Read Библия Церковнославянская в҃ маккавей́скаѧ 12 Bible Online

в҃ маккавей́скаѧ 12 - Библия Церковнославянская bible

в҃ маккавей́скаѧ 12

¹Содѣ҄ѧннымъ же бы́вшымъ завѣ́тѡмъ си҄мъ, лѷсі́а ѹ҆́бѡ ѿи́де ко царю̀, ї҆ѹде́є же въ земледѣ́лїи ѹ҆пражнѧ́хѹсѧ.

²Ѿ сѹ́щихъ же по мѣстѡ́мъ воево́дъ, тїмоѳе́й и҆ а҆поллѡ́нїй сы́нъ гене́овъ, є҆ще́ же ї҆ерѡиѵ́мъ и҆ димофѡ́нъ, къ си҄мъ же и҆ нїкано́ръ кѷпрїа́рхъ, не ѡ҆ставлѧ́хѹ и҆̀хъ благостоѧ́ти и҆ въ поко́и бы́ти.

³Ї҆ѻппі́ане же толи́ко сотвори́ша нече́стїе, ѹ҆моли́вше ї҆ѹдє́й съ ни́ми живѹ́щихъ вни́ти во предста́влєныѧ ѿ ни́хъ ладїи҄ съ жена́ми и҆ ча́ды, а҆́кибы ни є҆ди́нѣй враждѣ̀ междѹ̀ и҆́ми настоѧ́щей:

⁴на ѻ҆́бщее же ѹ҆ставле́нїе гра́дское и҆ си҄мъ соизво́лившымъ, ѩ҆́кѡ ми́ръ и҆мѣ́ти хотѧ́щымъ и҆ ничто́же подозрѣ́нїѧ и҆мѹ́щымъ, ѿве́зше и҆̀хъ погрѹзи́ша, сѹ́щхъ не мнѣ́е двѹ̀ сѡ́тъ.

⁵Позна́въ же ї҆ѹ́да бы́вшѹю на сро́дники своѧ҄ же́стокость, возвѣсти́въ мѹжє́мъ и҆̀же съ ни́мъ и҆ призва́въ првднаго сѹдїю̀ бг҃а,

⁶прїи́де на скверноѹбі́йцъ бра́тїй є҆гѡ̀, и҆ приста҄нища но́щїю сожжѐ, и҆ ладїи҄ попалѝ, избѣ́гшихъ же ѿ ѻ҆гнѧ̀ закла̀.

⁷Странѣ́ же заключе́нѣ бы́вшей ѿи́де, ѩ҆́кѡ па́ки прїитѝ и҆мѹ́щь и҆ всѐ ї҆ѻппі́анъ и҆скорени́ти гражда́нство.

⁸Ѹ҆разѹмѣ́въ же, ѩ҆́кѡ и҆ во а҆мні́и живѹ́щїй хотѧ́тъ ѡ҆бита́ющымъ ї҆ѹде́ѡмъ тѣ́мже ѡ҆́бразомъ сотвори́ти,

⁹и҆ на ї҆амні́тѧнъ но́щїю напа́дъ, зажжѐ приста́нище съ кораблѧ́ми ѩ҆́кѡ ѩ҆ви́тисѧ зарѧ́мъ ѻ҆гнѧ̀ во ї҆ер҇ли́мѣ, ста́дїѧмъ сѹ́щымъ двѹ́мъ ста́мъ четы́редесѧти.

¹⁰Ѿтѹ́дѹ же ѿше́дшымъ де́вѧть ста́дїй, творѧ́щымъ пѹ́ть на тїмоѳе́а, срази́шасѧ съ ни́мъ а҆ра́влѧнъ мно́жае пѧтѝ ты́сѧщъ мѹже́й и҆ кѡ́нникъ пѧ́ть сѡ́тъ.

¹¹Бы́вшей же крѣ́пцѣй бра́ни, и҆ сѹ́щымъ при ї҆ѹ́дѣ по́мощїю бж҃їею преѹспѣва́ющымъ, напо́льнїи а҆ра́влѧне ѡ҆долѣ́ни, проша́хѹ ѿ ї҆ѹ́ды десни́цы себѣ̀, ѡ҆бѣща́юще и҆ па́жить да́ти и҆ во про́чїихъ по́льзовати и҆̀хъ.

