Read Библия Церковнославянская г҃ е҆́здры 13 Bible Online

г҃ е҆́здры 13 - Библия Церковнославянская bible

г҃ е҆́здры 13

¹И҆ бы́сть по дне́хъ седмѝ, и҆ ви́дѣхъ со́нъ но́щїю:

²и҆ сѐ, ѿ мо́рѧ вѣ́тръ востава́ше, да возмѹти́тъ всѧ҄ вѡ́лны є҆гѡ̀.

³И҆ ви́дѣхъ, и҆ сѐ, возмога́ше то́й человѣ́къ съ ты́сѧщьми небе́сными, и҆ а҆́може лицѐ своѐ ѡ҆браща́ше, да воззри́тъ, трепета́хѹ всѧ҄, ѩ҆̀же под̾ ни́мъ ви́дѧхѹсѧ,

⁴и҆ а҆́може и҆схожда́ше гла́съ ѿ ѹ҆́стъ є҆гѡ̀, возжиза́хѹсѧ всѝ, и҆̀же слы́шахѹ гла́съ є҆гѡ̀, ѩ҆́коже поко́итсѧ землѧ̀, є҆гда̀ ѹ҆слы́шитъ ѻ҆́гнь.

⁵И҆ ви́дѣхъ по се́мъ, и҆ сѐ, собира́шесѧ мно́жество люді́й, и҆́хже не бѣ̀ числа̀, ѿ четы́рехъ вѣ҄тръ небе́сныхъ, да побѣдѧ́тъ человѣ́ка, и҆́же и҆зы́де ѿ мо́рѧ.

⁶И҆ ви́дѣхъ, и҆ сѐ, са́мъ себѣ̀ и҆зваѧ̀ го́рѹ вели́кѹ и҆ возлетѣ̀ на ню̀:

⁷а҆́зъ же и҆ска́хъ ви́дѣти странѹ̀ и҆лѝ мѣ́сто, ѿкѹ́дѹ и҆зва́ѧна бы́сть гора̀, и҆ не мого́хъ.

⁸И҆ по се́мъ ви́дѣхъ, и҆ сѐ, всѝ, и҆̀же со́брани сѹ́ть на него̀, да побо́рютъ є҆го̀, боѧ́хѹсѧ ѕѣлѡ̀, ѻ҆ба́че дерза́хѹ ра́товати.

⁹И҆ сѐ, є҆гда̀ ѹ҆ви́дѣ стремле́нїе мно́жества грѧдѹ́щагѡ, не воздви́же рѹкѝ своеѧ̀, ни ѻ҆рѹ́жїѧ держа́ше и҆ ни кото́рагѡ ѻ҆рѹ́дїѧ бра́ннагѡ, то́кмѡ ѩ҆́коже ви́дѣхъ:

¹⁰поне́же и҆спѹстѝ и҆з̾ ѹ҆́стъ свои́хъ а҆́ки дохнове́нїе ѻ҆гнѧ̀, и҆ ѿ ѹ҆сте́нъ є҆гѡ̀ ѩ҆́кѡ дѹ́хъ пла́мене, и҆ ѿ ѧ҆зы́ка своегѡ̀ и҆спѹска́ше и҆́скры и҆ бѹ҄ри, и҆ соединє́на сѹ́ть всѧ҄ вкѹ́пѣ сїѧ҄, дохнове́нїе ѻ҆гнѧ̀ и҆ дѹ́хъ пла́мене и҆ мно́жество бѹ́ри:

¹¹и҆ нападѐ на мно́жество во ѹ҆стремле́нїи, є҆́же ѹ҆гото́вано бы́сть ѡ҆полча́тисѧ, и҆ пожжѐ всѣ́хъ (и҆ и҆скоренѝ), ѩ҆́кѡ а҆́бїе ничто́же ви́дѣно бѧ́ше ѿ безчи́сленна мно́жества, ра́звѣ то́кмѡ пра́хъ и҆ ды́ма вонѧ̀. И҆ ви́дѣхъ и҆ ѹ҆страши́хсѧ.

