Read Библия Церковнославянская а҃ маккавей́скаѧ 6 Bible Online

а҃ маккавей́скаѧ 6 - Библия Церковнославянская bible

а҃ маккавей́скаѧ 6

¹И҆ ца́рь а҆нтїо́хъ прохожда́ше вы҄шнїѧ страны҄ и҆ слы́ша, ѩ҆́кѡ є҆́сть є҆лѷмаі́съ въ персі́дѣ гра́дъ сла́венъ бога́тствомъ, сребро́мъ и҆ зла́томъ,

²и҆ хра́мъ въ не́мъ бога́тъ ѕѣлѡ̀, и҆ тѹ̀ запѡ́ны зла҄ты, и҆ брѡнѧ̀ и҆ ѻ҆рѹ҄жїѧ, ѩ҆̀же ѡ҆ста́ви тѹ̀ а҆леѯа́ндръ сы́нъ фїлі́пповъ, ца́рь македѡ́нскїй, и҆́же ца́рствова пе́рвый во є҆́ллинѣхъ.

³И҆ прїи́де и҆ и҆ска́ше взѧ́ти гра́дъ и҆ плѣни́ти є҆го̀, и҆ не возмо́же, ѩ҆́кѡ позна́сѧ сло́во сѹ́щымъ во гра́дѣ.

⁴И҆ воста́ша проти́вѹ є҆мѹ̀ на бра́нь, и҆ побѣжѐ ѿтѹ́дѹ, и҆ и҆́де со ско́рбїю ве́лїею, и҆ возврати́сѧ въ вавѷлѡ́нъ.

⁵И҆ прїи́де возвѣща́ѧй є҆мѹ̀ нѣ́кто въ персі́дѹ, ѩ҆́кѡ ѿбѣго́ша полцы̀ ходи́вшїи во ї҆ѹде́ю.

⁶И҆ ходѝ лѷсі́а съ си́лою крѣ́пкою въ пе́рвыхъ, и҆ прогна́нъ бы́сть ѿ лица̀ и҆́хъ, и҆ возмого́ша ѻ҆рѹ́жїѧми и҆ си́лами и҆ коры́стьми мно́гими, ѩ҆̀же взѧ́ша ѿ полкѡ́въ, и҆̀хже и҆зби́ша.

⁷И҆ разори́ша ме́рзость, ю҆́же созда̀ на ѻ҆лтарѝ во ї҆ер҇ли́мѣ, и҆ ст҃ы́ню, ѩ҆́коже пре́жде ѡ҆крѹжи́ша стѣна́ми высо́кими, и҆ веѳсѹ́рѹ гра́дъ є҆гѡ̀.

⁸И҆ бы́сть ѩ҆́кѡ ѹ҆слы́ша ца́рь словеса̀ сїѧ҄, ѹ҆страши́сѧ и҆ смѹти́сѧ ѕѣлѡ̀: и҆ падѐ на ло́же и҆ впадѐ въ недѹ́гъ ѿ печа́ли, поне́же не сбы́стсѧ є҆мѹ̀, ѩ҆́коже помышлѧ́ше.

⁹И҆ бѣ̀ тѹ̀ дни҄ мнѡ́ги, поне́же ѡ҆бнови́сѧ на не́мъ печа́ль вели́ка, и҆ мнѧ́ше, ѩ҆́кѡ ѹ҆́мретъ.

¹⁰И҆ созва̀ всѧ҄ дрѹ́ги своѧ҄ и҆ речѐ и҆̀мъ: ѿи́де со́нъ ѿ ѻ҆́чїю моє́ю, и҆ и҆спадо́хъ се́рдцемъ ѿ печа́ли,

¹¹и҆ рѣ́хъ въ се́рдцы мое́мъ: до коли́кїѧ ско́рби доидо́хъ и҆ волны̀ ве́лїѧ, въ не́йже нн҃ѣ є҆́смь; ѩ҆́кѡ бла́гъ и҆ люби́мь бы́хъ во вла́сти мое́й:

