Read Библия Церковнославянская в҃ маккавей́скаѧ 10 Bible Online

в҃ маккавей́скаѧ 10 - Библия Церковнославянская bible

в҃ маккавей́скаѧ 10

¹Маккаве́й же и҆ и҆̀же съ ни́мъ бѧ́хѹ, гд҇ѹ и҆̀хъ защища́ющѹ, хра́мъ ѹ҆́бѡ и҆ гра́дъ воспрїѧ́ша:

²ка҄пища же ѿ и҆ноплеме́нникѡвъ на то́ржищи ѹ҆стро́єннаѧ, є҆ще́ же и҆ трє́бища раскопа́ша,

³и҆ ѡ҆чи́стивше хра́мъ, и҆́нъ ѻ҆лта́рь сотвори́ша, и҆ разже́гше ка́менїе и́ взе́мше ѻ҆́гнь ѿ ни́хъ, принесо́ша же́ртвѹ по двою̀ лѣ́тѹ и ше́сти мц҇ѣхъ, и҆ ѳѷмїа́мъ и҆ свѣ́щники, и҆ хлѣ́бѡвъ предложе́нїе сотвори́ша.

⁴Сїѧ҄ же сотво́рше, молѧ́хѹ гд҇а па́дше ни́цъ, да не ктомѹ̀ въ сицєва́ѧ ѕла҄ѧ впадѹ́тъ, но а҆́ще когда̀ и҆ согрѣ́шатъ, ѿ негѡ̀ съ кро́тостїю да наказѹ́ютсѧ, а҆ не ва́рварѡмъ и҆ хѹ́льнымъ ѩ҆зы́кѡмъ предадѧ́тсѧ.

⁵И҆ въ ѻ҆́ньже де́нь хра́мъ ѿ и҆ноплемє́нникъ ѡ҆скверни́сѧ, слѹчи́сѧ въ то́й же де́нь ѡ҆чище́нїю бы́ти хра́ма, два́десѧть пѧ́тагѡ днѐ мц҇а, и҆́же є҆́сть хасле́ѵъ.

⁶И҆ съ весе́лїемъ пра́здновахѹ дні́й ѻ҆́смь по ѡ҆́бразѹ сѣ́ней, помина́юще, ѩ҆́кѡ пре́жде ма́лагѡ вре́мене пра́здникъ сѣ́нницъ въ гора́хъ и҆ въ пеще́рахъ ѕвюри́нымъ ѡ҆́бразомъ бѧ́хѹ провожда́юще.

⁷Сегѡ̀ ра́ди ѳѵ́рси и҆ вѣ҄тви зелє́ныѧ, є҆ще́ же и҆ фі́нїки и҆мѣ́юще, пѣ҄сни приношахѹ бл҃гопоспѣши́вшемѹ ѡ҆чт҇ити мѣ́сто своѐ.

⁸И҆ ѹ҆зако́ниша ѻ҆́бщимъ повелѣ́нїемъ и҆ ѹ҆ставленїемъ всемѹ̀ ѩ҆зы́кѹ ї҆ѹде́йскѹ по всѧ҄ лѣ҄та пра́здновати дни҄ сїѧ҄.

⁹И҆ а҆нтїохъ ѹ҆́бѡ, и҆́же проименова́шесѧ є҆пїфа́нъ, кончи́нѹ та́кѡ и҆мѣ̀.

¹⁰Нн҃ѣ же ѩ҆̀же ѡ҆ є҆ѵпа́торѣ а҆нтїо́хѣ, сы́нѣ нечести́вагѡ бы́вшемъ, рече́мъ, сокраща́юще ѕлаа҄ѧ, ѩ҆̀же во бра́нехъ сотворє́на сѹ́ть.

¹¹Се́й бо воспрїѧ́въ ца́рствїе, поста́ви над̾ дѣла́ми ца́рскими лѷсі́ю нѣ́коего, кїлисѷрі́и же и҆ фїнїкі́и воево́дѹ первонача́лнаго.

¹²Птоломе́й бо нарица́емый ма́крѡнъ пра́вдѹ соблюда́ти произво́ливъ ко ї҆ѹде́ѡмъ бы́вшаѧ ра́ди къ ни҄мъ ѡ҆би́ды, покѹша́шесѧ ѩ҆̀же къ ни҄мъ ми́рнѡ препроводи́ти.

