Read Библия Церковнославянская г҃ е҆́здры 2 Bible Online

г҃ е҆́здры 2 - Библия Церковнославянская bible

г҃ е҆́здры 2

¹Сїѧ҄ гл҃етъ гд҇ь: а҆́зъ и҆зведо́хъ лю́ди сїѧ҄ и҆з̾ рабо́ты, и҆̀мже повелѣ҄нїѧ да́хъ рабы҄ мои́ми про҇рѡ́ки, и҆̀хже слѹ́шати не восхотѣ́ша, но ѿверго́ша моѧ҄ совѣ́ты.

²Ма́ти, ѩ҆́же и҆̀хъ родѝ, глаго́летъ и҆̀мъ: и҆ди́те, сы́нове, поне́же а҆́зъ вдови́ца є҆́смь и҆ ѡ҆ста́влена,

³воспита́хъ вы̀ съ ра́достїю и҆ лиши́хсѧ ва́съ со пла́чемъ и҆ ско́рбїю, ѩ҆́кѡ согрѣши́сте пред̾ гд҇емъ бг҃омъ ва́шимъ, и҆ є҆́же лѹка́вое є҆́сть пред̾ ни́мъ, сотвори́сте:

⁴нн҃ѣ же что̀ сотворю̀ ва́мъ; а҆́зъ вдова̀ є҆́смь и҆ ѡ҆ста́влена: и҆ди́те, сы́нове, и҆ проси́те ѿ гд҇а мл҇ти.

⁵А҆́зъ же тебѐ, ѻ҆́ч҃е, свидѣ́телѧ призыва́ю на ма́терь сынѡ́въ, и҆̀же не восхотѣ́ша завѣ́та моегѡ̀ храни́ти:

⁶да да́си и҆̀мъ посрамле́нїе и҆ ма́терь и҆́хъ на расхище́нїе, да ро́да и҆́хъ не бѹ́детъ,

⁷да расточа́тсѧ во ѩ҆зы́ки и҆мена̀ и҆́хъ, да и҆згла́дѧтсѧ ѿ землѝ, занѐ презрѣ́ша завѣ́тъ мо́й.

⁸Го́ре тебѣ̀, а҆ссѹ́ръ, и҆́же сокрыва́еши непра́вєдныѧ ѹ҆ себє̀. Ро́де лѹка́вый, воспомѧнѝ, что̀ сотвори́хъ содо́мѹ и҆ гомо́ррѣ,

⁹и҆́хже землѧ̀ лежи́тъ въ жѹ́пелнѣй грѹ́дѣ и҆ въ хо́лмѣхъ пе́пелныхъ: та́кѡ да́мъ тѣ́хъ, и҆̀же мѧ̀ не слѹ́шаша, гл҃етъ гд҇ь вседержи́тель.

¹⁰Сїѧ҄ гл҃етъ гд҇ь ко є҆́здрѣ: возвѣстѝ лю́демъ мои҄мъ, ѩ҆́кѡ да́мъ и҆̀мъ ца́рство ї҆ер҇ли́мское, є҆́же да́ти и҆мѣ́хъ ї҆и҃лю,

¹¹и҆ возмѹ̀ мнѣ̀ сла́вѹ и҆́хъ и҆ да́мъ и҆̀мъ селє́нїѧ вѣ҄чнаѧ, ѩ҆̀же пред̾ѹгото́вахъ и҆̀мъ:

¹²дре́во жи́зни бѹ́детъ и҆̀мъ въ благово́нїе ма́сти, и҆ не и҆́мѹтъ трѹжда́тисѧ, нижѐ ѹ҆трѹдѧ́тсѧ.

¹³И҆ди́те и҆ прїими́те, проси́те себѣ̀ дні́й ма́лыхъ, да закоснѧ́тъ: ѹ҆жѐ гото́во є҆́сть ва́мъ ца́рство, бди́те.

¹⁴Засвидѣ́телствѹй нб҃омъ и҆ земле́ю: сотро́хъ бо ѕло́е и҆ сотвори́хъ бл҃го́е, ѩ҆́кѡ живѹ̀ а҆́зъ, гл҃етъ гд҇ь.

¹⁵Ма́ти, ѡ҆б̾имѝ сы́ны твоѧ҄, воспита́й и҆̀хъ со весе́лїемъ, ѩ҆́кѡ голѹби́ца ѹ҆твердѝ но́зѣ и҆́хъ, занѐ тебѐ и҆збра́хъ, гл҃етъ гд҇ь.

