Read Библия Церковнославянская Заха́рїа 5 Bible Online

Заха́рїа 5 - Библия Церковнославянская bible

Заха́рїа 5

¹И҆ ѡ҆брати́хсѧ и҆ возведо́хъ ѻ҆́чи моѝ и҆ ви́дѣхъ, и҆ сѐ, се́рпъ летѧ́щь.

²И҆ речѐ ко мнѣ̀: что̀ ты̀ ви́диши; И҆ рѣ́хъ: а҆́зъ ви́ждѹ се́рпъ летѧ́щь, въ долготѹ̀ лакте́й два́десѧть и҆ въ широтѹ̀ десѧтѝ лакте́й.

³И҆ речѐ ко мнѣ̀: сїѧ̀ клѧ́тва и҆сходѧ́щаѧ на лицѐ всеѧ̀ землѝ: занѐ всѧ́къ та́ть ѿ сегѡ̀ да́же до сме́рти ѿмще́нъ бѹ́детъ, и҆ всѧ́къ клены́йсѧ во лжѹ̀ ѿ сегѡ̀ до сме́рти ѿмсти́тсѧ.

⁴И҆ и҆знесѹ̀ є҆го̀, гл҃етъ гд҇ь вседержи́тель, и҆ вни́детъ въ до́мъ та́тѧ и҆ въ до́мъ кленѹ́щагѡсѧ и҆́менемъ мои́мъ во лжѹ̀, и҆ всели́тсѧ посредѣ̀ до́мѹ є҆гѡ̀, и҆ сконча́етъ є҆го̀ и҆ древа̀ є҆гѡ̀ и҆ ка́менїе є҆гѡ̀.

⁵И҆ и҆зы́де а҆́гг҃лъ глаго́лѧй во мнѣ̀ и҆ речѐ ко мнѣ̀: воззрѝ ѻ҆чи́ма твои́ма и҆ ви́ждь и҆сходѧ́щее сїѐ. И҆ рѣ́хъ:

⁶что́ є҆сть; И҆ речѐ: сїѧ҄ мѣ́ра и҆сходѧ́щаѧ. И҆ речѐ: сїѧ̀ непра́вда и҆́хъ по все́й землѝ.

⁷И҆ сѐ, тала́нтъ ѻ҆ловѧ́нъ взе́млѧйсѧ, и҆ сѐ, жена̀ є҆ди́на сѣдѧ́ше посредѣ̀ мѣ́ры.

⁸И҆ речѐ: сїѧ̀ є҆́сть беззако́нїе. И҆ ве́рже ю҆̀ въ среди́нѹ мѣ́ры и҆ вве́рже ка́мень ѻ҆ловѧ́ный во ѹ҆ста̀ є҆ѧ̀.

⁹И҆ возведо́хъ ѻ҆́чи моѝ и҆ ви́дѣхъ, и҆ сѐ, двѣ̀ жєны̀ и҆сходѧ́щыѧ, и҆ дѹ́хъ въ крилѣ́хъ и҆́хъ, и҆ тѣ̀ и҆мѧ́хѹ кри́ла, ѩ҆́кѡ крилѣ҄ вдо́дѡвы: и҆ взѧ́ша мѣ́рѹ междѹ̀ земле́ю и҆ междѹ̀ не́бомъ.

¹⁰И҆ рѣ́хъ ко а҆́гг҃лѹ глаго́лющемѹ во мнѣ̀: ка́мѡ сїѧ҄ ѿно́сѧтъ мѣ́рѹ;

¹¹И҆ речѐ ко мнѣ̀: созда́ти є҆́й хра́минѹ въ землѝ вавѷлѡ́нстѣй и҆ ѹ҆гото́вати, и҆ положа́тъ ю҆̀ та́мѡ на ѹ҆гото́ванїе своѐ.