Read Библия Церковнославянская а҃ маккавей́скаѧ 11 Bible Online

а҃ маккавей́скаѧ 11 - Библия Церковнославянская bible

а҃ маккавей́скаѧ 11

¹И҆ ца́рь є҆гѵ́петскїй собра̀ си́лѹ мно́гѹ а҆́ки песо́къ, и҆́же вскра́й мо́рѧ, и҆ корабли҄ мнѡ́ги: и҆ и҆ска́ше ѡ҆блада́ти ца́рство а҆леѯа́ндрово ле́стїю и҆ приложи́ти є҆̀ къ ца́рствѹ своемѹ̀.

²И҆ и҆зы́де въ сѷрі́ю словесы̀ ми́рными, и҆ ѿверза́хѹ є҆мѹ̀ и҆̀же ѿ градѡ́въ и҆ срѣта́хѹ є҆го̀, ѩ҆́кѡ за́повѣдь бѣ̀ а҆леѯа́ндра царѧ̀ срѣта́ти є҆го̀, занѐ бѧ́ше те́сть є҆гѡ̀.

³Е҆гда́ же вхожда́ше во гра́ды, птоломе́й поставлѧ́ше си҄лы на стра́жѹ въ ко́емждо гра́дѣ.

⁴Е҆гда́ же прибли́жисѧ ко а҆зѡ́тѹ, показа́ша є҆мѹ̀ ка́пище дагѡ́ново сожже́но, и҆ а҆зѡ́тъ и҆ ѡ҆крє́стныѧ гра́ды є҆гѡ̀ разорє́ны, и҆ тѣлеса̀ пове́ржєна, и҆ побїе́ныхъ, и҆̀хже побѝ во бра́ни: смета́ша бо ѧ҆̀ въ кѹ҄пы и҆́хъ при пѹтѝ є҆гѡ̀.

⁵И҆ повѣ́даша царю̀, ѩ҆̀же сотворѝ ї҆ѡнаѳа́нъ, є҆́же бы возненави́дѣти є҆го̀. и҆ ѹ҆молча̀ ца́рь.

⁶И҆ срѣ́те ї҆ѡнаѳа́нъ царѧ̀ во ї҆ѻппі́и со сла́вою, и҆ цѣлова́ста дрѹ́гъ дрѹ́га и҆ почи́ста тѹ̀.

⁷И҆ и҆́де ї҆ѡнаѳа́нъ со царе́мъ да́же до рѣкѝ нарица́емыѧ є҆леѵѳе́ра, и҆ возврати́сѧ во ї҆ер҇ли́мъ.

⁸Ца́рь же птоломе́й ѡ҆госпо́дствова гра҄ды примо́рскими да́же до селеѵкі́и примо́рскїѧ и҆ размышлѧ́ше на а҆леѯа́ндра совѣ́ты лѹка҄вы.

⁹И҆ посла̀ старѣ́йшинъ къ дими́трїю царю̀, глаго́лѧ: прїидѝ, соста́вимъ междѹ̀ на́ма завѣ́тъ, и҆ да́мъ тебѣ̀ дще́рь мою̀, ю҆́же и҆́мать а҆леѯа́ндръ, и҆ ца́рствовати и҆́маши во ца́рствїи ѻ҆тца̀ твоегѡ̀:

¹⁰раска́ѧхсѧ бо да́въ є҆мѹ̀ дще́рь мою̀, и҆ска́ше бо мѧ̀ ѹ҆би́ти.

¹¹И҆ похѹ́ли є҆го̀ ра́ди похотѣ́нїѧ ца́рства є҆гѡ̀.

¹²И҆ ѿѧ́въ дще́рь свою̀, дадѐ ю҆̀ дими́трїю и҆ ѿчѹжди́сѧ ѿ а҆леѯа́ндра, и҆ ѩ҆ви́сѧ вражда̀ и҆́хъ.

