Read Библия Церковнославянская г҃ е҆́здры 14 Bible Online

г҃ е҆́здры 14 - Библия Церковнославянская bible

г҃ е҆́здры 14

¹И҆ бы́сть въ тре́тїй де́нь, и҆ а҆́зъ сѣдѧ́хъ под̾ дѹ́бомъ, и҆ сѐ, гла́съ и҆зы́де проти́вѹ менє̀ ѿ кѹпины̀ и҆ речѐ: є҆́здро, є҆́здро! И҆ реко́хъ:

²сѐ, а҆́зъ, гд҇и. И҆ воста́хъ на но́зѣ моѝ. И҆ речѐ ко мнѣ̀:

³ѿкрыва́ѧсѧ ѿкрове́нъ є҆́смь на кѹпинѣ̀ и҆ гл҃ахъ ко мѡѷсе́ю, є҆гда̀ слѹжа́хѹ лю́дїе моѝ во є҆гѵ́птѣ,

⁴и҆ посла́хъ є҆го̀ и҆ и҆зведо́хъ лю́ди моѧ҄ ѿ є҆гѵ́пта, и҆ возведо́хъ є҆го̀ на го́рѹ сїна́йскѹ и҆ держа́хъ є҆го̀ пред̾ собо́ю дни҄ мнѡ́ги,

⁵И҆ возвѣсти́хъ є҆мѹ̀ чѹдеса̀ мнѡ́га и҆ показа́хъ є҆мѹ̀ време́нъ та҄йнаѧ и҆ коне́цъ, и҆ заповѣ́дахъ є҆мѹ̀ гл҃ѧ:

⁶сїѧ҄ во ѩ҆вле́нїе сотвори́ши словеса̀ и҆ сїѧ҄ скры́еши:

⁷и҆ нн҃ѣ тебѣ̀ гл҃ю:

⁸зна́мєнїѧ, ѩ҆̀же показа́хъ, и҆ сѡ́нїѧ, ѩ҆̀же ви́дѣлъ є҆сѝ, и҆ толкова҄нїѧ, ѩ҆̀же ты̀ вѣ́дѣлъ є҆сѝ, въ се́рдцы твое́мъ положѝ ѧ҆̀,

⁹ты́ бо воспрїѧ́тъ бѹ́деши ѿ всѣ́хъ, ѡ҆брати́шисѧ ѡ҆ста́тнїй съ совѣ́томъ мои́мъ и҆ съ подо́бными твои́ми, до́ндеже сконча́ютсѧ времена̀:

¹⁰ѩ҆́кѡ вѣ́къ погѹбѝ ю҆́ность свою̀, и҆ времена̀ приближа́ютсѧ старѣ́тисѧ:

¹¹на двана́десѧть бо часте́й раздѣле́нъ є҆́сть вѣ́къ, и҆ проидо́ша є҆го̀ десѧ́таѧ и҆ полдесѧ́тыѧ ча҄сти,

¹²ѡ҆ста́шасѧ же є҆гѡ̀ по́слѣ полдесѧ́тыѧ ча́сти:

¹³нн҃ѣ ѹ҆̀бо ѹ҆стро́й до́мъ тво́й и҆ накажѝ лю́ди твоѧ҄, и҆ ѹ҆тѣ́ши смире́нныхъ и҆́хъ и҆ ѿрецы́сѧ ѹ҆жѐ тлѣ́нїѧ,

¹⁴и҆ ѿпѹстѝ ѿ себє̀ сме́ртное помышле́нїе и҆ ѿве́рзи ѿ себє̀ тѧ́гѡсти людскї҄ѧ, и҆ и҆звлецы̀ ѹ҆жѐ ѿ себє̀ немощно́е є҆стество̀ и҆ ѿста́ви во є҆ди́нѹ странѹ̀ смѹща҄ющаѧ тѧ̀ помышлє́нїѧ, и҆ тщи́сѧ пресели́тисѧ ѿ време́нъ си́хъ:

¹⁵ѩ҆̀же бо ви́дѣлъ є҆сѝ нн҃ѣ слѹчи҄вшаѧсѧ ѕла҄ѧ, па́ки тѣ́хъ гѡ́ршаѧ сотворѧ́тъ:

¹⁶коли́кѡ бо и҆знемо́жетъ вѣ́къ ѿ ста́рости, толи́кѡ ѹ҆мно́жатсѧ на ѡ҆бита́ющихъ ѕла҄ѧ:

¹⁷ѹ҆дали́босѧ дале́че и҆́стина, и҆ прибли́жисѧ лжа̀: ѹ҆жѐ бо тщи́тсѧ прїитѝ є҆́же ви́дѣлъ є҆сѝ видѣ́нїе.

