Read Библия Церковнославянская в҃ маккавей́скаѧ 14 Bible Online

в҃ маккавей́скаѧ 14 - Библия Церковнославянская bible

в҃ маккавей́скаѧ 14

¹По трїе́хъ же лѣ́тѣхъ ѹ҆вѣ́бда ї҆ѹ́да, ѩ҆́кѡ дими́трїй селе́ѵковъ сы́нъ вплывѐ сквозѣ̀ приста́нище, є҆́же при трі́поли, со мно́жествомъ крѣ́пкимъ и҆ кораблѧ́ми,

²и҆ ѡ҆держа̀ странѹ̀ и҆ ѹ҆бѝ а҆нтїо́ха и҆ є҆гѡ̀ намѣ́стника лѷсі́ю.

³А҆лкі́мъ же нѣ́кто бы́вый пре́жде а҆рхїере́й, во́лею же ѡ҆скверни́выйсѧ во времена̀ смѣше́нїѧ, помы́сливъ, ѩ҆́кѡ ни кі́имъ ѡ҆́бразомънѣ́бсть є҆мѹ̀ спасе́нїѧ, нижѐ прихожде́нїѧ ко ст҃о́мѹ ѻ҆лтарю̀,

⁴прїи́де ко царю̀ дими́трїю сто̀ пѧтьдесѧ́тъ пе́рвагѡ лѣ́та, приносѧ̀ є҆мѹ̀ вѣне́цъ зла́тъ и҆ фі́нїкъ, къ си҄мъ же и҆ цвѣты̀, и҆̀же мнѧ́хѹсѧ церко́внїи бы́ти: и въ де́нь ѻ҆́ный молча́ше.

⁵Полѹчи́въ же вре́мѧ безѹ́мїю своемѹ̀ содѣ́йствѹющее, при́званъ бы́сть дими́трїемъ на собо́ръ и҆ вопроше́нъ, въ ко́емъ состоѧ́нїи и҆ совѣ́тѣ стоѧ́тъ ї҆ѹде́є;

⁶Къ си҄мъ речѐ: глаго́лемїи ѿ ї҆ѹдє́й а҆сїде́є, и҆́хже во́ждь ї҆ѹ́да маккаве́й, бра҄ни стро́ѧтъ и҆ ра҄спри воздвиза́ютъ, не допѹска́юще ца́рствѹ благостоѧ́нїѧ полѹчи́ти:

⁷сегѡ̀ ра́ди ѿлѹче́нъ прароди́телскїѧ сла́вы, си́рѣчь свѧщеннонача́лства, сѣ́мѡ нн҃ѣ прїидо́хъ,

⁸пе́рвое ѹ҆́бѡ ѡ҆ надлежа́щихъ царю̀ вѣ́рность содержа́щь, второ́е же и҆ ѡ҆ свои́хъ гра́жданѣ́хъ промышлѧ́ѧ: предрѣче́ниыхъ бо безслове́сїемъ весьма̀ ро́дъ на́шъ не ма́лѡ стра́ждетъ:

⁹ка҄ѧждо же си́хъ позна́въ, ты̀, царю̀, ѡ҆ странѣ̀ и҆ ѡ҆ ѡ҆бстоѧ́нїи ро́да на́шегѡ проѹразѹмѣ́й по человѣколю́бїю, є҆́же и҆́маши ко всѣ҄мъ благопрекло́нное:

¹⁰доне́лѣже бо ї҆ѹ́да жи́въ є҆́сть, невозмо́жно ми́ра полѹчи́ти веще́мъ.

¹¹Сицєвымъ же рѣчє́ннымъ бы́вшымъ ѿ негѡ̀, а҆́бїе про́чїи дрѹ́зи, враждѹ̀ и҆мѹ́щїи на ї҆ѹ́дѹ, разжего́ша дими́трїа.

