Read Библия Церковнославянская в҃ маккавей́скаѧ 11 Bible Online

в҃ маккавей́скаѧ 11 - Библия Церковнославянская bible

в҃ маккавей́скаѧ 11

¹По ма́лѣ же весьма̀ вре́мени лѷсі́а, намѣ́стннкъцаре́въ и҆ сро́дникъ и҆ къ дѣлѡ́мъ приста́вникъ, ѕѣлѡ̀ тѧ́жцѣ сносѧ̀ бы҄вшаѧ,

²собра́въ а҆́ки ѻ҆́смьдесѧтъ ты́сѧщъ и҆ конники всѧ҄, прїи́де на ї҆ѹде́євъ, помышлѧ́ѧ ѹ҆́бѡ гра́дъ є҆́ллинѡмъ ѡ҆бита́лище,

³хра́мъ же среброда́ненъ сотвори́ти, ѩ҆́коже и҆ про́чїихъ ѩ҆зы҄къ ка҄пища, и҆ по всѧ҄ лѣ҄та продава́ти а҆рхїере́йство,

⁴ника́коже помышлѧю бж҃їю держа́вѹ безѹ́мнѡ ѹ҆пова́ѧ на тмы҄ пѣбшцє́въ и҆ на ты́сѧщы ко́нникѡвъ и҆ на ѻ҆́смьдесѧтъ слонѡ́въ.

⁵Вше́дъ же во ї҆ѹде́ю и҆ прибли́живсѧ ко веѳсѹ́рѣ, къ мѣ́стѹ ѹ҆́бѡ крѣ́пкомѹ сѹ́щѹ, ѿ ї҆ер҇ли́ма же ѿстоѧщемѹ ѩ҆́кѡ сті́дїй пѧ́ть, сїѐ ѹ҆тѣснѧ́ше.

⁶Е҆гда́ же позна̀ маккаве́й и҆ и҆̀же съ ни́мъ ра́тѹюща є҆го̀ тверды҄ни, съ пла́чемъ и҆ слеза́ми молѧ́хѹ гд҇а со всѣ́мъ наро́домъ, бл҃га́го а҆́гг҃ла посла́ти ко сп҃се́нїю ї҆и҃лѧ.

⁷Са́мъ же маккаве́й пе́рвый взѧ́въ ѻ҆рѹ́жїе ѹ҆вѣщава́ше про́чихъ вкпѣ съ ни́мъ бѣ́дство под̾ѧ́ти, є҆́же помога́ти бра́тїи свое́й: вкѹ́пѣ же и҆ со ѹ҆́се́рдмъ ѹ҆стреми́шасѧ.

⁸Та́мѡ же, и҆ бли́з̾ ї҆ер҇ли́ма сѹ́щымъ, ѩ҆ви́сѧ предводѧ́й и҆́хъ ко́нникъ во ѻ҆де́жди бѣ́лѣ всеѻрѹ́жїе злато́е потрѧса́ющь.

⁹Вкѹ́пѣ же всѝ благослови́ша мл҇рдаго бг҃а и҆ ѹ҆крѣпи́шасѧ дѹша́ми, не то́чїю человѣ́кѡвъ, но и҆ ѕвѣре́й лютѣ́йшихъ и҆ стѣ́ны жєлѣ́зны сокрѹша́ти сѹ́ще гото́ви,

¹⁰и҆дѧ́хѹ во ѹ҆строе́нїи съ нб҃се спобо́рника и҆мѣ́юще, ми́лѹющѹ и҆̀хъ гд҇ѹ:

¹¹львоѡбра́знѡ же ѹ҆стрѣми́вшесѧ на сѹпоста́ты, положи́ша ѿ ни́хъ є҆ди́нона́десѧть ты́сѧщъ пѣшцє́въ, ко́нникѡвъ же ты́сщѹ и҆ ше́сть сѡ́тъ,

¹²всѣ́хе же понѹ́диша бѣжа́ти: мно́зи же ѿ ни́хъ ѩ҆́звени на́зи ѹ҆цѣлѣ́ша, и҆ са́мъ лѷсі́а стѹ́днѡ бѣжа́въ спасе́сѧ.

¹³Не без̾ ѹ҆ма́ же сы́й, размышлѧ́ѧ въ себѣ̀ бы́вшее на себѐ пораже́нїе и́ ѹ҆разѹмѣ́въ непобѣди́мыхъ бы́ти є҆вре́ѡвъ, всемогѹ́щемѹ бг҃ѹ спобо́рствѹющемѹ и҆̀мъ, посла́въ

¹⁴ѹ҆вѣщава́ше, ѩ҆́кѡ и҆́мать примири́тисѧ во всѣ́хъ пра́ведныхъ и҆ ѩ҆́кѡ совѣ́тѹѧ прекли҆ царѧ̀, да бѹ́детъ и҆̀мъ дрѹ́гъ.

¹⁵Соизво́ли же маккаве́й ѡ҆ всѣ́хъ, ѡ҆ ни́хже лѷсі́а молѧ́ше, ѡ҆ полезныхъ радѧ́щь: є҆ли҄ка бо маккаве́й дадѐ лѷсі́а на писмѣ̀ ѡ҆ ї҆ѹде́ехъ, соизво́ли ца́рь.

