Read Библия Церковнославянская в҃ маккавей́скаѧ 8 Bible Online

в҃ маккавей́скаѧ 8 - Библия Церковнославянская bible

в҃ маккавей́скаѧ 8

¹Ї҆ѹ́да же маккаве́й и҆ и҆̀же съ ни́мъ, входѧ́ще та́йнѡ въ се́ла, созыва́хѹ сро́дники и҆ пребыва́юшихъ во ї҆ѹде́йствѣ прїе́млюще собра́ша до шестѝ ты́сѧщъ мѹже́й.

²И҆ призыва́хѹ гд҇а призрѣ́ти на лю́ди ѿ всѣ́хъ попира́ємыхъ, ѹ҆ще́дрити же и҆ хра́мъ ѿ нечести́выхъ человѣ҄къ ѡ҆скверне́нъ

³поми́ловати же и҆ разореный гра́дъ и҆ и҆мѣ́ющь ра́внѡ со земле́ю бы́ти, и҆ гла́съ крове́й вопїю́щихъ къ немѹ̀ ѹ҆слы́шати,

⁴помѧнѹ́ти же и҆ безгрѣ́шныхъ младе́нцєвъ беззако́нное погѹбле́нїе и҆ бы҄вшаѧ хѹлє́нїѧ на и҆́мѧ є҆гѡ̀, и҆ возненави́дѣти лѹка҄вства.

⁵Собра́въ же мно́жество, маккаве́й нестерпи́мь ѩ҆́жѐ ѩ҆зы́кѡмъ бы́сть, гнѣ́вѹ гд҇ню въ мл҇ть ѡ҆брати́вшѹсѧ.

⁶И҆ напа́даѧ на вє́си и҆ гра́ды неча́ѧннѡ сожига́ше, и҆ благовре́мєнна мѣста̀ взима́ющь, не ма́лѡ сѹпоста҄тъ побѣжда́ше ѹ҆бива́ѧ,

⁷наипа́че же но́щы на такѡва́ѧ нападє́нїѧ въ по́мощь прїе́млѧше: и҆ сла́ва нѣ́каѧ мѹ́жества є҆гѡ̀ прохожда́ше всю́дѹ.

⁸Ви́дѣ же фїлі́ппъ по ма́лѹ въ пред̾ѹспѣѧ́нїе грѧдѹ́ща мѹ́жа, ча́стѣе же во благоде́нствїихъ ѹ҆спѣва́юща, ко птоломе́ю воево́дѣ кїлисѷрі́и и҆ фїнїкі́и писа̀, дабы̀ помога́лъ въ ца́рскихъ дѣ́лѣхъ.

⁹ѻ҆́нъ же ско́рѡ и҆збра́въ нїкано́ра, сы́на патро́клова ѿ пе́рвѣйшихъ дрѹгѡ́въ посла̀, подчини́въ є҆мѹ̀ ѿ всѧ́кихъ ѩ҆зы́кѡвъ воѡрѹже́нныхъ ви́євъ не ме́нше два́десѧти ты́сѧщъ, да ве́сь ї҆ѹде́йскїй ро́дъ и҆збїе́тъ: придаде́ же є҆мѹ̀ и҆ горгі́ю мѹ́жа страти́га и҆ въ ра́тныхъ дѣ́лѣхъ и҆скѹ́сство и҆мѹ́ща.

¹⁰Ѹ҆ста́ви же нїкано́ръ да́нь царю̀, ѩ҆́же ри́млѧнѡмъ даѧ́шесѧ, двѣ̀ ты́сѧщы тала́нтѡвъ ѿ плѣне́нїѧ ї҆ѹде́йскагѡ напо́лнити.

¹¹А҆́бїе же въ помѡ́рскїхъ гра́ды посла̀, созыва́ѧ на кѹ́плю і́ѹде́йскихъ плѣ́нникѡвъ, ѡ҆бѣща́ѧсѧ де́вѧтьдесѧтъ плѣ́нникѡвъ за тала́нтъ да́ти, не ча́ѧ мще́нїѧ хотѧ́щаго послѣ́довати є҆мѹ̀ ѿ вседержи́телѧ.