¹²И҆ по си́хъ ви́дѣхъ того̀ человѣ́ка сходѧ́щаго съ горы̀ и҆ зовѹ́ща къ себѣ̀ мно́жество и҆но́е ми́рное:

¹³и҆ пристѹпа́хѹ къ немѹ̀ ли́ца человѣ́кѡвъ мно́гихъ, нѣ́кїихъ ра́дѹющихсѧ и҆ нѣ́кїихъ скорбѧ́щихъ, нѣ́цыи же привѧ́зани, нѣ́цыи приводѧ́ще ѿ тѣ́хъ, и҆̀же приноша́хѹсѧ. И҆ и҆знемого́хъ ѿ мно́жества стра́ха, и҆ возбѹди́хсѧ и҆ реко́хъ:

¹⁴ты̀ ѿ нача́ла показа́лъ є҆сѝ рабѹ̀ твоемѹ̀ чѹдеса̀ сїѧ҄, и҆ досто́йна мѧ̀ и҆мѣ́лъ є҆сѝ, да прїи́меши моли́твѹ мою̀:

¹⁵и҆ нн҃ѣ покажѝ мнѣ̀ є҆щѐ толкова́нїе сна̀ сегѡ̀,

¹⁶ѩ҆́коже бо мню̀ въ чѹ́вствѣ мое́мъ, го́ре и҆̀же ѡ҆ста́влени бѹ́дѹтъ во дни҄ ты҄ѧ, и҆ наипа́че го́ре си҄мъ, и҆̀же не сѹ́ть ѡ҆ста́влени,

¹⁷и҆̀же бо не сѹ́ть ѡ҆ста́влени, ско́рбни бѧ́хѹ:

¹⁸разѹмѣ́ю нн҃ѣ, ѩ҆̀же сѹ́ть ѿложє́на на послѣ҄днїѧ дни҄, и҆ ѹ҆срѧ́щѹтъ и҆̀хъ, но и҆ тѣ́хъ, и҆̀же ѡ҆ста́влени сѹ́ть:

¹⁹сегѡ́ бо ра́ди прїидо́ша въ бѣды҄ вєли́кїѧ и҆ въ нѹ҄жды мнѡ́гїѧ, ѩ҆́коже показѹ́ютъ сѡ́нїѧ сїѧ҄:

²⁰ѻ҆ба́че легча́е є҆́сть бѣ́дствѹющемѹ прїитѝ на сїѐ, не́же прейтѝ ѩ҆́кѡ ѡ҆́блакѹ ѿ вѣ́ка и҆ нн҃ѣ ви́дѣти, ѩ҆̀же слѹча́тсѧ въ послѣ҄днѧѧ времена̀. И҆ ѿвѣша̀ ко мнѣ̀ и҆ речѐ:

²¹и҆ видѣ́нїѧ толкова́нїе рекѹ̀ тебѣ̀, и҆ ѡ҆ ни́хже глаго́лалъ є҆сѝ, ѿве́рзѹ тѝ.

²²Поне́же ѡ҆ си́хъ ре́клъ є҆сѝ, и҆̀же ѡ҆ста́влени сѹ́ть, сїѐ є҆́сть толкова́нїе:

²³и҆́же ѿи́метъ бѣдѹ̀ въ то̀ вре́мѧ, то́й сохрани́сѧ: и҆̀же въ бѣдѹ̀ впадо́ша, сі́и сѹ́ть, и҆̀же и҆мѣ́ютъ дѣла̀ и҆ вѣ́рѹ къ крѣпча́йшемѹ:

²⁴вѣ́ждь ѹ҆̀бо, ѩ҆́кѡ бо́лши ѹ҆блаже́ни сѹ́ть и҆̀же ѡ҆ста́влени, па́че тѣ́хъ, и҆̀же ме́ртви сѹ́ть.

²⁵Сїѧ҄ толкѡва́нїѧ видѣ́нїю: ѩ҆́кѡ ви́дѣлъ є҆сѝ мѹ́жа восходѧ́ща ѿ се́рдца морска́гѡ,

²⁶то́й є҆́сть, є҆го́же храни́тъ вы́шнїй мнѡ́га времена̀, и҆́же сами́мъ собо́ю и҆зба́витъ сотворе́нїе своѐ и҆ то́й разсмо́тритъ, и҆̀же ѡ҆ста́влени сѹ́ть.

