Read Библия Церковнославянская а҃ маккавей́скаѧ 7 Bible Online

а҃ маккавей́скаѧ 7 - Библия Церковнославянская bible

а҃ маккавей́скаѧ 7

¹Лѣ́та сто̀ пѧтьдесѧ́тъ пе́рвагѡ, и҆зы́де дими́трїй селеѵкі́евъ сы́нъ ѿ ри́ма, и҆ взы́де съ ма́лыми людьмѝ во гра́дъ примо́рскїй, и҆ воцари́сѧ та́мѡ.

²И҆ бы́сть, є҆гда̀ вхожда́ше въ до́мъ ца́рства ѻ҆тє́цъ свои́хъ, ѩ҆́ша си҄лы а҆нтїо́ха и҆ лѷсі́ю привестѝ и҆̀хъ къ немѹ̀.

³И҆ ѹ҆вѣ́дана бы́сть є҆мѹ̀ ве́щь, и҆ речѐ: не покажи́те мѝ ли́цъ и҆́хъ.

⁴И҆ ѹ҆би́ша и҆̀хъ во́ини, и҆ сѣ́де дими́трїй на престо́лѣ ца́рства своегѡ̀.

⁵И҆ прїидо́ша къ немѹ̀ всѝ мѹ́жїе беззако́ннїи и҆ нечести́вїи ѿ ї҆и҃лѧ, и҆ а҆лкі́мъ предвожда́ше и҆̀хъ, хотѧ́й жре́чествовати:

⁶и҆ ѡ҆клевета́ша люді́й пред̾ царе́мъ, глаго́люще: погѹбѝ ї҆ѹ́да и҆ бра́тїѧ є҆гѡ̀ всѣ́хъ дрѹгѡ́въ твои́хъ и҆ на́съ расточѝ ѿ землѝ на́шеѧ:

⁷нн҃ѣ ѹ҆̀бо послѝ мѹ́жа, є҆мѹ́же вѣ́риши, да и҆́детъ и҆ ви́дитъ и҆стреблє́нїѧ всѧ҄, ѩ҆̀же сотворѝ на́мъ и҆ странѣ̀ ца́рстѣй, и҆ да мѹ́читъ и҆̀хъ и҆ всѣ́хъ помога́ющихъ и҆̀мъ.

⁸И҆ и҆збра̀ ца́рь вакхі́да дрѹ́га ца́рска, и҆́же госпо́дствоваше ѡ҆б̾ ѻ҆нѹ̀ странѹ̀ рѣкѝ, и҆ вели́каго въ ца́рствѣ и҆ вѣ́рна царе́ви,

⁹и҆ посла̀ є҆го̀ и҆ а҆лкі́ма нечести́ваго, и҆ ѹ҆ста́ви є҆мѹ̀ жре́чество, и҆ повелѣ̀ є҆мѹ̀ сотвори́ти ѿмще́нїе въ сынѣ́хъ ї҆и҃левыхъ.

¹⁰И҆ ѿидо́ша и҆ прїидо́ша съ си́лою ве́лїею въ зе́млю ї҆ѹ́динѹ: и҆ посла̀ вѣ́стники ко ї҆ѹ́дѣ и҆ бра́тїи є҆гѡ̀ словесы̀ ми́рными съ ле́стїю.

¹¹И҆ не внѧ́ша словесє́мъ и҆́хъ: ви́дѣша бо, ѩ҆́кѡ прїидо́ша съ си́лою ве́лїею.

¹²И҆ собра́шасѧ ко а҆лкі́мѹ и҆ вакхі́дѹ собра҄нїѧ кни҄жникъ и҆зыска́ти пра́вєднаѧ.

¹³И҆ пе́рвїи а҆сїде́є бѣ́хѹ въ сынѣ́хъ ї҆и҃левыхъ, и҆ и҆ска́хѹ ѿ ни́хъ ми́ра.

¹⁴Реко́ша бо: человѣ́къ жре́цъ ѿ сѣ́мене а҆арѡ́нѧ прїи́де въ си́лахъ и҆ не и҆з̾ѡби́дитъ на́съ.

¹⁵И҆ глаго́ла съ ни́ми словеса̀ ми҄рна и҆ клѧ́тсѧ и҆̀мъ, глаго́лѧ: не возда́мъ ва́мъ ѕла҄ѧ, нижѐ дрѹгѡ́мъ ва́шымъ. и҆ вѣ́роваша є҆мѹ̀.

¹⁶И҆ поима̀ ѿ ни́хъ шестьдесѧ́тъ мѹже́й и҆ ѹ҆бѝ и҆̀хъ во є҆ди́нъ де́нь по словесѣ́хъ, ѩ҆́коже пи́сано є҆́сть:

¹⁷плѡ́ти прпдбныхъ твои́хъ и҆ крѡ́ви и҆́хъ пролїѧ́ша ѡ҆́крестъ ї҆ер҇ли́ма, и҆ не бѣ̀ погреба́ѧй и҆̀хъ.