¹²Призва́въ же ско́рѡ никано́ра старѣ́йшинѹ над̾ слона́ми и҆ воево́дою поста́вивъ ї҆ѹде́ею, посла̀,

¹³да́въ за́повѣдь, самаго̀ ѹ҆́бѡ ї҆ѹ́дѹ ѹ҆би́ти, сѹ́щихъ же съ ни́мъ расточи́ти, поста́вити же а҆лкі́ма а҆рхїере́емъ превели́кагѡ хра́ма.

¹⁴Тогда̀ ѩ҆зы́цы ѹ҆бѣ́гшїи и҆з̾ ї҆ѹде́и ѿ ї҆ѹ́ды, стада́ми прихожда́хѹ къ нїкано́рѹ, ї҆ѹдє́йскаѧ ѕлополѹ҄чїѧ и҆ бѣ҄дства себѣ̀ благополѹ҄чїѧ мнѧ́ще бы́ти.

¹⁵Слы́шавще же (ї҆ѹде́є) нїкано́рово прише́ствїе и҆ нападе́нїе ѩ҆зы́кѡвъ, посы́павшесѧ земле́ю, молѧ́хѹ поста́вившаго да́же до вѣ́ка лю́ди своѧ҄ и҆ пр҇нѡ съ ѩ҆вленїемъ защища́ющаго свою̀ ча́сть.

¹⁶Повелѣ́вшѹ же воево́дѹ, ско́рѡ ѿтѹ́дѹ дви́гнѹшасѧ и҆ смѣси́шасѧ съ ни́ми при гра́дцѣ деса́вли.

¹⁷Сі́мѡнъ же бра́тъ ї҆ѹ́динъ срази́всѧ съ нїкано́ромъ, ма́лѡ же ѹ҆страши́всѧ внеза́пнагѡ ра́ди нахожде́нїѧ сѹпоста́тѡвъ.

¹⁸Ѻ҆ба́че же слы́шавъ нїкано́ръ мѹ́жесто при ї҆ѹ́дѣ сѹ́щихъ и҆ благодѹ́шїе, и҆́мже подвиза́ютсѧ за ѻ҆те́чество, ѹ҆боѧ́сѧ сѹ́дъ кро́вїю сотвори́ти:

¹⁹сегѡ̀ ра́ди посла̀ посїдѡ́нїа и҆ ѳеодо́та и҆ маттаѳі́ю да́ти и҆ взѧ́ти десни́цѹ.

²⁰Мно́гѹ же ѡ҆ се́мъ бы́вшѹ совѣ́тѹ и҆ воево́дѣ лю́демъ возвѣсти́вшѹ и҆ бы́вшѹ є҆диногла́сномѹ всѣ́хъ и҆зволе́нїю, соизво́лиша на ми҄рнаѧ

²¹и҆ нареко́ша де́нь, въ ѻ҆́ньже ѡ҆со́бнѡ сни́дѹтсѧ кѹ́пнѡ. И҆ прїи́де. И҆ поста́виша разли҄чнаѧ сѣда҄лища.

²²Повелѣ́ же ї҆ѹ́да воѡрѹжє́ннымъ бы́ти готѡ́вымъ въ мѣ́стѣхъ прили́чныхъ, да не когда̀ ѿ сѹпоста҄тъ внеза́пѹ ѕлодѣѧ́нїе бѹ́детъ, и҆ подоба́ющѹю бесѣ́дѹ ѻ҆́бще сотвори́ша.

²³Пребыва́ше же нїкано́ръ во ї҆ер҇ли́мѣ и҆ ни ко́егѡже ѕла̀ сотворѝ, стада́ же наро́дѡвъ со́бранныхъ ѿпѹстѝ.

²⁴И҆мѣ́ѧше же ї҆ѹ́дѹ всегда̀ въ лицы̀, дѹше́внѡ къ мѹ́жѹ преклони́сѧ:

²⁵моли́ же є҆го̀ ѡ҆жени́тисѧ и҆ ча҄да сотвори́ти. Ѡ҆жени́сѧ, бла́гѡ поживѐ, ѻ҆бщежи́телствоваше.

