Read Библия Церковнославянская а҃ маккавей́скаѧ 3 Bible Online

а҃ маккавей́скаѧ 3 - Библия Церковнославянская bible

а҃ маккавей́скаѧ 3

¹И҆ воста̀ ї҆ѹ́да нарица́емый маккаве́й сы́нъ є҆гѡ̀ вмѣ́стѡ є҆гѡ̀.

²И҆ помога́хѹ є҆мѹ̀ всѝ бра́тїѧ є҆гѡ̀ и҆ всѝ є҆ли́цы прилѣпи́шасѧ ко ѻ҆тцѹ̀ є҆гѡ̀, и҆ ѡ҆полча́хѹсѧ ѡ҆полче́нїемъ ї҆и҃ль съ весе́лїемъ.

³И҆ распространѝ сла́вѹ лю́демъ свои҄мъ: и҆ ѡ҆блече́сѧ въ бронѧ̀ ѩ҆́кѡ и҆споли́нъ и҆ препоѧ́сасѧ ѻ҆рѹ́жїемъ свои́мъ бра́ннымъ, и҆ соста́ви ра҄ти, защища́ѧ ѡ҆полчє́нїѧ мече́мъ свои́мъ,

⁴и҆ ѹ҆подо́бисѧ львѹ̀ въ дѣ́лѣхъ свои́хъ, и҆ ѩ҆́кѡ скѵ́менъ рыка́ющь въ лови́твѣ:

⁵и҆ погна̀ беззакѡ́нныѧ и҆зслѣ́дѹѧй, и҆ смѹща́ющихъ лю́ди є҆гѡ̀ пожжѐ пла́менемъ.

⁶И҆ слѧко́шасѧ беззако́ннїи ѿ стра́ха є҆гѡ̀, и҆ всѝ дѣ́лателє беззако́нїѧ смѧто́шасѧ, и҆ благопоспѣ́шно бы́ти спасе́нїе рѹко́ю є҆гѡ̀.

⁷И҆ ѡ҆горчѝ цари҄ мнѡ́ги и҆ возвеселѝ ї҆а́кѡва въ дѣ́лѣхъ свои́хъ, и҆ да́же до вѣ́ка па́мѧть є҆гѡ̀ во благослове́нїе:

⁸и҆ про́йде гра́ды ї҆ѹ҄дины, и҆ погѹбѝ нечести́выхъ ѿ ни́хъ, и҆ ѿвратѝ гнѣ́въ ѿ ї҆и҃лѧ,

⁹и҆ и҆мени́тъ бы́сть да́же до послѣ́днихъ землѝ, и҆ собра̀ погиба́ющихъ.

¹⁰А҆поллѡ́нїй же собра̀ ѩ҆зы́ки и҆ ѿ самарі́и си́лѹ ве́лїю, є҆́же ра́товати на ї҆и҃лѧ.

¹¹И҆ ѹ҆вѣ́да ї҆ѹ́да и҆ и҆зы́де во срѣ́тенїе є҆мѹ̀, и҆ поразѝ є҆го̀ и҆ ѹ҆бѝ того̀: и҆ падо́ша ѩ҆́звенїи мно́зи, а҆ про́чїи ѹ҆бѣго́ша.

¹²И҆ взѧ̀ коры҄сти и҆́хъ, и҆ ме́чь а҆поллѡ́нїевъ ѿѧ̀ ї҆ѹ́да, и҆ бы́сть вою́ѧ и҆́мъ всѧ҄ дни҄.

¹³И҆ ѹ҆слы́ша сирѡ́нъ нача́лникъ во́євъ сѵ́рскихъ, ѩ҆́кѡ собра̀ ї҆ѹ́да совокѹпле́нїе и҆ цр҃ковь вѣ́рныхъ съ ни́мъ и҆сходѧ́щихъ на бра́нь,

¹⁴и҆ речѐ: сотворю̀ себѣ̀ и҆́мѧ, и҆ просла́влюсѧ въ ца́рствїи, и҆ поборю̀ ї҆ѹ́дѹ и҆ сѹ́щихъ съ ни́мъ и҆ ѹ҆ничижа́ющихъ сло́во царе́во.

¹⁵(и҆ ѹ҆гото́васѧ) и҆ приложѝ є҆́же взы́ти: и҆ взы́де съ ни́мъ по́лкъ нечести́выхъ крѣ́покъ помощѝ є҆мѹ̀ и҆ сотвори́ти ѿмще́нїе на сынѣ́хъ ї҆и҃левыхъ.

