Read Библия Церковнославянская г҃ е҆́здры 3 Bible Online

г҃ е҆́здры 3 - Библия Церковнославянская bible

г҃ е҆́здры 3

¹Лѣ́та тридесѧ́тагѡ ѿ разоре́нїѧ гра́да, бѣ́хъ въ вавѷлѡ́нѣ и҆ смѧто́хсѧ на ѻ҆дрѣ̀ мое́мъ лежа́щь, и҆ помышлє́нїѧ моѧ҄ восхожда́хѹ на се́рдце моѐ,

²поне́же ви́дѣхъ ѡ҆пѹстѣ́нїе сїѡ́на и҆ и҆з̾ѻби́лїе ве́лїе живѹ́щихъ въ вавѷлѡ́нѣ.

³(Тогѡ̀ ра́ди) смѹти́сѧ дѹ́хъ мо́й ѕѣлѡ̀, и҆ нача́хъ ѹ҆миле́нными словесы̀ глаго́лати къ вы́шнемѹ

⁴и҆ реко́хъ: ѽ, влдко гд҇и! ты̀ (са́мъ) ре́клъ є҆сѝ ѿ нача́ла, є҆гда̀ созда́лъ є҆сѝ зе́млю, и҆ сїѐ є҆ди́нъ, и҆ повелѣ́лъ є҆сѝ лю́демъ,

⁵и҆ да́лъ є҆сѝ а҆да́мѹ пло́ть ме́ртвенѹ, но и҆ сїѧ̀ бѧ́ше дѣ́ло рѹ́къ твои́хъ, и҆ вдохнѹ́лъ є҆сѝ въ него̀ дѹ́хъ жи́зни, и҆ бы́сть жи́въ пред̾ тобо́ю:

⁶и҆ вве́лъ є҆сѝ є҆го̀ въ ра́й, є҆го́же насадѝ десни́ца твоѧ̀, пре́жде не́же прозѧбѐ землѧ̀:

⁷и҆ завѣща́лъ є҆сѝ є҆мѹ̀ сохрани́ти за́повѣдь твою̀, и҆ престѹпѝ ю҆̀, и҆ а҆́бїе пре́далъ є҆сѝ є҆го̀ сме́рти и҆ ро́дъ є҆гѡ̀, и҆ роди́шасѧ ѩ҆зы́цы и҆ племена̀, и҆ лю́дїе и҆ наро́ди, и҆̀мже нѣ́сть числа̀:

⁸и҆ хожда́ше кі́йждо наро́дъ по по́хотемъ свои҄мъ, и҆ ди҄внаѧ дѣ́лаша пред̾ тобо́ю, и҆ презира́ша за́пѡвѣди твоѧ҄:

⁹па́ки же во вре́мѧ наве́лъ є҆сѝ на ни́хъ пото́пъ и҆ потреби́лъ є҆сѝ живѹ́щихъ на землѝ,

¹⁰и҆ бы́сть коемѹ́ждо и҆́хъ, ѩ҆́коже а҆да́мѹ ѹ҆мре́ти, та́кѡ си҄мъ пото́пъ:

¹¹ѡ҆ста́вилъ же є҆сѝ є҆ди́наго ѿ ни́хъ нѡ́ѧ съ до́момъ є҆гѡ̀, и҆з̾ негѡ́же (роди́шасѧ) всѝ пра́веднїи:

¹²и҆ бы́сть, є҆гда̀ нача́ша мно́житисѧ живѹ́щїи на землѝ, и҆ ѹ҆мно́жиша сы́ны и҆ лю́ди и҆ ѩ҆зы́ки мнѡ́ги, и҆ нача́ша па́ки нече́стїе твори́ти мно́жае пре́жнихъ:

¹³и҆ бы́сть, є҆гда̀ беззако́нїе творѧ́хѹ пред̾ тобо́ю, и҆збра́лъ є҆сѝ себѣ̀ мѹ́жа ѿ си́хъ, є҆мѹ́же и҆́мѧ бѣ̀ а҆враа́мъ,

¹⁴и҆ возлюби́лъ є҆сѝ є҆го̀, и҆ показа́лъ є҆сѝ є҆мѹ̀ є҆ди́номѹ хотѣ́нїе твоѐ,

¹⁵и҆ положи́лъ є҆сѝ є҆мѹ̀ завѣ́тъ вѣ́чный, и҆ ре́клъ є҆сѝ є҆мѹ̀, ѩ҆́кѡ никогда̀ ѡ҆ста́виши сѣ́мене є҆гѡ̀, и҆ да́лъ є҆сѝ є҆мѹ̀ ї҆саа́ка, ї҆саа́кѹ же да́лъ є҆сѝ ї҆а́кѡва и҆ и҆са́ѵа:

¹⁶и҆ и҆збра́лъ є҆сѝ себѣ̀ ї҆а́кѡва, и҆са́ѵа же ѿри́нѹлъ є҆сѝ, и҆ размно́жисѧ ї҆а́кѡвъ во мно́жество ве́лїе:

¹⁷и҆ бы́сть, є҆гда̀ и҆зве́лъ є҆сѝ и҆з̾ є҆гѵ́пта сѣ́мѧ є҆гѡ̀, приве́лъ є҆сѝ къ горѣ̀ сина́йстѣй,