¹²Ї҆ѹ́дѣ же возвѣще́но бѣ̀ ѡ҆ прище́ствїи нїкано́ровѣ: и҆ є҆гда̀ ѻ҆́нъ возвѣстѝ сѹ́щымъ съ собо́ю ѡ҆ прише́ствїи во́инства,

¹³ѹ҆жа́сшесѧ и҆ не вѣ́ровавше бж҃їю ѿмще́нїю разбѣга́хѹсѧ и҆ ѿ мѣ́ста своегѡ̀ ѿстѹпа́хѹ:

¹⁴и҆ні́и же ѡ҆ста҄вшаѧ всѧ҄ продаѧ́хѹ, кѹ́пнѡ же гд҇а молѧ́хѹ, да и҆зба́витъ ѿ нечести́вагѡ нїкано́ра про́даныхъ, пре́жде да́же сни́тисѧ,

¹⁵и҆ а҆́ще не и҆́хъ ра́ди, то̀ ра́ди завѣ́та, и҆́же бы́сть ко ѻ҆тцє́мъ и҆́хъ, и҆ призыва́нїѧ ра́ди честна́гѡ и҆ великолѣ́пагѡ и҆́мене своегѡ̀ на ни́хъ.

¹⁶Собра́въ же маккаве́й сѹ́щихъ ѡ҆́крестъ є҆гѡ̀ число́мъ ше́сть ты́сѧщъ, молѧ́ше, да не ѹ҆жа́снѹтсѧ ѿ сѹпроти́вникѡвъ, нижѐ да ѹ҆страша́тсѧ непра́веднѡ грѧдѹ́щихъ на нѧ̀ ѩ҆зы́кѡвъ мно́жества, но мѹ́жественнѡ да подвиза́ютсѧ,

¹⁷пред̾ ѻ҆чи́ма имѣ́юще беззако́ннѡ на мѣ́сто ст҃о́е содѣ́ланнѹю ѿ ни́хъ ѹ҆кори́знѹ и҆ посмѣѧ́ннагѡ гра́да ѡ҆би́дѹ, є҆ще́ же и҆ прароди́телнагѡ жи́телства разрѹше́нїе.

¹⁸Ѻ҆ни́ бо на ѻ҆рѹ́жїе надѣ́ютсѧ кѹ́пнѡ и҆ на де́рзость, речѐ: мы́ же на вседержи́телѧ бг҃а могѹ́щаго и҆ грѧдѹ́щихъ мгнове́нїемъ низложи́ти надѣ́емсѧ.

¹⁹Воспомѧнѹ́въ же и҆̀мъ и҆ бы҄вшаѧ застѹплє́нїѧ при прароди́телехъ, и҆ ѩ҆́кѡ под̾ сеннахирі́момъ сто ѻ҆́смьдесѧтъ пѧ́ть ты́сѧщь погибо́ща,

²⁰и҆ въ вавѷлѡ́нѣ на гала́тѡвъ бы́вшее ѡ҆полче́нїе, ка́кѡ всѝ, є҆гда̀ на бра́нь прїидо́ша, ѻ҆́смь ты́сѧщъ съ четы́рїю тысѧщами македѡ́нѧнъ, македѡ́нѧнѡмъ ѿча́ѧвшымсѧ, є҆ди́ни ѻ҆́смь ты́сѧщъ поби́ша сто̀ два́десѧть ты́сѧщъ по́мощїю да́нною и҆̀мъ ѿ нб҃сѐ, и҆ по́льзѹ мно́гѹ взѧ́ша.

²¹Си́ми (воспомѧновє́нїи) де́рзѡстны ѡ҆́ныѧ поста́вивъ и҆ готѡ́вы ѹ҆мре́ти за зако́ны и҆ ѻ҆те́чество, четвероча́стно во́инство поста́ви:

²²ѹ҆чини́въ и҆ бра́тїю свою̀ воево́дами ѻ҆боегѡ̀ ѡ҆полче́нїѧ, сі́мѡна и҆ ї҆ѡ́сифа и҆ ї҆ѡнаѳа́на, подда́въ коемѹ́ждо ты́сѧщѹ и҆ пѧ́ть сѡ́тъ,

²³є҆ще́ же и҆ є҆леаза́рѹ (повелѣ́въ) честѝ ст҃ѹ́ю кни́гѹ и҆ да́въ зна́менїе по́мощи бж҃їю, пе́рвомѹ полкѹ̀ са́мъ предводи́телствѹѧ сразі́сѧ съ нїканоромъ.

²⁴Бы́вшѹ же и҆̀мъ вседержи́телю спобо́рникѹ, ѹ҆би́ша сѹпоста́тѡвъ бо́лѣе девѧтѝ ты́сѧщъ, ѩ҆́звеныхъ же и҆ безчленныхъ бо́лшѹю ча́сть сотворища во́євъ нїкано́ровыхъ, всѣ́хъ же въ бѣ́гство понѹ́диша.

