Read Библия Церковнославянская г҃ е҆́здры 16 Bible Online

г҃ е҆́здры 16 - Библия Церковнославянская bible

г҃ е҆́здры 16

¹Го́ре тебѣ̀, вавѷлѡ́не и҆ а҆сі́а! го́ре тебѣ̀, є҆гѵ́пте и҆ сѷрі́а!

²Препоѧ́шитесѧ вре́тищемъ и҆ власѧни́цами и҆ пла́чите сынѡ́въ ва́шихъ и҆ болѣ́знѹйте, ѩ҆́кѡ прибли́жисѧ сокрѹше́нїе ва́ше:

³по́сланъ є҆́сть на ва́съ ме́чь, и҆ кто́ є҆сть, и҆́же ѿврати́тъ є҆го̀;

⁴по́сланъ є҆́сть на ва́съ ѻ҆́гнь, и҆ кто́ є҆сть, и҆́же ѹ҆гаси́тъ є҆го̀;

⁵пѡ́слана сѹ́ть на ва́съ ѕла҄ѧ, и҆ кто́ є҆сть, и҆́же ѿме́тнетъ ѧ҆̀;

⁶є҆да̀ ѿжене́тъ кто̀ льва̀ а҆́лчѹща въ лѣ́съ; и҆лѝ ѹ҆гаси́тъ ѻ҆́гнь во хвра́стїи ско́рѡ, є҆гда̀ начне́тъ возгара́ти;

⁷є҆да̀ ѿрази́тъ кто̀ стрѣлѹ̀ ѿ стрѣлца̀ крѣ́пкагѡ и҆спѹще́ннѹю;

⁸гд҇ь крѣ́пкїй посыла́етъ ѕла҄ѧ, и҆ кто̀ є҆́сть, и҆́же ѿжене́тъ ѧ҆̀;

⁹и҆зы́де ѻ҆́гнь ѿ гнѣ́ва є҆гѡ̀, и҆ кто́ є҆сть, и҆́же ѹ҆гаси́тъ є҆го̀;

¹⁰блесне́тъ мо́лнїею, и҆ кто̀ не ѹ҆бои́тсѧ; возгреми́тъ, и҆ кто̀ не ѹ҆жа́снетсѧ;

¹¹гд҇ь воспрети́тъ, и҆ кто̀ до ѡ҆снова́нїѧ не сокрѹши́тсѧ ѿ лица̀ є҆гѡ̀;

¹²Землѧ̀ сотрѧсе́сѧ и҆ ѡ҆снова҄нїѧ є҆ѧ̀, мо́ре волнѹ́етсѧ и҆з̾ глѹбины̀, и҆ вѡ́лны є҆гѡ̀ возмѹтѧ́тсѧ и҆ ры҄бы є҆гѡ̀ ѿ лица̀ гд҇нѧ и҆ ѿ сла́вы си́лы є҆гѡ̀.

¹³Поне́же крѣпка̀ десни́ца є҆гѡ̀, ѩ҆́же лѹ́къ напрѧжѐ: стрѣ́лы є҆гѡ̀ ѻ҆стры҄, ѩ҆̀же ѿ негѡ̀ посыла́ютсѧ, не ѡ҆скѹдѣ́ютъ, є҆гда̀ начнѹ́тъ посыла́тисѧ въ концы҄ землѝ.

¹⁴Сѐ, посыла́ютсѧ ѕла҄ѧ и҆ не возвратѧ́тсѧ, до́ндеже прїи́дѹтъ на зе́млю.

¹⁵Ѻ҆́гнь возгара́етсѧ и҆ не ѹ҆га́снетъ, до́ндеже сконча́етъ ѡ҆снова҄нїѧ землѝ.

¹⁶И҆́мже ѡ҆́бразомъ не возвраща́етсѧ стрѣла̀ по́слана ѿ си́льнагѡ стрѣлца̀, та́кѡ не возвратѧ́тсѧ ѕла҄ѧ, ѩ҆̀же пѡ́слана бѹ́дѹтъ на зе́млю.