¹³И҆ вни́де птоломе́й во а҆нтїохі́ю и҆ возложѝ двѣ̀ дїади҄мы на главѹ̀ свою̀, а҆сі́йскѹю и҆ є҆гѵ́петскѹю.

¹⁴А҆леѯа́ндръ же ца́рь бѣ̀ въ кїлїкі́и во времена̀ ѻ҆́на, поне́же ѿмета́хѹсѧ и҆̀же ѿ мѣ́стъ ѻ҆́ныхъ.

¹⁵И҆ слы́ша а҆леѯа́ндръ и҆ прїи́де на́нь бра́нїю: и҆ и҆зведѐ птоломе́й си́лѹ, и҆ срѣ́те є҆го̀ рѹко́ю крѣ́пкою, и҆ прогна̀ є҆го̀.

¹⁶И҆ побѣжѐ а҆леѯа́ндръ во а҆раві́ю защи́титисѧ та́мѡ: ца́рь же птоломе́й вознесе́сѧ.

¹⁷И҆ ѹ҆сѣ́кнѹ завдїи́ль а҆раві́тинъ главѹ̀ а҆леѯа́ндровѹ и҆ посла̀ птоломе́ю.

¹⁸И҆ ца́рь птоломе́й ѹ҆́мре въ тре́тїй де́нь, и҆ сѹ́щїи въ тверды́нехъ погибо́ша ѿ сѹ́щихъ въ тверды́нехъ.

¹⁹И҆ воцари́сѧ дими́трїй въ лѣ́то сто̀ шестьдесѧ́тъ седмо́е.

²⁰Во дни҄ ѡ҆́ны собра̀ ї҆ѡнаѳа́нъ сѹ́щихъ ѿ ї҆ѹде́и, да вою́ютъ краегра́дїе, є҆́же во ї҆ер҇ли́мѣ, и҆ сотворѝ на ѻ҆́ное миха҄ны мнѡ́ги.

²¹И҆ и҆до́ша нѣ́цыи ненави́дѧщїи ѩ҆зы́ка и҆́хъ, мѹ́жїе беззакѡ́нницы, ко царю̀ дими́трїю и҆ возвѣсти́ша є҆мѹ̀, ѩ҆́кѡ ї҆ѡнаѳа́нъ ѡ҆бстои́тъ краегра́дїе.

²²И҆ слы́шавъ разгнѣ́васѧ: є҆гда́ же слы́ша, ско́рѡ прїи́де во птолемаі́дѹ и҆ написа̀ ко ї҆ѡнаѳа́нѹ, да не ѡ҆бстои́тъ краегра́дїѧ, но да и҆́детъ во срѣ́тенїе є҆мѹ̀ тща́телнѡ во птолемаі́дѹ, є҆́же бесѣ́довати съ ни́мъ.

²³Е҆гда́ же ѹ҆слы́ша ї҆ѡнаѳа́нъ, повелѣ̀ ѡ҆бстоѧ́ти, и҆ и҆збра̀ ѿ старѣ́йшинъ ї҆и҃левыхъ и҆ ї҆ере́євъ, и҆ вдаде́сѧ въ бѣ́дство:

²⁴и҆ взѧ́въ зла́то и҆ сребро̀ и҆ ри҄зы и҆ и҆́ны да́ры мнѡ́ги, и҆́де ко царю̀ во птолемаі́дѹ и҆ ѡ҆брѣ́те благода́ть пред̾ ни́мъ.

²⁵И҆ клевета́хѹ на него̀ нѣ́цыи беззако́ннїи ѿ ѩ҆зы́ка (є҆гѡ̀).

²⁶И҆ сотворѝ є҆мѹ̀ ца́рь, ѩ҆́коже сотвори́ша є҆мѹ̀, и҆̀же пре́жде є҆гѡ̀ бы́ша, и҆ возвы́си є҆го̀ пред̾ всѣ́ми дрѹ҄ги свои́ми,

²⁷и҆ поста́ви є҆го̀ нача́лника свѧще́нствѹ, и҆ є҆ли҄ка и҆́на и҆мѣ́ѧше пре́жде честна҄ѧ, и҆ сотворѝ є҆го̀ въ пе́рвыхъ дрѹзѣ́хъ бы́ти.

