Read Библия Церковнославянская в҃ маккавей́скаѧ 7 Bible Online

в҃ маккавей́скаѧ 7 - Библия Церковнославянская bible

в҃ маккавей́скаѧ 7

¹Слѹчи́сѧ же и҆ седми́мъ бра́тїѧмъ вкѹ́пѣ съ ма́терїю ѩ҆́тымъ, понѹжда́ємымъ бы́ти ѿ царѧ̀ ѩ҆́сти проти́вѹ пра́вилъ мѧса̀ свина҄ѧ, бичмѝ и҆ жи́лами волѹ́ѧми мѹ҄чимымъ.

²Е҆ди́нъ же ѿ ни́хъ, и҆́же бѣ̀ пе́рвый, та́кѡ речѐ: что̀ хо́щеши вопроша́ти и҆ наѹчи́тисѧ ѿ на́съ; гото́ви бо є҆смы̀ ѹ҆мре́ти, не́жели престѹпи́ти ѻ҆те́чєскїѧ зако́ны.

³Разгнѣ́вавсѧ же ца́рь повелѣ̀ скѡврады̀ и҆ коно́бы разжещѝ.

⁴И҆̀мже ско́рѡ разжжє́ннымъ бы́вшымъ, повелѣ̀ сѹ́щемѹ ѿ ни́хъ предводи́телю сло́ва ѿрѣ́зати ѧ҆зы́къ, и҆ со всегѡ̀ ко́жѹ содра́вше, краи҄ ѹ҆дѡ́въ тѣле́сныхъ ѿсѣщѝ, прѡ́чїимъ бра́тїѧмъ и҆ ма́тери смотрѧ́щымъ.

⁵И҆ є҆гда̀ ѹ҆жѐ неключи́мь сотворе́нъ бы́сть всѣ́ми (ѹ҆десы̀), повелѣ̀ ѻ҆гню̀ преда́ти є҆щѐ ды́шѹща и҆ пещѝ на сковрадѣ̀: па́рѹ же ѹ҆множа́ющѹсѧ ѿ сковрады̀, (про́чїи кѹ́пнѡ) съ ма́терию дрѹ́гъ дрѹ́га поѡщрѧ́хѹ ѹ҆мре́ти мѹ́жественнѡ, глаго́люще си́це:

⁶гд҇ь бг҃ъ зри́тъ и҆ ѡ҆ и҆́стинѣ на́шей ѹ҆тѣша́етсѧ, ѩ҆́коже пред̾ лице́мъ свидѣ́телствѹющею пѣ́снїю и҆з̾ѧвѝ мѡѷсе́й глаго́лѧ: и҆ ѡ҆ рабѣ́хъ свои́хъ ѹ҆тѣ́шитсѧ.

⁷Ѹ҆ме́ршѹ же пе́рвомѹ си́мъ ѡ҆́бразомъ, втора́го и҆зводѧ́хѹ на порѹга́нїе: и҆ ко́жѹ со главы̀ є҆гѡ̀ со власы҄ содра́вше, и҆ вопроша́хѹ: бѹ́деши ли ѩ҆́сти пре́жде не́же ѹ҆мѹ́чено бѹ́детъ всѐ тѣ́ло по ѹ҆́дамъ.

⁸Ѻ҆́нъ же ѿвѣща́въ ѻ҆те́ческимъ гла́сомъ, речѐ: нѝ. Тѣ́мже и҆ се́й по рѧ́дѹ прїѧ́тъ мѹче́нїе, ѩ҆́коже и҆ пе́рвый.

⁹Въ послѣ́днемъ же и҆здыха́нїи бы́въ, речѐ: ты̀ ѹ҆̀бо, ѡ҆каѧ́ннѣйшїй, ѿ настоѧ́щагѡ живота̀ на́съ погѹблѧ́еши, цр҃ь же мі́ра ѹ҆ме́ршихъ на́съ свои́хъ ра́ди зако́нѡвъ воскр҃си́тъ на́съ въ воскр҇нїе живота̀ вѣ́чнагѡ.

¹⁰По се́мъ же тре́тїй порѹга́емь бѣ̀, и҆ ѧ҆зы́ка и҆спроше́нъ, а҆́бїе и҆здадѐ и҆ рѹ́цѣ де́рзостнѣ прострѐ и́ мѹ́жественнѣ речѐ:

¹¹ѿ нб҃сѐ сїѧ҄ притѧжа́хъ, и҆ є҆гѡ̀ ра́ди зако́нѡвъ презира́ю сїѧ҄, и҆ ѿ негѡ̀ сїѧ҄ па́ки ѹ҆пова́ю воспрїѧ́ти.