¹⁷Го́ре мнѣ̀, го́ре мнѣ̀! кто́ мѧ и҆зба́витъ во дни҄ ты҄ѧ;

¹⁸Нача́ло болѣ́зней, и҆ мнѡ́га стена҄нїѧ: нача́ло гла́да, и҆ мнѡ́ги поги́бєли: нача́ло бра́ней, и҆ ѹ҆боѧ́тсѧ вла҄сти: нача́ло ѕѡ́лъ, и҆ вострепе́щѹтъ всѝ.

¹⁹Во вре́мѧ же то̀ что̀ сотворю̀, є҆гда̀ прїи́дѹтъ ѕла҄ѧ;

²⁰Сѐ, гла́дъ и҆ ка́знь, и҆ ско́рбь и҆ тѣснота̀, по́слани сѹ́ть бичи҄ во и҆справле́нїе:

²¹и҆ во всѣ́хъ си́хъ не ѡ҆братѧ́тсѧ ѿ беззако́нїй свои́хъ, ни бїє́нїѧ па́мѧтствовати бѹ́дѹтъ всегда̀.

²²Сѐ, бѹ́детъ ѻ҆би́лїе ни во что́же на землѝ, та́кѡ ѩ҆́кѡ возмнѧ́тъ себѣ̀ бы́ти ѹ҆пра́вленъ ми́ръ, и҆ тогда̀ возрастѹ́тъ ѕла҄ѧ на землѝ, ме́чь, гла́дъ и҆ вели́ко смѧте́нїе.

²³Ѿ гла́да бо мно́зи, и҆̀же ѡ҆бита́ютъ на землѝ, поги́бнѹтъ, и҆ ме́чь и҆згѹби́тъ про́чихъ, и҆̀же ѡ҆ста́нѹтъ ѿ гла́да.

²⁴И҆ ме́ртвїи ѩ҆́кѡ моты҄ла и҆зве́ржени бѹ́дѹтъ, и҆ не бѹ́детъ, и҆́же ѹ҆тѣ́шитъ и҆̀хъ: ѡ҆пѹстѣ́етъ бо землѧ̀, и҆ гра́ди є҆ѧ̀ разоре́ни бѹ́дѹтъ.

²⁵Не ѡ҆ста́нетсѧ, и҆́же воздѣ́лаетъ зе́млю и҆ и҆́же посѣ́етъ на не́й.

²⁶Древеса̀ дадѹ́тъ плоды̀, и҆ кто̀ ѡ҆б̾и́метъ ѧ҆̀;

²⁷гро́здїе созрѣ́етъ, и҆ кто̀ пото́пчетъ є҆̀; бѹ́детъ бо мѣ́стъ вели́кое ѡ҆пѹстѣ́нїе.

²⁸Восхо́щетъ бо человѣ́къ человѣ́ка ви́дѣти, и҆лѝ гла́съ є҆гѡ̀ слы́шати,

²⁹занѐ ѡ҆ста́нѹтъ ѿ гра́да де́сѧть, и҆ два̀ ѿ ни́вы, и҆̀же сокры́ютсѧ въ гѹсты́хъ дѹбра́вахъ и҆ въ разсѣ́линахъ ка́менныхъ.

³⁰И҆́мже ѡ҆́бразомъ ѡ҆ставлѧ́ютсѧ въ ма́сличїихъ и҆ на всѧ́цѣмъ дре́вѣ трѝ и҆лѝ четы́ри ма҄слины,

³¹и҆лѝ ѩ҆́коже въ вїногра́дѣ ѡ҆бра́нѣмъ гро́здїе ѡ҆ставлѧ́ютсѧ ѿ тѣ́хъ, и҆̀же прилѣ́жнѡ вїногра́дъ ѡ҆бира́ютъ:

³²та́кѡ ѡ҆ста́вѧтсѧ во дне́хъ ѻ҆́нѣхъ трѝ и҆лѝ четы́ри ѿ и҆зслѣ́дѹющихъ до́мы и҆́хъ мече́мъ.