²⁸И҆ молѝ ї҆ѡнаѳа́нъ царѧ̀ сотвори́ти ї҆ѹде́ю безда́ннѹ, и҆ трѝ топа҄рхїи, и҆ самарі́ю, и҆ ѡ҆бѣща̀ є҆мѹ̀ три́ста тала҄нтъ.

²⁹И҆ ѹ҆го́дно бы́сть царю̀, и҆ написа̀ ї҆ѡнаѳа́нѹ є҆пїстѡ́лїи ѡ҆ всѣ́хъ си́хъ, и҆мѣ́ющыѧ ѡ҆́бразъ сицевы́й:

³⁰ца́рь дими́трїй бра́тѹ ї҆ѡнаѳа́нѹ ра́доватисѧ и҆ ѩ҆зы́кѹ ї҆ѹде́йскомѹ:

³¹списа́нїе є҆пїсто́лїи, ю҆́же писа́хомъ ласѳе́нѹ сро́дникѹ на́шемѹ ѡ҆ ва́съ, писа́хомъ и҆ къ ва́мъ, да вѣ́сте:

³²ца́рь дими́трїй ласѳе́нѹ ѻ҆тцѹ̀ ра́доватисѧ:

³³ѩ҆зы́кѹ ї҆ѹде́йскѹ дрѹгѡ́мъ на́шымъ и҆ сохранѧ́ющымъ ѩ҆̀же къ на́мъ пра́вєднаѧ сѹди́хомъ благосотвори́ти, ра́ди благопрїѧ́тства и҆́хъ къ на́мъ:

³⁴ѹ҆ста́вихомъ ѹ҆̀бо и҆̀мъ предѣ́лы ї҆ѹдє́йскїѧ и҆ трѝ страны҄, а҆фере́мѹ, лѵ́ддѹ и҆ рамаѳе́мъ, и҆̀же приложи́шасѧ ї҆ѹде́и ѿ самарі́и, и҆ всѧ҄ надлєжа́щаѧ къ ни҄мъ, всѣ҄мъ жрѹ́щымъ во ї҆ер҇ли́мѣ, вмѣ́стѡ ца́рскихъ, и҆̀хже взима́ше ца́рь ѿ ни́хъ пе́рвѣе на всѧ́ко лѣ́то ѿ жи҄тъ землѝ и҆ ѿ ѻ҆воще́й древе́сныхъ,

³⁵и҆ и҆́на надлєжа́щаѧ на́мъ ѿнн҃ѣ десѧти́нъ и҆ да́ней надлежа́щихъ на́мъ, и҆ со́ли точи҄ла, и҆ принадлежа́щихъ на́мъ вѣнцє́въ,

³⁶всѧ҄ ще́дрѡ ѡ҆ставлѧ́емъ и҆̀мъ, и҆ ничто́же ѿ си́хъ ѿи́метсѧ ѿнн҃ѣ и҆ въ вѣ́чное вре́мѧ:

³⁷нн҃ѣ ѹ҆̀бо прилѣжи́те сотвори́ти си́хъ списа́нїе, и҆ да да́стсѧ ї҆ѡнаѳа́нѹ и҆ да положи́тсѧ въ горѣ̀ ст҃ѣ́й въ мѣ́стѣ че́стнѣ.

³⁸И҆ ви́дѣ дими́трїй ца́рь, ѩ҆́кѡ ѹ҆тиши́сѧ землѧ̀ пред̾ ни́мъ, и҆ ничто̀ є҆мѹ̀ проти́витсѧ, и҆ ѿпѹстѝ всѧ҄ вѡ́и своѧ҄ коего́ждо въ мѣ́сто своѐ, кромѣ̀ чѹжди́хъ си́лъ, и҆̀хже собра̀ ѿ ѻ҆стровѡ́въ ѩ҆зы́ческихъ, и҆ враждова́хѹ є҆мѹ̀ всѧ҄ си҄лы ѻ҆тцє́въ є҆гѡ̀.

