Read Библия Церковнославянская а҃ маккавей́скаѧ 1 Bible Online

а҃ маккавей́скаѧ 1 - Библия Церковнославянская bible

а҃ маккавей́скаѧ 1

¹И҆ бы́сть, є҆гда̀ поража́ше а҆леѯа́ндръ македѡ́нскїй сы́нъ фїлі́ппа, и҆́же и҆зы́де ѿ землѝ хеттїи́мъ, поразѝ и҆ да́рїа царѧ̀ пе́рсскаго и҆ ми́дскаго, и҆ воцари́сѧ вмѣ́стѡ є҆гѡ̀ пе́рвый во є҆лла́дѣ,

²и҆ соста́ви бра҄ни мнѡ́ги, и҆ ѡ҆держа̀ твєрды́ни мнѡ́ги, и҆ ѹ҆бѝ цари҄ зє́мскїѧ,

³и҆ про́йде да́же до кра́євъ землѝ, и҆ взѧ̀ коры҄сти мно́гихъ ѩ҆зы́кѡвъ. и҆ ѹ҆молчѐ землѧ̀ пред̾ ни́мъ. и҆ возвы́сисѧ, и҆ вознесе́сѧ се́рдце є҆гѡ̀.

⁴И҆ собра̀ си́лѹ крѣ́пкѹ ѕѣлѡ̀, и҆ нача́лствова над̾ страна́ми и҆ ѩ҆зы҄ки и҆ мѹчи́тельми, и҆ бы́ша є҆мѹ̀ въ да́нники.

⁵И҆ по си́хъ падѐ на ло́же и҆ позна̀, ѩ҆́кѡ ѹ҆мира́етъ:

⁶и҆ созва̀ ѻ҆́троки своѧ҄ благорѡ́дныѧ, и҆̀же съ ни́мъ бѧ́хѹ совоспита́ни ѿ ю҆́ности є҆гѡ̀, и҆ раздѣлѝ и҆̀мъ ца́рство своѐ є҆щѐ жи́въ сы́й.

⁷И҆ ца́рствова а҆леѯа́ндръ лѣ́тъ двана́десѧть и҆ ѹ҆́мре.

⁸И҆ ѡ҆блада́ша ѻ҆́троцы є҆гѡ̀ кі́йждо въ мѣ́стѣ свое́мъ.

⁹И҆ возложи́ша всѝ дїади҄мы по сме́рти є҆гѡ̀, и҆ сы́нове и҆́хъ по ни́хъ лѣ҄та мнѡ́га, и҆ ѹ҆мно́жиша ѕла҄ѧ на землѝ.

¹⁰И҆ и҆зы́де ѿ ни́хъ ко́рень грѣха̀ а҆нтїо́хъ є҆пїфа́нъ, сы́нъ а҆нтїо́ха царѧ̀, и҆́же бѣ̀ зало́гомъ въ ри́мѣ: и҆ ца́рствова въ лѣ́тѣ сто̀ три́десѧть седмѣ́мъ ца́рства є҆́ллинскагѡ.

¹¹Во дне́хъ тѣ́хъ и҆зыдо́ша ѿ ї҆и҃лѧ сы́нове беззако́ннїи и҆ наѹсти́ша мно́гихъ глаго́люще: по́йдемъ и҆ завѣща́емъ завѣ́тъ съ ѩ҆зы҄ки, и҆̀же ѡ҆́крестъ на́съ, ѩ҆́кѡ ѿне́лѣже ѿлѹчи́хомсѧ ѿ ни́хъ, ѡ҆брѣто́ша на́съ мнѡ́га ѕла҄ѧ.

¹²И҆ благоѹви́дѣсѧ сло́во во ѻ҆́чїю и҆́хъ:

¹³и҆ пред̾избра́шасѧ нѣ́цыи ѿ люді́й и҆ и҆до́ша ко царю̀: и҆ дадѐ и҆̀мъ вла́сть твори́ти ѡ҆правда҄нїѧ ѩ҆зы́чєскаѧ.

¹⁴И҆ созда́ша (себѣ̀) ѹ҆чи́лище во ї҆ер҇ли́мѣ по зако́нѡмъ ѩ҆зы́чєскимъ.