³³И҆ ѡ҆ста́влена бѹ́детъ землѧ̀ пѹста̀, и҆ ни҄вы є҆ѧ̀ состарѣ́ютсѧ, и҆ пѹтїѐ є҆ѧ̀ и҆ всѧ҄ стєзѝ є҆ѧ̀ те́рнїемъ зарастѹ́тъ, занѐ не про́йдѹтъ человѣ́цы по ни҄мъ.

³⁴Воспла́чѹтъ дѣ҄вы не и҆мѹ́щыѧ ѡ҆брѹ́чникѡвъ, воспла́чѹтъ жє́ны не и҆мѣ́ющыѧ мѹже́й, воспла́чѹтъ дщє́ри и҆́хъ не и҆мѣ́ющыѧ по́мощи:

³⁵ѡ҆брѹ҄чницы и҆́хъ въ бра́ни сконча́ютсѧ, и҆ мѹ́жїе и҆́хъ во гла́дѣ и҆стребѧ́тсѧ.

³⁶Слы́шите сїѧ҄ и҆ позна́йте ѧ҆̀, рабѝ гд҇ни.

³⁷Сѐ, сло́во гд҇не, прїими́те є҆̀: не вѣ́рѹйте богѡ́мъ, ѡ҆ ни́хже речѐ гд҇ь:

³⁸сѐ, приближа́ютсѧ ѕла҄ѧ и҆ не ѹ҆ме́длѧтъ.

³⁹И҆́мже ѡ҆́бразомъ бремена́таѧ є҆гда̀ роди́тъ въ девѧ́тый мц҇ъ сы́на своего̀, приближа́ющѹсѧ часѹ̀ рожде́нїѧ є҆ѧ̀, пре́жде часѡ́въ двѹ́хъ и҆лѝ трїе́хъ бѡлѣ́зни ѡ҆бдержа́тъ чре́во є҆ѧ̀, и҆ и҆сходѧ́щѹ младе́нцѹ ѿ чре́ва, не закоснѧ́тъ ни на є҆ди́нѹ чертѹ̀:

⁴⁰та́кѡ не ѹ҆коснѧ́тъ ѕла҄ѧ произы́ти на зе́млю, и҆ вѣ́къ возстене́тъ, и҆ бѡлѣ́зни ѡ҆бы́мѹтъ и҆̀.

⁴¹Слы́шите сло́во, лю́дїе моѝ, ѹ҆гото́вайтесѧ на бра́нь, и҆ во ѕлы́хъ та́кѡ бѹ́дите, ѩ҆́коже прише́лцы землѝ:

⁴²продаѧ́й а҆́ки бѣ́гаѧй, а҆ кѹпѹ́ѧй а҆́ки погѹблѧ́ѧй,

⁴³торгѹ́ѧй а҆́ки плода̀ не прїе́млѧй, и҆ созида́ѧй а҆́ки то́й, и҆́же ѡ҆бита́ти не и҆́мать:

⁴⁴сѣ́ѧй, ѩ҆́кѡ и҆́же не по́жнетъ: та́кѡ и҆́же вїногра́дъ рѣ́жетъ, ѩ҆́кѡ не и҆мы́й ѡ҆бира́ти є҆го̀:

⁴⁵и҆̀же посѧга́ютъ, та́кѡ а҆́ки ча҄дъ не сотворѧ́тъ: и҆ и҆̀же не посѧга́ютъ, та́кѡ ѩ҆́кѡ вдѡви́цы.

⁴⁶Тогѡ̀ ра́ди, и҆̀же трѹдѧ́тсѧ, вотщѐ трѹдѧ́тсѧ:

⁴⁷плоды́ бо и҆́хъ и҆ноплемє́нницы по́жнѹтъ и҆ и҆мѣ҄нїѧ и҆́хъ расхи́тѧтъ, и҆ до́мы превратѧ́тъ и҆ сынѡ́въ и҆́хъ плѣнѧ́тъ, и҆́бо во плѣне́нїи и҆ гла́дѣ родѧ́тъ ча҄да своѧ҄.

⁴⁸И҆ и҆̀же кѹ́плю дѣ́ютъ хїще́нїемъ, ко́ль до́лгѡ ѹ҆краша́ютъ гра́ды и҆ до́мы своѧ҄, и҆ ѡ҆держа҄нїѧ и҆ ли́ца своѧ҄,

⁴⁹толи́кѡ па́че возненави́ждѹ и҆̀хъ за грѣхѝ и҆́хъ, речѐ гд҇ь.

