Read Библия Церковнославянская в҃ маккавей́скаѧ 9 Bible Online

в҃ маккавей́скаѧ 9 - Библия Церковнославянская bible

в҃ маккавей́скаѧ 9

¹Тогѡ́ же вре́мене а҆нтїо́хъ съ безче́стїемъ возврати́сѧ ѿ персі́ды.

²Вни́де бо во гра́дъ глаго́лемый персе́поль и҆ покѹси́сѧ расхи́тити хра́мъ и҆ гра́дъ ѡ҆бдержа́ти: тогѡ̀ ра́ди мно́жествѹ ѹ҆стреми́вшѹсѧ, къ по́мощи ѻ҆рѹ́жїй ѡ҆брати́шасѧ: и́ та́кѡ слѹчи́сѧ прогна́номѹ а҆нтїо́хѹ ѿ градожи́телей со сра́момъ возврати́тисѧ.

³Сѹ́щѹ же є҆мѹ̀ при є҆квата́нѣ, возвѣсти́шасѧ є҆мѹ̀ содѣ҄ѧннаѧ при нїкано́рѣ и҆ тїмоѳе́и.

⁴Возне́ссѧ же ѩ҆́ростїю, мнѧ́ше и҆ прогна́вшихъ є҆го̀ ѕло́бѹ нанестѝ на ї҆ѹдє́и: сегѡ̀ ра́ди повелѣ̀ возни́цѣ непреста́ннѡ гонѧ́щемѹ соверша́ти ше́ствїе, нб҇номѹ сѹдѹ̀ понѹжда́ющѹ є҆го̀, си́це бо гордели́вѣ речѐ: гро́бищное мѣ́сто ї҆ѹде́ємъ ї҆ер҇ли́мъ, прише́дъ та́мѡ, сотворю̀.

⁵Всеви́децъ же гд҇ь бг҃ъ ї҆и҃левъ поразѝ є҆го̀ неизцѣ́льною и҆ неви́димою ѩ҆́звою: и҆зре́кшѹсѧ бо є҆гѡ̀ сло́вѹ, а҆́бїе ѡ҆б̾ѧ́тъ є҆го̀ ѹ҆тро́бнаѧ неизѣ́льнаѧ болѣ́бзнь и҆ гѡ́рькїѧ внѹ́трєннїѧ мѹ҄ки,

⁶ѕѣлѡ̀ пра́веднѣ, ѩ҆́кѡ мно́гими и҆ стра́нными напа́стьми и҆ны́хъ ѹ҆трѡ́бы мѹ́чи. Ѻ҆́нъ же ника́коже ѿ киче́нїѧ (своегѡ̀) преста̀:

⁷є҆ще́ же и҆ горды́ни и҆сполнѧ́шесѧ, ѻ҆гне́мъ ды́шѹщь ѩ҆́рости на ї҆ѹдє́и и҆ заповѣ́давъ ѹ҆скори́ти ше́ствїе: слѹчи́сѧ же и҆ па́сти є҆мѹ̀ ѿ колесни́цы со ѹ҆стремле́нїемъ и҆дѹ́щїѧ, и҆ лю́тымъ паде́нїемъ па́дшемѹ всѧ҄ ѹ҆ды пло́ти сокрѹши́ти.

⁸Ѻ҆́нъ же, и҆́же ма́лѡ пре́жде мнѧ́й волна́мъ мѡрски́мъ повелѣва́ти, ѿ го́рдости па́че человѣ́чи, и҆ мѣ́риломъ высотѹ̀ го́ръ мнѧ́сѧ и҆змѣ́рити, до землѝ смире́нъ на носи́лѣ носѧ́шесѧ, ѩ҆́внѹю бж҃ию си́лѹ всѣ҄мъ показѹ́ѧ:

⁹ѩ҆́кѡ и҆ ѿ тѣлесѐ нечести́вагѡ че́рвїю кипѣ́ти, и҆ живѹ́щѹ въ болѣ́знехъ и҆ въ мѹче́нїихъ, пло́ти є҆гѡ̀ и҆злїѧ́тисѧ ѿ смра́да же є҆гѡ̀ и҆ гно́ѧ всѝ во́ини гнѹша́хѹсѧ.

¹⁰И҆ ма́лѡ пре́жде небе́сныхъ ѕвѣ́здъ каса́тисѧ мнѧ́щаго никто́же можа́ше носи́ти, смра́да ра́ди лю́тагѡ.

¹¹Ѿсю́дѹ ѹ҆̀бо нача̀ ѿ многїѧ горды́ни своеѧ̀ престава́ти ѹ҆ѧ́звленъ и҆ въ позна́нїе приходи́ти (наѹче́нъ) бж҃їею ѩ҆́звою повсеча́стнѡ ѹ҆множее болѣ́зни своеѧ̀ прїемлѧ.

¹²И҆ є҆гда̀ нижѐ са́мъ смра́да своегѡ̀ терпѣ́ти можа́ше, та́кѡ речѐ: пра́ведно є҆́сть повинѹ́тисѧ бг҃ови, и҆ сме́ртнѹ сѹ́щѹ ра҄внаѧ бг҃ови не мѹ́дрствовати го́рдѣ.

