Read Библия Церковнославянская г҃ е҆́здры 11 Bible Online

г҃ е҆́здры 11 - Библия Церковнославянская bible

г҃ е҆́здры 11

¹И҆ ви́дѣхъ со́нъ, и҆ сѐ, восхожда́ше ѿ мо́рѧ ѻ҆ре́лъ, є҆мѹ́же бѧ́хѹ двана́десѧть кри́лъ перна́тыхъ и҆ главы҄ трѝ.

²И҆ ви́дѣхъ, и҆ сѐ, простира́ше крилѣ҄ своѝ по все́й землѝ, и҆ всѝ вѣ́три небе́снїи надыха́хѹ въ него̀ и҆ собира́хѹсѧ.

³И҆ ви́дѣхъ, и҆ ѿ пе́рїѧ є҆гѡ̀ ражда́хѹсѧ сопроти҄внаѧ пє́рїѧ, и҆ та҄ѧ творѧ́хѹсѧ въ пе́рїйцахъ дро́бныхъ и҆ ма́лыхъ:

⁴и҆́бо главы҄ є҆гѡ̀ бѧ́хѹ покѡ́йны, и҆ сре́днѧѧ глава̀ бѣ̀ бо́лши и҆нѣ́хъ гла́въ, но та̀ поко́ѧшесѧ съ ни́ми.

⁵И҆ ви́дѣхъ, и҆ сѐ, ѻ҆ре́лъ летѧ́ще кри́лами свои́ми и҆ воцари́сѧ на землѝ и҆ над̾ живѹ́щими на не́й.

⁶И҆ ви́дѣхъ, ѩ҆́кѡ повиновє́на бѧ́хѹ є҆мѹ̀ всѧ҄ поднебє́снаѧ, и҆ никто́же є҆мѹ̀ противлѧ́шесѧ ни є҆ди́нъ ѿ тва́ри, ѩ҆́же є҆́сть на землѝ.

⁷И҆ ви́дѣхъ, и҆ сѐ, воста̀ ѻ҆ре́лъ на нѡ́гти своѧ҄ и҆ и҆спѹстѝ гла́съ пе́рїємъ свои҄мъ, глаго́лѧ:

⁸не бди́те всѝ вкѹ́пѣ, спи́те є҆ди́нъ кі́йждо въ мѣ́стѣ свое́мъ и҆ по вре́мени бди́те,

⁹главы҄ же на послѣ́докъ да сохранѧ́тсѧ.

¹⁰И҆ ви́дѣхъ, и҆ сѐ, гла́съ не и҆схожда́ше ѿ гла́въ є҆гѡ̀, но ѿ среды̀ тѣ́ла є҆гѡ̀.

¹¹И҆ и҆счи́слихъ проти҄внаѧ пє́рїѧ є҆гѡ̀, и҆ сѐ, си́хъ бѧ́ше ѻ҆́смь.

¹²И҆ ви́дѣхъ, и҆ сѐ, ѡ҆ деснѹ́ю странѹ̀ воста̀ є҆ди́но перо̀ и҆ воцари́сѧ над̾ все́ю земле́ю.

¹³И҆ бы́сть, є҆гда̀ ца́рствоваше, прїи́де є҆мѹ̀ коне́цъ, и҆ не ѩ҆ви́сѧ мѣ́сто є҆гѡ̀, и҆ и҆́но воста̀ и҆ ца́рствоваше: то́е мно́го держа̀ вре́мѧ.

¹⁴И҆ бы́сть, є҆гда̀ ца́рствоваше, и҆ грѧдѧ́ше коне́цъ є҆гѡ̀, да не ѩ҆ви́тсѧ ѩ҆́коже пре́жднее,

¹⁵и҆ сѐ, гла́съ и҆спѹще́нъ бы́сть томѹ̀, глаго́лѧ:

¹⁶слы́ши ты̀, є҆́же толи́ко вре́мѧ держа́ло є҆сѝ зе́млю, сїѧ҄ возвѣща́ю тебѣ̀, пре́жде не́же начне́ши не ѩ҆влѧ́тисѧ:

¹⁷никто́же послѣдѝ тебє̀ ѡ҆держи́тъ вре́мѧ твоѐ, но ни по́лъ є҆гѡ̀.

