Read Библия Церковнославянская в҃ маккавей́скаѧ 6 Bible Online

в҃ маккавей́скаѧ 6 - Библия Церковнославянская bible

в҃ маккавей́скаѧ 6

¹Не по мно́зѣ же вре́мени посла̀ ца́рь ста́рца (нѣ́коего) а҆ѳине́анина понѹжда́ти ї҆ѹдє́й, дабы̀ ѿстѹпи́ли ѿ ѻ҆те́ческихъ преда́нїй и҆ по бж҇твєннымъ зако́нѡмъ не жи́телствовали,

²ѡ҆скверни́ти же и҆ во ї҆ер҇ли́мѣ хра́мъ и҆ нарещѝ ді́а ѻ҆лѷмпі́йскагѡ, и҆ сѹ́щїй въ гарїзі́нѣ, ѩ҆́коже ѡ҆бита́ющїи бѧ́хѹ на мѣ́стѣ ѻ҆́нѣмъ, ді́а страннопрїи́мца.

³Лю́то же и҆ всемѹ̀ наро́дѹ бѣ̀ и тѧ́жко нападе́нїе ѕло́бы,

⁴и҆́бо це́рковь любодѣѧ́нїѧ и҆ козлогласова́нїѧ бѣ̀ полна̀ ѿ ѩ҆зы҄къ живѹ́щихъ со блѹдни́цами и҆ во свѧще́нныхъ притво́рѣхъ къ жена́мъ приближа́ющихсѧ и҆ неподѡба́ющаѧ внѹ́трь вносѧ́щихъ.

⁵Ѻ҆лта́рь та́кожде по́лнъ бѣ̀ возбране́нными ѿ зако́нѡвъ.

⁶Бѧ́ше же не возмо́жио сѹббѡ́тъ храни́ти, ни пра́здникѡвъ ѻ҆те́ческихъ содержа́ти, нижѐ весьма̀ комѹ̀ себѐ ї҆ѹде́аниномъ и҆менова́ти.

⁷Ведѧ́хѹжесѧ съ го́рькою нѹжде́ю на всѧ́къ мц҇ъ въ де́нь рожде́нїѧ царе́ва въ же́ртвѣ: бы́вшѹ же дїоно́совѹ пра́здникѹ, понѹжда́хѹсѧ ї҆ѹде́є кі́ссы и҆мѹ́ще хвали́ти дїонѵ́са.

⁸Повелѣ́нїе же и҆зы́де въ бли҄жнїѧ гра́ды є҆́ллинскїѧ, птоломе́ю под̾ѹсти́вшѹ, да тогѡ́жде ѹ҆ставле́нїѧ проти́вѹ ї҆ѹде́євъ ѹ҆потреблѧ́ютъ, и҆ же́ртвѹ прино́сѧтъ,

⁹не и҆зволѧ́ющихъ же прейтѝ на є҆́ллинскїѧ ѹ҆ста́вы да ѹ҆бива́ютъ: бѣ̀ ѹ҆̀бо ви́дѣти настоѧ́щѹю бѣ́дность.

¹⁰Двѣ̀ бо жєны̀ ѡ҆клевєта́ны бы́стѣ ѡ҆брѣ́завшыѧ ча҄да своѧ҄: си́хъ привѣ́сивше и҆́ма къ сосца́мъ младе́нцы и҆ пред̾ наро́домъ ѡ҆бводи́вше и҆̀хъ по гра́дѹ, со стѣны̀ сверго́ша.

¹¹И҆ні́и же въ бли҄жнїѧ сте́кшесѧ пещє́ры, та́йнѡ де́нь сѹббѡ́тный пра́здновати, є҆гда̀ возвѣ́щено бы́сть фїлі́ппѹ, сожже́ни бы́ша, занѐ ра́ди че́сти пра́здничнагѡ днѐ боѧ́хѹсѧ помога́ти себѣ̀.

¹²Молю̀ ѹ҆̀бо чтѹ́щихъ кни́гѹ сїю̀ не ѹ҆страша́тисѧ напа́стей, мнѣ́ти же мѹчє́їѧ сїѧ҄ не къ погѹбле́нїю, но къ наказа́нїю ро́да на́шегѡ бы́ти.

¹³И҆́бо на мно́го вре́мѧ не попѹска́ти ѕлоче́ствѹющымъ, но а҆́бїе впа́дати и҆̀мъ въ мѹчє́нїѧ, вели́кагѡ благодѣѧ́нїѧ є҆́сть зна́менїе.

¹⁴Не бо̀ ѩ҆́коже на и҆́ныхъ ѩ҆зы́цѣхъ жде́тъ долготерпѣли́вый влдка, до́ндеже дости́гшихъ ко и҆сполне́нїю грѣхѡ́въ мѹ́читъ, та́кѡ и҆ на на́съ сѹдѝ бы́ти:

¹⁵да не до конца̀ дости́гшымъ грѣхѡ́мъ на́шымъ, послѣдѝ на́мъ ѿмсти́тъ.

¹⁶Сегѡ̀ ра́ди никогда́же ѿ на́съ мл҇рдїе своѐ ѿе́млетъ: наказѹ́ѧй же бѣ́дствами не ѡ҆ставлѧ́етъ люді́й свои́хъ.

¹⁷Но сїѧ҄ ко ѹ҆вѣща́нїю на́мъ речє́на сѹ́ть: ма́лыми же подоба́етъ вни́ти въ по́вѣсть.