¹⁶И҆ прибли́жисѧ да́же до восхо́да веѳѡрѡ́нска: и҆ и҆зы́де ї҆ѹ́да во срѣ́тенїе є҆мѹ̀ въ ма́лѣ.

¹⁷Е҆гда́ же ѹ҆ви́дѣша по́лкъ грѧдѹ́щїй во срѣ́тенїе и҆̀мъ, рѣ́ша ї҆ѹ́дѣ: ка́кѡ мо́жемъ въ ма́лѣ сѹ́ще ѡ҆полча́тисѧ проти́вѹ мно́жества толи́кагѡ крѣ́пкагѡ; и҆ мы̀ ѹ҆трѹжде́ни є҆смы̀ посто́мъ дне́сь.

¹⁸И҆ речѐ ї҆ѹ́да: ѹ҆до́бь є҆́сть ѡ҆б̾ѧ́ти мно́гихъ рѹко́ю ма́лыхъ: и҆ нѣ́сть ра́знствїѧ пред̾ бг҃омъ нб҇нымъ сп҇тѝ во мно́гихъ и҆лѝ въ ма́лыхъ:

¹⁹ѩ҆́кѡ не во мно́жествѣ во́євъ ѡ҆долѣ́нїе бра́ни є҆́сть, то́кмѡ ѿ нб҃сѐ крѣ́пость:

²⁰сі́и грѧдѹ́тъ къ на́мъ во мно́жествѣ ѹ҆кори́зны и҆ беззако́нїѧ, є҆́же и҆сто́ргнѹти на́съ и҆ жєны̀ на́шѧ и҆ ча҄да на҄ша, є҆́же взѧ́ти коры҄сти на́шѧ,

²¹мы́ же ѡ҆полча́емсѧ за дѹ́шы на́шѧ и҆ зако́ны на́шѧ:

²²и҆ са́мъ гд҇ь сокрѹши́тъ и҆̀хъ пред̾ лице́мъ на́шимъ, вы́ же не ѹ҆страши́тесѧ и҆́хъ.

²³ѩ҆́коже преста̀ глаго́лати, и҆ наскочѝ на ни́хъ внеза́пѹ, и҆ сотре́сѧ сирѡ́нъ и҆ вѡ́и є҆гѡ̀ пред̾ ни́мъ:

²⁴и҆ погна̀ є҆го̀ въ низхожде́нїе веѳѡрѡ́на да́же до по́лѧ: и҆ падо́ша ѿ ни́хъ ѩ҆́кѡ ѻ҆́смь сѡ́тъ мѹже́й, про́чїи же побѣго́ша въ зе́млю фѷлїсті́млю.

²⁵И҆ нападѐ стра́хъ ї҆ѹ́динъ и҆ бра́тїи є҆гѡ̀ и҆ боѧ́знь на всѧ҄ ѩ҆зы́ки, ѩ҆̀же ѡ҆́крестъ и҆́хъ.

²⁶И҆ до́йде до царѧ̀ и҆́мѧ є҆гѡ̀, и҆ ѡ҆ ѡ҆полче́нїихъ ї҆ѹ́диныхъ повѣ́дахѹ всѝ ѩ҆зы́цы.

²⁷Е҆гда́ же ѹ҆слы́ша ца́рь а҆нтїо́хъ словеса̀ сїѧ҄, разгнѣ́васѧ ѩ҆́ростїю, и҆ посла́въ собра̀ си҄лы всѧ҄ ца́рства своегѡ̀, по́лкъ крѣ́покъ ѕѣлѡ̀:

²⁸и҆ ѿве́рзе сокро́вище своѐ, и҆ дадѐ ѡ҆бро́ки во́инѡмъ свои҄мъ на лѣ́то, и҆ заповѣ́да и҆̀мъ въ лѣ́то бы́ти готѡ́вымъ на всѧ́кѹ потре́бѹ.

²⁹И҆ ви́дѣ, ѩ҆́кѡ ѡ҆скѹдѣ̀ сребро̀ ѿ сокро́вищъ, и҆ да҄ни ѿ стра́нъ ма҄лы, ра́ди несогла́сїѧ и҆ ѩ҆́звы, ѩ҆̀же сотворѝ на землѝ, да во́зметъ закѡ́ннаѧ, ѩ҆̀же бѧ́хѹ ѿ пе́рвыхъ дні́й.

³⁰И҆ ѹ҆страши́сѧ, да не вознеимѣ́етъ є҆ди́ною и҆ два́жды въ росхо́ды и҆ даѧ҄нїѧ, ѩ҆̀же даѧ́ше пре́жде простра́нною рѹко́ю, и҆ и҆збы́точествова па́че царе́й бы́вшихъ пре́жде.