³⁹Трѵ́фѡнъ же бѣ̀ ѿ а҆леѯа́ндровыхъ пе́рвѣе, и҆ ви́дѣ, ѩ҆́кѡ всѧ҄ си́лы ро́пщѹтъ на дими́трїа, и҆ и҆́де ко є҆малкѹ́ю а҆раві́тинѹ, и҆́же воспита̀ а҆нтїо́ха дѣ́тище а҆леѯа́ндрово:

⁴⁰и҆ прилѣжа́ше є҆мѹ̀, ѩ҆́кѡ да да́стъ є҆мѹ̀ є҆̀, да воцари́тъ вмѣ́стѡ ѻ҆тца̀ є҆гѡ̀: и҆ возвѣстѝ є҆мѹ̀, є҆ли҄ка сотворѝ дими́трїй, и҆ враждѹ̀, є҆́юже враждѹ́ютъ на́нь си҄лы є҆гѡ̀, и҆ пребы́сть тѹ̀ дни҄ мнѡ́ги.

⁴¹И҆ посла̀ ї҆ѡнаѳа́нъ ко дими́трїю царю̀, да и҆ждене́тъ сѹ́щихъ во краегра́дїи и҆з̾ ї҆ер҇ли́ма и҆ и҆̀же въ тверды́нехъ: бѧ́хѹ бо вою́юще ї҆и҃лѧ.

⁴²И҆ посла̀ дими́трїй ко ї҆ѡнаѳа́нѹ глаго́лѧ: не то́кмѡ сїѧ҄ сотворю̀ тебѣ̀ и҆ ѩ҆зы́кѹ твоемѹ̀, но и҆ сла́вою просла́влю тѧ̀ и҆ ѩ҆зы́къ тво́й, а҆́ще благовре́менство полѹчѹ̀:

⁴³нн҃ѣ ѹ҆̀бо пра́вѡ сотвори́ши, а҆́ще по́слеши мѝ мѹже́й спобора́ющихъ, ѩ҆́кѡ ѿстѹпи́ша всѝ вѡ́и моѝ.

⁴⁴И҆ посла̀ є҆мѹ̀ ї҆ѡнаѳа́нъ трѝ ты́сѧщы мѹже́й си́льныхъ крѣ́постїю во а҆нтїохі́ю, и҆ прїидо́ша ко царю̀, и҆ возвесели́сѧ ца́рь ѡ҆ прише́ствїи и҆́хъ.

⁴⁵И҆ собра́шасѧ и҆̀же ѿ гра́да въ среди́нѹ гра́да сто̀ два́десѧть ты́сѧщъ мѹже́й и҆ совѣща́хѹсѧ ѹ҆би́ти царѧ̀.

⁴⁶И҆ бѣжа̀ ца́рь во дво́ръ, и҆ ѡ҆б̾ѧ́ша и҆̀же бѣ́хѹ ѿ гра́да пѹти҄ гра҄дскїѧ, и҆ нача́ша би́тисѧ.

⁴⁷И҆ призва̀ ца́рь ї҆ѹдеѡ́въ на по́мощь, и҆ собра́шасѧ всѝ вкѹ́пѣ къ немѹ̀: и҆ расточи́шасѧ всѝ по гра́дѹ,

⁴⁸и҆ ѹ҆би́ша во гра́дѣ въ то́й де́нь сто̀ ты́сѧщъ мѹже́й, и҆ сожго́ша гра́дъ, и҆ взѧ́ша коры҄сти мнѡ́ги во ѡ҆́нъ де́нь и҆ и҆зба́виша царѧ̀.

