Read Библия Церковнославянская г҃ е҆́здры 1 Bible Online

г҃ е҆́здры 1 - Библия Церковнославянская bible

г҃ е҆́здры 1

¹Кни́га є҆́здры про҇ро́ка втора́ѧ, сы́на сараі́ева, сы́на а҆зарі́ева, сы́на є҆лкі́ева, сы́на садані́ева, сы́на садѡ́кова, сы́на а҆хі́тѡва,

²сы́на а҆хі́ева, сы́на фїнее́сова, сы́на є҆лі́ева, сы́на а҆мері́ева, сы́на а҆сїе́лева, сы́на марїмѡ́ѳова, сы́на а҆рна́ева, сы́на ѻ҆зі́ева, сы́на ворі́ѳова, сы́на а҆вїсе́ева, сы́на фїнее́сова, сы́на є҆леаза́рова,

³сы́на а҆арѡ́нова ѿ колѣ́на леѵі́ина, и҆́же бы́сть ю҆́зникомъ въ землѝ ми́дстѣй, въ ца́рство а҆ртаѯе́рѯа царѧ̀ пе́рсскагѡ.

⁴И҆ бы́сть сло́во гд҇не ко мнѣ̀, си́це гл҃ющее:

⁵и҆дѝ и҆ возвѣстѝ лю́демъ мои҄мъ ѕла҄ѧ дѣла̀ и҆́хъ и҆ сынѡ́мъ и҆́хъ лѹка҄вствїѧ, ѩ҆̀же проти́вѹ менє̀ сотвори́ша, да возвѣстѧ́тъ сынѡ́мъ сынѡ́въ свои́хъ,

⁶ѩ҆́кѡ грѣсѝ роди́телей и҆́хъ возрасто́ша въ ни́хъ, забы́вше бо менѐ, пожро́ша богѡ́мъ чѹжди҄мъ:

⁷є҆да̀ не а҆́зъ и҆зведо́хъ и҆̀хъ и҆з̾ землѝ є҆гѵ́петскїѧ и҆з̾ до́мѹ рабо́ты; ті́и же прогнѣ́ваша мѧ̀ и҆ совѣ́ты моѧ҄ ѹ҆ничижи́ша:

⁸ты́ же ѡ҆стризѝ власы̀ главы̀ твоеѧ̀ и҆ ве́рзи на ни́хъ всѧ҄ ѕла҄ѧ, поне́же не послѹ́шаша зако́на моегѡ̀, лю́дїе сѹ́ть ненака́занни:

⁹доко́лѣ терплю̀ и҆̀мъ, и҆̀мже толи҄каѧ благодѣѧ҄нїѧ сотвори́хъ;

¹⁰низложи́хъ ра́ди и҆́хъ мно́жество царе́й и҆ порази́хъ фараѡ́на съ людьмѝ є҆гѡ̀ и҆ со всѣ́ми вѡ́и є҆гѡ̀:

¹¹всѧ҄ ѩ҆зы́ки ѿ лица̀ и҆́хъ погѹби́хъ, и҆ на восто́цѣ двѹ́хъ стра́нъ люді́й, тѵ́рскихъ и҆ сїдѡ́нскихъ, разсы́пахъ, и҆ поби́хъ всѣ́хъ врагѡ́въ и҆́хъ.

¹²Ты́ же глаго́ли къ ни҄мъ си́це: та́кѡ гл҃етъ гд҇ь:

¹³а҆́зъ вы̀ преведо́хъ сквозѣ̀ мо́ре и҆ ѹ҆гото́вахъ ва́мъ пѹ́ть бла́гъ и҆з̾ нача́ла, да́хъ ва́мъ мѡѷсе́а вожда̀ и҆ а҆арѡ́на во ї҆ере́а,

¹⁴да́хъ ва́мъ свѣ́тъ во столпѣ̀ ѻ҆́гненѣ и҆ сотвори́хъ въ ва́съ чѹдеса̀ вє́лїѧ: вы́ же менѐ забы́сте, речѐ гд҇ь.

¹⁵Та́кѡ гл҃етъ гд҇ь вседержи́тель: кра́стелє бы́ша ва́мъ во зна́менїе, да́хъ ва́мъ полкѝ въ защище́нїе, вы́ же и҆ та́мѡ ропта́сте

¹⁶и҆ не ра́довастесѧ ѡ҆ и҆́мени мое́мъ, ѡ҆ побѣ́дѣ врагѡ́въ ва́шихъ, но ропта́сте да́же и҆ донн҃ѣ:

¹⁷гдѣ̀ сѹ́ть благодѣѧ҄нїѧ, ѩ҆̀же сотвори́хъ ва́мъ; не въ пѹсты́ни ли, є҆гда̀ воз̾алка́сте, возопи́сте ко мнѣ̀

¹⁸глаго́люще: чесѡ̀ ра́ди на́съ въ пѹсты́ню сїю̀ приве́лъ є҆сѝ погѹби́ти на́съ; лѹ́чше на́мъ бѣ̀ рабо́тати є҆гѵ́птѧнѡмъ, не́жели ѹ҆мре́ти въ пѹсты́ни се́й:

¹⁹а҆́зъ ѹ҆жалѣ́хсѧ стена́нїй ва́шихъ и҆ да́хъ ва́мъ ма́ннѹ въ пи́щѹ, хлѣ́бъ а҆́гг҃лскїи ѩ҆до́сте:

²⁰є҆гда̀ возжажда́сте, не разсѣко́хъ ли ка́мене, и҆ потеко́ша во́ды въ сы́тости, зно́ѧ ра́ди ли́ствїемъ древе́съ ва́съ покрыва́хъ:

