Read Библия Церковнославянская Заха́рїа 14 Bible Online

Заха́рїа 14 - Библия Церковнославянская bible

Заха́рїа 14

¹Сѐ, дні́е гд҇ни грѧдѹ́тъ, и҆ раздѣлѧ́тсѧ коры҄сти твоѧ҄ въ тебѣ̀:

²и҆ соберѹ̀ всѧ҄ ѩ҆зы́ки на ї҆ер҇ли́мъ въ бра́нь, и҆ плѣни́тсѧ гра́дъ, и҆ расхи́тѧтсѧ до́мове, и҆ жєны̀ ѡ҆сквернѧ́тсѧ: и҆ и҆зы́детъ по́лъ гра́да въ плѣне́нїе, а҆ ѡ҆ста́нокъ люді́й мои́хъ не потребѧ́тсѧ ѿ гра́да.

³И҆ и҆зы́детъ гд҇ь и҆ ѡ҆полчи́тсѧ на ѩ҆зы́ки ѡ҆́ны, ѩ҆́коже де́нь ѡ҆полче́нїѧ є҆гѡ̀ въ де́нь бра́ни.

⁴И҆ ста́нѹтъ но́зѣ є҆гѡ̀ въ де́нь ѡ҆́нъ на горѣ̀ є҆леѡ́нстѣй, ѩ҆́же є҆́сть прѧ́мѡ ї҆ер҇ли́мѹ на восто́къ: и҆ раздѣли́тсѧ гора̀ є҆леѡ́нскаѧ, по́лъ є҆ѧ̀ къ восто́кѡмъ и҆ по́лъ є҆ѧ̀ къ мо́рю, про́пасть ве́лїѧ ѕѣлѡ̀: и҆ ѹ҆клони́тсѧ по́лъ горы̀ на сѣ́веръ и҆ по́лъ є҆ѧ̀ на ю҆́гъ:

⁵и҆ засы́плетсѧ де́брь го́ръ мои́хъ, и҆ прильпне́тъ де́брь го́рнѧѧ да́же до а҆саи́ла и҆ напо́лнитсѧ, ѩ҆́коже напо́лнисѧ ѿ лица̀ трѹ́са во дне́хъ ѻ҆зі́и царѧ̀ ї҆ѹ́дова: и҆ прїи́детъ гд҇ь бг҃ъ мо́й, и҆ всѝ ст҃і́и съ ни́мъ.

⁶И҆ бѹ́детъ въ де́нь ѡ҆́нъ, не бѹ́детъ свѣ́тъ, но зима̀ и҆ мра́зъ:

⁷и҆ бѹ́детъ де́нь є҆ди́нъ, и҆ де́нь то́й зна́емь бѹ́детъ гд҇еви, и҆ не де́нь и҆ не но́щь, и҆ при ве́черѣ бѹ́детъ свѣ́тъ.

⁸И҆ въ де́нь ѡ҆́нъ и҆зы́детъ вода̀ жива̀ и҆з̾ ї҆ер҇ли́ма, по́лъ є҆ѧ̀ въ мо́ре пе́рвое и҆ по́лъ є҆ѧ̀ въ мо́ре послѣ́днее: и҆ въ жа́твѹ и҆ въ ве́снѹ бѹ́детъ та́кѡ.

⁹И҆ бѹ́детъ гд҇ь въ цр҃ѧ̀ по все́й землѝ: въ де́нь ѡ҆́нъ бѹ́детъ гд҇ь є҆ди́нъ, и҆ и҆́мѧ є҆гѡ̀ є҆ди́но,

¹⁰ѡ҆бходѧ̀ всю̀ зе́млю и҆ пѹсты́ню, ѿ гаваѝ и҆ до реммѡ́на, на ю҆́гъ ї҆ер҇ли́мѹ: и҆ вознесе́тсѧ на мѣ́стѣ и҆ пребѹ́детъ ѿ вра́тъ венїамі́нихъ до мѣ́ста вра́тъ пе́рвыхъ, да́же до вра́тъ ѹ҆го́лныхъ и҆ до столпа̀ а҆намеи́лѧ и҆ до подточи́лїѧ царе́ва.

¹¹И҆ вселѧ́тсѧ въ не́мъ, и҆ а҆на́ѳема не бѹ́детъ ктомѹ̀, и҆всели́тсѧ ї҆ер҇ли́мъ надѣ́ѧйсѧ.