¹²нн҃ѣ же помина́ю ѕла҄ѧ, ѩ҆̀же сотвори́хъ во ї҆ер҇ли́мѣ, и҆ взѧ́хъ всѧ҄ сосѹ́ды зла҄ты и҆ срє́брѧны въ не́мъ, и҆ посла́хъ и҆з̾ѧ́ти ѡ҆бита́ющихъ во ї҆ѹде́и вотщѐ:

¹³позна́хъ ѹ҆̀бо, ѩ҆́кѡ си́хъ ра́ди ѡ҆брѣто́ша мѧ̀ ѕла҄ѧ сїѧ҄: и҆ сѐ, ги́бнѹ ско́рбїю ве́лїею въ землѝ чѹжде́й.

¹⁴И҆ призва̀ фїлі́ппа є҆ди́наго ѿ дрѹгѡ́въ свои́хъ, и҆ поста́ви є҆го̀ над̾ всѣ́мъ ца́рствомъ свои́мъ,

¹⁵и҆ дадѐ є҆мѹ̀ дїади́мѹ и҆ ри́зѹ свою̀ и҆ пе́рстень, є҆́же води́ти а҆нтїо́ха сы́на є҆гѡ̀ и҆ воспита́ти є҆го̀ є҆́же ца́рствовати.

¹⁶И҆ ѹ҆́мре та́мѡ а҆нтїо́хъ ца́рь въ лѣ́то сто̀ четы́редесѧть девѧ́тое.

¹⁷И҆ позна̀ лѷсі́а, ѩ҆́кѡ ѹ҆́мре ца́рь. и҆ поста́ви ца́рствовати а҆нтїо́ха сы́на є҆гѡ̀ вмѣ́стѡ є҆гѡ̀, є҆го́же воспита̀ ю҆́ношѹ, и҆ наречѐ и҆́мѧ є҆мѹ̀ є҆ѵпа́тѡръ.

¹⁸И҆ сѹ́щїи во краегра́дїи заключи́ша ї҆и҃лѧ ѡ҆́крестъ ст҃ы́хъ и҆ и҆ска́хѹ и҆̀мъ ѕла҄ѧ всегда̀ и҆ ѹ҆твержде́нїе ѩ҆зы́кѡмъ.

¹⁹И҆ ѹ҆мы́сли ї҆ѹ́да и҆згна́ти и҆̀хъ: и҆ созва̀ всѧ҄ лю́ди, да ѡ҆бстоѧ́тъ и҆̀хъ.

²⁰И҆ собра́шасѧ вкѹ́пѣ и҆ ѡ҆бсѣдо́ша и҆̀хъ въ лѣ́то сто̀ пѧтьдесѧ́тое, и҆ сотворѝ на ни́хъ стрѣлостоѧ́тєлницы и҆ миха҄ны.

²¹И҆ и҆зыдо́ша ѿ ни́хъ и҆з̾ заключе́нїѧ, и҆ прилѣпи́шасѧ тѣ҄мъ нѣ́цыи нечести́вїи ѿ ї҆и҃лѧ,

²²и҆ и҆до́ша ко царю̀ и҆ рѣ́ша: доко́лѣ не сотвори́ши сѹда̀ и҆ ѿмсти́ши бра́тїю на́шѹ;

²³мы̀ благоволи́мъ слѹжи́ти ѻ҆тцѹ̀ твоемѹ̀ и҆ ходи́ти въ за́повѣдехъ є҆гѡ̀ и҆ послѣ́довати повелѣ́нїємъ є҆гѡ̀:

²⁴и҆ ѡ҆блеже́ни сѹ́ть во краегра́дїи сы́нове люді́й на́шихъ, сегѡ̀ ра́ди и҆ ѿчѹжда́ютсѧ ѿ на́съ: и҆ є҆ли́цы ѡ҆брѣта́хѹсѧ ѿ на́съ, погѹблѧ́хѹсѧ, и҆ наслѣ҄дїѧ на҄ша расхища́єма бѧ́хѹ:

²⁵и҆ не на на́съ то́кмѡ простро́ша рѹ́кѹ, но и҆ на всѧ҄ предѣ́лы на́шѧ:

²⁶и҆ сѐ, ѡ҆полчи́шасѧ дне́сь на краегра́дїе во ї҆ер҇ли́мѣ, є҆́же взѧ́ти є҆го̀ и҆ ст҃ы́ню, и҆ веѳсѹ́рѹ ѹ҆тверди́ша:

²⁷и҆ а҆́ще не предвари́ши и҆̀хъ скорѣ́е, бѡ́лшаѧ си́хъ сотворѧ́тъ, и҆ не возмо́жеши ѹ҆держа́ти и҆̀хъ.

