Read Библия Церковнославянская в҃ маккавей́скаѧ 5 Bible Online

в҃ маккавей́скаѧ 5 - Библия Церковнославянская bible

в҃ маккавей́скаѧ 5

¹Въ сїе́ же вре́мѧ вторы́й похо́дъ ѹ҆гото́ва а҆нтїо́хъ во є҆гѵ́петъ.

²Слѹчи́сѧ же по всемѹ̀ гра́дѹ, є҆два̀ не чрез̾ четы́редесѧть дні́й ѩ҆влѧ́тисѧ на воздѹ́сѣ рнста́ющихъ ко́нникѡвъ златы҄ѧ ѻ҆дє́жды и҆мѹ́щихъ и҆ ко́пїѧми по полкѡ́мъ воѡрѹже́нныхъ,

³и҆ собра҄нїѧ ко́ней чи́ннѡ ѹ҆стро́енныхъ, и҆схождє́нїѧ твѡри́маѧ и҆ сражє́нїѧ ѿ ѻ҆бои́хъ стра́нъ, и҆ щитѡ́въ движє́нїѧ и҆ сѹ́лицъ мно́жество, и́ мече́й и҆сторжє́нїѧ и҆ стрѣ́лъ мета҄нїѧ, и҆ златы́хъ ѻ҆де́ждъ блиста҄нїѧ и҆ всѧ҄кїѧ брѡнѝ.

⁴Тѣ́мже всѝ молѧ́хѹсѧ, да ѩ҆вле́нїе во бла́го бѹ́детъ.

⁵Бы́вши же вѣ́сти лжи́вѣй, а҆́кибы а҆нтїо́хъ ѿ житїѧ̀ ѿше́лъ, взе́мъ ї҆асѡ́нъ не ме́нши ты́ѧщи мѹже́й, внеза́пѹ на гра́дъ сотворѝ нападе́нїе гра́жданѡмъ же на стѣ́нѹ восте́кшымъ, и҆ наконе́цъ ѹ҆жѐ взе́млемѹ сѹ́щѹ гра́дѹ, менела́й во краегра́дїе ѹ҆бѣжѐ.

⁶Ї҆асѡ́нъ же творѧ́ше закла҄нїѧ гра́жданъ свои́хъ неща́днѡ, не помышлѧ́ѧ, ѩ҆́кѡ благовре́менство, є҆́же на ѹ҆́жики, ѕлополѹ́чїе є҆́сть преве́лїе: мнѧ̀ над̾ врага́ми, а҆ не над̾ є҆диноѧзы́чными побѣди́тєлнаѧ прїѧ́ти,

⁷нача́лства ѹ҆́бѡ не ѡ҆держа̀, кончи́нѹ же навѣ́та стѹ́дъ прїе́мь, бѣгле́цъ па́ки во а҆мані́тїдѹ ѿи́де.

⁸Коне́цъ ѹ҆̀бо ѕла́гѡ житїѧ̀ полѹчѝ, заключе́нъ ѹ҆ а҆ре́ты а҆ра́вскагѡ мѹчи́телѧ, бѣ́гаѧ ѿ гра́да во гра́дъ, гони́мь ѿ всѣ́хъ и҆ ненави́димь а҆́ки зако́нѡвъ ѿстѹ́пникъ, и҆ ѡ҆гнѹша́емь, ѩ҆́кѡ ѻ҆те́чествѹ и҆ гра́жданѡмъ вра́гъ, во є҆гѵ́петъ и҆згна́нъ бы́сть.

⁹И҆ и҆́же мно́гихъ ѿ ѻ҆те́чества и҆згна́вый, стра́нствѹѧ поги́бе къ лакедемо́нѧнѡмъ ѿше́дъ, а҆́ки сро́дства ра́ди прибѣ́жище хотѧ́щь и҆мѣ́ти.

¹⁰И҆ и҆́же мно́жество непогребе́нныхъ и҆зве́рже, (са́мъ) не ѡ҆пла́канъ бы́сть, и҆ погребе́нїѧ ни какова̀ сподо́бисѧ, нижѐ ѻ҆те́ческомѹ гро́бѹ приѡбщи́сѧ.

¹¹Возвѣсти́вшымъ же царю̀ ѡ҆ бы́вшихъ, ѹ҆сѹмнѣ́сѧ (ца́рь), да не ѿстѹ́питъ ї҆ѹде́а: и҆ тогѡ̀ ра́ди прише́дъ и҆з̾ є҆гѵ́пта раз̾ѧре́нъ дѹше́ю, взѧ̀ гра́дъ ѻ҆рѹ́жїемъ

¹²и҆ повелѣ̀ во́инѡмъ сѣщѝ неща́днѡ срѣта́ющихсѧ и҆ въ до́мы входѧ́щихъ закала́ти.

¹³Бы́ша же ѹ҆бїє́нїѧ ю҆́ношъ и҆ ста́рцєвъ, мѹже́й и҆ же́нъ и҆ ча҄дъ и҆стреблє́нїѧ, дѣ́въ же и҆ ѻ҆трокѡ́въ закла́нїѧ.

¹⁴Ѻ҆́смьдесѧтъ же ты́сѧщъ во всѣ́хъ трїе́хъ дне́хъ и҆збїе́ни: и҆ четы́редесѧть ѹ҆́бѡ ты́сѧщъ плѣне́ни, не ме́нши же ѹ҆бїе́ныхъ про́дани бы́ша.