¹⁶И҆ воскр҃шѹ̀ мє́ртвыѧ ѿ мѣ́стъ свои́хъ и҆ и҆з̾ гробѡ́въ и҆зведѹ̀ и҆̀хъ: позна́хъ бо и҆́мѧ моѐ во ї҆и҃ли.

¹⁷Не бо́йсѧ, ма́ти сынѡ́въ, занѐ тебѐ и҆збра́хъ, гл҃етъ гд҇ь.

¹⁸Послю̀ тебѣ̀ по́мощь ѻ҆́троки моѧ҄, и҆са́їю и҆ ї҆еремі́ю, по и҆́хже совѣ́тѹ ѡ҆ст҃и́хъ и҆ ѹ҆гото́вахъ тебѣ̀ древе́съ двана́десѧть ѡ҆тѧгче́ныхъ разли́чными плѡ́ды,

¹⁹и҆ толи́кожде и҆сто́чникѡвъ текѹ́щихъ млеко́мъ и҆ ме́домъ, и҆ го́ръ превысо́кихъ се́дмь и҆мѣ́ющихъ ши́покъ и҆ крі́нъ, на ни́хже весе́лїемъ и҆спо́лню сы́ны твоѧ҄.

²⁰Вдовѹ̀ ѡ҆правда́й, си́рѹ сѹдѝ, ни́щемѹ да́й, сиротѹ̀ защитѝ, нага́го ѡ҆дѣ́й,

²¹ѡ҆ сокрѹше́ннѣмъ и҆ немощнѣ́мъ попецы́сѧ, хромо́мѹ не посмѣ́йсѧ, защитѝ безрѹ́каго, а҆ слѣпа́го къ видѣ́нїю свѣ́та моегѡ̀ припѹстѝ:

²²ста́раго и҆ млада́го междѹ̀ стѣна́ми твои́ми сокры́й:

²³мє́ртвыѧ и҆дѣ́же ѡ҆брѧ́щеши, назна́менавъ ѿда́й гро́бѹ, и҆ да́мъ тебѣ̀ пе́рвое сѣдѣ́нїе въ воскр҇нїе моѐ.

²⁴И҆ ѹ҆тиши́тесѧ и҆ препоко́йтесѧ, лю́дїе моѝ, занѐ прїи́детъ поко́й ва́шъ.

²⁵Корми́лице блага́ѧ, кормѝ сы́ны твоѧ҄, ѹ҆твержда́й но́зѣ и҆́хъ.

²⁶Рабѡ́въ, и҆̀хже тебѣ̀ да́хъ, ни є҆ди́нъ ѿ ни́хъ поги́бнетъ, и҆̀хъ бо а҆́зъ взыщѹ̀ ѿ числа̀ твоегѡ̀.

²⁷Не и҆знемога́й: є҆гда́ бо прїи́детъ де́нь печа́ли и҆ тѣсноты̀, и҆ні́и воспла́чѹтсѧ и҆ печа́льни бѹ́дѹтъ, ты́ же ра́достна и҆ ѻ҆би́лна бѹ́деши.

²⁸Поревнѹ́ютъ (тебѣ̀) ѩ҆зы́цы и҆ ничто́же проти́вѹ тебє̀ возмо́гѹтъ, гл҃етъ гд҇ь.

²⁹Рѹ́цѣ моѝ покры́ютъ тѧ̀, да сы́нове твоѝ гее́нны не ѹ҆́зрѧтъ.

³⁰Ѹ҆тѣша́йсѧ, ма́ти, съ сы҄ны твои́ми, занѐ а҆́зъ тѧ̀ и҆зба́влю, гл҃етъ гд҇ь.

³¹Воспомѧнѝ ча҄да твоѧ҄ спѧ́щыѧ, поне́же а҆́зъ и҆зведѹ̀ и҆̀хъ и҆з̾ бокѡ́въ землѝ и҆ мл҇ть съ ни́ми сотворю̀: мл҇тивъ бо є҆́смь, гл҃етъ гд҇ь вседержи́тель.

³²Ѡ҆б̾имѝ ча҄да твоѧ҄, до́ндеже а҆́зъ прїидѹ̀ и҆ сотворю̀ и҆̀мъ мл҇рдїе: и҆сто́чницы бо моѝ и҆з̾ѡби́лѹютъ и҆ блгдть моѧ̀ не ѡ҆скѹдѣ́етъ.

³³А҆́зъ є҆́здра взѧ́хъ повелѣ́нїе ѿ гд҇а на горѣ̀ ѡ҆ри́въ, да и҆дѹ̀ ко ї҆и҃лю, къ ни҄мже є҆гда̀ прїидо́хъ, ѿри́нѹша мѧ̀ и҆ ѹ҆ничижи́ша за́повѣдь гд҇ню.

