѝ и҆́хъ.

⁷И҆ ѹ҆пасѹ̀ ѻ҆́вцы заколе́нїѧ въ землѝ ханаа́ни: и҆ прїимѹ̀ себѣ̀ два̀ жезла҄, є҆ди́наго нареко́хъ добро́тѹ, а҆ дрѹга́го нареко́хъ ѹ҆́же, и҆ ѹ҆пасѹ̀ ѻ҆́вцы.

⁸И҆ погѹблю̀ трѝ па҄стыри въ мц҇ъ є҆ди́нъ, и҆ ѡ҆тѧгча́етъ дѹша̀ моѧ̀ на нѧ̀: и҆́бо дѹ́ши и҆́хъ рыка́хѹ на мѧ̀.

⁹И҆ рѣ́хъ: не и҆́мамъ пастѝ ва́съ: ѹ҆мира́ющее да ѹ҆́мретъ, и҆ и҆зчеза́ющее да и҆зче́знетъ, и҆ прѡ́чаѧ да поѧ́стъ кі́йждо пло́ть бли́жнѧгѡ своегѡ̀.

¹⁰И҆ прїимѹ̀ же́злъ мо́й до́брый и҆ ѿве́ргѹ є҆го̀ є҆́же разори́ти завѣ́тъ мо́й, є҆го́же завѣща́хъ ко всѣ҄мъ лю́демъ:

¹¹и҆ разори́тсѧ въ де́нь ѻ҆́ный, и҆ ѹ҆разѹмѣ́ютъ ханане́є ѻ҆́вцы храни҄мыѧ мнѣ̀, занѐ сло́во гд҇не є҆́сть.

¹²И҆ рекѹ̀ къ ни҄мъ: а҆́ще добро̀ пред̾ ва́ми є҆́сть, дади́те мздѹ̀ мою̀, и҆лѝ ѿрецы́тесѧ. И҆ поста́виша мздѹ̀ мою̀ три́десѧть сре́брєникъ.

¹³И҆ речѐ гд҇ь ко мнѣ̀: вложѝ ѧ҆̀ въ горни́ло и҆ смотрѝ, а҆́ще и҆скѹше́но є҆́сть, и҆́мже ѡ҆́бразомъ и҆скѹше́нъ бы́хъ ѡ҆ ни́хъ. И҆ прїѧ́хъ три́десѧть сре́брєникъ и҆ вложи́хъ и҆̀хъ въ хра́мъ гд҇ень въ горни́ло.

¹⁴И҆ ѿверго́хъ же́злъ вторы́й ѹ҆́же, є҆́же разори́ти завѣ́тъ и҆́же посредѣ̀ ї҆ѹ́ды и҆ посредѣ̀ ї҆и҃лѧ.

¹⁵И҆ речѐ гд҇ь ко мнѣ̀: є҆щѐ прїимѝ себѣ̀ сосѹ́ды па҄стырски, па́стырѧ неискѹ́сна:

¹⁶занѐ, сѐ, а҆́зъ воздви́гнѹ па́стырѧ на зе́млю: погиба́ющаго не посѣти́тъ и҆ расточе́ннаго не и҆́мать взыска́ти, и҆ сокрѹше́ннаго не и҆́мать и҆зцѣли́ти и҆ здра́ваго не и҆́мать напра́вити, и҆ мѧса̀ и҆збра́нныхъ поѧ́стъ и҆ глє́зны и҆́хъ и҆зві́етъ.

¹⁷Ѽ, пасѹ́щїи сѹ́єтнаѧ и҆ ѡ҆ста́вльшїи ѻ҆ве́цъ! ме́чь на мы́шцѹ є҆гѡ̀ и҆ на ѻ҆́ко є҆мѹ̀ десно́е: мы́шца є҆гѡ̀ и҆зсыха́ющи и҆́зсхнетъ, и҆ ѻ҆́ко є҆мѹ̀ десно́е ѡ҆слѣпа́ѧ ѡ҆слѣ́пнетъ.