¹⁵Не дово́ленъ же бы́въ и҆ си́ми, дерзнѹ̀ вни́ти въ це́рковь всеѧ̀ землѝ свѧтѣ́йшѹю, и҆мѣ́ѧй менела́а предводи́телѧ, бы́вша зако́нѡвъ и҆ ѻ҆те́чества преда́телѧ.

¹⁶И҆ скве́рныма рѹка́ма взе́млѧ свѧщє́нныѧ сосѹ́ды и҆ ѩ҆̀же ѿ и҆ны́хъ царе́й положє́ннаѧ на ѹ҆множе́нїе и҆ сла́вѹ мѣ́ста и҆ че́сть, скве́рныма рѹка́ма прикаса́ѧсѧ подаѧ́ше.

¹⁷И҆ вознесе́сѧ мы́слїю а҆нтїо́хъ, не помышлѧ́ѧ, ѩ҆́кѡ грѣ҄хъ ра́ди ѡ҆бита́ющихъ во гра́дѣ ма́лѡ прогнѣ́васѧ влдка, тогѡ̀ ра́ди бы́сть ѡ҆ мѣ́стѣ презрѣ́нїе:

¹⁸а҆́ще же бы не слѹчи́лосѧ и҆̀мъ мно́гими грѣхи҄ бы́ти ѡ҆б̾ѧ҄тымъ, ѩ҆́коже бѣ̀ и҆лїодѡ́ръ по́сланный ѿ селе́ѵка царѧ̀ ко ѡ҆смотре́нїю сокро́вищнагѡ храни́лища, се́й прише́дъ внеза́пѹ бїе́нъ бы́въ ѿврати́лсѧ бы ѿ де́рзости.

¹⁹Но не ра́ди мѣ́ста ѩ҆зы́къ, но ѩ҆зы́ка ра́ди мѣ́сто гд҇ь и҆збра̀.

²⁰Тѣ́мже ѹ҆̀бо и҆ сїѐ мѣ́сто соприча́стно бы́сть людски́хъ ѕѡ́лъ слѹчи́вишихсѧ, послѣди́ же благодѣѧ́нїємъ ѿ гд҇а приѡбщи́сѧ, и҆ ѡ҆ста́вленое во гнѣ́вѣ вседержи́телѧ, па́ки въ примире́нїи вели́кагѡ влдки со всѧ́кою сла́вою и҆спра́висѧ.

²¹?И҆́бо а҆нтїо́хъ и҆з̾ це́ркве взе́мъ ты́сѧщѹ ѻ҆́смь сѡ́тъ тала́нтѡвъ, ско́рѡ во а҆нтїохі́ю возврати́сѧ, ча́ѧ ѿ горды́ни зе́млю ѹ҆́бѡ пла́вателнѹ, а҆ мо́ре пѣшехо́дно положи́ти ѿ возвыше́нїѧ се́рдца.

²²Ѡ҆ста́ви же и҆ приста́вники ко ѡ҆ѕлобле́нїю люді́й, во ї҆ер҇ли́мѣ ѹ҆́бѡ фїлі́ппа ро́домъ фрѷге́анина, нра́въ жесточа́йшїй и҆мѹ́щаго не́же поста́вльшїй (є҆го̀),

²³въ гарїзі́нѣ же а҆ндроні́ка: и҆ къ си҄мъ менела́а, и҆́же ѕлѣ́е и҆ны́хъ ѡ҆ѕлоблѧ́ше гра́жданъ,

²⁴ненави́стное же ко гражда́нѡмъ ї҆ѹдє́йскимъ и҆мѣ́ѧй се́рдце, посла̀ ненави́стнаго нача́лника а҆поллѡ́нїа со два́десѧтїю двѣма̀ ты́сѧщьми во́инства, повелѣ́въ є҆мѹ̀ всѣ́хъ въ во́зрастѣ сѹ́щихъ погѹби́ти, жєны́ же и҆ ю҆́ношы продаѧ́ти.

²⁵Се́й же прише́дъ во ї҆ер҇ли́мъ и҆ а҆́ки ми́ръ себѣ̀ притвори́въ, ѹ҆держа́сѧ да́же до днѐ свѧтыѧ сѹббѡ́ты: и҆ ѹ҆лѹчи́въ празднѹющихъ ї҆ѹде́ѡвъ, воѡрѹжи́тисѧ свои҄мъ повелѣ̀,

²⁶и҆ и҆зше́дшихъ всѣ́хъ на позо́ръ закла̀, и҆ во гра́дъ со ѻ҆рѹ́жїи вскочи́въ, люді́й мно́гое мно́жество погѹбѝ.

²⁷Ї҆ѹ́да же маккаве́й, и҆́же десѧ́тый бы́въ, и҆ ѿше́дъ въ пѹ́сто мѣ́сто, ѕвѣри́нымъ ѡ҆́бразомъ въ гора́хъ живѧ́ше съ сѹ́щими съ ни́мъ, и҆ травнѹ́ю пи́щѹ ѩ҆дѹ́ще пребыва́хѹ, є҆́же бы не причасти́сѧ ѡ҆скверне́нїю.