Read Библия Церковнославянская г҃ е҆́здры 4 Bible Online

г҃ е҆́здры 4 - Библия Церковнославянская bible

г҃ е҆́здры 4

¹Тогда̀ ѿвѣща̀ ко мнѣ̀ а҆́гг҃лъ, и҆́же по́сланъ бѣ̀ ко мнѣ̀, є҆мѹ́же и҆́мѧ ѹ҆рїи́лъ,

²и҆ речѐ мѝ: во ѹ҆́жасѣ и҆зстѹпѝ се́рдце твоѐ въ вѣ́цѣ се́мъ, поне́же хо́щеши пости́гнѹти пѹти҄ вы́шнѧгѡ. А҆́зъ же ѿвѣша́хъ:

³та́кѡ є҆́сть, го́споди мо́й. Ѻ҆́нъ же ко мнѣ̀ речѐ си́це: трѝ пѹти҄ по́сланъ є҆́смь показа́ти тебѣ̀ и҆ трѝ подѡ́бїѧ предложи́ти пред̾ тобо́ю:

⁴ѿ ни́хже є҆гда̀ мѝ є҆ди́но и҆з̾ѧви́ши, и҆ а҆́зъ тѝ покажѹ̀ пѹ́ть, є҆го́же жела́еши ви́дѣти, и҆ наѹчѹ̀ тѧ̀, ѿкѹ́дѹ є҆́сть се́рдце лѹка́во.

⁵И҆ реко́хъ: возвѣстѝ, го́споди мо́й. И҆ речѐ ко мнѣ̀: и҆дѝ и҆ и҆звѣ́си мѝ ѻ҆гнѧ̀ тѧ́гость, и҆лѝ и҆змѣ́ри дыха́нїе вѣ́тра, и҆лѝ возвратѝ вспѧ́ть де́нь, и҆́же мимои́де.

⁶А҆́зъ же ѿвѣша́хъ и҆ реко́хъ: кто̀ ѿ человѣ҄къ мо́жетъ сотвори́ти, ѡ҆ ни́хже мѧ̀ вопроша́еши;

⁷Ѻ҆́нъ же речѐ ко мнѣ̀: а҆́ще бы́хъ вопроси́лъ тѧ̀, глаго́лѧ: ко́ль мно́гѡ жили́щъ є҆́сть въ се́рдцы морстѣ́мъ, и҆лѝ ко́ль мно́гѡ и҆сто́чникѡвъ въ нача́лѣ бе́здны, и҆лѝ ко́ль мно́гѡ жи҄лъ є҆́сть над̾ тве́рдїю небе́сною, и҆лѝ кі́и сѹ́ть предѣ́лы ра́йстїи;

⁸не́гли ѿвѣща́лъ бы мѝ є҆сѝ: въ бе́зднѹ не снидо́хъ, ни во а҆́дъ є҆щѐ, нижѐ на небеса̀ когда̀ взыдо́хъ:

⁹нн҃ѣ же ѡ҆ се́мъ не вопроси́хъ тѧ̀, то́чїю ѡ҆ ѻ҆гнѝ и҆ ѡ҆ вѣ́трѣ и҆ ѡ҆ днѝ, въ ѻ҆́ньже є҆сѝ пребыва́лъ, и҆ без̾ си́хъ веще́й бы́ти не мо́жеши: и҆ ты̀ ѡ҆ си́хъ ничто́же мѝ ѿвѣща́лъ є҆сѝ.

¹⁰И҆ речѐ мѝ: ты̀ си́хъ, ѩ҆̀же твоѧ҄ сѹ́ть и҆ съ тобо́ю возрасто́ша, позна́ти не мо́жеши:

¹¹и҆ ка́кѡ сосѹ́дъ тво́й возмо́жетъ вмѣсти́ти пѹти҄ вы́шнѧгѡ, и҆ ѹ҆жѐ мі́рѹ ѿвнѣ̀ растлѣ́ннѹ сѹ́щѹ, ѹ҆разѹмѣ́ти раслѣ́нїе ѩ҆́вное пред̾ лице́мъ мои́мъ;

¹²И҆ реко́хъ къ немѹ̀: лѹ́чше на́мъ дабы̀ є҆смы̀ не бы́ли, не́жели є҆щѐ живѹ́щымъ жи́ти въ нече́стїихъ и҆ претерпѣва́ти и҆ не вѣ́дати, ко́еѧ ра́ди ве́щи.