¹⁶Бѣ́ша бо писа҄нїѧ ї҆ѹдеємъ пѡ́сланаѧ ѿ лѷсі́и, и҆мѹ́щаѧ ѡ҆́бразъ сице́въ, лѷсі́а мно́жествѹ ї҆ѹде́йскѹ ра́доватисѧ:

¹⁷ї҆ѡа́ннъ и҆ а҆вессалѡ́мъ, и҆̀же по́слани сѹ́ть ѿ ва́съ, даю҄ща напи́санный ѿвѣ́тъ, проша́ста ѡ҆ назна́менанныхъ въ не́мъ:

¹⁸є҆ли҄ка ѹ҆̀бо подоба́ше царю̀ предложи́ти, и҆звѣсти́хъ, и҆ ѩ҆̀же бѧ́хѹ прїѧ҄тна, соизво́ли:

¹⁹а҆́ще ѹ҆̀бо въ дѣ́лѣхъ вѣ́рность соблюдетѐ, то̀ и҆ въ про́чее покѹшѹ́сѧ вино́венъ ва́мъ бы́ти благи́хъ:

²⁰ѡ҆ си́хъ же подро́бнѹ заповѣ́дахъ си́ма и҆ пѡ́сланнымъ ѿ меиє̀ побесѣ́довати съ ва́ми:

²¹здра́вствѹйте. Лѣ́та сто̀ четы́редесѧть ѻ҆сма́гѡ, (мц҇а) дїоскорі́нѳїа, днѐ два́десѧть четве́ртагѡ.

²²Ца́рское же посла́нїе содержа́ше сїѧ҄: ца́рь а҆нтїо́хъ лѷсі́и бра́тѹ ра́доватисѧ:

²³ѻ҆тцѹ̀ на́шемѹ въ бо́ги премѣ́ншѹсѧ, мы̀ хотѧ́ще во ца́рствїи сѹ́щихъ безмѧте́жныхъ бы́ти и҆ ѡ҆ свои́хъ прилѣжа́ти,

²⁴слы́шахомъ ї҆ѹдє́й не соблаговолѧ́ющихъ ѻ҆тца̀ моегѡ̀ повелѣ́нїю, є҆́же премѣни́тисѧ и҆̀мъ на є҆́ллинскїѧ зако́ны, но и҆зволѧ́ющихъ держа́ти своѧ҄ за́пѡвѣди и тогѡ̀ ра́ди молѧ́щихъ, да да́рѹютсѧ и҆̀мъ закѡ́ннаѧ и҆́хъ:

²⁵хотѧ́ще ѹ҆́бѡ и҆ семѹ̀ ѩ҆зы́кѹ без̾ мѧте́жа бы́ти, сѹди́хомъомъ и҆ хра́мъ и҆̀мъ возврати́ти и҆ жи́ти по прароди́тєлскимъ и҆́хъ ѡ҆бы́чаємъ:

²⁶бла́гѡ ѹ҆̀бо сотвори́ши, а҆́ще по́слеши къ ни҄мъ и҆ десни́цѹ да́си, ѩ҆́кѡ да познавше на́ше произволе́нїе, благодѹ́шни бѹ́дѹтъ и҆ безпеча́льнѡ пребѹ́дѹтъ ко своемѹ̀ ѡ҆хране́нїю.

²⁷Ко ї҆ѹде́ѡмъ же ца́рское посла́нїе сицево̀ бѣ̀: ца́рь а҆нтїо́хъ старѣ́йшинамъ ї҆ѹдє́йскимъ и҆ прочымъ ї҆ѹде́ѡмъ ра́доватисѧ:

²⁸а҆́ще здра́вствѹете, да бѹ́детъ ѩ҆́коже хо́щемъ, и҆ са́ми здра́вствѹемъ:

²⁹и҆з̾ѧвѝ на́мъ менела́й, ѩ҆́кѡ хо́щете ѿше́дше бы́ти съ ва́шими:

³⁰приходѧ́щы́мъ ѹ҆́бѡ да́же до днѐ тридесѧ́тагѡ мц҇а занѳі́ка, дади́мъ десни́цѹ без̾ ѡ҆пасе́нїѧ:

³¹є҆́же ѹ҆потреблѧ́ти ї҆ѹде́ѡмъ свои́хъ бра́шенъ и҆ зако́нѡвъ, ѩ҆́коже и҆ пре́жде, и҆ ни є҆ди́нъ и҆̀мъ ни по є҆ди́номѹ ѡ҆́бразѹ стѹжи́ти и҆́мать ѡ҆ содѣ́ѧнныхъ въ невѣ́дѣнїи:

³²посла́хомъ же и҆ менела́а и҆мѹ́щаго ѹ҆тѣ́шити ва́съ:

³³здра́вствѹйте. Лѣ́та сто̀ четы́редесѧть ѻ҆сма́гѡ, ѯанѳі́ка (мц҇а), пѧтагѡна́десѧть днѐ.

³⁴Посла́ша же и҆ ри́млѧне къ ни҄мъ посла́нїе и҆мѣ́ющее сїѧ҄: кві́нтъ ме́ммїй и҆ ті́тъ ма́нлїй, старѣ҄йшины ри́мстїи, лю́демъ ї҆ѹдє́йскимъ ра́доватисѧ:

³⁵ѡ҆ ни́хже лѷсі́а сро́дникъ царе́въ соизво́ли ва́мъ, и҆ мы̀ соблаговолѧ́емъ:

³⁶а҆ ѩ҆̀же сѹдѝ предложи́ти царю̀, скорѣ́е посли́те кого̀ созира́юще ѡ҆ си́хъ, да ѹ҆ста́витъ, ѩ҆́коже подоба́етъ ва́мъ, мы бо и҆́демъ ко а҆нтїохі́и:

³⁷сегѡ̀ ра́ди ѹ҆скори́те и҆ посли́те нѣ́кїихъ, да и҆ мы̀ ѹ҆вѣ́мы, ко́еѧ є҆стѐ мы́сли:

³⁸Здра́вствѹйте. Лѣ́та сто̀ четы́редесѧть ѻ҆сма́гѡ, пѧтагѡна́десѧть днѐ (мц҇а) ѯанѳі́ка.