Read Библия Церковнославянская а҃ маккавей́скаѧ 13 Bible Online

а҃ маккавей́скаѧ 13 - Библия Церковнославянская bible

а҃ маккавей́скаѧ 13

¹И҆ слы́ша сі́мѡнъ, ѩ҆́кѡ собра̀ трѵ́фѡнъ си́лѹ мно́гѹ прїитѝ въ зе́млю ї҆ѹ́динѹ и҆ сокрѹши́ти ю҆̀,

²и҆ ви́дѣ лю́ди, ѩ҆́кѡ сѹ́ть въ стра́сѣ и҆ тре́петѣ, и҆ взы́де во ї҆ер҇ли́мъ и҆ собра̀ лю́ди,

³и҆ ѹ҆вѣща̀ и҆̀хъ и҆ речѐ и҆̀мъ: вы̀ вѣ́сте, є҆ли҄ка а҆́зъ и҆ бра́тїѧ моѧ҄ и҆ до́мъ ѻ҆тца̀ моегѡ̀ сотвори́хомъ и҆ ѡ҆ зако́нѣхъ и҆ ѡ҆ ст҃ы́хъ, и҆ бра҄ни и҆ тѣснѡты̀, и҆̀хже ви́дѣхомъ:

⁴сегѡ̀ ра́ди погибо́ша бра́тїѧ моѧ҄ всѝ ра́ди ї҆и҃лѧ, и҆ ѡ҆ста́хъ а҆́зъ є҆ди́нъ:

⁵и҆ нн҃ѣ не бѹ́ди мѝ пощади́ти дѹшѝ моеѧ̀ во всѧ́ко вре́мѧ скорбе́й, не бо̀ лѹ́чшїй є҆́смь бра́тїи моеѧ̀:

⁶ѻ҆ба́че ѿмщѹ̀ ѡ҆ ѩ҆зы́цѣ мое́мъ и҆ ѡ҆ ст҃ы́хъ и҆ ѡ҆ жена́хъ и҆ ча́дѣхъ на́шихъ: ѩ҆́кѡ собра́шасѧ всѝ ѩ҆зы́цы сотре́ти на́съ вражды̀ ра́ди.

⁷И҆ возгорѣ́шасѧ дѹ́хомъ лю́дїе вкѹ́пѣ послѹ́шати слове́съ си́хъ

⁸и҆ ѿвѣща́ша гла́сомъ ве́лїимъ, глаго́люще: ты̀ є҆сѝ во́ждь на́шъ вмѣ́стѡ ї҆ѹ́ды и҆ ї҆ѡнаѳа́на бра́та твоегѡ̀:

⁹поборѝ бра́нь на́шѹ, и҆ всѧ҄, є҆ли҄ка а҆́ще рече́ши на́мъ, сотвори́мъ.

¹⁰И҆ собра̀ всѧ҄ мѹ́жы бра́нники и҆ ѹ҆скорѝ соверши́ти всѧ҄ стѣ́ны ї҆ер҇ли҄мскїѧ и҆ ѹ҆твердѝ є҆го̀ ѡ҆́крестъ:

¹¹и҆ посла̀ ї҆ѡнаѳа́на сы́на а҆вессалѡ́мова и҆ съ ни́мъ си́лѹ дово́лнѹю во ї҆ѻппі́ю, и҆ и҆згна̀ сѹ́щихъ въ не́й и҆ пребы́сть та́мѡ въ не́й.

¹²И҆ воздви́жесѧ трѵ́фѡнъ ѿ птолемаі́ды съ си́лою ве́лїею вни́ти въ зе́млю ї҆ѹ́динѹ, и҆ ї҆ѡнаѳа́нъ съ ни́мъ въ стра́жи.

¹³Сі́мѡнъ же ѡ҆полчи́сѧ во а҆ді́дѣ на лицы̀ по́лѧ.