¹⁸И҆ ѡ҆вѣща́хъ и҆ реко́хъ: пред̾ тобо́ю, гд҇и:

¹⁹се́ бо, а҆́зъ пойдѹ̀, ѩ҆́коже повелѣ́лъ є҆сѝ мнѣ̀, и҆ накажѹ̀ настоѧ́щыѧ лю́ди: а҆ и҆̀же родѧ́тсѧ, кто̀ наѹчи́тъ ѧ҆̀;

²⁰поста́вленъ бо є҆́сть вѣ́къ во тмѣ̀: и҆̀же ѡ҆бита́ютъ въ не́мъ, без̾ свѣ́та:

²¹поне́же зако́нъ тво́й сожже́нъ є҆́сть, тогѡ̀ ра́ди никто́же зна́етъ, ѩ҆̀же ѿ тебє̀ сотворє́на сѹ́ть, и҆лѝ ѩ҆̀же начнѹ́тсѧ дѣла̀:

²²а҆́ще бо ѡ҆брѣто́хъ благода́ть пред̾ тобо́ю, послѝ въ мѧ̀ дх҃ъ ст҃ъ, да напишѹ̀ всѐ, є҆́же сотворе́но бы́сть въ вѣ́цѣ ѿ нача́ла, ѩ҆̀же бы́ша въ зако́нѣ твое́мъ пи҄сана, да возмо́гѹтъ человѣ́цы ѡ҆брѣстѝ стезю̀, и҆ и҆̀же восхотѧ́тъ жи́ти въ послѣ́днихъ временѣ́хъ, да живѹ́тъ.

²³И҆ ѿвѣща̀ ко мнѣ̀ и҆ речѐ: ше́дъ соберѝ лю́ди и҆ рече́ши къ ни҄мъ, да не и҆́щѹтъ тебѐ дні́й четы́редесѧть,

²⁴ты́ же ѹ҆гото́ви себѣ̀ дщи́цъ мно́гѡ и҆ возмѝ съ собо́ю сарі́а, даврі́а, салемі́а, є҆ха́на и҆ а҆сїе́лѧ, пѧ́ть и҆́хъ, и҆̀же ѹ҆гото́вани сѹ́ть къ писа́нїю ско́рѡ:

²⁵и҆ прїи́деши сѣ́мѡ, и҆ а҆́зъ возжгѹ̀ въ се́рдцы твое́мъ свѣти́лникъ ра́зѹма, и҆ не ѹ҆га́снетъ, до́ндеже сконча́ютсѧ, ѩ҆̀же начне́ши писа́ти:

²⁶и҆ когда̀ соверши́ши, нѣ҄каѧ ѩ҆́вственнѡ да сотвори́ши, нѣ́котѡраѧ мѹ҄дрымъ сокрове́ннѡ преда́си, въ заѹ́трїи бо въ се́й ча́съ начне́ши писа́ти.

²⁷И҆ и҆до́хъ, ѩ҆́коже мѝ повелѣ̀, и҆ собра́хъ всѧ҄ лю́ди и҆ реко́хъ:

²⁸слы́ши, ї҆и҃лю, словеса̀ сїѧ҄:

²⁹стра́нствоваша ѻ҆тцы̀ на́ши ѿ нача́ла во є҆гѵ́птѣ и҆ и҆зба́влени сѹ́ть ѿто́лѣ,

³⁰и҆ прїѧ́ша зако́нъ жи́зни, є҆гѡ́же не сохрани́ша, є҆го́же и҆ вы̀ по ни́хъ престѹпи́сте:

³¹и҆ дана̀ ва́мъ є҆́сть землѧ̀ въ жре́бїй, и҆ землѧ̀ сїѡ́нъ, и҆ ѻ҆тцы̀ ва́ши и҆ вы̀ беззако́нїе сотвори́сте и҆ не содержа́сте пѹті́й, и҆̀хже повелѣ̀ ва́мъ вы́шнїй:

³²а҆ поне́же првдный сѹдїѧ̀ є҆́сть, ѿѧ́лъ ѿ ва́съ во вре́мѧ, є҆́же дарова̀:

³³и҆ нн҃ѣ вы̀ здѣ̀ є҆стѐ, и҆ бра́тїѧ ва҄ша въ ва́съ сѹ́ть:

³⁴а҆́ще ѹ҆̀бо повелитѐ чѹ́вствѹ ва́шемѹ и҆ поѹчитѐ се́рдце ва́ше, жи́ви соде́ржани бѹ́дете и҆ по сме́рти мл҇ть наслѣ́дите:

³⁵сѹ́дъ бо по сме́рти прїи́детъ, є҆гда̀ па́ки ѡ҆живе́мъ, и҆ тогда̀ првдныхъ и҆мена̀ ѩ҆вѧ́тсѧ и҆ нечести́выхъ дѣла̀ пока́жѹтсѧ:

³⁶ко мнѣ̀ ѹ҆̀бо никто́же да пристѹ́питъ нн҃ѣ, ни взы́щетъ менѐ да́же до четы́редесѧти дні́й.

³⁷И҆ прїѧ́хъ пѧ́ть мѹже́й, ѩ҆́коже заповѣ́да мнѣ̀, и҆ и҆до́хомъ въ по́ле и҆ пребы́хомъ тѹ̀.

³⁸И҆ бы́сть въ заѹ́трїи, и҆ сѐ, гла́съ воззва́ мѧ гл҃ѧ: є҆́здро! ѿве́рзи ѹ҆ста̀ твоѧ҄ и҆ пі́й, и҆́мже тѧ̀ напою̀.

³⁹И҆ ѿверзо́хъ ѹ҆ста̀ моѧ҄, и҆ сѐ, ча́ша полна̀ подаѧ́шесѧ мнѣ̀: и҆ сїѐ, и҆́мже бѣ̀ и҆спо́лнена, бѧ́ше ѩ҆́коже вода̀, цвѣ́тъ же є҆ѧ̀ ѻ҆гню̀ подо́бенъ.

⁴⁰И҆ прїѧ́хъ и҆ пи́хъ: и҆ тогда̀, є҆гда̀ пїѧ́хъ, се́рдце моѐ мѧтѧ́шесѧ ра́зѹмомъ, и҆ въ пе́рсехъ мои́хъ возраста́ше премѹ́дрость, и҆́бо дѹ́хъ мо́й содержа́шесѧ па́мѧтїю:

⁴¹и҆ ѿвє́рста бы́ша ѹ҆ста̀ моѧ҄ и҆ не бы́ша затворє́на ктомѹ̀.

⁴²Вы́шнїй дадѐ ра́зѹмъ пѧти́мъ мѹжє́мъ, и҆ писа́ша, ѩ҆̀же глаго́лахѹсѧ ѹ҆́жасы нѡщны́ѧ, и҆́хже не вѣ́дѧхѹ.

⁴³Но́щїю же ѩ҆дѧ́хѹ хлѣ́бъ, а҆́зъ же во днѝ глаго́лахъ и҆ но́щїю не молча́хъ.

⁴⁴И҆ напи҄саны сѹ́ть за четы́редесѧть дні́й кни҄ги двѣ́сти четы́ри.

⁴⁵И҆ бы́сть є҆гда̀ соверши́шасѧ четы́редесѧть дні́й,

⁴⁶гл҃а вы́шнїй, рекі́й: пє́рваѧ, ѩ҆̀же ппса́лъ є҆сѝ, въ ѩ҆́вѣ поста́ви, и҆ да чтѹ́тъ досто́йнїи и҆ недосто́йнїи:

⁴⁷послѣ҄днѧѧ же се́дмьдесѧтъ сохранѝ, да преда́си и҆̀хъ мѹ҄дрымъ ѿ люді́й твои́хъ:

⁴⁸въ тѣ́хъ бо є҆́сть ко́рень ра́зѹма, и҆ премѹ́дрости и҆сто́чникъ, и҆ вѣ́дѣнїѧ рѣка̀. И҆ сотвори́хъ та́кѡ.