Read Библия Церковнославянская г҃ е҆́здры 15 Bible Online

г҃ е҆́здры 15 - Библия Церковнославянская bible

г҃ е҆́здры 15

¹Сѐ, глаго́ли во ѹ҆́шы лю́демъ мои҄мъ словеса̀ про҇ро́чества, ѩ҆̀же да́мъ во ѹ҆ста̀ твоѧ҄, гл҃етъ гд҇ь:

²и҆ сотворѝ, да на хартїѝ напи́шѹтсѧ, ѩ҆́кѡ вѣ҄рна и҆ и҆́стинна сѹ́ть:

³не бо́йсѧ ѿ помышле́нїй на тѧ̀, нижѐ да смѹтѧ́тъ тѧ̀ невѣ́рнѡсти глаго́лющихъ,

⁴поне́же всѧ́къ невѣ́рный въ невѣ́рїи свое́мъ ѹ҆́мретъ.

⁵Сѐ, а҆́зъ наведѹ̀ (речѐ гд҇ь) на крѹ́гъ земны́й ѕла҄ѧ, ме́чь и҆ гла́дъ, и҆ сме́рть и҆ погѹбле́нїе,

⁶поне́же ѡ҆сквернѝ беззако́нїе всю̀ зе́млю, и҆ напо́лнєна сѹ́ть дѣла̀ и҆́хъ врє́днаѧ.

⁷Сегѡ̀ ра́ди речѐ гд҇ь:

⁸ѹ҆жѐ не ѹ҆молчѹ̀ ѡ҆ нече́стїихъ и҆́хъ, ѩ҆̀же беззако́ннѡ содѣ́ловаютъ, ни потерплю̀ и҆̀мъ, ѩ҆̀же ѕлѣ̀ творѧ́тъ: сѐ, кро́вь непови́ннаѧ и҆ пра́веднаѧ вопїе́тъ ко мнѣ̀, и҆ дѹ́ши првдныхъ вопїю́тъ безпреста́ннѡ:

⁹ѿмща́ѧ ѿмщѹ̀ и҆̀мъ, речѐ гд҇ь, и҆ воспрїимѹ̀ всѧ́кѹ кро́вь непови́ннѹю ѿ тѣ́хъ ко мнѣ̀.

¹⁰Сѐ, лю́дїе моѝ ѩ҆́кѡ стада̀ къ заколе́нїю ведѹ́тсѧ, ѹ҆жѐ не потерплю̀ тогѡ̀, є҆́же ѡ҆бита́ти и҆̀мъ въ землѝ є҆гѵ́петстѣй,

¹¹но и҆зведѹ̀ ѧ҆̀ рѹко́ю си́льною и҆ мы́шцею высо́кою, и҆ поражѹ̀ (є҆гѵ́петъ) ка́знїю ѩ҆́коже пре́жде, и҆ растлю̀ всю̀ зе́млю є҆гѡ̀:

¹²воспла́четсѧ є҆гѵ́петъ, и҆ ѡ҆снова҄нїѧ є҆гѡ̀ ка́знїю и҆збїє́на бѹ́дѹтъ и҆ наказа́нїемъ, ѩ҆̀же наведе́тъ є҆мѹ̀ бг҃ъ:

¹³воспла́чѹтъ дѣ́лателє дѣ́лающїи зе́млю, ѩ҆́кѡ ѡ҆скѹдѣ́ютъ сѣ́мена и҆́хъ ѿ ржѝ и҆ гра́да и҆ ѿ ѕвѣзды̀ стра́шныѧ.

¹⁴Го́ре вѣ́кѹ, и҆ и҆̀же ѡ҆бита́ютъ въ не́мъ:

¹⁵поне́же прибли́жисѧ ме́чь и҆ сокрѹше́нїе и҆́хъ, и҆ воста́нетъ ѩ҆зы́къ на ѩ҆зы́къ къ бра́ни, и҆ ме́чь въ рѹка́хъ и҆́хъ.

¹⁶Бѹ́детъ бо непостоѧ́нїе человѣ́кѡмъ, и҆ и҆ні́и и҆ны́хъ ѡ҆долѣва́ющїи вознерадѧ́тъ ѡ҆ царѝ свое́мъ, и҆ нача҄лницы пѹті́й ѡ҆ дѣ́лѣхъ свои́хъ въ могѹ́тствѣ свое́мъ.