¹³Ѻ҆́нъ же ѿвѣща̀ мѝ и҆ речѐ: ше́дъ и҆до́хъ въ дѹбра́вѹ древе́съ по́льныхъ, и҆дѣ́же древа̀ совѣ́тъ сотвори́ша

¹⁴глаго́люще: прїиди́те и҆ и҆́демъ и҆ дви́гнемъ бра́нь на мо́ре, да ѹ҆стѹ́питъ на́мъ, и҆ да сотвори́мъ себѣ̀ и҆ны҄ѧ дѹбра҄вы:

¹⁵та́кожде и҆ вѡ́лны мѡрскі́ѧ совѣ́тъ сотвори́ша глаго́лющѧ: по́йдемъ и҆ дви́гнемъ бра́нь на лѣ́сы пѡ́льныѧ, да побѣди́вшѧ и҆̀хъ воспрїи́мемъ себѣ̀ та́мѡ и҆но́е мѣ́сто:

¹⁶и҆ бы́сть ѹ҆мышле́нїе дѹбра́вы пра́здно, поне́же прїи́де ѻ҆́гнь и҆ пожжѐ ю҆̀,

¹⁷та́кожде и҆ ѹ҆мышле́нїе во́лнъ морски́хъ, поне́же ста̀ песо́къ и҆ ѹ҆держа̀ и҆̀хъ:

¹⁸и҆ є҆гда́ бы є҆сѝ бы́лъ сѹдїѧ̀ и҆́хъ, ко́его бы є҆сѝ ѿ си́хъ ѡ҆правда́лъ, и҆лѝ ко́его ви́нна сотвори́лъ;

¹⁹Ѿвѣща́хъ а҆́зъ и҆ рѣ́хъ: вои́стиннѹ въ совѣ́тъ сѹ́етенъ вда́шасѧ, поне́же землѧ̀ дана̀ є҆́сть лѣсѡ́мъ, и҆ мо́рю мѣ́сто, є҆́же носи́ти вѡ́лны своѧ҄.

²⁰Ѻ҆́нъ же речѐ ко мнѣ̀: пра́вѡ разсѹди́лъ є҆сѝ: чесѡ́ же ра́ди себѐ не сѹ́диши;

²¹поне́же ѩ҆́коже землѧ̀ дѹбра́вамъ дана̀ є҆́сть и҆ мо́ре волна́мъ свои҄мъ (дано̀ є҆́сть): та́кѡ и҆̀же ѡ҆бита́ютъ на землѝ, то́кмѡ ве́щы назє́мныѧ разѹмѣ́ти мо́гѹтъ, а҆ сѹ́щїи на нб҃сѣ́хъ, ѩ҆̀же на высотѣ̀ нб҃съ.

²²И҆ ѡ҆вѣша́хъ и҆ реко́хъ: молю́тисѧ, го́споди, да мнѣ̀ да́стсѧ ѹ҆́мъ разѹмѣ́нїѧ,

²³не бо̀ хотѣ́хъ вопроси́ти ѡ҆ вы́шнихъ твои́хъ, но ѡ҆ си́хъ, ѩ҆̀же всегда̀ въ на́съ быва́ютъ, чесѡ̀ ра́ди ї҆и҃ль да́нъ въ порѹга́нїе ѩ҆зы́кѡмъ; и҆ чесѡ̀ ра́ди лю́дїе твоѝ возлю́бленнїи даны̀ ѩ҆зы́кѡмъ нечєсти́вымъ; и҆ чесѡ̀ ра́ди зако́нъ ѻ҆тє́цъ на́шихъ въ па́гѹбѹ низведе́нъ бы́сть, и҆ ѹ҆строє́нїѧ пи҄саннаѧ нигдѣ̀ сѹ́ть;

²⁴и҆ преидо́хомъ ѡ҆ вѣ́ка а҆́ки прѹ́зи и҆ живе́мъ въ вели́цѣмъ стра́сѣ и҆ ѹ҆́жасѣ, и҆ недосто́йни є҆смы̀ ми́лости твоеѧ̀ наслѣ́дити:

²⁵но что̀ сотвори́тъ и҆́мени своемѹ̀, є҆́же мы̀ нарица́емъ; сїѧ҄ сѹ́ть, є҆гѡ́же а҆́зъ вопроси́хъ.

