Read Библия Церковнославянская а҃ маккавей́скаѧ 8 Bible Online

а҃ маккавей́скаѧ 8 - Библия Церковнославянская bible

а҃ маккавей́скаѧ 8

¹И҆ слы́ша ї҆ѹ́да и҆́мѧ ри́млѧнъ, ѩ҆́кѡ сѹ́ть си́льни крѣ́постїю, и҆ ті́и благоволѧ́тъ ѡ҆ всѣ́хъ приложи́вшихсѧ къ ни҄мъ, и҆ є҆ли́цы прїи́дѹтъ къ ни҄мъ, составлѧ́ютъ съ ни́ми дрѹ́жбѹ, и҆ ѩ҆́кѡ сѹ́ть си́льни крѣ́постїю.

²И҆ повѣ́даша є҆мѹ̀ бра҄ни и҆́хъ и҆ мѹ́жєства бла҄га, ѩ҆̀же творѧ́тъ въ гала́тѣхъ, и҆ ѩ҆́кѡ ѡ҆держа́ша и҆̀хъ и҆ приведо́ша и҆̀хъ под̾ да́нь:

³и҆ коли҄ка сотвори́ша во странѣ̀ ї҆спані́йстѣй, є҆́же ѹ҆держа́ти рѹды҄ сребра̀ и҆ зла́та, є҆́же та́мѡ: и҆ ѡ҆держа́ша всѧ́ко мѣ́сто совѣ́томъ свои́мъ и҆ долготерпѣ́нїемъ,

⁴и҆ мѣ́сто бѣ̀ дале́че ѿстоѧ́що ѿ ни́хъ ѕѣлѡ̀: и҆ царе́й наше́дшихъ на ни́хъ ѿ кра́ѧ землѝ сотро́ша, и҆ порази́ша и҆̀хъ ѩ҆́звою вели́кою, про́чїи же даю́тъ и҆̀мъ да́нь по всѧ҄ лѣ҄та:

⁵и҆ фїлі́ппа и҆ персе́а кїтїе́йскаго царѧ̀, и҆ воста́вшихъ на ни́хъ сокрѹши́ша и҆̀хъ въ бра́ни и҆ ѡ҆держа́ша и҆̀хъ:

⁶и҆ а҆нтїо́ха вели́каго царѧ̀ а҆сі́йскаго, ше́дшаго проти́вѹ и҆́хъ на бра́нь, и҆мѹ́щаго сто̀ два́десѧть слонѡ́въ, ко́нники и҆ колєсни́цы и҆ си́лѹ ве́лїю ѕѣлѡ̀, и҆ сотре́нъ бы́сть ѿ ни́хъ:

⁷и҆ ѩ҆́ша є҆го̀ жи́ва, и҆ ѹ҆ста́виша, да дае́тъ и҆̀мъ то́й и҆ ца́рствѹющїи по не́мъ да́нь вели́кѹ, и҆ даѧ́ти зало́гъ и҆ ѹ҆ставле́нїе,

⁸и҆ странѹ̀ ї҆нді́йскѹ и҆ миді́ю, и҆ лѷді́ю и҆ ѿ предо́брыхъ стра́нъ и҆́хъ, и҆ взѧ́вше и҆̀хъ ѿ негѡ̀ да́ша ѧ҆̀ є҆ѵме́нїю царю̀:

⁹и҆ ѩ҆́кѡ совѣща́ша сѹ́щїи ѿ є҆лла́ды прїитѝ и҆ взѧ́ти и҆́хъ: и҆ ѹ҆вѣ́дано бы́сть сло́во тѣ҄мъ,

¹⁰и҆ посла́ша на ни́хъ воево́дѹ є҆ди́наго и҆ воева́ша на ни́хъ, и҆ падо́ша ѿ ни́хъ ѩ҆́звенїи мно́зи, и҆ плѣни́ша же́нъ и҆́хъ и҆ ча҄дъ и҆́хъ, и҆ разгра́биша и҆̀хъ и҆ зе́млю и҆́хъ ѡ҆держа́ша, и҆ разори́ша тверды҄ни и҆́хъ и҆ порабо́тиша и҆̀хъ да́же до сегѡ̀ днѐ:

¹¹и҆ прѡ́чаѧ ца҄рства и҆ ѻ҆́стровы, и҆̀же нѣ́когда проти́вишасѧ и҆̀мъ, и҆стреби́ша и҆ порабо́тиша и҆̀хъ:

¹²съ дрѹ́ги же свои́ми и҆ примирѧ́ющимисѧ къ ни҄мъ сохранѧ́хѹ дрѹ́жбѹ, и҆ ѡ҆держа́хѹ ца҄рства бли҄жнѧѧ и҆ да҄льнѧѧ, и҆ є҆ли́цы слы́шахѹ и҆́мѧ и҆́хъ, боѧ́хѹсѧ ѿ ни́хъ:

¹³є҆ли҄цѣмъ же а҆́ще хотѧ́тъ помога́ти и҆ воцарѧ́ти, ца́рствѹютъ: и҆ и҆̀хже а҆́ще хотѧ́тъ, премѣнѧ́ютъ: и҆ вознесо́шасѧ ѕѣлѡ̀:

¹⁴и҆ во всѣ́хъ си́хъ не возлага́ше ни є҆ди́нъ ѿ ни́хъ дїади́мы, ни ѡ҆блача́шесѧ въ порфѵ́рѹ, є҆́же возвели́читисѧ ѡ҆ не́й:

¹⁵и҆ совѣ́тнѹю пала́тѹ сотвори́ша себѣ̀, и҆ на всѧ́къ де́нь совѣ́товахѹ въ не́й ѡ҆ мно́жествѣ (наро́дѡвъ) є҆́же благоѹстроѧ́ти и҆̀хъ:

¹⁶и҆ ввѣрѧ́ютъ є҆ди́номѹ человѣ́кѹ нача́лство своѐ по лѣ́тѹ, и҆ госпо́дствовати все́ю земле́ю и҆́хъ, и҆ всѝ повинѹ́ютсѧ є҆ди́номѹ, и҆ нѣ́сть за́висти нижѐ рве́нїѧ въ ни́хъ.

