Read Библия Церковнославянская а҃ маккавей́скаѧ 4 Bible Online

а҃ маккавей́скаѧ 4 - Библия Церковнославянская bible

а҃ маккавей́скаѧ 4

¹И҆ взѧ̀ горгі́а пѧ́ть ты́сѧщъ мѹже́й и҆ ты́сѧщѹ кѡ́нникъ и҆збра́нныхъ, и҆ подвиго́ша по́лкъ но́щїю,

²є҆́же напа́сти на по́лкъ ї҆ѹде́йскїй и҆ поби́ти и҆̀хъ внеза́пѹ, и҆ сы́нове краегра́дїѧ бы́ша є҆мѹ̀ вожде́ве.

³И҆ ѹ҆слы́ша ї҆ѹ́да, и҆ воста̀ са́мъ и҆ си́льнїи, поби́ти си́лѹ царе́вѹ, ѩ҆́же въ є҆ммаѹ́мѣ:

⁴є҆ще́ бо си҄лы расточє́ны бы́ша ѿ полка̀.

⁵И҆ прїи́де горгі́а въ по́лкъ ї҆ѹ́динъ но́щїю и҆ ни є҆ди́нагѡ ѡ҆брѣ́те: и҆ и҆ска́ше и҆̀хъ въ гора́хъ, поне́же речѐ: бѣжа́тъ сі́и ѿ на́съ.

⁶И҆ вкѹ́пѣ со дне́мъ ѩ҆ви́сѧ ї҆ѹ́да на по́ли со тремѧ̀ ты́сѧщами мѹже́й: ѻ҆ба́че щитѡ́въ и҆ мече́й не и҆мѧ́хѹ, ѩ҆́коже хотѧ́хѹ.

⁷И҆ ви́дѣша по́лкъ ѩ҆зы́ческїй крѣ́покъ воѡрѹже́нъ и҆ ко́нники ѡ҆́крестъ є҆гѡ̀, и҆ сі́и наѹче́ни бра́ни.

⁸И҆ речѐ ї҆ѹ́да мѹжє́мъ, и҆̀же съ ни́мъ бѧ́хѹ: не ѹ҆бо́йтесѧ мно́жества и҆́хъ и҆ ѹ҆стремле́нїѧ и҆́хъ не ѹ҆жаса́йтесѧ:

⁹помѧни́те, ка́кѡ спасе́ни бы́ша ѻ҆тцы̀ на́ши въ мо́ри чермнѣ́мъ, є҆гда̀ гонѧ́ше и҆̀хъ фараѡ́нъ съ вѡ́и мно́гими:

¹⁰и҆ нн҃ѣ возопі́имъ на нб҃о, не́гли ка́кѡ ѹ҆мл҇рдитсѧ на ны̀ и҆ помѧне́тъ завѣ́тъ ѻ҆тцє́въ на́шихъ и҆ сокрѹши́тъ по́лкъ се́й пред̾ лице́мъ на́шимъ дне́сь:

¹¹и҆ ѹ҆вѣ́дѧтъ всѝ ѩ҆зы́цы, ѩ҆́кѡ є҆́сть и҆збавлѧ́ѧй и҆ сп҃са́ѧй ї҆и҃лѧ.

¹²И҆ возведо́ша и҆ноплемє́нницы ѻ҆́чи своѝ и҆ ви́дѣша и҆̀хъ грѧдѹ́щихъ сопроти́вѹ,

¹³и҆ и҆зыдо́ша и҆з̾ полка̀ на бра́нь и҆ вострѹби́ша и҆̀же со ї҆ѹ́дою.

¹⁴И҆ срази́шасѧ: и҆ сотре́ни бы́ша ѩ҆зы́цы и҆ побѣго́ша въ по́ле,

¹⁵послѣ́днїи же всѝ падо́ша мече́мъ: и҆ прогна́ша и҆̀хъ да́же до а҆ссарїмѡ́ѳа и҆ да́же до по́ль ї҆дѹме́йскихъ и҆ а҆зѡ́тскихъ и҆ ї҆амні́йскихъ, и҆ падо́ша ѿ ни́хъ до трїе́хъ ты́сѧщъ мѹже́й.