¹²Ї҆ѹ́да же ѹ҆разѹмѣ́въ, ѩ҆́кѡ и҆́стиннѡ во мно́гихъ ѻ҆нѝ потре́бни, ѡ҆бѣща̀ ми́ръ содержа́ти съ ни́ми: взѧ́вше же десни́цѹ, ѿидо́ша въ кѹ́щы своѧ҄.

¹³Нападе́ же и҆ на нѣ́кїй гра́дъ моста́ми тве́рдъ и҆ стѣна́ми ѡ́гражде́нъ, и҆́же ѿ всѧ́кихъ смѣ́шеныхъ ѩ҆зы́кѡвъ ѡ҆бита́емый, є҆мѹ́же и҆́мѧ ка́спїнъ.

¹⁴Сѹ́щїи же внѹтрѝ надѣ́ющесѧ на крѣ́пость стѣ́нъ и҆ на ѹ҆готовле́нїе бра́шенъ, неради́вѡ пребыва́хѹ, проклина́юще сѹ́щихъ при ї҆ѹ́дѣ, и҆ ктомѹ̀ хѹлѧ́ще, и҆ глаго́люще, ѩ҆̀же не подоба́етъ.

¹⁵Сѹ́щїи же со ї҆ѹ́дою призва́вше вели́каго ѡ҆блада́телѧ мі́ра, и҆́же без̾ ѻ҆внѡ́въ и҆ меха́нїческихъ ѻ҆рѹ́дїй во времена̀ ї҆исѹ́са разрѹшѝ ї҆ерїхѡ́нъ, нападо́ша ѕвѣроѡбра́знѡ на стѣ́нѹ.

¹⁶И҆ взе́мше гра́дъ бж҃їею во́лею, безчи́слєнна закла҄нїѧ сотвори́ша, ѩ҆́кѡ прилежа́щемѹ є҆́зерѹ, въ широтѹ̀ и҆мѹ́щемѹ ста҄дїи двѣ̀, текѹ́щею (ѹ҆бїенныхъ) кро́вїю и҆сполненѹ ѩ҆ви́тисѧ.

¹⁷Ѿтѹ́дѹ же ѿше́дше ста́дїй се́дмь сѡ́тъ пѧтьдесѧ́тъ, прїидо́ша въ хара́къ, ко глаго́лємымъ тѹві́инѡмъ ї҆ѹде́ѡмъ.

¹⁸И҆ тїмоѳе́а ѹ҆́бѡ на мѣ́стѣхъ не достиго́ша, ни є҆ди́но дѣ́ло соверши́вша ѿ мѣ́стъ ѿше́дша, ѡ҆ста́вльша же стра́жѹ въ нѣ́коемъ мѣ́стѣ ѕѣлѡ̀ тве́рдѹ:

¹⁹досїѳе́й же и҆ сѡсїпа́тръ сѹ́щїи ѿ воево́дъ, и҆̀же со маккаве́омъ, и҆зше́дше погѹби́ша ѿ тїмоѳе́а ѡ҆ста́вшихъ въ тверды́ни бо́лѣе десѧтѝ ты́сѧщъ мѹже́й.

²⁰Маккаве́й же ѹ҆стро́ивъ вѡ́ѧ своѧ҄ по полкѡ́мъ, поста́ви и҆́хъ над̾ полка́ми, и҆ на тїмоѳе́а по́йде и҆мѹ́щаго съ собо́ю сто два́десѧть ты́сѧщъ пѣшє́цъ, кѡ́нникъ же двѣ̀ ты́сѧщы и҆ пѧ́ть сѡ́тъ.

²¹Позна́въ же тїмоѳе́й прише́ствїе ї҆ѹ́дино, посла̀ жєны̀ и҆ дѣ́ти и҆ прѡ́чаѧ ѹ҆готѡ́ванїѧ въ тверды́ню нарица́емѹю карні́ю: бѣ̀ бо непребори́ма и҆ ко всхо́дѹ неѹдобна ра́ди тѣсноты̀ всѣ́хъ мѣ́стъ.