⁴⁹И҆ ви́дѣша и҆̀же бѧ́хѹ ѿ гра́да, ѩ҆́кѡ ѡ҆держа́ша ї҆ѹде́є гра́дъ, ѩ҆́коже хотѣ́ша, и҆ и҆знемого́ша мы́сльми свои́ми, и҆ возопи́ша ко царю̀ съ моле́нїемъ, глаго́люще:

⁵⁰да́ждь на́мъ десни́цѹ, и҆ да преста́нѹтъ ї҆ѹде́є ра́товати на́съ и҆ гра́дъ.

⁵¹И҆ поверго́ша ѻ҆рѹ҄жїѧ своѧ҄ и҆ сотвори́ша ми́ръ. И҆ просла́вишасѧ ї҆ѹде́є пред̾ царе́мъ и҆ пред̾ всѣ́ми и҆̀же во ца́рствїи є҆гѡ̀, и҆ возврати́шасѧ во ї҆ер҇ли́мъ и҆мѣ́юще коры҄сти мнѡ́ги.

⁵²И҆ сѣ́де дими́трїй ца́рь на престо́лѣ ца́рства своегѡ̀, и҆ ѹ҆поко́исѧ землѧ̀ пред̾ ни́мъ.

⁵³И҆ солга̀ всѧ҄ є҆ли҄ка речѐ, и҆ ѿчѹжди́сѧ ї҆ѡнаѳа́на, и҆ не воздадѐ є҆мѹ̀ по благотворе́нїємъ, ѩ҆̀же воздадѐ є҆мѹ̀, и҆ ѡ҆скорбѝ є҆го̀ ѕѣлѡ̀.

⁵⁴По си́хъ же возврати́сѧ трѵ́фѡнъ и҆ а҆нтїо́хъ съ ни́мъ ѻ҆́трочищь ю҆́ный: и҆ воцари́сѧ и҆ возложѝ дїади́мѹ.

⁵⁵И҆ собра́шасѧ къ немѹ̀ всѝ вѡ́и, и҆̀хже расточѝ дими́трїй, и҆ ра́товаша проти́вѹ є҆гѡ̀, и҆ побѣжѐ и҆ побѣжде́нъ бы́сть.

⁵⁶И҆ взѧ̀ трѵ́фѡнъ ѕвѣ҄ри и҆ ѡ҆держа̀ а҆нтїохі́ю.

⁵⁷И҆ писа̀ а҆нтїо́хъ ю҆́ный ї҆ѡнаѳа́нѹ, глаго́лѧ: ѹ҆ставлѧ́ю тебѣ̀ а҆рхїере́йство и҆ поставлѧ́ю тебѐ над̾ четы́рми страна́ми, и҆ бѹ́деши въ дрѹзѣ́хъ ца́рскихъ.

⁵⁸И҆ посла̀ є҆мѹ̀ сосѹ́ды златы҄ѧ и҆ слѹже́нїе, и҆ дадѐ є҆мѹ̀ вла́сть пи́ти и҆з̾ зла́та и҆ бы́ти въ порфѵ́рѣ и҆ и҆мѣ́ти гри́внѹ зла́тѹ.

⁵⁹И҆ сі́мѡна бра́та є҆гѡ̀ поста́ви воево́дою ѿ страны̀ тѵ́ра да́же до предѣ҄лъ є҆гѵ́пта.

⁶⁰И҆ и҆зы́де ї҆ѡнаѳа́нъ и҆ прохожда́ше ѡ҆б̾ ѻ҆нѹ̀ странѹ̀ рѣкѝ и҆ во градѣ́хъ, и҆ собра́шасѧ къ немѹ̀ всѧ҄ си҄лы сѵ҄рскїѧ въ по́мощь, и҆ прїи́де во а҆скалѡ́нъ, и҆ срѣто́ша є҆го̀ че́стнѡ ѿ гра́да.