²⁷А҆ ѩ҆́кѡ ви́дѣлъ є҆сѝ ѿ ѹ҆́стъ є҆гѡ̀ и҆сходи́ти а҆́ки дѹ́хъ и҆ ѻ҆́гнь и҆ бѹ́рю,

²⁸и҆ ѩ҆́кѡ не держа́ше меча̀ и҆ ни ѻ҆рѹ́дїѧ бра́ннагѡ, порази́ бо стремле́нїе є҆гѡ̀ мно́жество, є҆́же прїи́де ра́товати є҆го̀, сїѐ є҆́сть толкова́нїе:

²⁹сѐ, дні́е грѧдѹ́тъ, є҆гда̀ начне́тъ вы́шнїй и҆збавлѧ́ти си́хъ, и҆̀же на землѝ сѹ́ть,

³⁰и҆ прїи́детъ ѹ҆́жасъ ѹ҆ма̀ на тѣ́хъ, и҆̀же ѡ҆бита́ютъ на землѝ,

³¹и҆ и҆ні́и и҆ны́хъ помы́слѧтъ воева́ти, гра́дъ на гра́дъ и҆ мѣ́сто на мѣ́сто, и҆ ѩ҆зы́къ на ѩ҆зы́къ и҆ ца́рство на ца́рство:

³²и҆ бѹ́детъ, є҆гда̀ бѹ́дѹтъ сїѧ҄, и҆ слѹча́тсѧ зна́мєнїѧ, ѩ҆̀же пре́жде показа́хъ тѝ, и҆ тогда̀ ѿкры́етсѧ сн҃ъ мо́й, є҆го́же ви́дѣлъ є҆сѝ ѩ҆́кѡ мѹ́жа восходѧ́ща:

³³и҆ бѹ́детъ, є҆гда̀ ѹ҆слы́шатъ всѝ ѩ҆зы́цы гла́съ є҆гѡ̀, и҆ ѡ҆ста́витъ є҆ди́нъ кі́йждо во странѣ̀ свое́й бра́нь свою̀, ю҆́же и҆́мѹтъ дрѹ́гъ на дрѹ́га,

³⁴и҆ собере́тсѧ во є҆ди́но собра́нїе мно́жество безчи́сленно, ѩ҆́кѡ хотѧ́ще прїитѝ и҆ ѡ҆полчи́тисѧ на него̀:

³⁵то́й же ста́нетъ на верхѹ̀ горы̀ сїѡ́на:

³⁶сїѡ́нъ же прїи́детъ и҆ ѩ҆ви́тсѧ всѣ҄мъ ѹ҆гото́ванъ и҆ созда́нъ, ѩ҆́коже ви́дѣлъ є҆сѝ го́рѹ и҆зва́ѧнѹ без̾ рѹ́къ:

³⁷то́й же сн҃ъ мо́й ѡ҆бличи́тъ, ѩ҆̀же и҆з̾ѡбрѣто́ша ѩ҆зы́цы, нечє́стїѧ и҆́хъ та҄, ѩ҆̀же къ бѹ́ри прибли́жишасѧ ра́ди лѹка́выхъ помышле́нїй и҆́хъ и҆ мѹче́нїй, и҆́миже начнѹ́тъ мѹ́читисѧ,

³⁸ѩ҆̀же подѡ́бна сѹ́ть пла́мени: и҆ погѹби́тъ и҆̀хъ без̾ трѹ́дности, по зако́нѹ, и҆́же ѻ҆гню̀ подо́бенъ є҆́сть.

³⁹А҆ ѩ҆́кѡ ви́дѣлъ є҆сѝ є҆го̀ собира́ющаго къ себѣ̀ и҆но́е мно́жество ми́рное:

⁴⁰сі́и сѹ́ть де́сѧть колѣ́нъ, и҆̀же плѣне́ни бы́ша ѿ землѝ своеѧ̀ во дни҄ ѡ҆сі́и царѧ̀, є҆го́же плѣнѝ салманаса́ръ ца́рь а҆ссѷрі́йскїй и҆ преведѐ и҆̀хъ за рѣкѹ̀, и҆ преведе́ни сѹ́ть въ зе́млю и҆нѹ́ю,

⁴¹ті́и же себѣ̀ да́ша совѣ́тъ то́й, да ѡ҆ста́вѧтъ мно́жество ѩ҆зы́кѡвъ, и҆ дабы̀ прошлѝ въ да́льнѹю странѹ̀, и҆дѣ́же никогда̀ ѡ҆бита́ше ро́дъ человѣ́ческїй,

⁴²и҆лѝ та́мѡ храни́ти закѡ́ннаѧ своѧ҄, и҆́хже не хранѧ́хѹ во странѣ̀ свое́й:

⁴³вхо́дами же тѣ́сными рѣкѝ є҆ѵфра́та внидо́ша:

⁴⁴сотвори́лъ бо и҆̀мъ тогда̀ вы́шнїй зна́мєнїѧ и҆ ѹ҆ста́вилъ жи҄лы рѣчны҄ѧ, до́ндеже про́йдѹтъ:

⁴⁵ѻ҆́ною бо страно́ю бѧ́ше пѹ́ть мно́гъ, пѹ́тьствовати лѣ́то є҆ди́но и҆ по́лъ, и҆́бо страна̀ та̀ зове́тсѧ а҆рсаре́ѳъ:

⁴⁶тогда̀ ѡ҆бита́ша та́мѡ да́же до послѣ́днѧгѡ вре́мене: и҆ нн҃ѣ па́ки є҆гда̀ начнѹ́тъ приходи́ти,

⁴⁷па́ки вы́шнїй ѹ҆ста́витъ жи҄лы рѣчны҄ѧ, да возмо́гѹтъ пройтѝ: си́хъ ра́ди ви́дѣлъ є҆сѝ мно́жество съ ми́ромъ:

⁴⁸но и҆ и҆̀же ѡ҆ста́влени сѹ́ть ѿ люді́й твои́хъ, сі́и сѹ́ть, и҆̀же ѡ҆брѧ́щѹтсѧ внѹ́трь предѣ҄лъ мои́хъ:

⁴⁹бѹ́детъ ѹ҆̀бо, є҆гда̀ начне́тъ погѹблѧ́ти мно́жество тѣ́хъ, и҆̀же со́брани сѹ́ть ѩ҆зы́цы, защи́титъ и҆̀хъ, и҆̀же премого́ша люді́й,

⁵⁰и҆ тогда̀ пока́жетъ и҆̀мъ ве́лїе мно́жество чѹде́съ.

⁵¹И҆ реко́хъ а҆́зъ: влдко гд҇и, сїе́ ми покажѝ, чесѡ̀ ра́ди ви́дѣхъ мѹ́жа восходѧ́ща ѿ се́рдца морска́гѡ; И҆ речѐ мнѣ̀:

⁵²ѩ҆́коже не мо́жеши сїѧ҄ и҆спыта́ти, и҆лѝ зна́ти, ѩ҆̀же сѹ́ть во глѹбинѣ̀ морстѣ́й, та́кѡ не мо́жетъ кі́йждо ви́дѣти на землѝ сн҃а моего̀, и҆лѝ тѣ́хъ, и҆̀же съ ни́мъ сѹ́ть, то́кмѡ во вре́мѧ днѐ.

⁵³Сїѐ є҆́сть толкова́нїе со́нїѧ, є҆́же ви́дѣлъ є҆сѝ и҆ є҆гѡ́же ра́ди просвѣще́нъ є҆сѝ здѣ̀ є҆ди́нъ:

⁵⁴ѡ҆ста́вилъ бо є҆сѝ тво́й и҆ ѡ҆́крестъ моегѡ̀ ѹ҆пражднѧ́лсѧ є҆сѝ зако́на и҆ и҆ска́лъ є҆сѝ:

⁵⁵житїе́ бо твоѐ ѹ҆стро́илъ є҆сѝ въ премѹ́дрости и҆ чѹ́вство твоѐ назва́лъ є҆сѝ ма́терїю:

⁵⁶и҆ тогѡ̀ ра́ди показа́хъ тебѣ̀ мзды҄ ѹ҆ вы́шнѧгѡ: бѹ́детъ бо по и҆нѣ́хъ трїе́хъ дне́хъ, и҆на҄ѧ къ тебѣ̀ возгл҃ю и҆ и҆з̾ѧвлю̀ тебѣ̀ тѧ҄жкаѧ и҆ ди҄внаѧ.

⁵⁷И҆ и҆до́хъ и҆ прїидо́хъ на по́ле, мно́гѡ сла́вѧ и҆ хвалѧ̀ вы́шнѧго ѡ҆ ди́вныхъ, ѩ҆̀же по вре́мени творѧ́ше,

⁵⁸и҆ ѩ҆́кѡ ѹ҆правлѧ́етъ сїѐ, и҆ ѩ҆̀же сѹ́ть во временѣ́хъ сотворє́на: и҆ сѣдо́хъ тѹ̀ трѝ дни҄.