²⁶А҆лкі́мъ же ви́дѧ междѹ̀ и҆́ми благопрїѧ́тство и҆ бы҄вшаѧ совѣща҄нїѧ позна́въ, и҆́де къ дими́трїю и҆ глаго́лаше, ѩ҆́кѡ нїкано́ръ ѡ҆ ве́щехъ чѹ҄ждаѧ мѹ́дрствѹетъ: ї҆ѹ́дѹ бо, навѣ́тника ца́рствѹ, прее́мника воспрїѧ̀ себѣ̀.

²⁷Ца́рь же воз̾ѧри́всѧ и҆ прелѹка́выми ѡ҆клевєта́нїи є҆гѡ̀ разсверѣ́пѣвъ, писа̀ нїкано́рѹ глаго́лѧ: ѡ҆ совѣща́нїихъ си́хъ тѧ́жко (мѝ є҆́сть) носи́ти: повелѣва́ю тѝ маккаве́а свѧ́зана посла́ти ско́рѡ во а҆нтїохі́ю.

²⁸Ѹ҆вѣ́давъ же ѡ҆ си́хъ нїкано́ръ, смѧте́сѧ и҆ тѧ́жкѡ терпѧ́ше завѣща҄ннаѧ ѿри́нѹти, ни чи́мже є҆го̀ мѹ́жѹ ѡ҆би́дѣвшѹ.

²⁹Но поне́же царю̀ сопроти́витисѧ не бѣ̀ возмо́жно, благовре́менства наблюда́ше хи́тростїю военною сїѐ соверши́ти.

³⁰Маккаве́й же ви́дѧ над̾ собо́ю гро́знѣе дѣ́юща нїкано́ра и҆ ѡ҆быкнове́нное срѣ́тенїе свирѣ́пѣе и҆мѹ́ща, ѹ҆разѹмѣ́въ не ѿ бла́га бы́ти сѹровствѹ̀ семѹ̀, собра́въ не ма́лѡ сѹ́щихъ ѡ҆́крестъ себє̀, скры́сѧ ѿ нїкано́ра.

³¹Позна́въ же дрѹгі́й, ѩ҆́кѡ до́бльственнѡ ѿ мѹ́жа хи́тростїю предваре́нъ, прише́дъ къ вели́комѹ и свѧто́мѹ хра́мѹ, свѧще́нникѡмъ подоба́ющыѧ жє́ртвы приносѧ́щымъ повелѣ̀ преда́ти мѹ́жа.

³²Си҄мъ же съ клѧ́твою ре́кшымъ, ѩ҆́кѡ не вѣ́дѧтъ, гдѣ̀ є҆́сть и҆ско́мый, просте́ръ десни́цѹ на це́рковь, си́ми клѧ́тсѧ:

³³а҆́ще не предадите́ ми свѧ́зана ї҆ѹ́дѹ, то̀ бж҃їй хра́мъ ра́венъ со земле́ю сотворю̀, и҆ ѻ҆лта́рь раскопа́ю, и҆ ка́пище дїонѵ́сѹ сла́вное возста́влю здѣ̀.

³⁴И҆ сїѧ҄ ре́къ ѿи́де. Жерцы̀ же воздѣ́юще рѹ́цѣ на не́бо, прнзыва́хѹ сѹ́щаго всегда̀ спобо́рника ѩ҆зы́кѹ своемѹ̀, сїѧ҄ рекѹ́ще:

³⁵ты̀, гд҇и всѣ́хъ, не тре́бѹѧй ничто́же, благоволи́лъ є҆сѝ хра́мѹ ѡ҆бита́нїѧ твоегѡ̀ бы́ти въ на́съ:

³⁶и҆ нн҃ѣ, ѽ, ст҃е, всѧ́кагѡ ѡ҆сщ҃е́нїѧ гд҇и, сохранѝ во вѣ́къ нескве́рненъ се́й хра́мъ неда́внѡ ѡ҆чище́нный, загради́ же всѧ҄ка ѹ҆ста̀ непра́вєдна.

