Read Библия Церковнославянская в҃ маккавей́скаѧ 1 Bible Online

в҃ маккавей́скаѧ 1 - Библия Церковнославянская bible

в҃ маккавей́скаѧ 1

¹Бра́тїи сѹ́щей во є҆гѵ́птѣ ї҆ѹде́ѡмъ ра́доватисѧ: бра́тїѧ и҆̀же во ї҆ер҇ли́мѣ ї҆ѹде́є и҆ и҆̀же во странѣ̀ ї҆ѹде́йстѣй, ми́ра блага́гѡ:

²и҆ да бл҃госотвори́тъ ва́мъ бг҃ъ и҆ да помѧне́тъ завѣ́тъ сво́й и҆́же ко а҆враа́мѹ и҆ ї҆саа́кѹ и҆ ї҆а́кѡвѹ рабѡ́мъ свои҄мъ вѣ҄рнымъ,

³и҆ да да́стъ ва́мъ се́рдце всѣ҄мъ во є҆́же че́ствовати є҆го̀ и҆ твори́ти хѡтѣ́нїѧ є҆гѡ̀ се́рдцемъ вели́кимъ и҆ дѹше́внымъ и҆зволе́нїемъ,

⁴и҆ да ѿве́рзетъ сердца̀ ва҄ша въ зако́нѣ свое́мъ и҆ въ повелѣ́нщхъ, и҆ ми́ръ да сотвори́тъ,

⁵и҆ да ѹ҆слы́шитъ моли҄твы ва́шѧ и҆ ѹ҆мили́тсѧ ва́мъ и҆ не ѡ҆ста́витъ ва́съ во вре́мѧ лѹка́во.

⁶И҆ нн҃ѣ здѣ̀ є҆смы̀ молѧ́щесѧ ѡ҆ ва́съ.

⁷Ца́рствѹющѹ дими́трїю лѣ́та сто̀ шестьдесѧ́тъ девѧ́тагѡ, мы̀ ї҆ѹде́є писа́хомъ ва́мъ въ ско́рби и҆ въ го́рести наше́дшей на́мъ въ лѣ́тѣхъ си́хъ, ѿне́лѣже ѿстѹпѝ ї҆а́сѡнъ и҆ и҆̀же съ ни́мъ ѿ сты́ѧ землѝ и҆ ца́рства,

⁸и҆ пожго́ша врата̀, и҆ пролїѧ́ша кро́вь непови́ннѹ: и҆ моли́хомсѧ гд҇еви, и҆ ѹ҆слы́шани є҆смы̀, и҆ принесо́хомъ же́ртвѹ и҆ семїда́лъ, и҆ возжго́хомъ свѣти́лники, и҆ предложи́хомъ хлѣ́бы.

⁹И҆ нн҃ѣ пра́зднѹйте дни҄ скинопигі́и хасле́ѵа мц҇а.

¹⁰Лѣ́та сто̀ ѻ҆́смьдесѧтъ ѻ҆сма́гѡ, и҆̀же во ї҆ер҇ли́мѣ и҆ и҆̀же во ї҆ѹде́и, и҆ старѣ҄йшины и ї҆ѹ́да а҆рїстовѹ́лѹ ѹ҆чи́телю птоломе́а царѣѧ̀ сѹ́щемѹ же ѿ пома́занныхъ ї҆ере́євъ ро́да, и сѹ́щымъ во є҆гѵ́птѣ ї҆ѹде́ѡмъ, ра́доватисѧ и҆ здра́вствовати.

¹¹Ѿ вели́кихъ бѣ́дствъ бг҃омъ сп҃се́ни, вельмѝ благодари́мъ є҆мѹ̀, а҆́ки на царѧ̀ ѡ҆полча́ющщсѧ.

¹²Се́й бо и҆зведѐ ѡ҆полча́ющихсѧ на ст҃ы́й гра́дъ:

¹³въ персі́дѹ бо бы́въ вождо́мъ, и҆ при не́мъ нестерпи́маѧ мнѧ́щаѧсѧ бы́ти си́ла, посѣ́чени бы́ша въ ка́пищи нане́и, прельщє́нїѧ ѹ҆потреби́вшымъ жерцє́мъ сѹ́щымъ при нане́и.

¹⁴А҆́ки бо спребыва́ти хотѧ̀ є҆́й, прїи́де на мѣ́сто а҆нтїо́хъ и и҆̀же съ ни́мъ дрѹ́зи, взѧ́тїѧ ра́ди сре́бреникѡвъ под̾ и҆́менемъ вѣ́на:

¹⁵и҆ предложи́вшымъ сїѧ҄ жерцє́мъ нане́и, и҆ ѻ҆́номѹ вше́дшѹ съ ма́лыми въ притво́ръ ка́пища, заключи́вше ка́пище,

¹⁶є҆гда̀ вни́де а҆нтїо́хъ, ѿве́рзше сво́да сокрове́ннѹю две́рь, мета́юще ка́менїе поби́ша и҆ге́мѡна и҆ сѹ́щихъ съ ни́мъ, и҆ раздѣли́вше на ѹ҆́ды и҆ главы҄ ѿсѣ́кше и҆змета́ша късѹ́щымъ внѣ̀.

¹⁷Ѡ҆ всѣ́хъ блг҇ве́нъ на́шъ бг҃ъ, и҆́же предадѐ нече́ствовавшихъ.

¹⁸Хотѧ́ще ѹ҆̀бо пра́здновати два́десѧть пѧ́тагѡ днѐ мц҇а хасле́ѵа ѡ҆чище́нїе це́ркве, потре́бно непщева́хомъ и҆звѣсти́ти ва́мъ, да и҆ вы̀ пра́зднѹете де́нь скинопигі́и и҆ ѻ҆гнѧ̀, є҆гда̀ неемі́а созда́въ це́рковь и҆ ѻ҆лта́рь, принесѐ же́ртвѹ.