²⁸И҆ прогнѣ́васѧ ца́рь, є҆гда̀ ѹ҆слы́ша, и҆ собра̀ всѧ҄ дрѹ́ги своѧ҄ и҆ нача́лники си́лы своеѧ̀ и҆ и҆̀же над̾ кѡ́нники:

²⁹и҆ ѿ ца́рствъ и҆ны́хъ и҆ ѿ ѻ҆стровѡ́въ морски́хъ прїидо́ша къ немѹ̀ си҄лы нає́мницы:

³⁰и҆ бы́сть число̀ си́лъ є҆гѡ̀ сто̀ ты́сѧщъ пѣшцє́въ и҆ два́десѧть ты́сѧщъ ко́нникѡвъ, и҆ слонѡ́въ три́десѧть два̀ вѣ́дѧщихъ бра́нь.

³¹И҆ прїидо́ша сквозѣ̀ ї҆дѹме́ю и҆ ѡ҆полчи́шасѧ въ веѳсѹ́рѣ, и҆ ра́товахѹ дни҄ мнѡ́ги и҆ сотвори́ша миха҄ны: и҆ и҆зыдо́ша и҆ пожго́ша и҆̀хъ ѻ҆гне́мъ и҆ би́шасѧ мѹ́жественнѣ.

³²И҆ ѿи́де ї҆ѹ́да ѿ краегра́дїѧ и҆ ѡ҆полчи́сѧ въ веѳсаха́рїи проти́вѹ полка̀ царе́ва.

³³И҆ воста̀ ца́рь ѕѣлѡ̀ ра́нѡ и҆ воздви́же ѡ҆полче́нїе во ѹ҆стремле́нїи є҆гѡ̀ по пѹтѝ веѳсаха́рїи: и҆ ѹ҆стро́ишасѧ си҄лы на бра́нь, и҆ вострѹби́ша трѹба́ми,

³⁴и҆ слонѡ́мъ показа́ша кро́вь гро́здовѹ и҆ ѩ҆́гѡды, є҆́же поѡстри́ти и҆̀хъ на бра́нь:

³⁵и҆ разлѹчи́ша ѕвѣре́й на полкѝ и҆ приста́виша коемѹ́ждо слонѹ̀ ты́сѧщѹ мѹже́й ѡ҆блече́нныхъ въ брѡнѧ̀ желѣ́зомъ соплетє́ны, и҆ шле́мы мѣ́дѧни на глава́хъ и҆́хъ, и҆ пѧ́ть сѡ́тъ ко́нникѡвъ вчине́ныхъ коемѹ́ждо ѕвѣ́рю и҆збра́нныхъ.

³⁶Сїѧ҄ бѣ́ша пре́жде вре́мене, и҆дѣ́же а҆́ще бѣ̀ ѕвѣ́рь: и҆ и҆дѣ́же а҆́ще и҆дѧ́ше, и҆дѧ́хѹ вкѹ́пѣ и҆ не ѿстѹпа́хѹ ѿ негѡ̀.

³⁷И҆ пѵ́рги древѧ́ни на ни́хъ крѣ́пцы защища́ющїи на ко́емждо ѕвѣ́ри, препоѧ́сани на не́мъ миха́нами, и҆ на ко́емждо мѹже́й си́лы три́десѧть два̀ вою́ющихъ на ни́хъ, и҆ ї҆нді́анинъ ѹ҆прави́тель є҆гѡ̀.