³¹И҆ смѧте́сѧ дѹше́ю свое́ю ѕѣлѡ̀, и҆ ѹ҆мы́сли и҆тѝ въ персі́дѹ и҆ прїѧ́ти да҄ни ѿ стра́нъ и҆ собра́ти сребра̀ мно́гѡ.

³²И҆ ѡ҆ста́ви лѷсі́ю человѣ́ка сла́вна и҆ ѿ ро́да ца́рска над̾ вещьмѝ ца́рскими, ѿ рѣкѝ є҆ѵфра́та да́же до предѣ҄лъ є҆гѵ́петскихъ:

³³и҆ пита́ти а҆нтїо́ха сы́на своего̀, до́ндеже возврати́тсѧ са́мъ.

³⁴И҆ предадѐ є҆мѹ̀ по́лъ си́лы и҆ слонѡ́въ и҆ заповѣ́да є҆мѹ̀ ѡ҆ всѣ́хъ, и҆́хже совѣща̀, и҆ ѡ҆ ѡ҆бита́ющихъ во ї҆ѹде́и и҆ ї҆ер҇ли́мѣ,

³⁵посла́ти на ни́хъ си́лѹ, є҆́же сокрѹши́ти и҆ и҆сто́ргнѹти крѣ́пость ї҆и҃левѹ и҆ ѡ҆ста́нокъ ї҆ер҇ли́ма, и҆ ѿѧ́ти па́мѧть и҆́хъ ѿ мѣ́ста,

³⁶и҆ всели́ти сынѡ́въ и҆норо́дныхъ во всѣ́хъ предѣ́лѣхъ и҆́хъ, и҆ по жре́бїю раздѣли́ти зе́млю и҆́хъ.

³⁷И҆ ца́рь взѧ̀ по́лъ си́лы ѡ҆ста́вшихъ и҆ и҆зы́де ѿ а҆нтїохі́и ѿ гра́да ца́рства своегѡ̀, лѣ́та сто̀ четы́редесѧть седма́гѡ: и҆ пре́йде є҆ѵфра́тъ рѣкѹ̀ и҆ прохожда́ше въ вы҄шнїѧ страны҄.

³⁸И҆ и҆збра̀ лѷсі́а птоломе́а сы́на дорѷме́нова, и҆ нїкано́ра, и҆ горгі́ю мѹ́жы си҄льныѧ ѿ дрѹгѡ́въ царе́выхъ.

³⁹И҆ посла̀ съ ни́ми четы́редесѧть ты́сѧщъ мѹже́й и҆ се́дмь ты́сѧщъ ко́нникѡвъ, є҆́же и҆тѝ въ зе́млю ї҆ѹ́динѹ и҆ растли́ти ю҆̀ по словесѝ ца́рскѹ.

⁴⁰И҆ ѿидо́ша со все́ю си́лою свое́ю, и҆ прїидо́ша, и҆ ѡ҆полчи́шасѧ бли́з̾ а҆ммаѹ́ма на землѝ полево́й.

⁴¹И҆ слы́шаша кѹпцы̀ страны̀ тоѧ̀ и҆́мѧ и҆́хъ, и҆ взѧ́ша сребро̀ и҆ зла́то мно́го ѕѣлѡ̀ и҆ ѻ҆́троки: и҆ прїидо́ша въ станы̀, да во́змѹтъ сынѡ́въ ї҆и҃левыхъ въ рабы҄, и҆ приложи́шасѧ къ ни҄мъ вѡ́и сѵ́рскїѧ и҆ землѝ и҆ноплеме́нникѡвъ.

⁴²И҆ ви́дѣ ї҆ѹ́да и҆ бра́тїѧ є҆гѡ̀, ѩ҆́кѡ ѹ҆мно́жишасѧ ѕла҄ѧ, и҆ вѡ́и ѡ҆полча́хѹсѧ въ предѣ́лѣхъ и҆́хъ: и҆ позна́ша словеса̀ царє́ва, ѩ҆̀же повелѣ̀ лю́демъ сотвори́ти въ погѹбле́нїе и҆ сконча́нїе.

⁴³И҆ речѐ кі́йждо ко и҆́скреннемѹ своемѹ̀: воста́немъ за и҆стребле́нїе люді́й на́шихъ и҆ ѡ҆полчи́мсѧ за лю́ди на́шѧ и҆ ст҃ы҄ѧ.