⁵⁰ѩ҆́коже ненави́дитъ блѹдни́ца женѹ̀ мѹ́дрѹ и҆ добрѹ̀ ѕѣлѡ̀,

⁵¹та́кѡ возненави́дитъ пра́вда непра́вдѹ, є҆гда̀ ѹ҆краша́етсѧ, и҆ клеве́щетъ на ню̀ въ лицѐ, є҆гда̀ прїи́детъ и҆́же защища́етъ и҆зыскѹ́ющаго всѧ́къ грѣ́хъ на землѝ:

⁵²сегѡ̀ ра́ди не ѹ҆подоблѧ́йтесѧ є҆́й, ни дѣлѡ́мъ є҆ѧ̀.

⁵³ѩ҆́кѡ є҆щѐ ма́лѡ, и҆ во́зметсѧ беззако́нїе ѿ землѝ, а҆ пра́вда воцари́тсѧ над̾ ва́ми.

⁵⁴Да не глаго́летъ грѣ́шникъ, ѩ҆́кѡ не согрѣшѝ, поне́же ѹ҆́глїе ѻ҆́гненное возгори́тсѧ на главѣ̀ є҆гѡ̀, и҆́же глаго́летъ: не согрѣши́хъ пред̾ гд҇емъ бг҃омъ и҆ сла́вою є҆гѡ̀.

⁵⁵Сѐ, гд҇ь вѣ́сть всѧ҄ дѣла̀ человѣ́чєскаѧ и҆ начина҄нїѧ и҆́хъ, и҆ помышлє́нїѧ и҆́хъ и҆ сердца̀ и҆́хъ.

⁵⁶Рече́ бо: да бѹ́детъ землѧ̀, и҆ бы́сть: да бѹ́детъ не́бо, и҆ бы́сть.

⁵⁷И҆ сло́вомъ є҆гѡ̀ ѕвѣ́зды сотворє́ны сѹ́ть, и҆ зна́етъ число̀ ѕвѣ́здъ:

⁵⁸и҆́же и҆спытѹ́етъ бє́здны и҆ сокрѡ́вища и҆́хъ, и҆́же и҆змѣ́рилъ є҆́сть мо́ре и҆ зача́тїе є҆гѡ̀,

⁵⁹и҆́же заключѝ мо́ре посредѣ̀ во́дъ и҆ повѣ́си зе́млю на вода́хъ сло́вомъ свои́мъ,

⁶⁰и҆́же прострѐ не́бо ѩ҆́кѡ кама́рѹ, на вода́хъ ѡ҆снова̀ є҆̀,

⁶¹и҆́же положѝ въ пѹсты́ни и҆сто́чники вѡдны́ѧ и҆ на верхѹ̀ го́ръ є҆зе́ра, во и҆спѹще́нїе рѣ́къ и҆з̾ высо́кагѡ ка́мене, да напаѧ́ютъ зе́млю,

⁶²и҆́же сотворѝ человѣ́ка и҆ положѝ се́рдце є҆гѡ̀ посредѣ̀ тѣ́ла, и҆ вложѝ є҆мѹ̀ дѹ́хъ и҆ живо́тъ и҆ ра́зѹмъ

⁶³и҆ дыха́нїе бг҃а вседержи́телѧ, и҆́же сотворѝ всѧ҄ и҆ и҆спытѹ́етъ всѧ҄ сокровє́ннаѧ въ сокрове́нныхъ землѝ:

⁶⁴то́й зна́етъ начина́нїе ва́ше, и҆ ѩ҆̀же мы́слите въ сердца́хъ ва́шихъ согрѣша́юще и҆ хотѧ́ще ѹ҆таи́ти грѣхѝ ва́шѧ.