³⁸И҆ про́чыѧ ко́нники сю́дѹ и҆ сю́дѹ поста́виша на двѣ̀ ча҄сти полка̀, побѹжда́юще и҆ загражда́юще въ де́брехъ.

³⁹Е҆гда́ же возсїѧ̀ со́лнце на щиты̀ златы҄ѧ и҆ мѣ҄дѧныѧ, ѡ҆бсїѧ́ша го́ры ѿ ни́хъ и҆ ѡ҆блиста́ша ѩ҆́кѡ лампа҄ды ѻ҆́гнєнныѧ.

⁴⁰И҆ ѿлѹчи́сѧ ча́сть нѣ́каѧ ѿ полка̀ царе́ва на го́ры высѡ́ки, и҆ нѣ́цыи на ни҄жшаѧ, и҆ и҆дѧ́хѹ крѣ́пцѣ и҆ чи́ннѡ.

⁴¹И҆ поколеба́шасѧ всѝ слы́шащїи гла́съ мно́жества и҆́хъ, и҆ пѹтьше́ствїѧ мно́гихъ, и҆ сраже́нїѧ ѻ҆рѹ́жїй: бѣ́ бо ѡ҆полче́нїе вели́ко ѕѣлѡ̀ и҆ крѣ́пко.

⁴²И҆ прибли́жисѧ ї҆ѹ́да и҆ по́лкъ є҆гѡ̀ на бра́нь, и҆ падо́ша ѿ полка̀ царе́ва ше́сть сѡ́тъ мѹже́й.

⁴³И҆ ѹ҆ви́дѣ є҆леаза́ръ сы́нъ савара́нь є҆ди́наго ѿ ѕвѣре́й ѡ҆блече́на въ броню̀ ца́рскѹ, и҆ бѧ́ше вы́ше про́чїихъ ѕвѣре́й, и҆ возмнѣ́сѧ є҆мѹ̀, ѩ҆́кѡ на не́мъ є҆́сть ца́рь:

⁴⁴и҆ вдаде́сѧ са́мъ є҆́же и҆зба́вити лю́ди своѧ҄ и҆ сотвори́ти себѣ̀ и҆́мѧ вѣ́чное,

⁴⁵и҆ течѐ къ немѹ̀ съ де́рзостїю въ среди́нѹ полка̀, и҆ побива́ше ѡ҆деснѹ́ю и҆ ѡ҆шѹ́юю, и҆ раздѣлѧ́хѹсѧ ѿ негѡ̀ сю́дѹ и҆ сю́дѹ:

⁴⁶и҆ вни́де под̾ слона̀, и҆ подложи́сѧ є҆мѹ̀, и҆ ѹ҆бѝ є҆го̀, и҆ падѐ на зе́млю верхѹ̀ є҆гѡ̀, и҆ ѹ҆́мре тѹ̀.

⁴⁷И҆ ви́дѣша си́лѹ ца́рства и҆ ѹ҆стремле́нїе во́євъ, и҆ ѹ҆клони́шасѧ ѿ ни́хъ.

⁴⁸Сѹ́щїи же ѿ полка̀ царе́ва взыдо́ша проти́вѹ и҆́хъ на ї҆ер҇ли́мъ: и҆ ѡ҆полчи́сѧ ца́рь на ї҆ѹде́ю и҆ на го́рѹ сїѡ́нъ.

⁴⁹И҆ сотворѝ ми́ръ съ сѹ́щими въ веѳсѹ́рѣхъ: и҆ и҆зыдо́ша и҆з̾ гра́да, ѩ҆́кѡ не бѣ̀ и҆̀мъ та́мѡ пи́щи, є҆́же затвори́тисѧ въ не́мъ, поне́же сѹббѡ́та бѧ́ше землѝ.

⁵⁰И҆ взѧ̀ ца́рь веѳсѹ́рѹ и҆ поста́ви тѹ̀ стра́жѹ храни́ти ю҆̀.