¹⁸Е҆леаза́ръ нѣ́кїй ѿ пе́рвенствѹющихъ кни́жникѡвъ, мѹ́жъ ѹ҆жѐ соста́рѣвсѧ лѣ́тами и҆ зра́комъ лица̀ благолѣ́пенъ сы́й, ѿве́рстыми ѹ҆сты҄ принѹжда́емь бѧ́ше ѩ҆́сти свина҄ѧ мѧса̀.

¹⁹Ѻ҆́нъ же со сла́вою сме́рть па́че, не́жели ненави́стный живо́тъ пред̾избра́въ, во́лею и҆дѧ́ше на мѹ́кѹ:

²⁰плю́нѹвъ же (на та҄ѧ), и҆́мже ѡ҆́бразомъ подоба́ше приходи́ти хотѧ́щымъ терпѣ́ти мѹче́нїе, ѩ҆̀же не лѣ́ть бѣ̀ ѩ҆́сти ра́ди любле́нїѧ живота̀.

²¹Ко беззако́ннѣй же приста́вленнїи же́ртвѣ, дре́внѧгѡ ра́ди къ мѹ́жѹ зна́нїѧ, взе́мше є҆го̀ на є҆ди́нѣ молѧ́хѹ, да принесє́наѧ мѧса̀, ѩ҆̀же ѩ҆́сти є҆мѹ̀ лѣ́ть бѧ́ше, є҆гѡ̀ ра́ди ѹ҆готѡ́вана, притвори́тъ себѐ а҆́ки ѩ҆дѹ́ща повелѣ҄ннаѧ ѿ царѧ̀ же́ртвєннаѧ мѧса̀:

²²да сїѐ содѣ́лавъ и҆зба́витсѧ ѿ сме́рти и҆ дре́внїѧ ра́ди къ ни҄мъ дрѹ́жбы полѹ́читъ человѣколю́бїе.

²³Ѻ҆́нъ же мы́сль бла́гѹ воспрїе́мь и҆ досто́йнѹ во́зраста и҆ ста́рости преимѹ́щества, и҆ пристѧжа́ныѧ лѣ́потныѧ сѣди́ны и҆ и҆здѣ́тска предо́брагѡ воспита́нїѧ, па́че же ст҃а́гѡ и҆ бг҃ода́ннагѡ зако́на, послѣ́довнѡ ѿвѣща̀, ско́рѡ глаго́лѧ: и҆зволѧ́ю по́сланъ бы́ти во а҆́дъ,

²⁴не бо̀ во́зрастѹ на́шемѹ досто́йно є҆́сть лицемѣ́рити, да мно́зи ѿ ю҆́ныхъ непщѹ́юще є҆леаза́ра девѧтидесѧтилѣ́тна прейтѝ къ жи́телствѹ и҆ноплеме́нныхъ,

²⁵и҆ ѻ҆нѝ моегѡ̀ ра́ди лицемѣ́рїѧ и҆ маловре́меннагѡ живота̀ прельстѧ́тсѧ менє̀ ра́ди, и҆ не́нависть и҆ поро́къ ста́ростимое́й сотворю̀:

²⁶а҆́ще бо ны́нѣшнїѧ мѹ́ки человѣ́ческїѧ и҆ и҆зба́влюсѧ, но рѹкѝ всемогѹ́щагѡ ни жи́въ, ни ѹ҆ме́рый и҆збѣгѹ̀:

²⁷тѣ́мже мѹ́жественнѣ нн҃ѣ разлѹчи́всѧ живота̀, ста́рости ѹ҆́бѡ досто́инъ ѩ҆влю́сѧ,

²⁸ю҆́нымъ же ѡ҆́бразъ до́блїй ѡ҆ста́влю, є҆́же ѹ҆се́рднѡ и҆ до́бльственнѡ за чєстны́ѧ и҆ свѧты҄ѧ зако́ны ѹ҆мира́ти. И҆ сїѧ҄ ре́къ, со тща́нїемъ на мѹ́кѹ по́йде.

²⁹Ведѹ́щїи же є҆го̀, бы́вшѹю ма́лѡ пре́жде благопрїѧ́тность къ немѹ̀ въ свирѣ́пость премѣни́ша предрѣче́нныхъ ра́ди слове́съ, ѩ҆̀же сі́и мнѧ́хѹ безѹ́мство бы́ти.

³⁰Хотѧ́ же ра́нами сконча́тисѧ, возстена́въ речѐ: гд҇еви ст҃ы́й ра́зѹмъ и҆мѹ́щемѹ ѩ҆́вно є҆́сть, ѩ҆́кѡ ѿ сме́рти могѹ́щь и҆зба́витисѧ, же́стѡкїѧ терплю̀ на тѣ́лѣ бѡлѣ́зни ѹ҆ѧзвлѧ́емь, на дѹши́ же сла́дцѣ стра́ха ра́ди є҆гѡ̀ сїѧ҄ стра́ждѹ.

³¹И҆ се́й ѹ҆̀бо си́мъ ѡ҆́бразомъ живо́тъ сконча̀, не то́кмѡ ю҆́ношамъ, но и҆ премнѡ́гимъ ѩ҆зы́ка свою̀ сме́рть во ѡ҆́бразъ до́блести и҆ въ памѧть добродѣ́тели ѡ҆ста́вивъ.