¹⁹И҆́бо є҆гда̀ въ персі́дѹ ведѧ́хѹсѧ ѻ҆тцы̀ на́ши, тогда̀ жерцы̀ боѧ́щщсѧ бг҃а взе́мше ѿ ѻ҆гнѧ̀ ѻ҆лта́рнагѡ ѡ҆́тай, скры́ша во ю҆до́ль кла́дѧзѧ дно̀ и҆мѣ́юща безво́дное, и҆ въ не́мъ соблюдо́ша, ѩ҆́кѡ всѣ҄мъ невѣ́домѹ бы́ти мѣ́стѹ.

²⁰Преминѹ́вшымъ же лѣ́тѡмъ мнѡ́гимъ, є҆гда̀ и҆зво́лисѧ бг҃ѹ, по́сланный неемі́а ѿ царѧ̀ персі́дскагѡ, внѹ́ки жерцє́въ сокры́вшихъ посла̀ на взыска́нїе ѻ҆гнѧ̀: и҆ ѩ҆́коже повѣ́даша на́мъ, не ѡ҆брѣто́ша ѻ҆гнѧ̀, но во́дѹ гѹ́стѹ,

²¹повелѣ̀ и҆̀мъ че́рпати и҆ принестѝ: є҆гда́ же принесє́на бы́ша же́ртвєннаѧ, повелѣ̀ жерцє́мъ неемі́а покропи́ти водо́ю дрова̀ и҆ лежа҄щаѧ на ни́хъ.

²²Е҆гда́ же бы́сть сїѐ, и҆ вре́мѧ прїи́де, є҆гда̀ со́лнце возсїѧ̀ пре́жде ѡ҆́блачно сѹ́що, возжже́сѧ ѻ҆́гнь вели́къ, ѩ҆́кѡ диви́тисѧ всѣ҄мъ.

²³Моли́твѹ же творѧ́хѹ жерцы̀, є҆гда̀ горѧ́ще же́ртва, и҆ жерцы̀ и҆ всѝ ї҆ѡнаѳа́нѹ начина́ющѹ, про́чымъ же ѿвѣща́ющымъ, ѩ҆́коже неемі́и.

²⁴Бѣ́ же моли́тва и҆мѣ́ющи ѡ҆́бразъ се́й: гд҇и, гд҇и бж҃е, всѣ́хъ тво́рче, стра́шный и҆ крѣ́пкїй, и҆ првдный и҆ мл҇тивый, є҆ди́ный цр҃ю̀ и҆ бл҃гі́й,

²⁵є҆ди́ный да́телю, є҆ди́не првдне и҆ вседержи́телю и҆ вѣ́чный, сп҃са́ѧй ї҆и҃лѧ ѿ всѧ́кагѡ ѕла̀, сотвори́вый ѻ҆тцы̀ и҆збра҄нны и҆ ѡ҆ст҃и́вый и҆̀хъ,

²⁶прщмѝ же́ртвѹ за всѧ҄ лю́ди твоѧ҄ ї҆и҃лѧ и҆ сохранѝ ча́сть твою̀ и҆ ѡ҆ст҃ѝ:

²⁷соберѝ расточе́нїе на́ше, и҆зба́ви рабо́тающихъ ѩ҆зы́кѡмъ, на ѹ҆ничиже́ниыхъ и҆ ме́рзкихъ при́зри, и҆ да ѹ҆вѣ́дѧтъ ѩ҆зы́цы, ѩ҆́кѡ ты̀ є҆сѝ бг҃ъ на́шъ:

²⁸показнѝ наси́лѹющихъ и҆ досажда́ющихъ въ горды́ни:

²⁹насадѝ лю́ди твоѧ҄ на мѣ́стѣ ст҃ѣ́мъ твое́мъ, ѩ҆́коже речѐ мѡѷсе́й.

³⁰Жерцы́ же поѧ́хѹ пѣ҄нїѧ.

³¹Е҆гда́ же сгорѣ́ша же́ртвєннаѧ, ѡ҆ста́вшею водо́ю неемі́а повелѣ̀ ка́менїе бо́льшее поли́ти.

³²Е҆гда́ же сїѐ бы́сть, пла́мень возгорѣ́сѧ, и҆ ѿ ѻ҆лтарѧ̀ ѡ҆блиста́вшѹ свѣ́тѹ, сгорѣ̀.

³³Е҆гда́ же ѩ҆вле́на бы́сть ве́щь, и҆ возвѣще́но бы́сть царю̀ пе́рсскѹ, ѩ҆́кѡ на мѣ́стѣ, въ не́мже ѻ҆́гнь скры́ша преселе́ннїи жерцы̀, вода̀ ѩ҆ви́сѧ, ѿне́лѣже неемі́а и҆ сѹ́щїи съ ни́мъ ѡ҆чи́стиша жє́ртвы,

³⁴ѡ҆гради́въ же ца́рь ст҃о сотворѝ (мѣ́сто то̀), и҆скѹша́ѧй ве́щь.

³⁵И҆ и҆̀мже дарова́ше ца́рь, мнѡ́ги да́ры взима́ше и҆ преподаѧ́ше.

³⁶Прозва́ же неемі́а и҆ и҆̀же съ ни́мъ мѣ́сто то̀ нефѳа́рь, є҆́же сказѹ́етсѧ ѡ҆чище́нїе, нарица́етсѧ же ѹ҆ мно́гихъ нефѳа́й.