³⁴И҆ сегѡ̀ ра́ди ва́мъ глаго́лю, ѩ҆зы́цы, и҆̀же слы́шите и҆ разѹмѣ́ете: жди́те па́стырѧ ва́шего, и҆́же да́стъ ва́мъ поко́й вѣ́чный: поне́же ѻ҆́нъ ѹ҆жѐ бли́з̾ є҆́сть и҆ и҆́мать прїитѝ во сконча́нїи вѣка.

³⁵Бѹ́дите гото́ви къ воздаѧ́нїємъ цр҇твїѧ, свѣ́тъ бо вѣ́чный возсїѧ́етъ на вы̀ во вѣ́ки:

³⁶бѣжи́те сѣ́ни вѣ́ка сегѡ̀, прїими́те наслажде́нїе сла́вы ва́шеѧ, а҆́зъ ѩ҆́вѣ свидѣ́телствѹю сп҃си́телемъ мои́мъ.

³⁷Ввѣ́ренный да́ръ прїими́те и҆ весели́тесѧ, благодарѧ́ще призва́вшаго вы̀ въ цр҇тво нб҇ное.

³⁸Воста́ните и҆ сто́йте, и҆ смотрѧ́йте число̀ зна́менаныхъ на пирѹ̀ гд҇немъ,

³⁹и҆̀же пресели́шасѧ ѿ сѣ́ни вѣ́ка сегѡ̀, воспрїѧ́ша свѣ҄тлаѧ ѡ҆дѣѧ҄нїѧ ѿ гд҇а.

⁴⁰Воспрїимѝ число̀ твоѐ, сїѡ́не, и҆ заключѝ ѡ҆дѣ́ѧнныхъ твои́хъ въ бѣ҄лаѧ, и҆̀же и҆спо́лниша зако́нъ гд҇ень.

⁴¹И҆спо́лнено є҆́сть число̀ ча҄дъ твои́хъ, и҆̀хже жела́лъ є҆сѝ: молѝ цр҇тва гд҇нѧ, да бѹ́дѹтъ ѡ҆свѧще́ни лю́дїе твоѝ, призва́ннїи и҆з̾ нача́ла.

⁴²А҆́зъ є҆́здра ви́дѣхъ на горѣ̀ сїѡ́нстѣй наро́дъ мно́гъ, и҆̀хже и҆счи́слити не мого́хъ, и҆ всѝ пѣ́сньми хвалѧ́хѹ гд҇а:

⁴³посредѣ́ же и҆́хъ бѣ̀ ю҆́ноша высоча́е во́зрастомъ па́че всѣ́хъ ѻ҆́ныхъ, и҆́же полага́ше вѣнцы̀ на главѹ̀ коегѡ́ждо и҆ па́че возвыша́шесѧ, а҆́зъ же диви́хсѧ ѕѣлѡ̀.

⁴⁴Тогда̀ вопроси́хъ а҆́гг҃ла, глаго́лѧ: что̀ сѹ́ть сі́и, го́споди;

⁴⁵Ѻ҆́нъ же ѿвѣща̀: сі́и сѹ́ть, и҆̀же совлеко́шасѧ ѡ҆дѣѧ́нїѧ сме́ртнагѡ и҆ ѡ҆блеко́шасѧ въ безсме́ртное и҆ и҆сповѣ́даша и҆́мѧ бж҃їе: нн҃ѣ вѣнча́ютсѧ и҆ прїе́млютъ фі́нїки.

⁴⁶И҆ вопроси́хъ а҆́гг҃ла ѡ҆ ю҆́ноши: кто̀ є҆́сть ѻ҆́ный ю҆́ноша, и҆́же возлага́етъ на ни́хъ вѣнцы̀ и҆ фі́нїки въ рѹ́цѣ дае́тъ;

⁴⁷Ѻ҆́нъ же ѿвѣща̀ мѝ: се́й є҆́сть сн҃ъ бж҃їй, є҆го́же и҆сповѣ́даша въ вѣ́цѣ се́мъ. А҆́зъ же нача́хъ велича́ти и҆̀хъ, и҆̀же крѣ́пкѡ за и҆́мѧ гд҇не воѡрѹжа́шасѧ.

⁴⁸Тогда̀ речѐ мѝ а҆гг҃лъ: и҆дѝ и҆ возвѣ́сти лю́демъ мои҄мъ, какѡва́ѧ и҆ кѡли́каѧ чѹдеса̀ гд҇а бг҃а ви́дѣлъ є҆сѝ.