Read Библия Церковнославянская Малахі́а 4 Bible Online

Малахі́а 4 - Библия Церковнославянская bible

Малахі́а 4

¹ѩ҆́кѡ сѐ, де́нь грѧде́тъ горѧ́щь ѩ҆́кѡ пе́щь и҆ попали́тъ ѧ҆̀, и҆ бѹ́дѹтъ всѝ и҆ноплемє́нницы и҆ всѝ творѧ́щїи беззакѡ́ннаѧ ѩ҆́кѡ сте́блїе: и҆ возжже́тъ ѧ҆̀ де́нь гд҇ень грѧды́й, гл҃етъ гд҇ь вседержи́тель, и҆ не ѡ҆ста́нетсѧ ѿ ни́хъ ко́рень нижѐ вѣ́твь.

²И҆ возсїѧ́етъ ва́мъ боѧ́щымсѧ и҆́мене моегѡ̀ со́лнце пра́вды и҆ и҆зцѣле́нїе въ крилѣ́хъ є҆гѡ̀: и҆ и҆зы́дете и҆ взыгра́ете, ѩ҆́коже телцы̀ ѿ ѹ҆́зъ разрѣше́ни:

³и҆ поперетѐ беззако́нники, и҆ бѹ́дѹтъ пе́пелъ под̾ нога́ми ва́шими въ де́нь, въ ѻ҆́ньже а҆́зъ сотворю̀, гл҃етъ гд҇ь вседержи́тель.

⁴Помѧни́те зако́нъ мѡѷсе́а раба̀ моегѡ̀, ѩ҆́коже повелѣ́хъ є҆мѹ̀ въ хѡри́вѣ ко всемѹ̀ ї҆и҃лю повелѣ҄нїѧ и҆ ѡ҆правда҄нїѧ.

⁵И҆ сѐ, а҆́зъ послю̀ ва́мъ и҆лїю̀ ѳесві́тѧнина, пре́жде прише́ствїѧ днѐ гд҇нѧ вели́кагѡ и҆ просвѣще́ннагѡ,

⁶и҆́же ѹ҆стро́итъ се́рдце ѻ҆тца̀ къ сы́нѹ и҆ се́рдце человѣ́ка ко и҆́скреннемѹ є҆гѡ̀, да не прише́дъ поражѹ̀ зе́млю въ коне́цъ.