¹⁷Восхо́щетъ бо человѣ́къ во гра́дъ и҆тѝ и҆ не возмо́жетъ:

¹⁸горды́ни бо и҆́хъ ра́ди гра́ди смѧтѹ́тсѧ, до́мы сокрѹша́тсѧ, человѣ́цы ѹ҆боѧ́тсѧ.

¹⁹Не ѹ҆милосе́рдитсѧ человѣ́къ ко и҆́скреннемѹ своемѹ̀, на разоре́нїе домѡ́въ и҆́хъ во ѻ҆рѹ́жїе, на расхище́нїе и҆мѣ́нїй и҆́хъ, гла́да ра́ди хлѣ́бнагѡ и҆ ѡ҆скобле́нїѧ мно́га.

²⁰Сѐ, а҆́зъ созыва́ю, речѐ гд҇ь, всѧ҄ цари҄ зє́мскїѧ, є҆́же менє̀ боѧ́тисѧ, и҆̀же сѹ́ть ѿ восто́ка и҆ ю҆́га, ѿ сѣ́вера и҆ лїва́на, ко ѡ҆браще́нїю къ себѣ̀, и҆ возда́ти, ѩ҆̀же возда́ша тѣ҄мъ:

²¹ѩ҆́коже творѧ́тъ да́же до дне́сь и҆збра҄ннымъ мои҄мъ, та́кѡ сотворю̀ и҆ возда́мъ въ нѣ҄дра и҆́хъ. Сїѧ҄ гл҃етъ гд҇ь бг҃ъ:

²²не пощади́тъ десни́ца моѧ̀ грѣ́шникѡвъ, и҆ не преста́нетъ ме́чь на пролива́ющихъ кро́вь непови́ннѹю на землѝ:

²³и҆зы́де ѻ҆́гнь ѿ гнѣ́ва є҆гѡ̀, и҆ пожрѐ ѡ҆снова҄нїѧ землѝ, и҆ грѣ́шники ѩ҆́кѡ хвра́стїе зажже́но.

²⁴Го́ре си҄мъ, и҆̀же согрѣша́ютъ и҆ не содержа́тъ за́повѣдїй мои́хъ, речѐ гд҇ь,

²⁵не прошѹ̀ и҆̀мъ: ѿиди́те, сы́нове, ѿ вла́сти, не ѡ҆сквернѧ́йте ст҃ы́ни моеѧ̀.

²⁶ѩ҆́кѡ вѣ́сть гд҇ь всѣ́хъ, и҆̀же согрѣша́ютъ є҆мѹ̀, сегѡ̀ ра́ди предадѐ и҆̀хъ въ сме́рть и҆ въ заколе́нїе.

²⁷Ѹ҆же́ бо прїидо́ша на крѹ́гъ земны́й ѕла҄ѧ, и҆ пребѹ́дете въ ни́хъ, не и҆зба́витъ бо ва́съ бг҃ъ, поне́же согрѣши́сте пред̾ ни́мъ.

²⁸Сѐ, видѣ́нїе гро́зное, и҆ лицѐ є҆гѡ̀ ѿ восто́ка:

²⁹и҆ и҆зы́дѹтъ рождє́нїѧ ѕмїє́въ а҆ра́вскихъ на колесни́цахъ мно́гихъ: ѩ҆́коже дыха́нїе (вѣ́трѡвъ) число̀ и҆́хъ понесе́тсѧ по землѝ, ѩ҆́кѡ ѹ҆жѐ ѹ҆боѧ́тсѧ и҆ вострепе́щѹтъ всѝ, и҆̀же и҆́хъ ѹ҆слы́шатъ:

³⁰кармѡ́нѧне неи́стовствѹющїи во гнѣ́вѣ и҆зы́дѹтъ ѩ҆́кѡ вє́при ѿ дѹбра́вы и҆ прїи́дѹтъ въ си́лѣ вели́цѣй, и҆ ста́нѹтъ на бра́нь съ ни́ми и҆ ѡ҆пѹстоша́тъ ча́сть землѝ а҆ссѷрі́йскїѧ:

³¹и҆ по си́хъ превозмо́гѹтъ ѕмі́еве по́мнѧщїи рожде́нїе своѐ и҆ ѡ҆братѧ́тсѧ согласѹ́юще въ си́лѣ вели́цѣй на постиза́нїе и҆́хъ:

³²сі́и смѹтѧ́тсѧ, и҆ ѹ҆молча́тъ въ си́лѣ и҆́хъ, и҆ ѡ҆братѧ́тъ но́зѣ своѝ на бѣжа́нїе:

³³и҆ ѿ ѡ҆́бласти а҆ссѷрі́йскїѧ ѡ҆бстоѧ́тель ѡ҆бста́нетъ и҆̀хъ и҆ сконча́етъ є҆ди́наго ѿ ни́хъ, и҆ бѹ́детъ боѧ́знь и҆ стра́хъ въ полцѣ̀ и҆́хъ, и҆ рве́нїе на цари҄ и҆́хъ.

