Read Библия Церковнославянская г҃ е҆́здры 12 Bible Online

г҃ е҆́здры 12 - Библия Церковнославянская bible

г҃ е҆́здры 12

¹И҆ бы́сть, є҆гда̀ глаго́лаше ле́въ словеса̀ сїѧ҄ ко ѻ҆рлѹ̀, и҆ ви́дѣхъ:

²и҆ сѐ, ѩ҆́же ѡ҆ста̀ глава̀, и҆ не ѩ҆ви́шасѧ четы́ри кри́ла ѡ҆́наѧ, ѩ҆̀же къ немѹ̀ преидо́ша и҆ воздвиго́шасѧ да ца́рствѹютъ, и҆ бѧ́ше ца́рство и҆́хъ скѹ́дно и҆ молвы̀ по́лно.

³И҆ ви́дѣхъ, и҆ сѐ, та҄ не ѩ҆влѧ́хѹсѧ, и҆ всѐ тѣ́ло ѻ҆́рлее возжига́шесѧ, и҆ ѹ҆страши́сѧ землѧ̀ ѕѣлѡ̀, и҆ а҆́зъ ѿ молвы̀ и҆ ѹ҆́жаса ѹ҆ма̀ и҆ ѿ вели́ка стра́ха воспрѧнѹ́хъ и҆ рѣ́хъ дѹ́хѹ моемѹ̀:

⁴сѐ, ты̀ по́далъ є҆сѝ мнѣ̀ то̀ въ то́мъ, ѩ҆́кѡ и҆спытѹ́еши пѹти҄ вы́шнѧгѡ:

⁵сѐ, є҆щѐ ѹ҆трѹжде́нъ є҆́смь дѹше́ю и҆ дѹ́хомъ мои́мъ и҆знемого́хъ ѕѣлѡ̀, и҆ нижѐ ма́лаѧ є҆́сть во мнѣ̀ си́ла ѿ мно́жества боѧ́зни, є҆́юже ѹ҆страши́хсѧ но́щи сеѧ̀:

⁶нн҃ѣ ѹ҆́бѡ помолю́сѧ вы́шнемѹ, да мѧ̀ ѹ҆крѣпи́тъ да́же до конца̀.

⁷И҆ реко́хъ: влдко гд҇и, а҆́ще ѡ҆брѣто́хъ благода́ть пред̾ ѻ҆чи́ма твои́ма, и҆ а҆́ще ѡ҆правда́нъ є҆́смь пред̾ тобо́ю па́че мно́гихъ, и҆ а҆́ще и҆́стиннѡ взы́де моле́нїе моѐ пред̾ лице́мъ твои́мъ,

⁸ѹ҆крѣпи́ мѧ и҆ ѩ҆вѝ мнѣ̀ рабѹ̀ твоемѹ̀ толкова́нїе и҆ раздѣле́нїе видѣ́нїѧ гро́знагѡ сегѡ̀, да соверше́ннѣе ѹ҆тѣ́шиши дѹ́шѹ мою̀:

⁹досто́йна бо менѐ и҆мѣ́лъ є҆сѝ показа́ти мнѣ̀ времена̀ послѣ҄днѧѧ. И҆ речѐ ко мнѣ̀:

¹⁰сїѐ є҆́сть толкова́нїе видѣ́нїѧ сегѡ̀:

¹¹ѻ҆рла̀ є҆го́же ви́дѣлъ є҆сѝ восходѧ́ща ѿ мо́рѧ, то̀ є҆́сть ца́рство, є҆́же ви́дѣно бы́сть въ видѣ́нїи данїи́ла бра́та твоегѡ̀,

¹²но нѣ́сть є҆мѹ̀ протолко́вано, ѩ҆̀же а҆́зъ нн҃ѣ тебѣ̀ протолкѹ́ю.

¹³Сѐ, дні́е грѧдѹ́тъ, и҆ воста́нетъ ца́рство на землѝ, и҆ бѹ́детъ боѧ́знь вѧ́щшаѧ всѣ҄мъ ца́рствѡмъ, ѩ҆̀же бы́ша пре́жде є҆гѡ̀:

¹⁴ца́рствовати же бѹ́дѹтъ на не́й ца́рїе двана́десѧть, є҆ди́нъ по є҆ди́номѹ,

¹⁵и҆́бо вторы́й начне́тъ ца́рствовати, и҆ то́й ѡ҆де́ржитъ вѧ́щшее вре́мѧ па́че двана́десѧти:

¹⁶сїѐ є҆́сть толкова́нїе двана́десѧти кри́лъ, ѩ҆̀же ви́дѣлъ є҆сѝ.