²⁵Сре́бреники же ѿ прише́дшихъ на кѹ́плю и҆́хъ взѧ́ша.

²⁶Гони́вше же и҆́хъ ѕѣ́лнѣ, возврати́шасѧ ѿ вре́мене заключе́ни: бѣ̀ бо (де́нь) пред̾ сѹббѡ́тою, сеѧ̀ ра́ди вины̀ не продолжи́ша гонѧ́ще и҆̀хъ.

²⁷ѻ҆рѹ҄жїѧ же и҆́хъ собира́юще и҆ коры҄сти ѿ сѹпоста҄тъ ѿе́млюще, сѹббѡ́тѹ пра́здновахѹ попремно́гѹ благословѧ́ще и҆ и҆сповѣ́даюшесѧ гд҇еви сп҇шемѹ и҆̀хъ въ де́нь се́й, нача́ло мл҇ти ѹ҆чини́вшемѹ и҆̀мъ.

²⁸По сѹббѡ́тѣ же немѡщны́мъ и҆ сирота́мъ, и҆ вдова́мъ (и҆ ѡ҆би҄димымъ) раздѣли́вше ѿ коры́стѣй, прѡ́чаѧ са́ми и҆ ѻ҆́троцы раздѣли́ша.

²⁹Сїѧ҄ же содѣ́ѧвше и҆ ѻ҆́бщѹю моли́твѹ сотво́рше, мл҇рдаго гд҇а молѧ́хѹ, въ коне́цъ примири́тисѧ рабѡ́мъ свои҄мъ.

³⁰И҆ ѿ сѹ́щихъ съ тїмоѳе́емъ и҆ вакхі́домъ проти́вныхъ мно́жае два́десѧти ты́сѧщъ ѹ҆би́ша и҆ тверды҄ни ѕѣлѡ̀ высѡ́кїѧ ѡ҆держа́ша, и҆ мнѡ́гїѧ коры҄сти раздѣли́ша, равноча́стнѣ себѣ̀ и҆ немощны҄мъ, и҆ сирота́мъ и҆ вдова́мъ, є҆ще́ же и҆ старѣ́йшинамъ сотво́рше.

³¹Собра́вше же ѻ҆рѹ́жїѧ и҆́хъ, прилѣ́жнѣ всѧ҄ положи́ша въ мѣ́стѣхъ благовре́менныхъ, про́чыѧ же коры҄сти во ї҆ер҇ли́мъ принесо́ша.

³²И҆ фїла́рха тїмоѳе́ева ѹ҆би́ша мѹ́жа беззако́ннѣ̀йшаго и҆ вельмѝ ї҆ѹде́ѡвъ ѡ҆ѕло́бившаго,

³³иобѣди́тєлнаѧ же пра́зднѹюще во ѻ҆те́чествѣ, заже́гшихъ свѧшє́ннаѧ врата̀, калїсѳе́на и҆ нѣ́кїихъ и҆ны́хъ сожго́ша ѹ҆бѣ́гшихъ во є҆ди́нѹ хра́минѹ, и҆̀же досто́йнѹю мздѹ̀ нече́стїѧ воспрїѧ́ша.

³⁴Треклѧ́тѣ́йшїй же нїкано́ръ, и҆́же тысѧщѹ кѹпцє́въ на кѹ́плю ї҆ѹде́ѡвъ приведы́й,

³⁵смире́нъ по́мощїю гд҇нею ѿ тѣ́хъ, и҆̀хже проти́вѹ себє̀ за ничто́же вмѣнѧ́ше, сла́внѹю ѿложи́въ ри́зѹ, чрез̾ средиземное (мо́ре) бѣглеца̀ ѡ҆́бразомъ ѹ҆единена себѐ сотво́рь, прїи́де во а҆нтїохі́ю преѕѣ́лнѣ неблагополѹ́ченъ ѡ҆ погѹблѣ́нїи во́инства.

³⁶И҆ и҆́же ѡ҆бѣща̀ ри́млѧнѡмъ да́нь возда́ти ѿ плѣне́нїѧ ї҆ер҇ли́мскагѡ, проповѣ́даше, ѩ҆̀кѡ защи́тителѧ бг҃а и҆мѣ́ютъ ї҆ѹде́и, и҆ сегѡ̀ ра́ди не ѹ҆ѧзвлѧ́еми сѹ́ть ї҆ѹде́є, занѐ послѣ́дѹютъ зако́нѡмъ ѿ тогѡ̀ ѹ҆ста́влєнымъ.