¹⁶И҆ возврати́сѧ ї҆ѹ́да и҆ вѡ́и є҆гѡ̀ ѿ гоне́нїѧ в̾слѣ́дъ и҆́хъ,

¹⁷и҆ речѐ къ лю́демъ: не вожделѣ́йте коры́стей, поне́же бра́нь проти́вѹ на́съ:

¹⁸и҆ горгі́а и҆ вѡ́и є҆гѡ̀ бли́з̾ на́съ на горѣ̀: но сто́йте нн҃ѣ проти́вѹ врагѡ́въ на́шихъ и҆ побори́те и҆̀хъ, и҆ по си́хъ во́змете кѡры́сти без̾ боѧ́зни.

¹⁹И҆ є҆щѐ глаго́лющѹ ї҆ѹ́дѣ сїѧ҄, сѐ, ѩ҆ви́сѧ ча́сть нѣ́каѧ приница́ющаѧ съ горы̀.

²⁰И҆ ви́дѣ, ѩ҆́кѡ въ бѣ́гъ ѡ҆брати́шасѧ, и҆ зажго́ша по́лкъ, и҆̀же сѹ́ть со ї҆ѹ́дою, ды́мъ бо зри́мый ѩ҆влѧ́ше бы́вшее.

²¹Смотрѧ́щїи же сїѧ҄ ѹ҆боѧ́шасѧ ѕѣлѡ̀: ви́дѧще же ѡ҆полче́нїе ї҆ѹ́дино въ по́ли гото́во на бра́нь, бѣжа́ша всѝ въ зе́млю и҆ноплеме́нникѡвъ.

²²И҆ ѡ҆брати́сѧ ї҆ѹ́да на кѡры́сти ѡ҆полче́нїѧ:

²³и҆ взѧ̀ зла́та мно́гѡ и҆ сребра̀, и҆ ѵ҆акі́нѳа и҆ порфѵ́ры морскі́ѧ, и҆ бога҄тства вели҄ка.

²⁴И҆ возвраща́ющесѧ пѣ́снь поѧ́хѹ и҆ благословлѧ́хѹ бг҃а нб҇наго, ѩ҆́кѡ бл҃гъ є҆́сть, ѩ҆́кѡ въ вѣ́къ мл҇ть є҆гѡ̀.

²⁵И҆ бы́сть сп҇нїе вели́ко ї҆и҃лю въ де́нь ѡ҆́нъ.

²⁶Е҆ли́цы же ѿ и҆ноплеме́нникѡвъ ѹ҆цѣлѣ́ша, прише́дше возвѣсти́ша лѷсі́и всѧ҄ слѹчи҄вшаѧсѧ.

²⁷Ѻ҆́нъ же слы́шавъ ѹ҆ны̀ дѹше́ю и҆ ѡ҆печа́лисѧ, ѩ҆́кѡ не ѩ҆̀же хотѧ́ше, такѡва̀ бы́ша ї҆и҃лю, и҆ не какѡва̀ заповѣ́да є҆мѹ̀ ца́рь, сицева҄ѧ сбы́шасѧ.

²⁸И҆ во грѧдѹ́щее лѣ́то собра̀ лѷсі́а мѹже́й и҆збра́нныхъ шестьдесѧ́тъ ты́сѧщъ и҆ ко́нникѡвъ пѧ́ть ты́сѧщъ, да побїе́тъ ї҆ер҇ли́мъ.

²⁹И҆ прїидо́ша во ї҆дѹме́ю и҆ ѡ҆полчи́шасѧ во веѳсѹ́рѣхъ, и҆ срѣ́те и҆̀хъ ї҆ѹ́да съ десѧтїю̀ ты́сѧщьми мѹже́й.

³⁰И҆ ви́дѣ по́лкъ крѣ́покъ, и҆ помоли́сѧ, и҆ речѐ: блг҇ве́нъ є҆сѝ, сп҇се ї҆и҃левъ, сокрѹши́вый стремле́нїе си́льнагѡ рѹко́ю раба̀ твоегѡ̀ даві́да, и҆ пре́далъ є҆сѝ по́лкъ и҆ноплеме́нныхъ въ рѹ́ки ї҆ѡнаѳа́на сы́на саѹ́лѧ и҆ носѧ́щагѡ ѻ҆рѹ́жїе є҆гѡ̀:

³¹заключѝ по́лкъ се́й рѹко́ю люді́й твои́хъ ї҆и҃лѧ, и҆ да постыдѧ́тсѧ ѡ҆ си́лѣ и҆ ко́нницѣ свое́й:

³²да́ждь и҆̀мъ боѧ́знь и҆ раста́й де́рзость си́лы и҆́хъ, и҆ да поколе́блютсѧ сотре́нїемъ свои́мъ:

³³низложѝ и҆̀хъ мече́мъ лю́бѧщихъ тѧ̀, и҆ да восхва́лѧтъ тебѐ всѝ вѣ́дѹщїи и҆́мѧ твоѐ въ пѣ́снехъ.