¹⁵И҆ сотвори́ша себѣ̀ неѡбрѣ́занїе, и҆ ѿстѹпи́ша ѿ завѣ́та ст҃а́гѡ, и҆ сопрѧго́шасѧ ѩ҆зы́кѡмъ, и҆ прода́шасѧ є҆́же твори́ти лѹка́вое.

¹⁶И҆ ѹ҆гото́васѧ ца́рство пред̾ а҆нтїо́хомъ: и҆ ѹ҆мы́сли ца́рствовати во є҆гѵ́птѣ, ѩ҆́кѡ да ца́рствѹетъ над̾ двѣма̀ ца́рствома.

¹⁷И҆ вни́де во є҆гѵ́петъ въ наро́дѣ тѧ́жцѣ, на колесни́цахъ и҆ на сло́нѣхъ, и҆ на вса́дникахъ и҆ на корабле́хъ мно́гихъ.

¹⁸И҆ соста́ви бра́нь на птоломе́а царѧ̀ є҆гѵ́петскаго: и҆ ѹ҆боѧ́сѧ птоломе́й ѿ лица̀ є҆гѡ̀ и҆ побѣжѐ, и҆ падо́ша ѩ҆́звени мно́зи.

¹⁹И҆ взѧ́ша гра́ды твє́рды въ землѝ є҆гѵ́петстѣй: и҆ взѧ̀ кѡры́сти землѝ є҆гѵ́петскїѧ.

²⁰И҆ ѡ҆брати́сѧ а҆нтїо́хъ, повнегда̀ поразѝ є҆гѵ́пта во сто̀ четы́редесѧть тре́тїе лѣ́то: и҆ взы́де на ї҆и҃лѧ и҆ на ї҆ер҇ли́мъ въ наро́дѣ тѧ́жцѣ,

²¹и҆ вни́де во свѧти́лище съ горды́нею, и҆ взѧ̀ ѻ҆лта́рь златы́й и҆ свѣти́лникъ свѣ́щный и҆ всѧ҄ сосѹ́ды є҆гѡ̀,

²²и҆ трапе́зѹ предложе́нїѧ и҆ возлїѧ́лники, и҆ фїа́лы и҆ кади҄лницы златы҄ѧ, и҆ катапета́смѹ и҆ вѣнцы̀ и҆ ѹ҆краше́нїе злато́е, є҆́же на лицы̀ це́ркви (бѧ́ше), и҆ сокрѹшѝ всѧ҄:

²³и҆ взѧ̀ сребро̀ и҆ зла́то и҆ сосѹ́ды вожделѣ҄нныѧ: и҆ взѧ̀ сокрѡ́вища та҄йнаѧ, и҆̀хже ѡ҆брѣ́те.

²⁴И҆ взе́мъ всѧ҄ ѿи́де въ зе́млю свою̀, и҆ сотворѝ ѹ҆бі́йство, и҆ глаго́ла въ го́рдости вели́цѣй.

²⁵И҆ бы́сть пла́чь вели́къ во ї҆и҃ли на всѧ́цѣмъ мѣ́стѣ и҆́хъ.

²⁶И҆ возстена́ша нача҄лницы и҆ старѣ҄йшины, дѣ҄вы и҆ ю҆́нѡши и҆знемого́ша, и҆ красота̀ же́нскаѧ и҆змѣни́сѧ.

²⁷Всѧ́къ жени́хъ прїѧ̀ пла́чь, и҆ сѣдѧ́щаѧ на ѻ҆дрѣ̀ бра́чнѣ бы́сть въ печа́ли.

²⁸И҆ потрѧсе́сѧ землѧ̀ на ѡ҆бита́ющихъ на не́й, и҆ ве́сь до́мъ ї҆а́кѡвль ѡ҆блече́сѧ стѹдо́мъ.