¹⁷И҆ є҆гѡ́же слы́шалъ є҆сѝ гла́съ, и҆́же глаго́лаше, не ѿ гла́въ є҆гѡ̀ и҆сходѧ́щь, но ѿ среди́ны тѣ́ла є҆гѡ̀,

¹⁸сїѐ є҆́сть толкова́нїе: ѩ҆́кѡ по́слѣ вре́мене ца́рства тогѡ̀ родѧ́тсѧ рвє́нїѧ не ма҄ла, и҆ бѣ́дствовати и҆́мать, ѩ҆́кѡ да паде́тъ, и҆ не паде́тъ тогда̀, но па́ки возста́витсѧ въ своѐ нача́ло:

¹⁹а҆ ѩ҆̀же ви́дѣлъ є҆сѝ подкри́лєцъ ѻ҆́смь прилѣплѧ́ющихсѧ кри́ламъ є҆гѡ̀,

²⁰сїѐ є҆́сть толкова́нїе: воста́нѹтъ въ то́мъ ѻ҆́смь царе́й, и҆́хже бѹ́дѹтъ времена̀ лє́гка и҆ лѣ҄та скѡ́раѧ, и҆ два̀ ѹ҆́бѡ ѿ ни́хъ поги́бнѹтъ:

²¹приближа́ющѹсѧ же вре́мени сре́днемѹ, четы́ри сохранѧ́тсѧ во вре́мѧ, є҆гда̀ начне́тъ приближа́тисѧ вре́мѧ є҆гѡ̀ да сконча́етсѧ, дво́е же на коне́цъ сохранѧ́тсѧ.

²²А҆ ѩ҆́кѡ ви́дѣлъ є҆сѝ трѝ главы҄ поко́ѧщыѧсѧ,

²³сїѐ є҆́сть толкова́нїе: въ послѣ҄днѧѧ є҆гѡ̀ воздви́гнетъ вы́шнїй трѝ ца҄рства и҆ призове́тъ въ нѧ̀ мно́гихъ, и҆ поѡблада́ютъ земле́ю:

²⁴и҆ и҆̀же ѡ҆бита́ютъ на не́й, съ трѹдо́мъ мно́гимъ на всѣ́хъ, и҆̀же бы́ша пре́жде си́хъ, сегѡ̀ ра́ди ті́и назва́ни сѹ́ть главы҄ ѡ҆́рли:

²⁵сі́и бо бѹ́дѹтъ, и҆̀же воз̾ѡглавѧ́тъ нечє́стїѧ є҆гѡ̀ и҆ и҆̀же соверша́тъ послѣ҄днѧѧ є҆гѡ̀.

²⁶А҆ ѩ҆́кѡ ви́дѣлъ є҆сѝ главѹ̀ болшѹ́ю неѧвлѧ́ющѹюсѧ, сїѐ є҆́сть толкова́нїе є҆ѧ̀: ѩ҆́кѡ є҆ди́нъ ѿ ни́хъ на ѻ҆дрѣ̀ свое́мъ ѹ҆́мретъ, но ѻ҆ба́че съ мѹче́нїемъ,

²⁷и҆́бо два̀, и҆̀же пребѹ́дѹтъ, ме́чь и҆̀хъ поѧ́стъ:

²⁸є҆ди́нагѡ бо ме́чь поѧ́стъ сѹ́щихъ съ ни́мъ, но ѻ҆ба́че и҆ се́й мече́мъ на послѣ́докъ паде́тъ.

²⁹А҆ ѩ҆̀же ви́дѣлъ є҆сѝ два̀ подкри҄лїѧ восхѡдѧ́щаѧ на главѹ̀, ѩ҆́же є҆́сть ѡ҆ деснѹ́ю странѹ̀,

³⁰сїѐ є҆́сть толкова́нїе: сі́и сѹ́ть, и҆̀хже соблюдѐ вы́шнїй въ коне́цъ сво́й, то̀ є҆́сть ца́рство скѹ́дное и҆ скорбе́й по́лно.

³¹ѩ҆́коже ви́дѣлъ є҆сѝ и҆ льва̀, є҆го́же ви́дѣлъ є҆сѝ ѿ лѣ́са возбѹди́вшасѧ, рыка́юща и҆ глаго́люща ко ѻ҆рлѹ̀, и҆ ѡ҆блича́юща є҆го̀ и҆ непра҄вды є҆гѡ̀ всѣ́ми словесы̀ є҆гѡ̀, ѩ҆́коже слы́шалъ є҆сѝ:

³²се́й є҆́сть вѣ́тръ, є҆го́же сохрани́лъ вы́шнїй на коне́цъ на ни́хъ и҆ на нечє́стїѧ и҆́хъ, и҆ ѡ҆бличи́тъ тѣ́хъ и҆ ѡ҆б̾ѧви́тъ пред̾ тѣ́ми пре́лєсти и҆́хъ,

³³поста́витъ бо и҆̀хъ на сѹдѣ̀ живы́хъ: и҆ бѹ́детъ, є҆гда̀ ѡ҆бличи́тъ и҆̀хъ, тогда̀ нака́жетъ и҆̀хъ:

³⁴и҆́бо ѡ҆ста́нокъ люді́й мои́хъ и҆зба́витъ съ бѣ́дностїю, и҆̀же сохране́ни сѹ́ть на конца́хъ мои́хъ, и҆ ѹ҆блажи́тъ и҆̀хъ, до́ндеже прїи́детъ коне́цъ де́нь сѹда̀, ѡ҆ не́мже гл҃ахъ тебѣ̀ ѿ нача́ла.