¹³Молѧ́шесѧ же скве́рный ко никогда̀ хотѧ́щемѹ поми́ловати є҆го̀ вл҃цѣ̀, та́кѡ глаго́лѧ:

¹⁴сты́й ѹ҆́бѡ гра́дъ, є҆го́же тща́хсѧ пришедъ во пра́хъ ѡ҆брати́ти и҆ мѣ́сто гро́бищное созда́ти, свобо́денъ ѡ҆ста́влю,

¹⁵ї҆ѹде́євъ же, и҆̀хже хотѣ́хъ нижѐ погребе́нїе сподо́бите, но пти́цємъ ѕвѣрє́мъ на растерза́нїе преда́ти со младє́нцы, всѣ́хъ и҆̀хъ ра́вныхъ а҆ѳине́ѡмъ сотворю̀:

¹⁶хра́мъ же ст҃ы́й, є҆го́же пре́жде ѡ҆гра́бихъ, предо́брыми да҄ры ѹ҆крашѹ̀, и҆ свѧщє́нныѧ сосѹ́ды мно́гѡ бо́лше всѧ҄ возда́мъ, и҆ подоба́ющаѧ къ же́ртвамъ и҆ждивє́нїю ѿ свои́хъ дохо́дѡвъ пода́мъ:

¹⁷къ си҄мъ же и҆ ї҆ѹде́аниномъ бы́ти, и҆ всѧ́кое мѣ́сто ѡ҆бита́емо проходи́ти, и҆ проповѣ́дати бж҃їю держа́вѹ и҆́мамъ.

¹⁸Но ника́коже престаю́щымъ болѣ́знемъ, на́йде бо на́нь првдный бж҃їй сѹ́дъ, ѡ҆ себѣ̀ ѿча́ѧвсѧ, писа̀ ко ї҆ѹде́ѡмъ ниженапи́санное посла́нїе, моле́нїѧ чи́нъ и҆мѹ́щее, содержа́щее же сїѧ҄:

¹⁹предѡ́брымъ гра́жданѡмъ ї҆ѹде́ѡмъ ѕѣлѡ̀ ра́доватисѧ и҆ здра́вствовати и҆ благоде́нствовати, ца́рь а҆нтїо́хъ и҆ страти́гъ:

²⁰а҆́ще здра́вствѹете и҆ ча҄да, и҆ (и҆мѣ҄нїѧ) ва҄шѧ но мы́сли ва́мъ сѹ́ть, благодарю̀ ѹ҆́бѡ бг҃ѹ вели́кимъ благодаре́нїемъ, на нб҃о ѹ҆пова́нїе и҆мѣ́ѧ:

²¹а҆́зъ же въ не́мощи лежа́щь, ва́шѹ че́сть и҆ благопрїѧ́тство воспомина́хъ любе́знѡ: возвраща́ѧсѧ ѿ персі́дскихъ мѣ́стъ и҆ впа́дъ въ болы́знь тѧ́жкѹ, нѹ́жно возмнѣ́хъ попече́нїе воз̾имѣ́ти ѡ҆ ѻ҆́бщемъ всѣ́хъ ѹ҆твержде́нїи:

²²не ѿчаѧва́ѧсѧ ѡ҆ себѣ̀, но ѹ҆пова́нїе мно́го и҆мѣ́ѧ и҆збѣжа́ти недѹ́га,

²³зрѧ́ же, ѩ҆́кѡ и҆ ѻ҆те́цъ мо́й, въ нѧ́же времена̀ въ вы́шнихъ мѣ́стѣхъ воева̀, показа̀ и҆мѹ́щаго прїѧ́ти по не́мъ нача́лство,

²⁴да а҆́ще что̀ проти́вно слѹчи́тсѧ и҆лѝ возвѣсти́тсѧ что̀ бѣ́дственно, вѣ́дѹще сѹ́щїи по страна́мъ, комѹ̀ вла́сть ввѣ́рена, не смѹтѧ́тсѧ:

²⁵къ си҄мъ же помышлѧ́ю прїлежа́щихъ могѹ́тникѡвъ и҆ сосѣ́дей ца́рствїю вре́мене ѹ҆смотрѧ́ющихъ и҆ слѹ́чаѧ ѡ҆жидающихъ, ѡ҆ѣ́ѧви́хъ сы́на моего̀ а҆нтїо́ха царе́мъ, є҆го́же мно́гаши ѡ҆бходѧ́щь вы҄шнїй сатра҄пїи мнѡ́гимъ ѿ ва́съ препорѹча́хъ и҆ представлѧ́хъ, писа́хъ же къ немѹ̀, ѩ҆̀же нижа́е пи҄сана сѹ́ть:

²⁶молю̀ ѹ҆̀бо ва́съ и҆ прошѹ̀, да по́мнѧще благодѣѧ҄нїѧ во ѻ҆́бще и҆ ѡ҆со́бнѡ, кі́йждо содержитѐ сѹ́щее благопрїѧ́тство ко мнѣ̀ и҆ сы́нѹ моемѹ̀:

²⁷ѹ҆пова́ю бо, ѩ҆́кѡ ѻ҆́нъ кро́тцѣ и҆ человѣколю́бнѣ, послѣ́дѹющь моемѹ̀ произволе́нїю, соѡбща́тисѧ ва́мъ бѹ́детъ.

²⁸Мѹжеѹбі́йца ѹ҆̀бо и҆ хѹ́льникъ ѕлѣ҄йшаѧѣ пострада́въ, ѩ҆́коже и҆ны҄мъ сотворѝ, въ стра́нствѣ̀, на гора́хъ бѣ́дною сме́ртїю и҆зчезѐ.

²⁹Пренесе́ же тѣ́ло є҆гѡ̀ фїлі́ппъ све́рстникъ є҆гѡ̀: и҆́же и҆ ѹ҆боѧ́всѧ сы́на а҆нтїо́хова ко птоломе́ю фїломи́торѹ во є҆гѵ́петъ ѿи́де.