⁶⁵Сегѡ̀ ра́ди гд҇ь и҆спытѹ́ѧй и҆спыта̀ всѧ҄ дѣла̀ ва҄ша и҆ ѡ҆бличи́тъ ва́съ всѣ́хъ,

⁶⁶и҆ вы̀ посра́млени бѹ́дете, є҆гда̀ произы́дѹтъ грѣсѝ ва́ши пред̾ челѡвѣ́ки, и҆ беззакѡ́нїѧ предста́нѹтъ, ѩ҆̀же ѡ҆бвинѧ́ти бѹ́дѹтъ въ де́нь то́й.

⁶⁷Что̀ сотворитѐ, и҆лѝ ка́кѡ сокры́ете грѣхѝ ва́шѧ пред̾ бг҃омъ и҆ а҆́гг҃лы є҆гѡ̀;

⁶⁸Сѐ, сѹдїѧ̀ бг҃ъ, бо́йтесѧ є҆гѡ̀, ѡ҆ста́нитесѧ ѿ грѣ҄хъ ва́шихъ и҆ забѹ́дите беззакѡ́нїѧ ва҄ша ѹ҆жѐ твори́ти и҆̀хъ во вѣ́къ, и҆ бг҃ъ и҆зведе́тъ ва́съ и҆ и҆зба́витъ ѿ всѧ́кїѧ ско́рби.

⁶⁹Се́ бо, возгара́етсѧ ѻ҆́гнь на ва́съ, ѩ҆зы́цы мно́зи, и҆ восхи́тѧтъ нѣ́кїихъ ѿ ва́съ и҆ зако́лютъ на же́ртвѹ їдѡлѡмъ:

⁷⁰и҆ и҆̀же соизво́лѧтъ и҆̀мъ, бѹ́дѹтъ и҆̀мъ въ посмѣ́хъ и҆ въ поноше́нїе и҆ въ попра́нїе.

⁷¹Бѹ́детъ бо мѣстѡ́мъ мѣ́сто, и҆ ѿ сосѣ́днихъ градѡ́въ воста́нѹтъ мно́зи на боѧ́щихсѧ гд҇а.

⁷²Бѹ́дѹтъ а҆́ки неи́стови, ни кого́же щадѧ́ще на расхище́нїе и҆ запѹстѣ́нїе є҆щѐ боѧ́щымсѧ гд҇а:

⁷³и҆́бо ѡ҆пѹстоша́тъ и҆ расхи́тѧтъ стѧжа҄нїѧ и҆́хъ и҆ и҆з̾ домѡ́въ и҆́хъ и҆зженѹ́тъ ѧ҆̀.

⁷⁴Тогда̀ ѩ҆ви́тсѧ и҆скѹше́нїе и҆збра́нныхъ мои́хъ, ѩ҆́коже зла́то, є҆́же и҆скѹша́етсѧ ѿ ѻ҆гнѧ̀.

⁷⁵Слы́шите, возлю́бленнїи моѝ, речѐ гд҇ь: сѐ, пред̾ ва́ми сѹ́ть дні́е ско́рби, и҆ ѿ си́хъ и҆зба́влю ва́съ.

⁷⁶Не бо́йтесѧ, ни сѹмнѣва́йтесѧ, ѩ҆́кѡ бг҃ъ предводи́тель ва́шъ є҆́сть.

⁷⁷И҆ и҆́же храни́тъ за́пѡвѣди и҆ повелѣ҄нїѧ моѧ҄, речѐ гд҇ь бг҃ъ, да не преѡтѧгча́тъ ва́съ грѣсѝ ва́ши, нижѐ превзы́дѹтъ беззакѡ́нїѧ ва҄ша.

⁷⁸Го́ре и҆̀же стиснѧ́ютсѧ ѿ грѣ҄хъ свои́хъ и҆ покрыва́ютсѧ беззакѡ́нїи свои́ми:

⁷⁹и҆́мже ѡ҆́бразомъ ни́ва стиснѧ́етсѧ ѿ дѹбра́вы, и҆ те́рнїемъ покрыва́етсѧ стезѧ̀ є҆ѧ̀, є҆́юже не прохо́дитъ человѣ́къ, и҆ и҆сторга́етсѧ, и҆ посыла́етсѧ на сожже́нїе ѻ҆гню̀.