²¹раздѣли́хъ ва́мъ зе́мли ѻ҆би҄лны, ханане́ѡвъ и҆ ферезе́ѡвъ и҆ фѷлїсті́млѧнъ ѿ лица̀ ва́шегѡ и҆зверго́хъ: что̀ сотворю̀ ва́мъ ктомѹ̀, гл҃етъ гд҇ь;

²²Сїѧ҄ гл҃етъ гд҇ь вседержи́тель: є҆гда̀ въ пѹсты́ни бѣ́сте на рѣцѣ̀ а҆морре́йстѣ жа́ждѹще и҆ хѹ́лѧще и҆́мѧ мое,

²³не ѻ҆́гнь ва́мъ за хѹлє́нїѧ да́хъ, но вложи́въ дре́во въ во́дѹ, сла́дкѹ сотвори́хъ рѣ́кѹ:

²⁴что̀ тебѣ̀ сотворю̀, ї҆а́кѡве; не восхотѣ́лъ є҆сѝ послѹ́шати, ї҆ѹ́до: преселю́сѧ ко и҆ны҄мъ ѩ҆зы́кѡмъ и҆ да́мъ и҆̀мъ и҆́мѧ моѐ, да соблюда́ютъ зако́ны моѧ҄:

²⁵поне́же ѡ҆ста́висте мѧ̀, и҆ а҆́зъ ва́съ ѡ҆ста́влю: просѧ́щихъ ва́съ ѿ менє̀ мл҇ти не поми́лѹю:

²⁶є҆гда̀ призове́те мѧ̀, а҆́зъ не ѹ҆слы́шѹ вы̀, ѡ҆скверни́сте бо рѹ́цѣ ва́ши кро́вїю, и҆ но́зѣ ва́ши скѡ́ры сѹ́ть во є҆́же сотвори́ти человѣкоѹбї҄йства:

²⁷не ѩ҆́кѡ менѐ ѡ҆ста́висте, но ва́съ сами́хъ, гл҃етъ гд҇ь.

²⁸Сїѧ҄ гл҃етъ гд҇ь вседержи́тель: є҆да̀ а҆́зъ ва́съ не моли́хъ, ѩ҆́кѡ ѻ҆те́цъ сы́ны и҆ ѩ҆́кѡ ма́ти дще́рей и҆ ѩ҆́кѡ дои́лица ѻ҆троча́тъ свои́хъ,

²⁹да бѹ́дете мѝ въ лю́ди, и҆ а҆́зъ ва́мъ въ бг҃а, и҆ вы̀ мнѣ̀ въ сы́ны, и҆ а҆́зъ ва́мъ во ѻ҆тца̀:

³⁰та́мѡ ва́съ собира́хъ, ѩ҆́коже ко́кошъ птенцы̀ своѧ҄ под̾ крилѣ҄ своѝ: нн҃ѣ же что̀ сотворю̀ ва́мъ; ѿве́ргѹ вы̀ ѿ лица̀ моегѡ̀:

³¹приноше́нїе є҆гда̀ мнѣ̀ принесе́те, ѿвращѹ̀ лицѐ моѐ ѿ ва́съ: дни҄ бо пра҄здничныѧ ва́шѧ и҆ новом҇чїѧ и҆ ѡ҆брѣ҄занїѧ ѿверго́хъ:

³²а҆́зъ посла́хъ ѻ҆́троки моѧ҄ про҇ро́ки къ ва́мъ, и҆̀хже є҆́мше ѹ҆би́сте, и҆ растни́сте тѣлеса̀ и҆́хъ, и҆́хже кро́ве взыщѹ̀, гл҃етъ гд҇ь.

³³Сїѧ҄ гл҃етъ гд҇ь вседержи́тель: до́мъ ва́шъ пѹ́стъ є҆́сть, помещѹ̀ ва́съ ѩ҆́кѡ вѣ́тръ пле́вы,

³⁴и҆ сы́нове порожде́нїѧ не сотворѧ́тъ, поне́же за́повѣдь мою̀ презрѣ́ша, и҆ є҆́же ѕло̀ є҆́сть предо мно́ю, сотвори́ша:

³⁵преда́мъ до́мы ва́шѧ лю́демъ грѧдѹ́щымъ, и҆̀же мѧ̀ не слы́шавше ѹ҆вѣ́рѹютъ: и҆̀мже зна́менїй не ѩ҆ви́хъ, сотворѧ́тъ, ѩ҆́же повелѣ́хъ,

³⁶про҇ро́кѡвъ не ви́дѣша, а҆ воспомѧ́нѹтъ беззакѡ́нїѧ своѧ҄:

³⁷засвидѣ́телствѹю люді́й грѧдѹ́щихъ блгдть, и҆́хже ѻ҆́троцы веселѧ́тсѧ съ ра́достїю, менѐ не ви́дѧще ѻ҆чесы̀ плотски́ми, но дѹ́хомъ вѣ́рѹюще, ѩ҆̀же реко́хъ:

³⁸и҆ нн҃ѣ, бра́те, смотрѝ, ка́ѧ сла́ва, и҆ ви́ждь лю́ди приходѧ́щыѧ ѿ восто́ка,

³⁹и҆̀мже да́мъ нача́лство а҆враа́мле, ї҆саа́ково и҆ ї҆а́кѡвле, и҆ ѡ҆сі́ино и҆ а҆мѡ́сово, и҆ мїхе́ино и҆ ї҆ѡи́лево, и҆ а҆вді́ино и҆ ї҆ѡ́нино,

⁴⁰и҆ наѹ́мово и҆ а҆ввакѹ́мово, софо́нїино, а҆гге́ево, заха́рїино и҆ малахі́ино, и҆́же и҆ а҆́гг҃лъ гд҇ень нарече́сѧ.