¹³Тѣ́мже ѡ҆клевета́нъ ѿ дрѹгѡ́въ ко є҆ѵпа́торѹ и҆ ча́стѡ нарица́емь а҆́кибы преда́тель, поне́же кѵ́пръ ввѣ́рениый ѿ фїломи́тора ѡ҆ста́ви и҆ ко а҆нтїо́хѹ є҆пїфа́нѹ ѿи́де, нижѐ честны́ѧ вла́сти и҆мѹ́щь, ѿ печа́ли ѡ҆трави́въ себѐ живо́тъ сконча̀.

¹⁴Горгі́а же бы́въ воево́да над̾ мѣста́ми, собира́ше чѹжди́хъ во́євъ и҆ непреста́ннѡ на ї҆ѹдє́и ра́товаше.

¹⁵Съ ни́мъ же кѹ́пиѡ и҆ ї҆дѹме́ане ѡ҆бдержа́ще крѣ҄пкїѧ тверды҄ни ѡ҆бѹча́хѹ ї҆ѹде́ѡвъ, и҆ и҆згонѧ́емыхъ и҆з̾ ї҆ер҇ли́ма прїе́млюще, ра́товати начина́хѹ.

¹⁶Сѹ́щїи же со маккаве́омъ сотво́рше моли́твѹ и҆ моли́вше бг҃а спобо́рника и҆̀мъ бы́ти, на ї҆дѹмє́йскїѧ тверды҄ни ѹ҆стреми́шасѧ.

¹⁷Къ ни҄мъ же и҆ пристѹпи́вше мѹ́жественнѡ ѡ҆держа́ша мѣста̀, всѣ҄мъ же на стѣнѣ̀ ра́тѹющымъ ѿмсти́ша и҆ срѣта́ющихсѧ закала́хѹ, ѹ҆би́ша же не ме́нше два́десѧти ты́сѧщъ.

¹⁸И҆збѣ́гшымъ же иѣ҄кїимъ не ме́нши девѧтѝ ты́сѧщъ въ двѣ̀ пѵ҄рги крѣ҄пки ѕѣлѡ̀ и҆ всѧ҄, ѩ҆̀же проти́вѹ ѡ҆блеже́нїѧ, и҆мѹ́щыѧ,

¹⁹маккаве́й ѡ҆ста́вивъ сі́мѡна и҆ ї҆ѡ́сифа, є҆ще́ же и҆ закхе́а и҆ и҆̀же съ ни́мъ доволиыхъ ко ѡ҆блеже́нїю и҆́хъ, на нѹ́жднаѧ мѣста̀ са́мъ ѿи́де.

²⁰Сѹ́щїи же съ сі́мѡномъ сребролюби́вїи ѿ нѣ́кїихъ, и҆́же въ пѵ҄ргахъ, сребро́мъ прельще́ни, и҆ се́дмьдесѧтъ ты́сѧщъ дра́хмъ взе́мше, ѡ҆ста́виша нѣ́кїихъ и҆збѣжа́ти.

²¹Е҆гда́ же возвѣсти́сѧ маккаве́ю ѡ҆ бы́вшемъ, собра́въ нача́лники люді́й, порица́ше, ѩ҆́кѡ за сребро̀ прода́ша бра́тїю, сѹпоста́тѡвъ на ни́хъ ѿпѹсти́вше.

²²Си́хъ ѹ҆̀бо преда́телей бы́вшихъ ѹ҆бѝ и҆ внеза́пѹ двѣ̀ пѵ҄рги разрѹшѝ.

²³Ѻ҆рѹ́жїемъ же во всѣ́хъ и҆ рѹка́ми благоѹспѣва́ѧ, погѹбѝ въ двѹ̀ тверды́нехъ бо́лѣе два́десѧти ты́сѧщъ.

²⁴Тїмоѳе́й же, и҆́же пре́жде ѿ ї҆ѹдє́й бы́сть пораже́нъ, собра́въ во́євъ стра́нныхъ мно́жество, и҆ во а҆сі́и бы́вщихъ ко́нникѡвъ собра́въ не ма́лѡ, приі́де а҆́ки ѻ҆рѹ́жїемъ ї҆ѹде́ю хотѧ́щь взѧ́ти.