¹²И҆ сїѐ бѹ́детъ паде́нїе, и҆́мже и҆зсѣче́тъ гд҇ь всѧ҄ лю́ди, є҆ли́цы воева́ша на ї҆ер҇ли́мъ: и҆ста́ютъ плѡ́ти и҆́хъ стоѧ́щихъ на нога́хъ свои́хъ, и҆ ѻ҆чеса̀ и҆̀мъ и҆стекѹ́тъ и҆з̾ ѡ҆бо́чїй и҆́хъ, и҆ ѧ҆зы́къ и҆́хъ и҆ста́етъ во ѹ҆стѣ́хъ и҆́хъ.

¹³И҆ бѹ́детъ въ де́нь ѡ҆́нъ ѹ҆́жасъ гд҇ень ве́лїй на ни́хъ: и҆ и҆́мѹтсѧ кі́йждо за рѹ́кѹ бли́жнѧгѡ своегѡ̀, и҆ соплете́тсѧ рѹка̀ є҆гѡ̀ къ рѹцѣ̀ бли́жнѧгѡ своегѡ̀.

¹⁴И҆ ї҆ѹ́да ѡ҆полчи́тсѧ во ї҆ер҇ли́мѣ и҆ собере́тъ крѣ́пость всѣ́хъ люді́й ѡ҆́крестъ, зла́то и҆ сребро̀ и҆ ри҄зы во мно́жество ѕѣлѡ̀.

¹⁵И҆ сїѐ бѹ́детъ паде́нїе ко́нємъ и҆ мскѡ́мъ, и҆ велблю́дѡмъ и҆ ѻ҆слѡ́мъ, и҆ всѣ҄мъ скотѡ́мъ сѹ́щымъ въ полцѣ́хъ ѻ҆́нѣхъ, по паде́нїю семѹ̀.

¹⁶И҆ бѹ́детъ, є҆ли́цы а҆́ще ѡ҆ста́нѹтсѧ ѿ всѣ́хъ ѩ҆зы҄къ прише́дшихъ на ї҆ер҇ли́мъ, и҆ взы́дѹтъ на всѧ́кое лѣ́то покланѧ́тисѧ цр҃ю̀ гд҇ѹ вседержи́телю и҆ пра́здновати пра́здникъ скинопигі́и.

¹⁷И҆ бѹ́детъ, є҆ли́цы а҆́ще не взы́дѹтъ ѿ всѣ́хъ племе́нъ землѝ во ї҆ер҇ли́мъ поклони́тисѧ цр҃ю̀ гд҇ѹ вседержи́телю, и҆ сі́и ѻ҆́нѣмъ приложа́тсѧ, не бѹ́детъ на ни́хъ дождѧ̀.

¹⁸А҆́ще же колѣ́но є҆гѵ́петское не взы́детъ, ни прїи́детъ, и҆ на си́хъ бѹ́детъ ѩ҆́зва, є҆́юже порази́тъ гд҇ь всѧ҄ ѩ҆зы́ки, є҆ли́цы а҆́ще не взы́дѹтъ, є҆́же пра́здновати пра́здникъ скинопигі́и.

¹⁹Се́й бѹ́детъ грѣ́хъ є҆гѵ́птѹ и҆ грѣ́хъ всѣ҄мъ ѩ҆зы́кѡмъ, є҆ли́цы а҆́ще не взы́дѹтъ, є҆́же пра́здновати пра́здникъ скинопигі́и.

²⁰Въ де́нь ѡ҆́нъ бѹ́детъ є҆́же во ѹ҆здѣ̀ конѧ̀, ст҃о гд҇ѹ вседержи́телю: и҆ бѹ́дѹтъ коно́би въ домѹ̀ гд҇ни ѩ҆́кѡ ча́шы пред̾ лице́мъ ѻ҆лтарѧ̀,

²¹и҆ бѹ́детъ всѧ́къ коно́бъ во ї҆ер҇ли́мѣ и҆ во ї҆ѹ́дѣ ст҃ъ гд҇еви вседержи́телю: и҆ прїи́дѹтъ всѝ жрѹ́щїи и҆ прїи́мѹтъ ѿ ни́хъ и҆ сварѧ́тъ въ ни́хъ, и҆ не бѹ́детъ ханане́й ктомѹ̀ во хра́мѣ гд҇а вседержи́телѧ въ де́нь ѡ҆́нъ.