¹⁸И҆ нападѐ стра́хъ и҆́хъ и҆ тре́петъ на всѧ҄ лю́ди, ѩ҆́кѡ реко́ша: нѣ́сть въ ни́хъ и҆́стины и҆ сѹда̀: престѹпи́ша бо ѹ҆ставле́нїе и҆ клѧ́твѹ, є҆́юже клѧ́шасѧ.

¹⁹И҆ воздви́жесѧ вакхі́дъ ѿ ї҆ер҇ли́ма и҆ ѡ҆полчи́сѧ въ визе́ѳѣ, и҆ посла̀ и҆ ѩ҆́тъ мно́гихъ ѿстѹпи́вшихъ ѿ негѡ̀ мѹже́й и҆ нѣ́кїихъ ѿ люді́й, и҆ закла̀ и҆̀хъ, (и҆) въ кла́дѧзь вели́къ (вве́рже):

²⁰и҆ врѹчѝ странѹ̀ а҆лкі́мѹ и҆ ѡ҆ста́ви си́лѹ въ по́мощь є҆мѹ̀: и҆ ѿи́де вакхі́дъ ко царю̀.

²¹И҆ подвиза́шесѧ а҆лкі́мъ ѡ҆ а҆рхїере́йствѣ.

²²И҆ собра́шасѧ къ немѹ̀ всѝ возмѹща́ющїи лю́ди своѧ҄, и҆ ѡ҆держа́ша зе́млю ї҆ѹ́динѹ, и҆ сотвори́ша ѩ҆́звѹ вели́кѹ во ї҆и҃ли.

²³И҆ ви́дѣ ї҆ѹ́да всѧ҄ ѕла҄ѧ, ѩ҆̀же сотворѝ а҆лкі́мъ, и҆ и҆̀же съ ни́мъ бѧ́хѹ, сынѡ́мъ ї҆и҃лєвымъ па́че ѩ҆зы́кѡвъ.

²⁴И҆ и҆зы́де во всѧ҄ предѣ́лы ї҆ѹдє́йскїѧ по ѡ҆́крестъ и҆ сотворѝ ѿмще́нїе на мѹже́хъ ѿто́ргшихсѧ, и҆ преста́ша ходи́ти во странѹ̀.

²⁵Е҆гда́ же ѹ҆ви́дѣ а҆лкі́мъ, ѩ҆́кѡ ѹ҆крѣпи́сѧ ї҆ѹ́да и҆ и҆̀же съ ни́мъ, и҆ позна̀, ѩ҆́кѡ не мо́жетъ противостоѧ́ти и҆̀мъ, и҆ возврати́сѧ ко царю̀ и҆ ѡ҆клевета̀ и҆̀хъ лѹка́внѣ.

²⁶И҆ посла̀ ца́рь нїкано́ра, є҆ди́наго ѿ нача҄лникъ свои́хъ сла́вныхъ, и҆ ненави́дѧщаго и҆ враждѹ́ющаго на ї҆и҃лѧ, и҆ повелѣ̀ є҆мѹ̀ и҆зби́ти лю́ди.

²⁷И҆ прїи́де нїкано́ръ во ї҆ер҇ли́мъ съ си́лою вели́кою и҆ посла̀ ко ї҆ѹ́дѣ и҆ бра́тїи є҆гѡ̀ съ ле́стїю словесы̀ ми́рными, глаго́лѧ:

²⁸да не бѹ́детъ бра́нь междѹ̀ мно́ю и҆ ва́ми: прїидѹ̀ съ мѹ҄жы ма́лыми, да ви́ждѹ лица̀ ва҄ша съ ми́ромъ.

²⁹И҆ прїи́де ко ї҆ѹ́дѣ, и҆ поздравлѧ́хѹ дрѹ́гъ дрѹ́га ми́рнѡ: и҆ во́ини ѹ҆гото́вани бѧ́хѹ восхи́тити ї҆ѹ́дѹ.

³⁰И҆ позна́сѧ сло́во ї҆ѹ́дѣ, ѩ҆́кѡ съ ле́стїю прїи́де къ немѹ̀: и҆ ѹ҆страши́сѧ ѿ негѡ̀ и҆ не восхотѣ̀ ктомѹ̀ ви́дѣти лица̀ є҆гѡ̀.

³¹И҆ позна̀ нїкано́ръ, ѩ҆́кѡ ѿкры́сѧ совѣ́тъ є҆гѡ̀, и҆ и҆зы́де во срѣ́тенїе ї҆ѹ́дѣ бра́нїю бли́з̾ харфарсара́ма.

³²И҆ падо́ша ѿ сѹ́щихъ при нїкано́рѣ ѩ҆́кѡ пѧ́ть ты́сѧщъ мѹже́й, и҆ бѣжа́ша во гра́дъ даві́довъ.

³³И҆ по словесѣ́хъ си́хъ взы́де нїкано́ръ на го́рѹ сїѡ́нъ: и҆ и҆зыдо́ша ѿ ї҆ере́євъ ѿ ст҃ы́хъ и҆ ѿ старѣ́йшинъ людски́хъ поздра́вити є҆го̀ ми́рнѡ и҆ показа́ти є҆мѹ̀ всесожже́нїе приноси́мое за царѧ̀.