²⁹И҆ по двою̀ лѣ҄тѹ дні́й посла̀ ца́рь нача́лника да́немъ во гра́ды ї҆ѹ҄дины. и҆ прїи́де во ї҆ер҇ли́мъ съ наро́домъ вели́кимъ

³⁰и҆ глаго́ла къ ни҄мъ словеса̀ ми҄рнаѧ во льстѝ. и҆ вѣ́роваша є҆мѹ̀. и҆ нападѐ на гра́дъ внеза́пѹ и҆ поразѝ є҆го̀ ѩ҆́звою вели́кою и҆ погѹбѝ лю́ди мнѡ́ги ѿ ї҆и҃лѧ:

³¹и҆ взѧ̀ кѡры́сти гра́да и҆ сожжѐ є҆го̀ ѻ҆гне́мъ, и҆ разорѝ до́мы є҆гѡ̀ и҆ стѣ́ны є҆гѡ̀ ѡ҆́крестъ:

³²и҆ плѣни́ша же́нъ и҆ ча҄дъ, и҆ скоты̀ раздѣли́ша,

³³и҆ ѡ҆гради́ша гра́дъ даві́довъ стѣно́ю вели́кою и҆ крѣ́пкою и҆ ба́шнѧми крѣ́пкими, и҆ бы́сть и҆̀мъ въ крѣ́пость:

³⁴и҆ посади́ша та́мѡ люді́й грѣ́шникѡвъ, мѹже́й беззако́нныхъ, и҆ возмого́ша въ не́й:

³⁵и҆ положи́ша ѻ҆рѹ҄жїѧ и҆ бра҄шна, и҆ собира́хѹ кѡры́сти ї҆ер҇ли҄мскїѧ, и҆ полага́хѹ та́мѡ: и҆ бы́ша въ сѣ́ть вели́кѹ,

³⁶и҆ бы́сть въ лови́телство ст҃ы́ни и҆ въ дїа́вола лѹка́ваго ї҆и҃лю вы́нѹ.

³⁷И҆ пролїѧ́ша кро́вь непови́ннѹю ѡ҆́крестъ свѧти́лища и҆ ѡ҆скверни́ша ст҃ы́ню.

³⁸И҆ бѣжа́ша ѡ҆бита́ющїи во ї҆ер҇ли́мѣ и҆́хъ ра́ди, и҆ бы́сть ѡ҆бита́нїе чѹжди҄мъ: и҆ бы́сть чѹ́ждо сѣ́мени рожде́нїѧ своегѡ̀, и҆ ча҄да є҆гѡ̀ ѡ҆ста́виша є҆го̀.

³⁹Ст҃ы́нѧ є҆гѡ̀ разоре́на ѩ҆́кѡ пѹсты́нѧ, пра́здницы є҆гѡ̀ ѡ҆браще́ни сѹ́ть во пла́чь, сѹббѡ҄ты є҆гѡ̀ въ поноше́нїе, че́сть є҆гѡ̀ во ѹ҆ничиже́нїе:

⁴⁰по сла́вѣ є҆гѡ̀ ѹ҆мно́жисѧ безче́стїе є҆гѡ̀, и҆ высота̀ є҆гѡ̀ ѡ҆браще́на бы́сть во пла́чь.

⁴¹И҆ писа̀ ца́рь а҆нтїо́хъ всемѹ̀ ца́рствѹ своемѹ̀, да бѹ́дѹтъ всѝ лю́дїе є҆ди́но,

⁴²и҆ ѡ҆ста́витъ кі́йждо зако́нъ сво́й. и҆ соизво́лиша всѝ ѩ҆зы́цы по сло́вѹ царѧ̀ (а҆нтїо́ха).

⁴³И҆ мно́зи ѿ ї҆и҃лѧ и҆зво́лиша слѹже́нїю є҆гѡ̀ и҆ пожро́ша їдѡлѡмъ и҆ ѡ҆скверни́ша сѹббѡ́тѹ.

⁴⁴И҆ посла̀ ца́рь кни҄ги рѹко́ю вѣ́стникѡвъ во ї҆ер҇ли́мъ и҆ во гра́ды ї҆ѹ҄дины, да по́йдѹтъ в̾слѣ́дъ зако́нѡвъ чѹжди́хъ землѝ

⁴⁵и҆ возбранѧ́тъ всесожжє́нїѧ и҆ же́ртвѹ и҆ возлїѧ́нїе ѿ ст҃ы́ни, и҆ ѡ҆мерзѧ́тъ сѹббѡ҄ты и҆ пра́здники,

⁴⁶и҆ ѡ҆сквернѧ́тъ ст҃ы́ню и҆ ст҃ы́хъ,

⁴⁷и҆ сози́ждѹтъ трє́бища и҆ ка҄пища и҆ кѹмї҄рницы, и҆ да жрѹ́тъ мѧса̀ свина҄ѧ и҆ скоты̀ ѻ҆́бщыѧ:

⁴⁸и҆ да ѡ҆ста́вѧтъ сы́ны своѧ҄ неѡбрѣ҄заны, є҆́же ѡ҆скверни́ти дѹ́шы и҆́хъ во всѧ́цѣй нечистотѣ̀ и҆ ѡ҆скверне́нїи,

⁴⁹ѩ҆́кѡ да забѹ́дѹтъ зако́нъ и҆ и҆змѣнѧ́тъ всѧ҄ ѡ҆правда҄нїѧ (бж҃їѧ).