¹²ѩ҆́кѡ и҆ са́мъ ца́рь и҆ сѹ́щїи съ нимъ ѹ҆дивлѧ́хѹсѧ ю҆́нагѡ великодѹ́шїю, ѩ҆́кѡ ни во что́же полага́ше мѹ҄ки.

¹³И҆ семѹ̀ скончавшѹсѧ, и҆ четве́ртаго та́кожде мѹ́чахѹ мѹчи́телє.

¹⁴И҆ є҆гда̀ ѹ҆жѐ бы́сть къ сме́рти та́кѡ речѐ: лѹ́чше ѹ҆бива́емымъ ѿ человѣ҄къ ѹ҆пова́нїѧ ча́ѧти ѿ бг҃а, па́ки и҆мѹ́щымъ воскрешє́нымъ бы́ти ѿ негѡ̀, тебѣ́ же воскресе́нїе въ живо́тъ не бѹ́детъ.

¹⁵По се́мъ же пѧ́таго приве́дше мѹ́чиша. И҆ ѻ҆́нъ воззрѣ́въ на́нь, речѐ:

¹⁶вла́сть въ человѣ́цѣхъ и҆мѣ́ѧ тлѣ́ненъ сы́й, є҆́же хо́щеши, твори́ши: не мни́ же ро́дѹ на́шемѹ ѿ бг҃а ѡ҆ста́вленѹ бы́ти:

¹⁷ты́ же потерпѝ и҆ зрѝ ве́лїю держа́вѹ є҆гѡ̀, ка́кѡ тебѐ и҆ сѣ̀мѧ твоѐ ѹ҆мѹ́читъ.

¹⁸По се́мъ приведоша щеста́го. И҆ то́й ѹ҆мре́ти начина́ющь речѐ: не прельща́йсѧ сѹ́етиѡ, мы́ бо себє̀ ра́ди сїѧ҄ стра́ждемъ согрѣша́юще къ бг҃ѹ на́шемѹ, сегѡ̀ ра́ди достѡ́йнаѧ ѹ҆дивле́нїѧ бы́ша:

¹⁹ты́ же да не возмни́ши непови́ненъ бы́ти, бг҃обо́рствовати наче́нъ.

²⁰безмѣ́рно же ма́ти ди́внаѧ и҆ благі́ѧ па́мѧти досто́йнаѧ, ѩ҆́же погиба́ющихъ седмѝ сынѡ́въ є҆ди́нагѡ днѐ и҆ вре́мене ви́дѧщи, благодѹ́шнѡ терпѧ́ше ра́ди ѹ҆пова́нїѧ на гд҇а,

²¹и҆ коего́ждо и҆́хъ ѹ҆вѣщава́ше ѻ҆те́ческимъ гла́сомъ, до́блїѧ и҆спо́лнена мѹ́дрости и҆ же́нское помышле́нїе мѹ́жескою дѹше́ю воздвиза́ющи, глаго́лаше къ ни҄мъ:

²²не вѣ́мъ, ѩ҆́кѡ во чре́вѣ мое́мъ ѩ҆ви́стесѧ, ниже́ бо а҆́зъ дѹ́хъ и҆ живо́тъ да́хъ ва́мъ, и҆ коегѡ́ждо ѹ҆́ды не а҆́зъ соста́вихъ,

²³но мі́ра творе́цъ, созда́вый ро́дъ человѣ́чь и҆ всѣ́хъ и҆з̾ѡбрѣты́й рожде́нїе, и҆ дѹ́хъ и҆ жи́знь ва́мъ па́ки возда́стъ съ мл҇тїю, ѩ҆́кѡ нн҃ѣ са́ми себѐ презира́ете ра́ди зако́нѡвъ є҆гѡ̀.

²⁴А҆нтїо́хъ же непщѹ́ѧй ѹ҆ничиже́нъ бы́ти и҆ поноща́ющь гла́съ презрѣ́въ, є҆щѐ ю҆нѣ́йшемѹ жи́вѹ сѹ́щѹ, не то́кмѡ словесы̀ творѧ́ше ѹ҆вѣща́нїе, но и҆ клѧ́твою подкрѣплѧ́ше, бога́та кѹ́пнѡ и҆ блаже́на сотвори́ти, преведе́ннаго ѿ ѻ҆те́ческихъ зако́нѡвъ, и҆ дрѹ́га воз̾имѣ́ти, и҆ дѣла̀ ввѣ́рити є҆мѹ̀.

²⁵Си҄мъ же ю҆́ношѣ ни ка́коже вне́млющѹ, призва́въ ца́рь ма́терь ѹ҆вѣщава́ше, да бѹ́детъ ю҆́ношѣ совѣ́тница на спасе́нїе.

²⁶Мно́гѡ же є҆мѹ̀ ѹ҆вѣщава́ющѹ, ѡ҆бѣща́ла совѣ́товати сы́нѹ своемѹ̀.