⁵¹И҆ ѡ҆полчи́сѧ на мѣ́сто ст҃ы́ни дни҄ мнѡ́ги, и҆ поста́ви тѹ̀ стрѣлостоѧ́тєлницы и҆ миха҄ны, и҆ ѻ҆гнемє́тницы и҆ каменомє́тницы и҆ скорпїѡ́ны, є҆́же бы мета́ти стрѣ́лы и҆ пра́щы.

⁵²Сотвори́ша же и҆ ті́и миха҄ны проти́вѹ миха́нъ и҆́хъ, и҆ бра́шасѧ дни҄ мнѡ́ги.

⁵³Пи́ща же не бѧ́ше во гра́дѣ, зане́же седмо́е лѣ́то бѣ̀, и҆ и҆збѣжа́вшїи во ї҆ѹде́ю ѿ ѩ҆зы҄къ поѧдо́ша ѡ҆ста́нокъ сокрове́нїѧ.

⁵⁴И҆ ѡ҆ста́шасѧ во свѧти́лищи мѹже́й ма́лѡ, ѩ҆́кѡ ѡ҆б̾ѧ́тъ и҆̀хъ гла́дъ, и҆ расточе́ни бы́ша кі́йждо въ мѣ́сто своѐ.

⁵⁵И҆ слы́ша лѷсі́а, ѩ҆́кѡ фїли́ппъ, є҆го́же поста́ви ца́рь а҆нтїо́хъ, є҆щѐ жи́въ сы́й, да воспита́етъ а҆нтїо́ха сы́на є҆гѡ̀, во є҆́же ца́рствовати є҆мѹ̀,

⁵⁶возврати́сѧ ѿ персі́ды и҆ миді́и, и҆ вѡ́и ца́рстїи ходи́вшїи съ ни́мъ, и҆ ѩ҆́кѡ и҆́щетъ прїѧ́ти ве́щы:

⁵⁷и҆ потща́сѧ поитѝ ѿ краегра́дїѧ и҆ глаго́лати ко царю̀ и҆ воево́дамъ си́лы и҆ къ мѹжє́мъ: ѡ҆скѹдѣва́емъ на всѧ́къ де́нь, и҆ пи́ща на́мъ ма́ла (є҆́сть), и҆ мѣ́сто, є҆́же ѡ҆бстои́мъ, ѹ҆твержде́но, и҆ надлежи́тъ на́мъ (стро́ити) ѩ҆̀же ѡ҆ ца́рствѣ:

⁵⁸нн҃ѣ ѹ҆̀бо дади́мъ десни́цѹ человѣ́кѡмъ тѣ҄мъ и҆ сотвори́мъ съ ни́ми ми́ръ и҆ со всѣ́ми людьмѝ и҆́хъ,

⁵⁹и҆ ѹ҆ста́вимъ и҆̀мъ, да хо́дѧтъ въ зако́нѣхъ свои́хъ, ѩ҆́коже пре́жде: ра́ди бо зако́нѡвъ свои́хъ, ѩ҆̀же разрѹши́хомъ, прогнѣ́вашасѧ и҆ сотвори́ша всѧ҄ сїѧ҄.

⁶⁰И҆ ѹ҆го́дно бы́сть сло́во пред̾ царе́мъ и҆ нача҄лники, и҆ посла̀ къ ни҄мъ ми́ръ сотвори́ти. и҆ прїѧ́ша.

⁶¹И҆ клѧ́тсѧ и҆̀мъ ца́рь и҆ нача҄лницы: ѡ҆ си́хъ и҆зыдо́ша и҆з̾ тверды́ни.

⁶²И҆ вни́де ца́рь въ го́рѹ сїѡ́нъ и҆ ви́дѣ тверды́ню мѣ́ста: и҆ ѿве́ржесѧ клѧ́твы, є҆́юже клѧ́тсѧ, и҆ повелѣ̀ разори́ти стѣ́нѹ ѡ҆́крестъ.

⁶³И҆ ѿи́де тща́телнѡ и҆ возврати́сѧ во а҆нтїохі́ю, и҆ ѡ҆брѣ́те фїлі́ппа госпо́дствѹюща над̾ гра́домъ, и҆ воева̀ на́нь, и҆ взѧ̀ гра́дъ нѹ́ждею.