²⁶Ѻ҆́нъ же ѿвѣща̀ ко мнѣ̀ и҆ речѐ: коли́кѡ бо́лѣе и҆спыта́ти бѹ́деши, толи́кѡ бо́лѣе и҆ ѹ҆диви́шисѧ, поне́же ско́рѡ спѣши́тъ вѣ́къ преитѝ

²⁷и҆ не мо́жетъ носи́ти, ѩ҆̀же въ бѹ҄дѹщаѧ времена̀ пра́вєднымъ ѡ҆бѣща҄нна сѹ́ть,

²⁸поне́же непра́вды и҆спо́лнь вѣ́къ се́й и҆ не́мощей: а҆ ѡ҆ ни́хже вопроша́еши, возвѣщѹ̀ тебѣ̀: насѣ́ѧно бо є҆́сть ѕло̀, и҆ не ѹ҆̀ прїи́де погѹбле́нїе є҆гѡ̀:

²⁹а҆́ще ѹ҆́бѡ не преврати́тсѧ, є҆́же насѣ́ѧно є҆́сть, и҆ не ѹ҆стѹ́питъ мѣ́сто, и҆дѣ́же насѣ́ѧно лѹка́вство, не прїи́детъ, и҆дѣ́же насѣ́ѧно є҆́сть бла́го:

³⁰поне́же ѕла́къ сѣ́мене ѕла́гѡ всѣ́ѧнъ є҆́сть въ се́рдце а҆да́мово и҆з̾ нача́ла, и҆ ко́ль мно́гѡ ѕла̀ родѝ и҆ донн҃ѣ и҆ ражда́етъ, до́ндеже прїи́детъ млаче́нїе;

³¹разсѹди́ же въ себѣ̀ ѕла́къ ѕла́гѡ сѣ́мене, коли́къ пло́дъ нече́стїѧ породѝ;

³²є҆гда̀ пожа́ти бѹ́дѹтъ кла́си, и҆̀мже нѣ́сть числа̀, ко́ль ве́лїю молотьбѹ̀ начнѹ́тъ твори́ти;

³³И҆ ѿвѣща́хъ и҆ рѣ́хъ: ка́кѡ и҆ когда̀ сїѧ҄ (бѹ́дѹтъ); и҆ чесѡ̀ ра́ди кра҄тка и҆ ѕла҄ лѣ҄та на҄ша;

³⁴И҆ ѿвѣща̀ ко мнѣ̀ и҆ речѐ мѝ: не спѣшѝ ты̀ вы́ше вы́шнѧгѡ, ты́ бо тщи́шисѧ всѹ́е бы́ти вы́ше є҆гѡ̀, и҆́бо и҆зстѹпле́нїе твоѐ мно́го:

³⁵є҆да̀ не вопроша́ша дѹ́ши пра́ведныхъ ѡ҆ си́хъ въ затво́рѣхъ свои́хъ, глаго́люще: доко́лѣ та́кѡ надѣ́ющесѧ бѹ́демъ; и҆ когда̀ прїи́детъ пло́дъ жа́твы мзды̀ на́шеѧ;

³⁶и҆ ѿвѣща̀ на сїѧ҄ ї҆еремїи́лъ а҆рха́гг҃лъ и҆ речѐ: є҆гда̀ и҆спо́лнитсѧ число̀ сѣ́менъ въ ва́съ, поне́же на мѣ́рилѣ и҆звѣ́силъ вѣ́къ

³⁷и҆ мѣ́рою и҆змѣ́рилъ времена̀ и҆ число́мъ сочтѐ часы̀, и҆ не восколеба̀, ни возбѹдѝ, до́ндеже и҆спо́лнитсѧ предрѣче́ннаѧ мѣ́ра.