³⁴Сѐ, ѡ҆́блацы ѿ восто́ка и҆ сѣ́вера да́же до полѹ́дне, и҆ лицѐ и҆́хъ гро́зно ѕѣлѡ̀, и҆спо́лнено гнѣ́ва и҆ бѹ́ри:

³⁵и҆ сразѧ́тсѧ междѹ̀ собо́ю и҆ сразѧ́тъ ѕвѣздѹ̀ мно́гѹ на землѝ и҆ ѕвѣздѹ̀ и҆́хъ: и҆ бѹ́детъ кро́вь ѿ меча̀ да́же до ѹ҆тро́бы,

³⁶и҆ гно́й человѣ́ческїй да́же до сѣдла̀ велблю́ждѧ, и҆ бѹ́детъ боѧ́знь и҆ стра́хъ мно́гъ на землѝ,

³⁷и҆ ѹ҆страша́тсѧ, и҆̀же ѹ҆́зрѧтъ гнѣ́въ се́й, и҆ тре́петъ прїи́метъ и҆̀хъ:

³⁸и҆ по се́мъ воздви́гнѹтсѧ бѹ҄ри мнѡ́ги ѿ полѹ́дне и҆ сѣ́вера, и҆ ча́сть и҆́на ѿ за́пада,

³⁹и҆ премо́гѹтъ вѣ́три ѿ восто́ка, и҆ ѡ҆творѧ́тъ є҆го̀, и҆ ѡ҆́блакъ, є҆го́же воздви́же во гнѣ́вѣ, и҆ ѕвѣзда̀ на сотворе́нїе стра́ха ѿ восто́чна вѣ́тра и҆ за́падна повреди́тсѧ:

⁴⁰и҆ воздви́гнѹтсѧ ѡ҆́блацы ве́лїи и҆ ѕѣ́лнїи, по́лни гнѣ́ва, и҆ ѕвѣзда̀, да ѹ҆страша́тъ всю̀ зе́млю и҆ ѡ҆бита́ющихъ на не́й, и҆ возлїю́тъ на всѧ́ко мѣ́сто высо́ко и҆ вознесе́ное ѕвѣздѹ̀ стра́шнѹю,

⁴¹ѻ҆́гнь и҆ гра́дъ, и҆ мечы̀ лета́ющыѧ и҆ во́ды мнѡ́ги, ѩ҆́кѡ да напо́лнѧтсѧ всѧ҄ полѧ̀ и҆ всѝ и҆сто́чницы и҆сполне́нїемъ во́дъ мно́гихъ:

⁴²и҆ сокрѹша́тъ гра́ды и҆ стѣ́ны, и҆ го́ры и҆ хо́лмы, (и҆ ѹ҆дѡ́лїѧ) и҆ древа̀ дѹбра҄внаѧ, и҆ сѣ҄на лѹ҄жнаѧ и҆ жи҄та и҆́хъ,

⁴³и҆ про́йдѹтъ непоколе́блеми до вавѷлѡ́на и҆ сокрѹша́тъ є҆го̀:

⁴⁴соберѹ́тсѧ къ немѹ̀, и҆ ѡ҆бы́дѹтъ є҆го̀, и҆ и҆злїю́тъ ѕвѣздѹ̀ и҆ всю̀ ѩ҆́рость на́нь: и҆ взы́детъ пра́хъ и҆ ды́мъ да́же до небесѐ, и҆ всѝ, и҆̀же ѡ҆́крестъ, возрыда́ютъ ѡ҆ не́мъ,

⁴⁵и҆ и҆̀же под̾ ни́мъ ѡ҆ста́нѹтъ, послѹ́жатъ тѣ҄мъ, и҆̀же ѹ҆страши́ша и҆̀хъ.

⁴⁶И҆ ты̀, а҆сі́е, согла́сна во ѹ҆пова́нїе вавѷлѡ́на, и҆ сла́ва лица̀ є҆гѡ̀:

⁴⁷го́ре тебѣ̀ бѣ́днѣй! поне́же ѹ҆подо́биласѧ є҆сѝ є҆мѹ̀ и҆ ѹ҆краси́ла є҆сѝ дщє́ри твоѧ҄ въ любодѣѧ́нїи, ко ѹ҆гожде́нїю и҆ прославле́нїю въ любо́вныхъ твои́хъ, и҆̀же съ тобо́ю похотѣ́ша всегда̀ блѹди́ти:

⁴⁸ненави́дѣнномѹ подража́ла є҆сѝ во всѣ́хъ дѣ́лѣхъ є҆гѡ̀ и҆ въ начина́нїихъ є҆гѡ̀.