⁴⁴И҆ собра́сѧ со́нмъ є҆́же бы́ти готѡ́вымъ на бра́нь и҆ є҆́же моли́тисѧ и҆ проси́ти ми́лости и҆ щедро́тъ.

⁴⁵И҆ ї҆ер҇ли́мъ бѣ̀ неѡбита́емь а҆́ки пѹсты́нѧ: не бѣ̀ входѧ́й и҆ и҆сходѧ́й ѿ порожде́нїй є҆гѡ̀, и҆ ст҃ы́нѧ попра́на, и҆ сы́нове и҆норо́дныхъ въ краегра́дїи, бы́сть ѡ҆бита́лище ѩ҆зы́кѡмъ: и҆ взѧ́сѧ весе́лїе ѿ ї҆а́кѡва, и҆ ѡ҆скѹдѣ̀ (тѹ̀) сопѣ́ль и҆ гѹ́сли.

⁴⁶И҆ собра́шасѧ и҆ прїидо́ша въ массифѹ̀ прѧ́мѡ ї҆ер҇ли́мѹ, поне́же мѣ́сто моли́твы въ массифѣ̀ пе́рвѣе ї҆и҃лю.

⁴⁷И҆ пости́шасѧ тогѡ̀ днѐ, и҆ ѡ҆блеко́шасѧ во врє́тища, и҆ пе́пелъ посы́паша на главы҄ своѧ҄, и҆ растерза́ша ѡ҆дѣѧ҄нїѧ своѧ҄,

⁴⁸и҆ распростро́ша кни́гѹ зако́на, ѡ҆ ни́хже и҆спыта́хѹ ѩ҆зы́цы написа́ти на ни́хъ подѡ́бїѧ їдѡлъ свои́хъ,

⁴⁹и҆ принесо́ша ри҄зы свѧти́тєлскїѧ и҆ перворѡ́днаѧ и҆ десѧти҄ны: и҆ воздви́гнѹша назїре́євъ, и҆̀же напо́лниша дни҄,

⁵⁰и҆ возопи́ша гла́сомъ (ве́лїимъ) на нб҃о, рекѹ́ще: что̀ сотвори́мъ си҄мъ и҆ ка́мѡ и҆̀хъ ѿведе́мъ;

⁵¹и҆ ст҃а҄ѧ твоѧ҄ попра́шасѧ и҆ ѡ҆скверни́шасѧ, и҆ свѧще́нницы твоѝ въ ско́рби и҆ въ смире́нїи:

⁵²и҆ сѐ, ѩ҆зы́цы собра́шасѧ на ны̀, да расто́ргнѹтъ на́съ: ты̀ вѣ́си, ѩ҆̀же помышлѧ́ютъ на на́съ:

⁵³ка́кѡ возмо́жемъ ста́ти пред̾ лице́мъ и҆́хъ, а҆́ще не ты̀ помо́жеши на́мъ;

⁵⁴И҆ вострѹби́ша трѹба́ми и҆ возопи́ша гла́сомъ ве́лїимъ.

⁵⁵И҆ посе́мъ поста́ви ї҆ѹ́да воевѡ́ды люді́й, ты́сѧщники и҆ со́тники, и҆ пѧтьдесѧ́тники и҆ десѧтонача́лники.

⁵⁶И҆ реко́ша созида́ющымъ до́мы и҆ ѡ҆брѹча́ющымъ жєны̀, и҆ насажда́ющымъ вїногра́ды и҆ боѧзли҄вымъ возврати́тисѧ комѹ́ждо въ до́мъ сво́й по зако́нѹ.

⁵⁷И҆ воздви́жесѧ по́лкъ и҆ ѡ҆полчи́сѧ на ю҆́гъ а҆ммаѹ́ма.

⁵⁸И҆ речѐ ї҆ѹ́да: препоѧ́шитесѧ, и҆ бѹ́дите въ сы́ны си҄льны, и҆ бѹ́дите гото́ви въ заѹ́трїе ѡ҆полчи́тисѧ на ѩ҆зы́ки сїѧ҄, и҆̀же собра́шасѧ на ны̀ растерза́ти на́съ и҆ ст҃а҄ѧ на҄ша:

⁵⁹ѩ҆́кѡ лѹ́чше є҆́сть на́мъ ѹ҆мре́ти въ бра́ни, не́же ви́дѣти ѕла҄ѧ люді́й на́шихъ и҆ ст҃ы́хъ:

⁶⁰и҆ ѩ҆́коже во́лѧ бѹ́детъ на нб҃сѝ, та́кѡ сотвори́тъ.