¹⁴И҆ позна̀ трѵ́фѡнъ, ѩ҆́кѡ воста̀ сі́мѡнъ вмѣ́стѡ бра́та своегѡ̀ ї҆ѡнаѳа́на и҆ ѩ҆́кѡ срази́тисѧ съ ни́мъ хо́щетъ бра́нїю,

¹⁵посла̀ къ немѹ̀ послы̀ глаго́лѧ: сребра̀ ра́ди, є҆́же до́лженъ бра́тъ тво́й ї҆ѡнаѳа́нъ царю̀, потре́бъ ра́ди, и҆̀хже и҆мѣ́ѧше, содержи́мъ є҆го̀:

¹⁶и҆ нн҃ѣ послѝ сребра̀ тала́нтѡвъ сто̀ и҆ два̀ сы҄на є҆гѡ̀ въ зало́гъ, ѩ҆́кѡ да не ѿпѹще́нъ ѿстѹ́питъ ѿ на́съ, и҆ ѿпѹ́стимъ є҆го̀.

¹⁷И҆ позна̀ сі́мѡнъ, ѩ҆́кѡ ле́стїю глаго́лютъ къ немѹ̀, и҆ посла̀ сребро̀ и҆ ѻ҆́троки, да не когда̀ враждѹ̀ прїи́метъ ве́лїю ѿ люді́й, глаго́лющихъ:

¹⁸ѩ҆́кѡ не посла̀ є҆мѹ̀ сребра̀ и҆ ѻ҆трокѡ́въ, и҆ поги́бе.

¹⁹И҆ посла̀ ѻ҆́троки и҆ сто̀ тала҄нтъ. И҆ солга̀ и҆ не ѿпѹстѝ ї҆ѡнаѳа́на.

²⁰И҆ по си́хъ прїи́де трѵ́фѡнъ, да вни́детъ во странѹ̀ и҆ сотре́тъ ю҆̀, и҆ ѡ҆бы́де пѹ́ть, и҆́же веде́тъ во а҆дѡ́рѹ: а҆ сі́мѡнъ и҆ по́лкъ є҆гѡ̀ противоидѧ́ше є҆мѹ̀ на всѧ́ко мѣ́сто, а҆́може и҆дѧ́ше.

²¹Сѹ́щїи же ѿ краегра́дїѧ посла́ша къ трѵ́фѡнѹ послѡ́въ понѹжда́ющихъ є҆го̀, да потщи́тсѧ прїитѝ къ ни҄мъ пѹсты́нею и҆ посла́ти и҆̀мъ пи́щы.

²²И҆ ѹ҆гото́ва трѵ́фѡнъ всѧ҄ ко́нники своѧ҄, є҆́же прїитѝ въ но́щь ѻ҆́нѹю. и҆ бѣ̀ снѣ́гъ ве́лїй ѕѣлѡ̀, и҆ не прїи́де снѣ́га ра́ди: и҆ воста̀ и҆ ѿи́де въ галааді́тїдѹ.

²³Е҆гда́ же прибли́жисѧ къ васка́мѣ, ѹ҆бѝ ї҆ѡнаѳа́на, и҆ погребе́нъ бы́ти та́мѡ.

²⁴И҆ возврати́сѧ трѵ́фѡнъ и҆ и҆́де въ зе́млю свою̀.

²⁵И҆ посла̀ сі́мѡнъ и҆ взѧ̀ кѡ́сти ї҆ѡнаѳа́на бра́та своегѡ̀ и҆ погребѐ ѧ҆̀ въ мѡди́нѣ гра́дѣ ѻ҆тє́цъ свои́хъ.

²⁶И҆ пла́каша є҆гѡ̀ ве́сь ї҆и҃ль пла́чемъ ве́лїимъ и҆ рыда́хѹ є҆гѡ̀ дни҄ мнѡ́ги.

²⁷И҆ созда̀ сі́мѡнъ над̾ гро́бомъ ѻ҆тца̀ своегѡ̀ и҆ бра́тїй свои́хъ, и҆ вознесѐ є҆го̀ видѣ́нїемъ, ка́менїемъ те́санымъ созадѝ и҆ сопредѝ,

²⁸и҆ поста́ви на ни́хъ се́дмь пѷрамі́дъ, є҆ди́нѹ проти́вѹ є҆ди́ноѧ, ѻ҆тцѹ̀ и҆ ма́тери и҆ четы́ремъ бра́тїѧмъ:

²⁹и҆ си҄мъ сотворѝ ѡ҆гра҄ды, и҆ ѡ҆бложѝ столпы̀ вели҄кїѧ, и҆ сотворѝ на столпѣ́хъ всеѻрѹ҄жїѧ въ па́мѧть вѣ́чнѹю, и҆ при всеѻрѹ́жїихъ корабли҄ и҆зва҄ѧнныѧ, во є҆́же ви҄димымъ бы́ти ѿ всѣ́хъ пла́вающихъ на мо́ри.