²²Е҆гда́ же по́лкъ ї҆ѹ́динъ пе́рвый ѩ҆ви́сѧ, и҆ бы́сть ѹ҆́жасъ на сѹпоста́ты и҆ стра́хъ ѿ ѩ҆вле́нїѧ всеви́дѧщагѡ бы́вшагѡ на ни́хъ, въ бѣ́гство ѹ҆стреми́шасѧ є҆ди́нъ ѿ дрѹга́гѡ бѣжа́щь, ѩ҆́кѡ мно́жицею ѿ свои́хъ повреди́шасѧ и҆ ѻ҆рѹ́жїи свои́ми пробода́хѹсѧ.

²³Творѧ́ше же ї҆ѹ́да гоне́нїе прилѣ́жнѡ, ѹ҆бива́ѧ и҆ноплеме́нникѡвъ, и҆ и҆збѝ ѿ ни́хъ три́десѧть ты́сѧщъ мѹже́й.

²⁴Са́мъ же тїмоѳе́й впа́дъ междѹ̀ сѹ́щихъ со досїѳе́емъ и҆ сѡсїпа́тромъ, со мно́гимъ ѹ҆хищре́нїемъ молѧ́ше, да жи́въ ѿпѹ́сти́тсѧ: занѐ мно́гихъ ѹ҆́бѡ (ѿ ї҆ѹдє́й) роди́телей и҆ нѣ́кїихъ бра́тїю и҆мѣ́ѧше (ѹ҆ себє̀), и҆ си҄мъ ѕло̀ слѹчи́тсѧ, а҆́ще ѹ҆́мретъ.

²⁵Е҆гда́ же мно́гими словесы̀ вѣроѧ́тенъ сотворѝ ѡ҆бѣ́тъ, є҆́же возврати́ти ѻ҆́ныхъ невре́дныхъ, пѹсти́ша є҆го̀ ра́ди спасе́нїѧ бра́тїи.

²⁶И҆зше́дъ же (маккаве́й) на карні́ю и҆ на а҆тарга́тїю, ѹ҆бѝ два́десѧть пѧ́ть ты́сѧщъ.

²⁷По побѣ́дѣ же си́хъ и҆ погѹбле́нїи ѡ҆братѝ ї҆ѹ́да во́инство и҆ на є҆фрѡ́нъ, гра́дъ тве́рдый, въ не́мже живѧ́ше лѷсі́а и҆ мно́жество ра́зныхъ ѩ҆зы҄къ: ю҆́нѡши же си́льнїи стоѧ́ще пред̾ стѣна́ми крѣ́пкѡ противѹра́товахѹ, въ не́мже бѣ́хѹ ѻ҆рѹ҄дїѧ и҆ стрѣ́лъ мно́гое ѹ҆готовле́нїе.

²⁸Призва́вше же всеси́льнаго съ держа́вою сокрѹша́ющаго ра́тныхъ си҄лы, взѧ́ша гра́дъ под̾ рѹ́кѹ и҆ ѹ҆би́ша сѹ́щихъ внѹ́трь два́десѧть пѧ́ть ты́сѧщъ:

²⁹и҆ ѿше́дше ѿтѹ́дѹ ѹ҆стреми́шасѧ на скѵ́ѳскїй гра́дъ, ѿстоѧ́щь ѿ ї҆ер҇ли́ма ста́дїй ше́сть сѡ́тъ.

³⁰Ѡ҆свидѣ́телствовавшымъ же живѹ́щымъ та́мѡ ї҆ѹде́ѡмъ ѡ҆ скѵ́ѳскихъ гра́жданѣхъ, ѩ҆́кѡ и҆мѣ́ютъ къ ни҄мъ благопрїѧ́тство и҆ во времена̀ ѕлополѹ́чнаѧ кро́тцы пребыва́хѹ,

³¹благодари́вше и҆̀мъ и҆ ѹ҆моли́вше, дабы̀ и҆ въ про́чее къ ро́дѹ и҆́хъ благопрїѧ́тни бы́ли, прїидо́ша во ї҆ер҇ли́мъ, дню̀ вели́кагѡ пра́здника седми́цъ настоѧ́щѹ.

³²По глаго́лемей же пентико́стїи, и҆до́ша проти́вѹ горгі́а страти́га ї҆дѹме́йска.

³³И҆зы́де же съ пѣшцы҄ тремѝ ты́сѧщьми, и҆ кѡ́нникъ четы́ре ста҄,

³⁴и҆ сотво́ршымъ бра́нь, слѹчи́сѧ па́сти ма҄лымъ ѿ ї҆ѹдє́й.