²⁷Приклони́вшисѧ же къ немѹ̀, посмѣѧ́сѧ же́стокомѹ мѹчи́телю и҆ си́це речѐ ѻ҆те́ческимъ гла́сомъ: сы́не, поми́лѹй мѧ̀ носи́вшѹю тѧ̀ во чре́вѣ де́вѧть мц҇ей и҆ млеко́мъ пита́вшѹю тѧ̀ лѣ҄та трѝ, и҆ воскорми́вшѹю тѧ̀ и҆ приве́дшѹю въ во́зрастъ се́й, и҆ болѣ҄зни воспита́нїѧ поне́сшѹю:

²⁸молю́ тѧ, ча́до, да воззри́ши на не́бо и҆ зе́млю, и҆ всѧ҄, ѩ҆̀же въ ни́хъ, ви́дѧщь ѹ҆разѹмѣ́еши, ѩ҆́кѡ ѿ не сѹ́щихъ сотворѝ сїѧ҄ бг҃ъ, и҆ человѣ́чь ро́дъ та́кѡ бы́сть:

²⁹не ѹ҆бо́йсѧ плоторастерза́телѧ сегѡ̀, но досто́инъ бы́въ бра́тїи твоеѧ̀, воспрїимѝ сме́рть, да въ ми́лости съ бра́тїею твое́ю воспрїимѹ̀ тѧ̀.

³⁰Е҆ще́ же сїѧ҄ є҆́й глаго́лющей, ю҆́ноша речѐ: когѡ̀ ѡ҆жида́ете; не слѹ́шаю повелѣ́нїѧ царе́ва, но повелѣ́нїѧ зако́на слѹ́шаю да́ннагѡ ѻ҆тцє́мъ на́шымъ чрез̾ мѡѷсе́а:

³¹ты́ же всѧ́кїѧ ѕло́бы и҆з̾ѡбрѣта́тель бы́въ на ї҆ѹдє́и, не и҆збѣжи́ши рѹ́къ бж҃їихъ:

³²мы́ бо за грѣхѝ на́шѧ сїѧ҄ стра́ждемъ:

³³а҆́ще же ра́ди ѹ҆страше́нїѧ и҆ наказа́нїѧ живы́й гд҇ь на́шъ ма́лѡ прогнѣ́васѧ, но па́ки примири́тсѧ рабѡ́мъ свои҄мъ:

³⁴ты́ же, ѽ, беззако́нниче и҆ всѣ́хъ человѣ҄къ скверна́вѣйше, не возноси́сѧ сѹ́етнѡ кича́сѧ тще́тнымъ ѹ҆пова́нїемъ, на нб҇ныѧ рабы҄ є҆гѡ̀ возносѧ́щь рѹ́кѹ:

³⁵не ѹ҆̀ бо вседержи́телѧ и҆ бсеви́дца бг҃а сѹда̀ и҆збѣ́глъ є҆сѝ:

³⁶бра́тїѧ бо на҄ша ма́лѡ нн҃ѣ болѣ́зни потерпѣ́вше по завѣ́тѹ бж҃їю вѣ́чный живо́тъ полѹчи́ша: ты́ же сѹдо́мъ бж҃їимъ пра́веднѹю ка́знь горды́ни (твоеѧ̀) воспрїи́меши:

³⁷а҆́зъ же, ѩ҆́коже бра́тїѧ моѧ҄, дѹ́шѹ и҆ тѣ́ло моѐ предаю̀ за ѻ҆те́чєскїѧ зако́ны, призыва́ѧ бг҃а мл҇тива вско́рѣ бы́ти ї҆и҃лю: ты́ же съ мѹче́нїемъ и҆ бїе́нїемъ и҆сповѣ́си, ѩ҆́кѡ є҆ди́нъ то́кмѡ бг҃ъ є҆́сть:

³⁸на мнѣ̀ и҆ на бра́тїи мое́й преста́нетъ вседержи́телѧ гнѣ́въ нанесе́нный првднѡ всемѹ̀ ро́дѹ на́шемѹ.

³⁹Тогда̀ ца́рь раз̾ѧри́сѧ ѩ҆́ростїю на́нь па́че и҆ны́хъ лютѣ́е, го́рцѣ терпѧ́щь посмѣѧ́нїе.

⁴⁰И҆ се́й ѹ҆̀бо чи́стъ ѿ житїѧ̀ премѣни́сѧ, по всемѹ̀ на гд҇а ѹ҆пова́ѧ.

⁴¹Послѣди́ же сынѡ́въ и҆ ма́ти сконча́сѧ.

⁴²Сїѧ҄ ѹ҆̀бо ѡ҆ же́ртвахъ и҆ ѡ҆ превосходѧ́щихъ мѹчи́телствахъ толи́кѡ и҆звѣсти́шасѧ.