⁴⁹Сегѡ̀ ра́ди, речѐ гд҇ь, послю̀ на тѧ̀ ѕла҄ѧ, вдовство̀, ѹ҆бо́жество и҆ гла́дъ, и҆ ме́чь и҆ гѹби́телство на разоре́нїе домѡ́въ твои́хъ ѿ наси́лїѧ и҆ сме́рти,

⁵⁰и҆ сла́ва си́лы твоеѧ̀ ѩ҆́коже цвѣ́тъ и҆́зсхнетъ, є҆гда̀ воста́нетъ зно́й, и҆́же по́сланъ є҆́сть на тѧ̀:

⁵¹и҆знемо́жеши ѩ҆́коже ѹ҆бо́жайшаѧ ѩ҆́звена и҆ нака́зана ѿ же́нъ, ѩ҆́кѡ не возмо́гѹтъ тебѐ прїѧ́ти си́льнїи и҆ любѡ́вницы.

⁵²Є҆да̀ а҆́зъ та́кѡ возревнѹ́ю тебѣ̀, речѐ гд҇ь,

⁵³а҆́ще бы не закла́ла є҆сѝ и҆збра́нныхъ мои́хъ во всѧ́ко вре́мѧ, возвыша́ющи на пораже́нїе рѹ́цѣ и҆ глаго́лющи на сме́рть и҆́хъ, є҆гда̀ ѹ҆пива́ласѧ є҆сѝ;

⁵⁴ѹ҆красѝ лѣ́потѹ лица̀ твоегѡ̀:

⁵⁵мзда̀ блѹже́нїѧ твоегѡ̀ въ нѣ́дрѣхъ твои́хъ, сегѡ̀ ра́ди воздаѧ́нїе прїи́меши.

⁵⁶ѩ҆́коже сотвори́ши и҆збра҄ннымъ мои҄мъ, речѐ гд҇ь, та́кѡ сотвори́тъ тебѣ̀ бг҃ъ и҆ преда́стъ тѧ̀ во ѕла҄ѧ:

⁵⁷и҆ ча҄да твоѧ҄ гла́домъ поги́бнѹтъ, ты́ же мече́мъ паде́ши, и҆ гра́ди твоѝ сокрѹша́тсѧ, и҆ всѝ твоѝ въ по́ли ѻ҆рѹ́жїемъ падѹ́тъ:

⁵⁸и҆ и҆̀же сѹ́ть въ гора́хъ, гла́домъ поги́бнѹтъ и҆ ѩ҆́сти бѹ́дѹтъ мѧса̀ своѧ҄ ѿ гла́да хлѣ́ба и҆ кро́вь пи́ти ѿ жа́жды воды̀:

⁵⁹неблагополѹ́чна чрез̾ морѧ̀ прїи́деши и҆ па́ки прїи́меши ѕла҄ѧ,

⁶⁰и҆ въ прехожде́нїи поразѧ́тъ гра́дъ и҆збїе́нный, и҆ и҆скоренѧ́тъ нѣ́кѹю ча́сть землѝ твоеѧ̀, и҆ ча́сть сла́вы твоеѧ̀ и҆стребѧ́тъ, па́ки возвраща́ющесѧ къ вавѷлѡ́нѹ превраще́нномѹ:

⁶¹и҆ разоре́на бѹ́деши и҆̀мъ ѩ҆́кѡ хвра́стїе, и҆ ті́и бѹ́дѹтъ тебѣ̀ а҆́ки ѻ҆́гнь,

⁶²и҆ пожрѹ́тъ тѧ̀ и҆ гра́ды твоѧ҄, зе́млю твою̀ и҆ го́ры твоѧ҄, и҆ всѧ҄ дѹбра҄вы твоѧ҄ и҆ древеса̀ плодонѡ́снаѧ ѻ҆гне́мъ пожгѹ́тъ,

⁶³сы́ны твоѧ҄ въ плѣне́нїе поведѹ́тъ, и҆ да҄ни твоѧ҄ въ коры́сть во́змѹтъ, и҆ сла́вѹ лица̀ твоегѡ̀ и҆стребѧ́тъ.