³⁸И҆ ѿвѣща́хъ и҆ рѣ́хъ: ѽ, влдко гд҇и! но и҆ мы̀ всѝ и҆спо́лнени є҆смы̀ нече́стїѧ:

³⁹и҆ є҆да́ ли на́съ ра́ди не напо́лнѧтсѧ пра́ведныхъ жи҄тницы, за грѣхѝ ѡ҆бита́ющихъ на землѝ;

⁴⁰И҆ ѿвѣща̀ ко мнѣ̀ и҆ речѐ: и҆дѝ и҆ вопросѝ и҆мѹ́щѹю во чре́вѣ, є҆да̀ и҆спо́лнивши де́вѧть мц҇ей свои́хъ, є҆щѐ возмо́гѹтъ ложесна̀ є҆ѧ̀ въ себѣ̀ ѹ҆держа́ти пло́дъ;

⁴¹И҆ а҆́зъ ѿвѣща́хъ: вои́стиннѹ не мо́гѹтъ, го́споди. Ѻ҆́нъ же ѿвѣща̀: во а҆́дѣ ѡ҆би́тєли дѹ́шъ подѡ́бныѧ сѹ́ть ложесна́мъ:

⁴²поне́же ѩ҆́коже родѧ́щаѧ хо́щетъ вско́рѣ роди́ти, да и҆збѣжи́тъ нѹ́жды рожде́нїѧ, та́кѡ и҆ сїѧ҄ тща́тсѧ и҆зда́ти ѡ҆́наѧ, ѩ҆̀же вдана҄ и҆̀мъ сѹ́ть:

⁴³и҆з̾ нача́ла возвѣщѹ̀ и҆ и҆з̾ѧвлю̀ тебѣ̀ ѡ҆ си́хъ, и҆̀хже жела́еши ви́дѣти.

⁴⁴И҆ ѿвѣща́хъ и҆ реко́хъ: а҆́ще ѡ҆брѣто́хъ благода́ть пред̾ тобо́ю, и҆ а҆́ще возмо́жно є҆́сть, и҆ а҆́ще досто́инъ є҆́смь,

⁴⁵покажѝ мѝ, є҆да́ ли мно́жайшее є҆́сть вре́мѧ преше́дшее, не́жели и҆мѹ́щее прїитѝ; и҆лѝ мнѡ́жайшаѧ преидо́ша, не́же бѹ҄дѹщаѧ сѹ́ть;

⁴⁶вѣ́мъ бо, є҆́же пре́йде, а҆ тогѡ̀ не вѣ́мъ, є҆́же прейтѝ и҆́мать.

⁴⁷Ѻ҆́нъ же речѐ: ста́ни ѡ҆деснѹ́ю менє̀, и҆ и҆з̾ѧвлю̀ тебѣ̀ толкова́нїе при́тчи.

⁴⁸И҆ ста́хъ и҆ ви́дѣхъ, и҆ сѐ, пе́щь горѧ́щаѧ про́йде предо мно́ю: и҆ бы́сть є҆гда̀ пре́йде пла́мень, ви́дѣхъ, и҆ сѐ, превзы́де ды́мъ.

⁴⁹По си́хъ про́йде предо мно́ю ѡ҆́блакъ и҆спо́лненъ воды̀, и҆з̾ негѡ́же и҆спѹсти́сѧ до́ждь ве́лїй со ѹ҆стремле́нїемъ: и҆ є҆гда̀ про́йде стремле́нїе дождѧ̀, преѹмно́жишасѧ въ не́мъ ка҄пли.

⁵⁰И҆ речѐ ко мнѣ̀: внима́й себѣ̀: ѩ҆́коже расте́тъ до́ждь па́че не́же ка҄пли, и҆ ѻ҆́гнь, не́же ды́мъ, та́кѡ превзы́де преше́дшаѧ мѣ́ра: преѹмно́жишасѧ же ка҄пли и҆ ды́мъ.

⁵¹И҆ моли́хсѧ и҆ рѣко́хъ: мни́ши ли, ѩ҆́кѡ жи́ти и҆́мамъ да́же до дні́й ѻ҆́ныхъ; и҆лѝ что̀ бѹ́детъ во дне́хъ ѻ҆́нѣхъ;

⁵²И҆ ѿвѣща́ ми глаго́лѧ: ѡ҆ зна́менїихъ, ѡ҆ ни́хже мѧ̀ вопроша́еши, ѿ ча́сти могѹ́ ти глаго́лати, ѡ҆ животѣ́ же твое́мъ нѣ́смь по́сланъ повѣ́дати тебѣ̀, но не свѣ́мъ.