³⁴И҆ порѹга́сѧ и҆̀мъ и҆ посмѣѧ́сѧ и҆̀мъ, и҆ ѡ҆сквернѝ и҆̀хъ и҆ глаго́ла го́рдѡ.

³⁵И҆ клѧ́тсѧ съ ѩ҆́ростїю, рекі́й: а҆́ще не преда́стсѧ ї҆ѹ́да и҆ во́ини є҆гѡ̀ въ рѹ́ки моѧ҄ нн҃ѣ, и҆ бѹ́детъ, є҆гда̀ возвращѹ́сѧ въ ми́рѣ, сожгѹ̀ хра́мъ се́й. и҆ и҆зы́де съ ѩ҆́ростїю ве́лїею.

³⁶И҆ внидо́ша жерцы̀ и҆ ста́ша пред̾ лице́мъ ѻ҆лтарѧ̀ и҆ хра́ма и҆ пла́чѹще реко́ша:

³⁷ты̀, гд҇и, и҆збра́лъ є҆сѝ хра́мъ се́й, нарещи́сѧ и҆́мени твоемѹ̀ въ не́мъ, да бѹ́детъ хра́мъ моли́твы и҆ проше́нїѧ лю́демъ твои҄мъ:

³⁸сотворѝ ѿмще́нїе на человѣ́цѣ се́мъ и҆ на во́ехъ є҆гѡ̀, и҆ да падѹ́тъ мече́мъ: помѧнѝ хѹлє́нїѧ и҆́хъ и҆ не да́ждь и҆̀мъ ѡ҆бита́лища.

³⁹И҆ и҆зы́де нїкано́ръ ѿ ї҆ер҇ли́ма и҆ ѡ҆полчи́сѧ въ веѳѡрѡ́нѣ и҆ срѣ́те є҆го̀ си́ла сѵ́рска.

⁴⁰Ї҆ѹ́да же прибли́жисѧ во а҆да́сѹ съ тремѧ̀ ты́сѧщьми мѹже́й. и҆ помоли́сѧ ї҆ѹ́да и҆ речѐ:

⁴¹и҆̀же по́слани бѧ́хѹ ѿ царѧ̀ а҆ссѷрі́йскагѡ (сеннахирі́ма), гд҇и, є҆гда̀ похѹ́лиша тѧ̀, и҆зы́де а҆́гг҃лъ тво́й и҆ поразѝ ѿ ни́хъ сто̀ ѻ҆́смьдесѧтъ пѧ́ть ты́сѧщъ:

⁴²та́кѡ сокрѹшѝ ѡ҆полче́нїе сїѐ пред̾ на́ми дне́сь, и҆ да позна́ютъ про́чїи, ѩ҆́кѡ ѕло̀ глаго́ла на ст҃а҄ѧ твоѧ҄, и҆ сѹдѝ є҆мѹ̀ по ѕло́бѣ є҆гѡ̀.

⁴³И҆ сотвори́ша во́ини бра́нь въ третїйна́десѧть де́нь мц҇а а҆да́ра, и҆ сотре́сѧ ѡ҆полче́нїе нїкано́рово, и҆ падѐ са́мъ пе́рвый во бра́ни.

⁴⁴Е҆гда́ же ѹ҆ви́дѣша вѡ́и є҆гѡ̀, ѩ҆́кѡ падѐ нїкано́ръ, пове́ргше ѻ҆рѹ҄жїѧ своѧ҄ бѣжа́ша.

⁴⁵И҆ гна́ша и҆̀хъ пѹ́ть днѐ є҆ди́нагѡ ѿ а҆да́са, до́ндеже прїитѝ въ гази́ръ, и҆ трѹба́ми трѹби́ша в̾слѣ́дъ и҆́хъ со знаме́нами.

⁴⁶И҆ и҆зыдо́ша ѿ всѣ́хъ се́лъ ї҆ѹде́йскихъ ѡ҆́крестъ и҆ заключи́ша и҆̀хъ рога́ми, и҆ возвраща́хѹсѧ ті́и къ ни҄мъ и҆ падо́ша всѝ мече́мъ, и҆ не ѡ҆ста̀ ѿ ни́хъ ни є҆ди́нъ.

⁴⁷И҆ взѧ́ша кѡры́сти и҆́хъ и҆ плѣ́нъ, и҆ главѹ̀ нїкано́ровѹ ѿсѣко́ша, и҆ десни́цѹ є҆гѡ̀, ю҆́же прострѐ го́рдѡ, и҆ принесо́ша и҆ повѣ́сиша проти́вѹ ї҆ер҇ли́ма.

⁴⁸И҆ возвесели́шасѧ лю́дїе ѕѣлѡ̀, и҆ сотвори́ша де́нь то́й де́нь весе́лїѧ вели́кагѡ,

⁴⁹и҆ ѹ҆ста́виша пра́здновати на всѧ́ко лѣ́то де́нь то́й третїйна́десѧть мц҇а а҆да́ра.

⁵⁰И҆ ѹ҆молчѐ землѧ̀ ї҆ѹ́дина на дни҄ ма҄лы.