²⁵Маккаве́й же и҆ сѹ́щїи съ ни́мъ, приближа́ющѹсѧ томѹ̀, ко моли́твѣ бж҃їй ѡ҆братишасѧ, главы҄ земле́ю посы́павше и҆ чрє́сла вре́тищами препоѧ́савше,

²⁶пред ѻ҆лта́рнымъ пра́гомъ ни́цъ па́дше, молѧ́хѹ мл҇тива и҆̀мъ бы́ти, враждова́ти же враждѹ́ющымъ на ни́хъ и҆ сѹпоста́тѡмъ проти́витсѧ ѩ҆́кѡ зако́нъ глаго́летъ.

²⁷Бы́вше же по моли́твѣ, воспрїе́мше ѻ҆рѹ҄жїѧ дале́че и҆з̾ гра́да и҆зыдо́ша: прибли́жшежесѧ къ сѹпоста́тѡмъ, ѡ҆ себѣ̀ ста́ша.

²⁸Со́лнцѹ же возсїѧвающѹ, ѻ҆боѝ сразишасѧ: сі́и ѹ҆́бѡ спорѹ́чника и҆мѹ́ще благополѹ́чїѧ и҆ побѣ́ды съ добродѣ́телїю ко гд҇ѹ прибѣ́жище, ѻ҆ни́ же воево́дѹ бра́ней ѹ҆чини́ща ѩ҆́рость.

²⁹Пребыва́ющей же крѣ́пцейй бра́ни, ѩ҆ви́шасѧ сѹпоста́тѡмъ ѿ нб҃сѐ мѹ́жїе пѧ́ть на ко́нехъ зла҄ты ѹ҆зды҄ и҆мѹ́щихъ, благолѣ́пни, и҆ пра́вѧще ї҆ѹде́ѡвъ два̀:

³⁰и҆ маккаве́а средѣ̀ себє̀ вземше и҆ защища́юще свои́мъ всеорѹ́жїемъ невреди́ма сохранѧ́хѹ, на сѹпоста́ты же стрѣ́лы и҆ мѡ́лнїи мета́хѹ: тѣ́мже смѣси́вшесѧ невидѣ́нїемъ сѣча́хѹсѧ мѧте́жа и҆спо́лнени.

³¹Ѹ҆бїе́нныхъ же бы́сть два́десѧть ты́сѧщъ и҆ пѧ́тсѡть сѡ́тъ, ко́нныхъ же ше́сть сѡ́тъ.

³²Са́мъ же тїмоѳе́й побѣбжѐ въ газа́рѹ глаго́лемѹю тверды́ню, ѕѣлѡ̀ крѣ́пкѹю, воево́дствѹющѹ та́мѡ хере́ю.

³³Маккаве́й же и҆ сѹ́щїи съ нимъ ве́селѡ ѡ҆бсѣдо́ша крѣ́пость дни҄ четы́ри.

³⁴сѹ́щїи же внѹ́трь на тве́рдость мѣ́ста ѹ҆пова́юще, па́че мѣ́ры хѹ́лѧхѹ и҆ словеса̀ беззакѡ́ннаѧ и҆зноша́хѹ.

³⁵ѩ҆́вльшѹжесѧ пѧ́томѹ дню̀ два́десѧть ю҆́ношей, и҆̀же съ маккаве́емъ бѣ́хѹ, разже́гшесѧ ѩ҆́ростїю хѹле́нїѧ ра́ди, прибли́жившесѧ ко стѣнѣ̀, мѹ́жественнѡ и҆ ѕвѣроѡбра́зною ѩ҆̀ростїю прилѹчи́вшихсѧ разсѣца́хѹ.

³⁶И҆ні́и же подо́бнѣ возше́дше съ нѹ́ждею къ сѹ́щымъ внѹ́трь, зажига́хѹ пѵ҄рги, и҆ возже́гше ѻ҆гни҄ща, живы́хъ хѹ́льникѡвъ сожго́ша.

³⁷И҆ні́и же врата̀ разсѣко́ша, и҆ впѹсти́вше про́чїй по́лкъ, взѧ́ша гра́дъ, и҆ тїмоѳе́а скры́вшагосѧ въ нѣ́коемъ рвѣ̀ закла́ша, и҆ бра́та є҆гѡ̀ хере́а и҆ а҆поллѡфа́на.

³⁸Сїѧ҄ же сотво́рше съ пѣ́сньми и҆ и҆сиовѣ́даньми благословлѧ́хѹ гд҇а бл҃годѣ́телѧ вели́каго ї҆и҃лю и҆ побѣ́дѹ и҆̀мъ да́вшаго.