¹⁷И҆ и҆збра̀ ї҆ѹ́да є҆ѵполемо́на сы́на ї҆ѡа́ннова, сы́на а҆ккѡ́сова, и҆ ї҆а́сона сы́на є҆леаза́рова, и҆ посла̀ и҆̀хъ въ ри́мъ, соста́вити съ ни́ми дрѹ́жбѹ и҆ споборе́нїе,

¹⁸и҆ є҆́же ѿѧ́ти ѿ ни́хъ и҆́го и҆́хъ, поне́же ви́дѣша ца́рство є҆́ллинское порабоща́ющее ї҆и҃лѧ въ рабо́тѹ.

¹⁹И҆ и҆до́ша въ ри́мъ, пѹ́ть же ве́лїй ѕѣлѡ̀, и҆ внидо́ша въ пала́тѹ совѣ́тнѹю, и҆ ѿвѣща́ша и҆ рѣ́ша:

²⁰ї҆ѹ́да маккаве́й и҆ бра́тїѧ є҆гѡ̀ и҆ мно́жество ї҆ѹде́йское посла́ша на́съ къ ва́мъ соста́вити съ ва́ми дрѹ́жбѹ и҆ ми́ръ и҆ вписа́ти на́съ спобо́рниками и҆ дрѹга́ми ва́шими.

²¹И҆ ѹ҆го́дно бы́сть сло́во пред̾ ни́ми.

²²И҆ сїѐ списа́нїе посла́нїѧ, є҆́же восписа́ша на дщи́цахъ мѣ́дѧныхъ и҆ посла́ша во ї҆ер҇ли́мъ бы́ти ѹ҆ ни́хъ та́мѡ въ па́мѧть ми́ра и҆ спобо́рства:

²³бла́го да бѹ́детъ ри́млѧнѡмъ и҆ ѩ҆зы́кѹ ї҆ѹде́йскѹ на мо́ри и҆ на землѝ въ вѣ́къ, ѻ҆рѹ́жїе же и҆ вразѝ дале́че да бѹ́дѹтъ ѿ ни́хъ:

²⁴а҆́ще же настѹ́питъ бра́нь ри́млѧнѡмъ пе́рвѣе и҆лѝ всѣ҄мъ спобо́рникѡмъ и҆́хъ во все́мъ госпо́дствѣ и҆́хъ,

²⁵спобо́ретъ ѩ҆зы́къ ї҆ѹде́йскїй, ѩ҆́коже вре́мѧ ѡ҆предѣли́тъ и҆̀мъ, се́рдцемъ по́лнымъ:

²⁶и҆ ра́тѹющымъ не дадѹ́тъ, нижѐ ссѹ́дѧтъ пшени́цею, ѻ҆рѹ́жїемъ, сребро́мъ, кораблѧ́ми, ѩ҆́коже ѹ҆го́дно ри́млѧнѡмъ, и҆ сохранѧ́тъ за́пѡвѣди и҆́хъ ничто́же взе́млюще:

²⁷та́кожде а҆́ще и҆ ѩ҆зы́кѹ ї҆ѹде́йскѹ пре́жде слѹчи́тсѧ бра́нь, помо́гѹтъ ри́млѧне ѿ дѹшѝ, ѩ҆́коже и҆̀мъ вре́мѧ ѡ҆предѣли́тъ:

²⁸и҆ спобора́ющымъ не да́стсѧ пшени́ца, ѻ҆рѹ́жїе, сребро̀, корабли҄, ѩ҆́коже ѹ҆го́дно ри́млѧнѡмъ: и҆ сохранѧ́ти за́пѡвѣди и҆́хъ, и҆ без̾ ле́сти.

²⁹По си҄мъ словесє́мъ ѹ҆ста́виша ри́млѧне лю́демъ ї҆ѹдє́йскимъ.

³⁰А҆́ще же по словесѣ́хъ си́хъ совѣща́ютсѧ сі́и и҆ ѻ҆́нїи приложи́ти и҆лѝ ѿѧ́ти нѣ́что, сотворѧ́тъ ѿ произволе́нїѧ своегѡ̀, и҆ є҆́же а҆́ще приложа́тъ и҆лѝ ѿи́мѹтъ, бѹ́дѹтъ твєрда̀.

³¹А҆ ѡ҆ ѕло́бахъ, ѩ҆̀же ца́рь дими́трїй твори́тъ въ ни́хъ, писа́хомъ є҆мѹ̀, глаго́люще: вскѹ́ю ѡ҆тѧготи́лъ є҆сѝ и҆́го твоѐ на дрѹ́ги на́шѧ спобо́рники ї҆ѹдє́и;

³²а҆́ще ѹ҆̀бо па́ки прибѣ́гнѹтъ къ на́мъ на тѧ̀, сотвори́мъ и҆̀мъ сѹ́дъ и҆ ѡ҆полчи́мсѧ на тѧ̀ мо́ремъ и҆ земле́ю.