³⁰Се́й гро́бъ, є҆го́же сотворѝ въ мѡди́нѣ, да́же до сегѡ̀ днѐ.

³¹Трѵ́фѡнъ же хожда́ше ле́стїю со а҆нтїо́хомъ царе́мъ ю҆́нымъ, и҆ ѹ҆бѝ є҆го̀,

³²и҆ воцари́сѧ вмѣ́стѡ є҆гѡ̀, и҆ возложѝ на сѧ̀ дїади́мѹ а҆сі́йскѹю, и҆ сотворѝ ѩ҆́звѹ вели́кѹю на землѝ.

³³И҆ созда̀ сі́мѡнъ тверды҄ни ї҆ѹдє́йскїѧ, и҆ ѡ҆градѝ столпа́мивысо́кими и҆ стѣна́ми ве́лїими, и҆ врата́ми и҆ заво́рами, и҆ положѝ пи́щы въ тверды́нехъ.

³⁴И҆ и҆збра̀ сі́мѡнъ мѹ́жы и҆ посла̀ ко дими́трїю царю̀, да сотвори́тъ ѡ҆слабле́нїе странѣ̀, ѩ҆́кѡ всѧ҄ дѣла̀ трѵ́фѡнѡва бѣ́ша хищє́нїѧ.

³⁵И҆ посла̀ є҆мѹ̀ дими́трїй ца́рь по словесє́мъ си҄мъ, и҆ ѿвѣща̀ є҆мѹ̀, и҆ написа̀ є҆мѹ̀ є҆пїсто́лїю сицевѹ̀:

³⁶ца́рь дими́трїй сі́мѡнѹ а҆рхїере́ю и҆ дрѹ́гѹ царе́й и҆ старѣ́йшинамъ и҆ ѩ҆зы́кѹ ї҆ѹде́йскѹ ра́доватисѧ:

³⁷вѣне́цъ златы́й и҆ пе́рстень, ѩ҆̀же посла́лъ є҆сѝ, воспрїѧ́хомъ, и҆ гото́ви є҆смы̀ сотвори́ти съ ва́ми ми́ръ вели́къ и҆ писа́ти къ сѹ́щымъ над̾ да́ньми, є҆́же ѡ҆ста́вити ва́мъ да҄ни:

³⁸и҆ є҆ли҄ка ѹ҆ста́вихомъ ва́мъ, крѣ҄пка сѹ́ть, и҆ твєрды́ни, ѩ҆̀же созда́сте, да бѹ́дѹтъ ва́мъ:

³⁹ѿпѹща́емъ же невѣ҄дѣнїѧ и҆ согрѣшє́нїѧ да́же до дне́шнѧгѡ днѐ, и҆ вѣне́цъ, є҆го́же до́лжни бы́сте, и҆ а҆́ще ка́ѧ и҆на́ѧ да́нь бѣ̀ во ї҆ер҇ли́мѣ, ктомѹ̀ да не бѹ́дѹтъ дава́ємаѧ:

⁴⁰и҆ а҆́ще нѣ́цыи ѹ҆го́дни ѿ ва́съ вписа́тисѧ къ на́шымъ, да впи́шѹтсѧ, и҆ да бѹ́детъ междѹ̀ на́ми ми́ръ.

⁴¹Лѣ́та сто̀ седмьдесѧ́тагѡ ѿѧ́то бы́сть и҆́го ѩ҆зы́ческое ѿ ї҆и҃лѧ,

⁴²и҆ нача́ша лю́дїе ї҆и҃лєвы писа́ти въ писа́нїихъ и҆ въ совѣща́нїихъ: лѣ́та пе́рвагѡ при сі́мѡнѣ а҆рхїере́и вели́цѣмъ и҆ во́инѣ и҆ вождѝ ї҆ѹде́йстѣмъ.