¹⁸И҆ воздви́жесѧ тре́тїе и҆ ѡ҆держа̀ нача́лство, ѩ҆́коже и҆ прє́жднѧѧ, и҆ не ѩ҆ви́сѧ и҆ то́е.

¹⁹И҆ та́кѡ слѹча́шесѧ всѣ҄мъ и҆ны҄мъ, коемѹ́ждо ѡ҆со́бно нача́лство содержа́ти и҆ па́ки никогда̀ ѩ҆ви́тисѧ.

²⁰И҆ ви́дѣхъ, и҆ сѐ, во вре́мѧ послѣ́дствѹющее пе́рїе воздвиза́хѹсѧ ѡ҆ деснѹ́ю странѹ̀, да ѡ҆держа́тъ и҆ ті́и нача́лство, и҆ ѿ тѣ́хъ бы́ша, и҆̀же содержа́хѹ, но ѻ҆ба́че а҆́бїе не ѩ҆влѧ́хѹсѧ:

²¹и҆́бо и҆ нѣ́цыи ѿ ни́хъ воздвиза́хѹсѧ, но не содержа́хѹ нача́лства.

²²И҆ ви́дѣхъ по си́хъ, и҆ сѐ, не ѩ҆ви́шасѧ двана́десѧть пе́рїй и҆ два̀ пє́рїйца.

²³И҆ ничто́же бѧ́ше ѡ҆ста́ло въ тѣ́лѣ ѻ҆́рли, то́кмѡ двѣ̀ главы҄ поко́ѧщыѧсѧ и҆ ше́сть пе́рїйцъ.

²⁴И҆ ви́дѣхъ, и҆ сѐ, шести́мъ пе́рїйцамъ раздѣлє́на сѹ́ть два̀ и҆ пребы́ста под̾ главо́ю, ѩ҆́же є҆́сть на деснѣ́й странѣ̀, и҆́бо четы́ри пребы́ша въ мѣ́стѣ свое́мъ.

²⁵И҆ ви́дѣхъ, и҆ сѐ, подкри҄лїѧ мы́шлѧхѹ себѐ воздви́гнѹти и҆ ѡ҆держа́ти нача́лство.

²⁶И҆ ви́дѣхъ, и҆ сѐ, є҆ди́но воздви́жено є҆́сть, но а҆́бїе не ѩ҆ви́сѧ,

²⁷и҆ втора҄ѧ скорѣ́е, не́же прє́жнѧѧ, не ѩ҆ви́шасѧ.

²⁸И҆ ви́дѣхъ, и҆ сѐ, два̀, ѩ҆̀же ѡ҆ста́стасѧ въ себѣ̀ са́ми, помышлѧ́ста и҆ та҄ѧ ца́рствовати.

²⁹И҆ въ то́мъ є҆гда̀ помышлѧ́ста, и҆ сѐ, є҆ди́на ѿ поко́ѧщихсѧ гла́въ, ѩ҆́же бѧ́ше сре́днѧѧ, возбѹжда́шесѧ: сїѧ́ бо бѧ́ше ѿ двѹ̀ главѹ҄ бо́лшаѧ.

³⁰И҆ ви́дѣхъ, ѩ҆́кѡ соединє́ны сѹ́ть двѣ̀ главы҄ съ собо́ю,

³¹и҆ сѐ, ѡ҆браще́на є҆́сть глава̀ съ тѣ́ми, ѩ҆̀же съ не́ю бѧ́хѹ, и҆ снѣдѐ два̀ подкрылѧ҄та, ѩ҆̀же помышлѧ́ста ца́рствовати.

³²Сїѧ́ же глава̀ ѹ҆страшѝ всю̀ зе́млю и҆ ѡ҆блада́ше на не́й тѣ́ми, и҆̀же ѡ҆бита́ютъ на землѝ, съ трѹ́дностїю мно́гою, и҆ вла́сть ѡ҆бдержа̀ над̾ крѹ́гомъ земны́мъ па́че всѣ́хъ кри́лъ, ѩ҆̀же бы́ша.

