Read Библия Церковнославянская Заха́рїа 6 Bible Online

Заха́рїа 6 - Библия Церковнославянская bible

Заха́рїа 6

¹И҆ ѡ҆брати́хсѧ и҆ возведо́хъ ѻ҆́чи моѝ и҆ ви́дѣхъ, и҆ сѐ, четы́ри колєсни́цы и҆сходѧ́щыѧ и҆з̾ среди́ны двои́хъ го́ръ, го́ры же тѣ̀ бѣ́ша го́ры мѣ҄дѧны:

²въ колесни́цѣ пе́рвѣй ко́ни ры́жы, и҆ въ колесни́цѣ вторѣ́й ко́ни вра́ни,

³и҆ въ колесни́цѣ тре́тїей ко́ни бѣ́ли, и҆ въ колесни́цѣ четве́ртѣй ко́ни пе́стри ско́ри.

⁴И҆ ѿвѣща́хъ и҆ рѣ́хъ ко а҆́гг҃лѹ глаго́лющемѹ во мнѣ̀: что̀ сѹ́ть сїѧ҄, го́споди;

⁵И҆ ѿвѣща̀ а҆́гг҃лъ глаго́лѧй во мнѣ̀ и҆ речѐ: сїѧ҄ сѹ́ть четы́ри вѣ́три небе́снїи, и҆̀же и҆схо́дѧтъ предста́ти гд҇ѹ всеѧ̀ землѝ.

⁶Въ не́йже бѣ́хѹ ко́ни вра́ни, и҆схожда́хѹ на зе́млю сѣ́верскѹю, и҆ бѣ́лїи и҆схожда́хѹ в̾слѣ́дъ и҆́хъ, и҆ пе́стрїи и҆схожда́хѹ на зе́млю ю҆́жнѹю,

⁷и҆ ско́рїи и҆схожда́хѹ и҆ ѡ҆зира́хѹ є҆́же ѡ҆б̾итѝ зе́млю. И҆ речѐ: и҆ди́те, ѡ҆быди́те зе́млю. И҆ ѡ҆быдо́ша зе́млю.

⁸И҆ возопѝ и҆ речѐ ко мнѣ̀ глаго́лѧ: сѐ, и҆сходѧ́щїи на зе́млю сѣ́верскѹю ѹ҆поко́иша ѩ҆́рость мою̀ на землѝ сѣ́верстѣй.

⁹И҆ бы́сть сло́во гд҇не ко мнѣ̀ гл҃ѧ:

¹⁰прїимѝ, ѩ҆̀же ѿ плѣ́на ѿ кнѧзе́й и҆ ѿ ключи́мыхъ є҆гѡ̀ и҆ ѿ разѹмѣ́вшихъ є҆го̀, и҆ вни́деши ты̀ въ де́нь ѡ҆́нъ въ до́мъ ї҆ѡсі́и софо́нїина, грѧдѹ́щагѡ ѿ вавѷлѡ́на,

¹¹и҆ прїи́меши сребро̀ и҆ зла́то, и҆ сотвори́ши вѣнцы̀, и҆ возложи́ши на главѹ̀ ї҆исѹ́сѹ ї҆ѡседе́ковѹ, ї҆ере́ю вели́комѹ,

¹²и҆ рече́ши къ немѹ̀: си́це гл҃етъ гд҇ь вседержи́тель: сѐ, мѹ́жъ, восто́къ и҆́мѧ є҆мѹ̀, и҆ под̾ ни́мъ возсїѧ́етъ, и҆ сози́ждетъ хра́мъ гд҇ень:

¹³и҆ то́й прїи́метъ добродѣ́тель, и҆ сѧ́детъ и҆ воз̾ѡблада́етъ на престо́лѣ свое́мъ, и҆ бѹ́детъ ї҆ере́й ѡ҆деснѹ́ю є҆гѡ̀, и҆ совѣ́тъ ми́ренъ бѹ́детъ междѹ̀ ѻ҆бѣ́ма,

¹⁴а҆ вѣне́цъ бѹ́детъ терпѧ́щымъ и҆ ключи҄мымъ є҆мѹ̀ и҆ разѹмѣ́вшымъ є҆го̀, и҆ въ благода́ть сы́нѹ софо́нїинѹ, и҆ въ ѱало́мъ во хра́мѣ гд҇ни:

¹⁵и҆ и҆здале́ча ѿ си́хъ прїи́дѹтъ и҆ сози́ждѹтъ во хра́мѣ гд҇ни, и҆ ѹ҆разѹмѣ́ете, ѩ҆́кѡ гд҇ь вседержи́тель посла́ мѧ къ ва́мъ: и҆ бѹ́детъ, а҆́ще слѹ́шающе послѹ́шаете гла́са гд҇а бг҃а ва́шегѡ.