⁴³Во дне́хъ ѻ҆́нѣхъ прїи́де сі́мѡнъ въ га́зѹ и҆ ѡ҆крѹжѝ ю҆̀ полка́ми, и҆ сотворѝ миха҄ны и҆ прибли́жисѧ ко гра́дѹ, и҆ и҆збѝ сто́лпъ є҆ди́нъ и҆ взѧ̀.

⁴⁴И҆ вскача́хѹ во гра́дъ и҆̀же бѧ́хѹ въ миха́нѣ, и҆ бы́сть смѧте́нїе ве́лїе въ гра́дѣ.

⁴⁵И҆ взыдо́ша и҆̀же бѣ́хѹ во гра́дѣ съ жена́ми и҆ ча҄ды на стѣ́нѹ, растє́рзаны и҆мѹ́ще ри҄зы своѧ҄, и҆ возопи́ша гла́сомъ ве́лїимъ, молѧ́ще сі́мѡна десни́цѹ и҆̀мъ да́ти,

⁴⁶и҆ реко́ша: не сотворѝ на́мъ по лѹка́вствѡмъ на́шымъ, но по ми́лости твое́й.

⁴⁷И҆ ѹ҆ми́лостивисѧ и҆̀мъ сі́мѡнъ, не воева̀ и҆́хъ, и҆ и҆згна̀ и҆̀хъ ѿ гра́да: и҆ ѡ҆чи́сти до́мы, въ ни́хже бѧ́хѹ їдѡли, и҆ та́кѡ вни́де въ ѻ҆́нь съ пѣ́сньми благословѧ̀ гд҇а:

⁴⁸и҆ и҆зве́рже и҆з̾ негѡ̀ всѧ́кѹю нечистотѹ̀, и҆ вселѝ въ не́мъ мѹ́жы, и҆̀же зако́нъ творѧ́тъ, и҆ ѹ҆твердѝ є҆го̀, и҆ сотворѝ себѣ̀ въ не́мъ ѡ҆бита́нїе.

⁴⁹Сѹ́щымъ же ѿ краегра́дїѧ во ї҆ер҇ли́мѣ возбранѧ́шесѧ и҆сходи́ти и҆ входи́ти во странѹ̀, и҆ кѹпова́ти и҆ продава́ти: и҆ взалка́ша ѕѣлѡ̀, и҆ мно́зи ѿ ни́хъ гла́домъ погибо́ша.

⁵⁰И҆ возопи́ша къ сі́мѡнѹ десни́цѹ прїѧ́ти, и҆ дадѐ и҆̀мъ, и҆ и҆згна̀ и҆̀хъ ѿтѹ́дѹ и҆ ѡ҆чи́сти краегра́дїе ѿ ѡ҆скверне́нїй.

⁵¹И҆ вни́де въ нѐ въ два́десѧть тре́тїй де́нь втора́гѡ мц҇а, лѣ́та сто̀ се́дмьдесѧтъ пе́рвагѡ съ хвале́нїемъ и҆ ва́їѧми, и҆ въ гѹ́слехъ и҆ кѷмва́лѣхъ и҆ сопѣ́лехъ, и҆ въ пѣ́снехъ и҆ пѣ́нїихъ, ѩ҆́кѡ сокрѹши́сѧ вра́гъ ве́лїй ѿ ї҆и҃лѧ.

⁵²И҆ ѹ҆ста́ви на всѧ́кое лѣ́то провожда́ти де́нь то́й съ весе́лїемъ, и҆ ѹ҆твердѝ го́рѹ свѧти́лища, ѩ҆́же бли́з̾ краегра́дїѧ, и҆ всели́сѧ тѹ̀ са́мъ и҆ и҆̀же съ ни́мъ.

⁵³И҆ ви́дѣ сі́мѡнъ ї҆ѡа́нна сы́на своего̀, ѩ҆́кѡ мѹ́жъ є҆́сть, и҆ поста́ви є҆го̀ вожда̀ си́лъ всѣ́хъ, и҆ всели́сѧ въ газа́рѣхъ.