³⁷Разі́й же нѣ́кто ѿ старѣ́йшинъ ї҆ер҇ли́мскихъ ѡ҆клевета́нъ бы́сть нїкано́рѹ, мѹ́жъ люби́тель гра́жданъ и҆ ѕѣлѡ̀ до́брѣ словѹ́щь и҆ по благопрмѧ́тствѹ ѻ҆те́цъ ї҆ѹде́ѡмъ и҆менѹ́емый:

³⁸бѧ́ше бо внесы́й въ пре́жнихъ временѣ́хъ несмѣше́нїѧ сѹ́дъ во ї҆ѹде́йствѣ, и҆ тѣ́ло и҆ дѹ́шѹ за ї҆ѹде́йство предаѧ́ше со всѧ́кимъ ѹ҆се́рдїемъ.

³⁹Хотѧ́щь же нїкано́ръ ѩ҆́внѹ сотвори́ти не́нависть, ю҆́же и҆мѣ̀ на ї҆ѹдє́и, посла̀ во́инѡвъ бо́лѣе пѧтѝ сѡ́тъ ѩ҆́ти є҆го̀.

⁴⁰Мнѧ́ше бо, ѩ҆́кѡ ѻ҆́наго поима́въ, си҄мъ содѣ́лаетъ бѣдѹ̀.

⁴¹Мно́жествѹ же наро́да хотѧ́щѹ сто́лпъ ѡ҆бдержа́ти и҆ дворѡ́выѧ двє́ри разрѹша́ющѹ, и҆ повелѣ́вшѹ ѻ҆́гнь принестѝ и҆ двє́ри зажещѝ, ѡ҆б̾ѧ́тъ ѿвсю́дѹ бы́въ, мече́мъ порази́сѧ,

⁴²лѹ́чше добльственнѡ хотѧ́щь ѹ҆мре́ти, не́жели беззако́нникѡмъ подрѹ́чникъ бы́ти и҆ своѐ благоро́дство недосто́йнѣ ѡ҆безче́стити.

⁴³Ско́рости же ра́ди по́двига несме́ртна ѩ҆́зва бы́сть, и҆ наро́дѡмъ внѹ́трь две́рїй врѣ́ѧвшымсѧ, восте́къ де́рзостнѡ на стѣ́нѹ, све́рже са́мъ себѐ мѹ́жественнѡ на наро́ды.

⁴⁴Ѡ҆нымъ же ско́рѡ разбѣ́гшымсѧ и҆ бы́вшѹ разстоѧ́нїю, падѐ среди́ною чре́ва посредѣ̀ и҆́хъ:

⁴⁵є҆ще́ же ды́шѹщь и҆ разжже́нъ дѹше́ю, воста́въ, кро́ви є҆гѡ̀ пото́комъ текѹ́щей и҆ тѧжча́йшымъ ра́намъ сѹ́щымъ, бѣжа́щь сквозѣ̀ наро́ды про́йде,

⁴⁶и҆ ста́въ на нѣ́коемъ ка́мени стремни́ннѣмъ, весьма̀ ѹ҆жѐ без̾ кро́ви бы́въ, и҆сто́ргнѹвъ внѹ́трєннѧѧ (своѧ҄) и҆ взе́мъ ѻ҆бѣ́ма рѹка́ма ве́рже на наро́ды: и҆ призва́въ владѣ́ющаго живото́мъ и҆ дѹ́хомъ, да сїѧ҄ є҆мѹ̀ па́ки возда́стъ, и҆ си́мъ ѡ҆́бразомъ живо́тъ сконча̀.