⁵⁰И҆ и҆́же а҆́ще не сотвори́тъ по глаго́лѹ царе́вѹ, да ѹ҆́мретъ.

⁵¹По всѣ҄мъ словесє́мъ си҄мъ написа̀ всемѹ̀ ца́рствѹ своемѹ̀ и҆ приста́ви надзира́тєли над̾ всѣ́ми людьмѝ: и҆ повелѣ̀ градѡ́мъ ї҆ѹ҄динымъ жре́ти во всѧ́цѣмъ гра́дѣ.

⁵²И҆ собра́шасѧ мно́зи ѿ люді́й къ ни҄мъ, всѧ́къ ѡ҆ста́вивый зако́нъ гд҇ень: и҆ сотвори́ша лѹка҄ваѧ на землѝ

⁵³и҆ положи́ша ї҆и҃лѧ въ та́йныхъ во всѧ́цѣмъ ѹ҆бѣ́жищи и҆́хъ.

⁵⁴И҆ въ пѧтыйна́десѧть де́нь мц҇а хасле́ѵа, въ лѣ́то сто̀ четы́редесѧть пѧ́тое созда́ша ме́рзость запѹстѣ́нїѧ на ѻ҆лтарѝ (бж҃їи), и҆ во градѣ́хъ ї҆ѹ́диныхъ ѡ҆́крестъ созда́ша трє́бища.

⁵⁵И҆ пред̾ дверьмѝ домѡ́въ и҆ на сто́гнахъ кадѧ́хѹ,

⁵⁶и҆ кни҄ги зако́на (бж҃їѧ), и҆̀хже ѡ҆брѣто́ша, сожго́ша ѻ҆гне́мъ, раздира́юще (и҆̀хъ).

⁵⁷И҆ и҆дѣ́же ѡ҆брѣта́шесѧ ѹ҆ когѡ̀ кни́га завѣ́та гд҇нѧ, и҆ а҆́ще кто̀ соизволѧ́ше зако́нѹ гд҇ню, по повелѣ́нїю царе́вѹ закала́хѹ є҆го̀.

⁵⁸Въ си́лѣ свое́й творѧ́хѹ си́це лю́демъ ї҆и҃лєвымъ, ѡ҆брѣта́ющымсѧ во всѧ́цѣмъ мц҇ѣ и҆ мц҇ѣ во градѣ́хъ.

⁵⁹И҆ въ два́десѧть пѧ́тый де́нь мц҇а жрѧ́хѹ въ ка́пищи, є҆́же бѣ̀ на ѻ҆лтарѝ.

⁶⁰И҆ же́нъ ѡ҆брѣ́завшихъ ча҄да своѧ҄ закала́ша по повелѣ́нїю (царе́вѹ),

⁶¹и҆ ѡ҆бѣ́шахѹ дѣ҄тища за шї҄и и҆́хъ, до́мы и҆́хъ расхища́хѹ, и҆ ѡ҆брѣ́завшихъ ѧ҆̀ ѹ҆мерщвлѧ́хѹ.

⁶²И҆ мно́зи ѿ люді́й ї҆и҃левыхъ ѹ҆держа́шасѧ и҆ ѹ҆тверди́шасѧ въ себѣ̀, є҆́же не ѩ҆́сти скве́рныхъ,

⁶³и҆ и҆збра́ша па́че ѹ҆мре́ти, не́же ѡ҆скверни́тисѧ бра́шны, и҆ не хотѣ́ша престѹпи́ти зако́на бж҃їѧ ст҃а́гѡ: и҆ закла́ни бы́ша.

⁶⁴И҆ бы́сть гнѣ́въ ве́лїй на ї҆и҃лѧ ѕѣлѡ̀.