³⁵Се́й со́нъ, є҆го́же ви́дѣлъ є҆сѝ, и҆ сїѧ҄ сѹ́ть толкова҄нїѧ.

³⁶Ты̀ ѹ҆̀бо є҆ди́нъ досто́инъ бы́лъ є҆сѝ зна́ти та́йнѹ сїю̀ вы́шнѧгѡ:

³⁷напишѝ ѹ҆́бѡ всѧ҄ сїѧ҄ въ кни́гѹ, ѩ҆̀же ви́дѣлъ є҆сѝ, и҆ положѝ ѧ҆̀ въ мѣ́стѣ сохра́ннѣ,

³⁸и҆ наѹчи́ши си҄мъ мѹ҄дрыѧ ѿ люді́й твои́хъ, и҆́хже сердца̀ вѣ́си, ѩ҆́кѡ мо́гѹтъ прїѧ́ти и҆ храни́ти та҄йны сїѧ҄:

³⁹ты́ же є҆щѐ потерпѝ здѣ̀ и҆ны́хъ дні́й се́дмь, да тебѣ̀ пока́зано бѹ́детъ всѐ, є҆́же и҆зво́литсѧ вы́шнемѹ показа́ти тебѣ̀. И҆ ѿи́де ѿ менє̀.

⁴⁰И҆ бы́сть, є҆гда̀ ѹ҆слы́ша ве́сь наро́дъ, ѩ҆́кѡ проидо́ша се́дмь дні́й, и҆ а҆́зъ не возврати́хсѧ во гра́дъ, и҆ собра́шасѧ всѝ ѿ ме́ншагѡ да́же до бо́лшагѡ, и҆ прїидо́ша ко мнѣ̀ и҆ реко́ша мѝ, глаго́люще:

⁴¹что̀ согрѣши́ли є҆смы̀ тебѣ̀ и҆ что̀ непра́во содѣ́ѧхомъ на тѧ̀, ѩ҆́кѡ ѡ҆ставлѧ́ѧй на́съ сѣ́лъ є҆сѝ на мѣ́стѣ то́мъ;

⁴²ты́ бо на́мъ ѡ҆ста́лсѧ є҆сѝ є҆ди́нъ ѿ всѣ́хъ люді́й, ѩ҆́коже гро́здъ ѿ вїногра́да и҆ ѩ҆́кѡ свѣти́лникъ въ мѣ́стѣ мра́чнѣ и҆ ѩ҆́кѡ приста́нище и҆ кора́бль спасе́ный ѿ бѹ́ри:

⁴³и҆лѝ недовѡ́лна на́мъ сѹ́ть ѕла҄ѧ, ѩ҆̀же приключа́ютсѧ;

⁴⁴а҆́ще ѹ҆̀бо ты̀ на́съ ѡ҆ста́виши, ко́ль лѹ́чше бы на́мъ бы́ло, а҆́ще бы́хомъ сожже́ни бы́ли и҆ мы̀ съ сожже́нїемъ сїѡ́на;

⁴⁵нижѐ бо мы̀ є҆смы̀ лѹ́чши тѣ́хъ, и҆̀же та́мѡ ѹ҆мро́ша. И҆ пла́каша гла́сомъ вели́кимъ. И҆ ѡ҆вѣща́хъ къ ни҄мъ и҆ реко́хъ:

⁴⁶ѹ҆пова́й, ї҆и҃лю, и҆ не скорбѝ ты̀, до́ме ї҆а́кѡвль:

⁴⁷є҆́сть бо па́мѧть ѡ҆ ва́съ пред̾ вы́шнимъ, и҆ крѣ́пкїй не забы̀ ва́съ въ напа́сти:

⁴⁸а҆́зъ бо не ѡ҆ста́вихъ ва́съ, ни ѿидо́хъ ѿ ва́съ, но прїидо́хъ на сїѐ мѣ́сто, да помолю́сѧ ѡ҆ разоре́нїи сїѡ́на, да взыщѹ̀ мл҇рдїе за смире́нїе ст҃ы́ни ва́шеѧ:

⁴⁹и҆ нн҃ѣ и҆ди́те є҆ди́нъ кі́йждо въ до́мъ сво́й, и҆ а҆́зъ прїидѹ̀ къ ва́мъ по дне́хъ си́хъ.

⁵⁰И҆ ѿи́де наро́дъ, ѩ҆́коже реко́хъ є҆мѹ̀, во гра́дъ:

⁵¹а҆́зъ же сѣдо́хъ на по́ли се́дмь дні́й, ѩ҆́коже мѝ повелѣ̀, и҆ ѩ҆до́хъ то́кмѡ ѿ цвѣтѡ́въ се́лныхъ, и҆ ѿ тра́въ сотворена̀ бы́сть мнѣ̀ пи́ща во дне́хъ тѣ́хъ.