³⁴И҆ соста́виша бра́нь, и҆ падо́ша ѿ полка̀ лѷсі́и до пѧтѝ ты́сѧщъ мѹже́й, и҆ падо́ша пред̾ ни́ми.

³⁵Ви́дѧ же лѷсі́а своегѡ̀ ѡ҆полче́нїѧ бы́вшее бѣжа́нїе, а҆ ї҆ѹ́динѹ бы́вшѹю де́рзость, и҆ ѩ҆́кѡ гото́ви сѹ́ть и҆лѝ жи́ти, и҆лѝ ѹ҆мре́ти хра́брѡ, ѿи́де во а҆нтїохі́ю и҆ собира́ше чѹжди́хъ во́євъ: и҆ ѹ҆мно́живъ бы́вшее во́инство, ѹ҆мы́сли па́ки прїитѝ на ї҆ѹде́ю.

³⁶Рече́ же ї҆ѹ́да и҆ бра́тїѧ є҆гѡ̀: сѐ, сотре́ни сѹ́ть вразѝ на́ши, взы́демъ нн҃ѣ ѡ҆чи́стити ст҃а҄ѧ и҆ ѡ҆бнови́ти.

³⁷И҆ собра́сѧ ве́сь по́лкъ и҆ взыдо́ша на го́рѹ сїѡ́нъ:

³⁸и҆ ви́дѣша ст҃ы́ню ѡ҆пѹстоше́нѹ, и҆ же́ртвенникъ ѡ҆скверне́нъ, и҆ врата̀ сожжє́на, и҆ въ притво́рѣхъ возрасто́ша дре́вїе а҆́ки въ дѹбра́вѣ, и҆лѝ а҆́ки во є҆ди́нѣй ѿ го́ръ, и҆ пастофѡ́рїа разбїє́на.

³⁹И҆ растерза́ша ри҄зы своѧ҄ и҆ пла́каша пла́чемъ ве́лїимъ, и҆ возложи́ша пе́пелъ на главы҄ своѧ҄,

⁴⁰и҆ падо́ша лице́мъ на зе́млю, и҆ вострѹби́ша трѹ́бнымъ зна́менїемъ, и҆ возопи́ша на нб҃о.

⁴¹Тогда̀ повелѣ̀ ї҆ѹ́да мѹжє́мъ ра́товати сѹ́щихъ въ краегра́дїи, до́ндеже ѡ҆чи́ститъ ст҃а҄ѧ.

⁴²И҆ и҆збра̀ свѧще́нники непорѡ́чны воли́тєли зако́на бж҃їѧ:

⁴³и҆ ѡ҆чи́стиша ст҃а҄ѧ и҆ ѿверго́ша ка́менїе ѡ҆скверне́нїѧ въ мѣ́сто нечи́сто:

⁴⁴и҆ совѣ́товаша ѡ҆ же́ртвенницѣ всесожже́нїѧ ѡ҆скверне́нѣмъ, что̀ є҆мѹ̀ сотворѧ́тъ:

⁴⁵и҆ нападѐ и҆̀мъ совѣ́тъ бла́гъ разори́ти є҆го̀, да не когда̀ бѹ́детъ и҆̀мъ въ поноше́нїе, ѩ҆́кѡ ѡ҆скверни́ша є҆го̀ ѩ҆зы́цы. и҆ разори́ша же́ртвенникъ,

⁴⁶и҆ положи́ша ка́менїе на горѣ̀ хра́ма на мѣ́стѣ прили́чнѣмъ, до́ндеже прїи́детъ про҇ро́къ ѿвѣща́ти ѡ҆ ни́хъ:

⁴⁷и҆ взѧ́ша ка́менїе цѣ́ло по зако́нѹ и҆ созда́ша же́ртвенникъ но́въ по пре́жнемѹ.