¹⁸и҆ преклони́лъ є҆сѝ нб҃са̀, и҆ ѹ҆ста́вилъ є҆сѝ зе́млю, и҆ поколеба́лъ є҆сѝ вселе́ннѹю, и҆ трепета́ти сотвори́лъ є҆сѝ бє́здны, и҆ возмѹти́лъ є҆сѝ мі́ръ,

¹⁹и҆ про́йде сла́ва твоѧ̀ враты̀ четы́рьми, ѻ҆гне́мъ и҆ земны́мъ трѧсе́нїемъ, и҆ вѣ́тромъ и҆ мра́зомъ, да да́си зако́нъ сѣ́мени ї҆а́кѡвлю и҆ ро́дѹ ї҆и҃левѹ прилѣжа́нїе:

²⁰и҆ не ѿѧ́лъ є҆сѝ ѿ ни́хъ се́рдца лѹка́вагѡ, да зако́нъ тво́й сотвори́тъ въ ни́хъ пло́дъ:

²¹се́рдце бо лѹка́во носѧ̀ пе́рвый а҆да́мъ, престѹпѝ и҆ побѣжде́нъ бы́сть, и҆ та́кѡ всѝ, и҆̀же ѿ негѡ̀ роди́шасѧ:

²²и҆ пребыва́ше не́мощь и҆ зако́нъ съ се́рдцемъ человѣ́ческимъ, съ лѹка́встомъ ко́рене, и҆ преста̀ благо́е, и҆ наста̀ ѕло́е:

²³и҆ преидо́ша времена̀, и҆ сконча́шасѧ лѣ҄та, и҆ воздви́глъ є҆сѝ себѣ̀ раба̀ и҆́менемъ даві́да,

²⁴и҆ повелѣ́лъ є҆сѝ є҆мѹ̀ созда́ти гра́дъ и҆́мени твоемѹ̀ и҆ приноси́ти въ не́мъ тебѣ̀ ѳѷмїа́мъ и҆ жє́ртвы:

²⁵и҆ бы́сть сїѐ чрез̾ мнѡ́га лѣ҄та, и҆ согрѣши́ша живѹ́щїи въ то́мъ гра́дѣ,

²⁶во всѣ́хъ творѧ́ще, ѩ҆́коже сотворѝ а҆да́мъ и҆ всѝ ро́дове є҆гѡ̀, поне́же и҆ са́ми бы́ша се́рдцемъ лѹка́ви,

²⁷и҆ тогѡ̀ ра́ди гра́дъ тво́й пре́далъ є҆сѝ въ рѹ́ки врагѡ́въ твои́хъ:

²⁸є҆да̀ лѹ҄чшаѧ творѧ́тъ, и҆̀же ѡ҆бита́ютъ въ вавѷлѡ́нѣ, и҆ тогѡ̀ ра́ди владѣ́ютъ сїѡ́номъ;

²⁹и҆ бы́сть є҆гда̀ прїидо́хъ сѣ́мѡ и҆ ви́дѣхъ нечє́стїѧ, и҆̀мже нѣ́сть числа̀, и҆ мно́гихъ согрѣша́ющихъ ви́дѣ дѹша̀ моѧ̀ въ сїѐ тридесѧ́тое лѣ́то, и҆ ѹ҆жасе́сѧ се́рдце моѐ,

³⁰поне́же ви́дѣхъ, ка́кѡ терпи́ши согрѣша́ющымъ и҆ пощади́лъ є҆сѝ нече́ствѹющихъ и҆ погѹби́лъ є҆сѝ лю́ди твоѧ҄, сохрани́лъ же є҆сѝ врагѝ твоѧ҄ и҆ не возвѣсти́лъ є҆сѝ (ни комѹ́же):

³¹вои́стиннѹ не вѣ́мъ, ка́кѡ сїѧ҄ ѹ҆разѹмѣ́ти и҆́мамъ; є҆да̀ сѹ́ть дѣла̀ лѹ҄чшаѧ вавѷлѡ҄нскаѧ, не́жели сїѡ҄нскаѧ;

³²є҆да̀ позна́ша тебѐ и҆́нїи ѩ҆зы́цы кромѣ̀ ї҆и҃лѧ; и҆лѝ ка҄ѧ племена̀ вѣ́роваша свидѣ́нїємъ твои҄мъ, ѩ҆́коже ї҆а́кѡвъ;

³³и҆́хже мзда̀ не ѩ҆ви́сѧ, нижѐ трѹ́дъ и҆́хъ твори́тъ плода̀, поне́же прохожда́ѧ проидо́хъ посредѣ̀ ѩ҆зы҄къ и҆ ви́дѣхъ ѧ҆̀ процвѣта́ющѧ и҆ не по́мнѧщыѧ повелѣ́нїй твои́хъ:

³⁴нн҃ѣ ѹ҆́бѡ и҆змѣ́ри на мѣ́рилѣхъ непра҄вды на́шѧ и҆ живѹ́щихъ на землѝ, и҆ нигдѣ̀ ѡ҆брѧ́щетсѧ и҆́мѧ твоѐ, то́кмѡ во ї҆и҃ли:

³⁵и҆ когда̀ не согрѣши́ша пред̾ тобо́ю живѹ́щїи на землѝ; и҆лѝ кі́й ѩ҆зы́къ та́кѡ сохрани́лъ за́пѡвѣди твоѧ҄;

³⁶си́хъ ѹ҆́бѡ по и҆менѡ́мъ ѡ҆брѧ́щеши сохрани́вшихъ повєлѣ́нїѧ твоѧ҄, ѩ҆зы́кѡвъ же не ѡ҆брѧ́щеши.