³³И҆ ви́дѣхъ по си́хъ, и҆ сѐ, сре́днѧѧ глава̀ внеза́пѹ не ѩ҆ви́сѧ, и҆ сїѧ̀ ѩ҆́коже крилѣ҄.

³⁴Ѡ҆ста́стѣсѧ же двѣ̀ главы҄, ѩ҆̀же и҆ тѣ̀ та́кожде ца́рствовастѣ на землѝ и҆ над̾ ѡ҆бита́ющими на не́й.

³⁵И҆ ви́дѣхъ. и҆ сѐ, пожрѐ глава̀, сѹ́щаѧ ѡ҆ деснѹ́ю странѹ̀, ѻ҆́нѹю, ѩ҆́же ѡ҆ шѹ́юю.

³⁶И҆ слы́шахъ гла́съ глаго́лющь мѝ: зрѝ проти́вѹ тебє̀ и҆ разсмотрѧ́й є҆́же ви́диши.

³⁷И҆ ви́дѣхъ, и҆ сѐ, ѩ҆́коже ле́въ разгнѣ́ванъ ѿ лѣ́са рыка́ющь, и҆ ви́дѣхъ, ѩ҆́кѡ и҆спѹска́ше гла́съ человѣ́ческїи ко ѻ҆рлѹ̀, и҆ речѐ глаго́лѧ:

³⁸слы́ши ты̀, и҆ возглаго́лю тебѣ̀, и҆ рече́тъ вы́шнїй тебѣ̀:

³⁹не ты́ ли є҆сѝ, и҆́же ѡ҆ста́лсѧ ѿ четы́рехъ живо́тныхъ, ѩ҆̀же сотвори́хъ ца́рствовати въ вѣ́цѣ мое́мъ, и҆ да чрез̾ ни́хъ прїи́детъ коне́цъ вѣ́ка и҆́хъ;

⁴⁰и҆ четве́ртый грѧды́й побѣдѝ всѧ҄ живѡ́тнаѧ, ѩ҆̀же преидо́ша, и҆ вла́стїю ѡ҆держа̀ вѣ́къ со тре́петомъ мно́гимъ и҆ всю̀ вселеннѹю съ трѹ́дностїю лю́тою, и҆ ѡ҆бита́ше толи́кѡ време́нъ на крѹ́зѣ земнѣ́мъ съ ле́стїю:

⁴¹и҆ сѹди́лъ є҆сѝ зе́млю не со и҆́стиною,

⁴²сокрѹши́лъ бо є҆сѝ кро́ткихъ и҆ повреди́лъ є҆сѝ миролюби́выхъ, и҆ возлюби́лъ ло́жныхъ, и҆ разори́лъ є҆сѝ жили҄ща и҆́хъ, и҆̀же пло́дъ творѧ́хѹ, и҆ смири́лъ є҆сѝ стѣ́ны и҆́хъ, и҆̀же тебѐ не повреди́ша:

⁴³и҆ взы́де ѹ҆коре́нїе твоѐ къ вы́шнемѹ и҆ горды́нѧ твоѧ̀ ко крѣ́пкомѹ,

⁴⁴и҆ ѹ҆зрѣ̀ вы́шнїй гѡ́рдаѧ времена̀, и҆ сѐ, сконча҄на сѹ́ть, и҆ беззакѡ́нїѧ є҆гѡ̀ и҆спо́лнишасѧ:

⁴⁵сегѡ̀ ра́ди не ѩ҆влѧ́йсѧ ты̀, ѻ҆́рле, и҆ крилѣ҄ твоѝ грѡ́зныѧ и҆ пє́рїйца твоѧ҄ стропти҄ваѧ, и҆ главы҄ твоѧ҄ лѹка҄выѧ, и҆ нѡ́гти твоѝ ѕлѣ́йшїи, и҆ всѐ тѣ́ло твоѐ сѹ́етное,

⁴⁶ѩ҆́кѡ да прохлади́тсѧ всѧ̀ землѧ̀ и҆ ѡ҆брати́тсѧ свобо́дна ѿ твоеѧ̀ си́лы, и҆ ѹ҆пова́етъ на сѹ́дъ и҆ мл҇рдїе тогѡ̀, и҆́же сотворѝ ю҆̀.