⁴⁸И҆ созда́ша ст҃а҄ѧ и҆ всѧ҄ ѩ҆̀же внѹ́трь хра́ма, и҆ притво́ры ѡ҆свѧти́ша,

⁴⁹и҆ сотвори́ша сосѹ́ды ст҃ы҄ѧ нѡ́вы, и҆ внесо́ша свѣти́лникъ и҆ же́ртвенникъ всесожже́нїй и҆ ѳѷмїа́мѡвъ и҆ трапе́зѹ во хра́мъ,

⁵⁰и҆ кади́ша на же́ртвенницѣ, и҆ возжго́ша свѣти́лники, ѩ҆̀же на подсвѣ́щницѣ, и҆ свѣтѧ́хѹ во хра́мѣ,

⁵¹и҆ положи́ша на трапе́зѣ хлѣ́бы и҆ простро́ша катапета҄смы, и҆ сконча́ша всѧ҄ дѣла̀, ѩ҆̀же творѧ́хѹ.

⁵²И҆ ѕѣлѡ̀ ра́нѡ воста́ша въ пѧ́тый и҆ двадесѧ́тый де́нь мц҇а девѧ́тагѡ: се́й мц҇ъ хасле́ѵъ, сто̀ четы́редесѧть ѻ҆сма́гѡ лѣ́та.

⁵³И҆ принесо́ша же́ртвѹ по зако́нѹ на ѻ҆лта́рь всесожже́нїй но́вый, є҆го́же сотвори́ша:

⁵⁴по вре́мени и҆ по днѝ, въ ѻ҆́ньже ѡ҆скверни́ша є҆го̀ ѩ҆зы́цы, во ѡ҆́нъ ѡ҆бнови́сѧ въ пѣ́снехъ и҆ гѹ́слехъ и҆ кїнѵ́рѣхъ и҆ въ кѷмва́лѣхъ.

⁵⁵И҆ падо́ша всѝ лю́дїе на лицѐ своѐ и҆ поклони́шасѧ, и҆ благослови́ша на нб҃о бл҃гопоспѣши́вшаго и҆̀мъ:

⁵⁶и҆ сотвори́ша ѡ҆бновле́нїе ѻ҆лтарѧ̀ дні́й ѻ҆́смь, и҆ принесо́ша всесожжє́нїѧ съ весе́лїемъ, и҆ пожро́ша же́ртвѹ спасе́нїѧ и҆ хвале́нїѧ,

⁵⁷и҆ ѹ҆краси́ша сѹ́щее пред̾ лице́мъ хра́ма вѣнцы҄ златы́ми и҆ щита́ми, и҆ ѡ҆бнови́ша врата̀ и҆ пастофѡ́рїа, и҆ поста́виша двє́ри.

⁵⁸И҆ бы́сть весе́лїе въ лю́дехъ вели́ко ѕѣлѡ̀, и҆ ѿвраще́но бы́сть поноше́нїе ѩ҆зы́кѡвъ.

⁵⁹И҆ ѹ҆ста́ви ї҆ѹ́да и҆ бра́тїѧ є҆гѡ̀ и҆ ве́сь собо́ръ ї҆и҃левъ, да пра́зднѹютсѧ дні́е ѡ҆бновле́нїѧ ѻ҆лтарѧ̀ во времена̀ своѧ҄ на всѧ́ко лѣ́то дні́й ѻ҆́смь, ѿ два́десѧть пѧ́тагѡ днѐ мц҇а хасле́ѵъ съ весе́лїемъ и҆ ра́достїю.

⁶⁰И҆ созда́ша во вре́мѧ ѻ҆́но го́рѹ сїѡ́нъ, ѡ҆́крестъ стѣ́ны высѡ́кїѧ и҆ пѵ́рги крѣ҄пки, да не когда̀ прише́дше ѩ҆зы́цы поперѹ́тъ ѧ҆̀, ѩ҆́коже пре́жде сотвори́ша.

⁶¹И҆ посадѝ тѹ̀ во́євъ храни́ти ю҆̀, и҆ ѹ҆тверди́ша ю҆̀ храни́ти веѳсѹ́рѹ, є҆́же и҆мѣ́ти лю́демъ въ тверды́ню проти́вѹ лица̀ ї҆дѹме́и.