⁶¹И҆ и҆́де ѿтѹ́дѹ въ га́зѹ, и҆ заключи́шасѧ и҆̀же въ га́зѣ, и҆ ѡ҆бстоѧ́ше ю҆̀, и҆ пожжѐ ѡ҆крє́стныѧ гра́ды є҆ѧ̀ ѻ҆гне́мъ, и҆ плѣнѝ ѧ҆̀.

⁶²И҆ моли́ша ї҆ѡнаѳа́на и҆̀же ѿ га́зы, и҆ дадѐ и҆̀мъ десни́цѹ, и҆ взѧ̀ сы́ны нача́лникѡвъ и҆́хъ въ зало́гъ, и҆ посла̀ и҆̀хъ во ї҆ер҇ли́мъ, и҆ про́йде странѹ̀ да́же до дама́ска.

⁶³И҆ слы́ша ї҆ѡнаѳа́нъ, ѩ҆́кѡ сѹ́ть нача҄лницы дими́трїєвы въ ка́дисѣ, и҆́же въ галїле́и, съ си́лою мно́гою, хотѧ́ще и҆зри́нѹти є҆го̀ ѿ страны̀.

⁶⁴И҆ срѣ́тесѧ съ ни́ми, бра́та же своего̀ сі́мѡна ѡ҆ста́ви во странѣ̀.

⁶⁵И҆ ѡ҆полчи́сѧ сі́мѡнъ на веѳсѹ́рѹ, и҆ ра́товаша ю҆̀ дни҄ мнѡ́ги, и҆ заключѝ ю҆̀.

⁶⁶И҆ проси́ша ѹ҆ негѡ̀ десни́цѹ прїѧ́ти, и҆ дадѐ и҆̀мъ, и҆ и҆згна̀ и҆̀хъ ѿтѹ́дѹ, и҆ взѧ̀ гра́дъ, и҆ поста́ви въ не́мъстра́жѹ.

⁶⁷Ї҆ѡнаѳа́нъ же и҆ по́лкъ є҆гѡ̀ прїидо́ша къ водѣ̀ генниса́ръ:

⁶⁸и҆ и҆до́ша ѹ҆́трѡ ра́нѡ на по́ле насѡ́ръ, и҆ сѐ, по́лкъ и҆ноплеме́нникѡвъ срѣ́те є҆го̀ на по́ли, и҆ поста́виша на́нь лови́телство въ гора́хъ, са́ми же срѣто́ша ѿсѹпроти́вѹ.

⁶⁹Лови́телє же воста́ша ѿ мѣ́стъ свои́хъ и҆ соста́виша ра́ть,

⁷⁰и҆ побѣго́ша и҆̀же со ї҆ѡнаѳа́номъ всѝ, и҆ ни є҆ди́нъ ѡ҆ста́сѧ ѿ ни́хъ, то́кмѡ маттаѳі́а сы́нъ а҆вессалѡ́мовъ, и҆ ї҆ѹ́да сы́нъ халфі́евъ, нача҄лницы вои́нскихъ си́лъ.

⁷¹И҆ растерза̀ ї҆ѡнаѳа́нъ ри҄зы своѧ҄, и҆ возложѝ зе́млю на главѹ̀ свою̀, и҆ помоли́сѧ:

⁷²и҆ ѡ҆брати́сѧ на ни́хъ бра́нїю и҆ побѣдѝ и҆̀хъ, и҆ бѣго́ша.

⁷³И҆ ви́дѣша своѝ бѣжа́вшїи ѿ негѡ̀, и҆ ѡ҆брати́шасѧ къ немѹ̀, и҆ гна́ша съ ни́мъ да́же до ка́диса, да́же до полка̀ и҆́хъ, и҆ ѡ҆полчи́шасѧ та́мѡ.

⁷⁴И҆ падо́ша ѿ и҆ноплемє́нникъ въ де́нь то́й трѝ ты́сѧщы мѹже́й. и҆ возврати́сѧ ї҆ѡнаѳа́нъ во ї҆ер҇ли́мъ.