³⁵Досїѳе́й же нѣ́кто ѿ вакино́ра, ко́нный мѹ́жъ и҆ крѣ́покъ, ѩ҆́тъ горгі́ю, и҆ взе́мъ є҆го̀ за хламѵ́дѹ, ведѧ́ше є҆го̀ крѣ́пкѡ, и҆ хотѧ́щь проклѧ҄таго взѧ́ти жи́ва, нѣ́кто ѿ ѳракі́йскихъ кѡ́нникъ нападѐ на́нь и҆ ра́мо ѿсѣчѐ, горгі́а же и҆збѣжѐ во марїсѹ̀.

³⁶Во́инѡмъ же горгі́євымъ на мно́зѣ борю́щымсѧ и҆ ѹ҆трѹждє́ннымъ бы́вшымъ, призва́въ ї҆ѹ́да гд҇а спомо́щника, да бѹ́детъ и҆ воево́да бра́ни,

³⁷нача́тъ гла́сомъ ѻ҆те́ческимъ съ пѣ́сньми во́пль, возопи́въ и҆ неча́ѧннѣ на вѡ́ѧ горгі́євы напа́дъ, въ бѣ́гство и҆́хъ ѡ҆братѝ.

³⁸Ї҆ѹ́да же собра́въ вѡ́ѧ прїи́де во гра́дъ ѻ҆долла́мъ: и҆ є҆гда̀ седмы́й де́нь прмїи́де, по ѡ҆бы́чаю ѡ҆чи́стившесѧ въ то́мъ мѣ́стѣ сѹббѡ́тѹ пра́здноваша.

³⁹На ѹ҆́трїе же прїи́де со свои́ми ї҆ѹ́да, да, ѩ҆́коже подоба́ше, тѣлеса̀ па́дшихъ во́зметъ и҆ со сро́дниками положи́тъ во гробѣ́хъ ѻ҆те́ческихъ.

⁴⁰Ѡ҆брѣто́ша же ѹ҆ коегѡ́ждо ѿ ѹ҆ме́ршихъ под̾ ри́зами ѹ҆бїе́нныхъ ѿ дарѡ́въ їдѡлскихъ, ѩ҆̀же во ї҆амні́и, ѡ҆ ни́хже зако́нъ запреща́ше ї҆ѹде́ѡмъ, всѣ҄мъ же ѩ҆́ве бы́сть, ѩ҆́кѡ сеѧ̀ ра́ди вины̀ ті́и падо́ша.

⁴¹Всѝ ѹ҆̀бо благослови́вше пра́вый сѹ́дъ гдї҄ень, ѩ҆̀кѡ та҄йнаѧ сотворѝ ѩ҆влє́на,

⁴²къ моле́нїю ѡ҆брати́шасѧ моли́вше, да сотворе́ный грѣ́хъ весьма̀ и҆згла́дитсѧ: до́бльственный же ї҆ѹ́да молѧ́ше люді́й, да сохранѧ́тъ себѐ ѿ грѣха̀, ѻ҆чи́ма ви́дѧще бы҄вшаѧ па́дшихъ за грѣ́хъ.

⁴³И҆ сотвори́въ ѿ мѹже́й собра́нїе ѹ҆́тварей, ѩ҆́кѡ двѣ̀ ты́сѧщы дра́хмъ сребра̀, посла̀ во ї҆ер҇ли́мъ принестѝ за грѣ́хъ (ме́ртвыхъ) же́ртвѹ, предо́брѣ и҆ благоче́стнѡ творѧ̀, ѡ҆ воскресе́нїи помышлѧ́ѧ.

⁴⁴А҆́ще бо па́дшымъ воста́ти не ча́ѧлъ бы, и҆зли́шно бы́ло бы и҆ всѹ́е ѡ҆ ме́ртвыхъ моли́тисѧ.

⁴⁵Ктомѹ̀ взира́ющь, ѩ҆̀кѡ во благоче́стїи ѹ҆со́пшымъ и҆зрѧ́днѣ́йшаѧ ѹ҆гото́васѧ благода́ть:

⁴⁶преподо́бное и҆ благочести́вое помышле́нїе: ѿонѹ́дѹ же за ѹ҆ме́ршихъ моле́нїе сотворѝ, ѩ҆́кѡ да ѿ грѣха̀ ѡ҆чи́стѧтсѧ.