Read Библия Церковнославянская г҃ е҆́здры 5 Bible Online

г҃ е҆́здры 5 - Библия Церковнославянская bible

г҃ е҆́здры 5

¹Ѡ҆ зна́менїихъ же: сѐ, дні́е прїи́дѹтъ, въ ни́хже живѹ́щїи на землѝ ѡ҆бремене́ни бѹ́дѹтъ да́ньми мно́гими, и҆ скры́етсѧ пѹ́ть пра́вды, и҆ бѹ́детъ вселе́ннаѧ непло́дна ѿ вѣ́ры,

²и҆ ѹ҆мно́житсѧ непра́вда па́че сеѧ̀, ю҆́же ты̀ ви́диши, и҆ па́че тоѧ̀, ѡ҆ не́йже є҆сѝ слы́шалъ и҆здре́вле:

³и҆ бѹ́детъ землѧ̀, въ ню́же вше́дъ нн҃ѣ ви́диши ца́рствѹюшѹю, и҆ ѹ҆́зрѧтъ ю҆̀ ѡ҆пѹстѣ́нѹ:

⁴а҆́ще же тебѣ̀ да́стъ вы́шнїй жи́вѹ бы́ти, ѹ҆́зриши по тре́тїей трѹбѣ̀, и҆ возсїѧ́етъ внеза́пѹ со́лнце въ нощѝ, и҆ лѹна̀ три́жды въ де́нь,

⁵и҆ воска́плетъ кро́вь ѿ дре́ва, и҆ ка́мень да́стъ гла́съ сво́й, и҆ поколе́блютсѧ лю́дїе:

⁶и҆ то́й бѹ́детъ ца́рствовати, є҆гѡ́же не надѣ́ютсѧ живѹ́щїи на землѝ, и҆ пти҄цы пре́йдѹтъ ѿ мѣ́ста своегѡ̀,

⁷и҆ мо́ре содо́мское ры҄бы и҆зри́нетъ и҆ да́стъ гла́съ но́щїю, є҆гѡ́же мно́зи не зна́ша, и҆ всѝ ѹ҆слы́шатъ гла́съ є҆гѡ̀:

⁸и҆ смѧте́нїе бѹ́детъ на мѣ́стѣхъ мно́зѣхъ, и҆ ѻ҆́гнь ча́стѡ низпѹ́ститсѧ, и҆ ѕвѣ́рїе по́льстїи преселѧ́тсѧ, и҆ жєны̀ бѡлѣ́знивыѧ породѧ́тъ щѹ҄да,

⁹и҆ въ сла́дкихъ вода́хъ сла҄ны ѡ҆брѧ́щѹтсѧ, и҆ дрѹ́зи всѝ са́ми на сѧ̀ ѡ҆полча́тсѧ: и҆ скры́етсѧ тогда̀ ѹ҆́мъ, и҆ ра́зѹмъ ѿлѹчи́тсѧ въ храни́лище своѐ,

¹⁰и҆ взы́щетсѧ ѿ мно́гихъ и҆ не ѡ҆брѧ́щетсѧ: непра́вда же и҆ невоздержа́нїе ѹ҆мно́житсѧ на землѝ,

¹¹и҆ вопро́ситъ страна̀ бли́жнюю свою̀ и҆ рече́тъ: не пре́йде ли по тебѣ̀ пра́вда пра́веднаго творѧ́щаѧ; и҆ сегѡ̀ ѿрече́тсѧ:

¹²и҆ бѹ́детъ въ то̀ вре́мѧ, и҆ ѹ҆пова́ти бѹ́дѹтъ человѣ́цы и҆ не воспрїи́мѹтъ: трѹди́тисѧ бѹ́дѹтъ, и҆ не ѹ҆пра́вѧтсѧ пѹтїѐ и҆́хъ.

¹³Сїѧ҄ зна́мєнїѧ попѹще́но є҆́сть мнѣ̀ глаго́лати къ тебѣ̀: и҆ а҆́ще помо́лишисѧ па́ки, и҆ воспла́чешисѧ, ѩ҆́коже и҆ нн҃ѣ, и҆ попости́шисѧ се́дмь дні́й, є҆щѐ бѡ́лшаѧ си́хъ ѹ҆слы́шиши.

¹⁴И҆ возбнѹ́хъ, и҆ тѣ́ло моѐ ѹ҆страши́сѧ ѕѣлѡ̀, и҆ дѹша̀ моѧ̀ ѹ҆трѹди́сѧ, а҆́ки бы и҆счеза́ла.

¹⁵И҆ ѹ҆держа́ мѧ, и҆́же приі́де а҆́гг҃лъ, и҆́же глаго́лаше ко мнѣ̀, и҆ ѹ҆крѣпи́ мѧ и҆ поста́ви мѧ̀ на нога́хъ.

¹⁶И҆ бы́сть въ но́щь вторѹ́ю, и҆ прїи́де ко мнѣ̀ салаѳі́илъ во́ждь лю́демъ и҆ речѐ мнѣ̀: гдѣ̀ бы́лъ є҆сѝ, и҆ вскѹ́ю лицѐ твоѐ ско́рбно;

¹⁷и҆лѝ не вѣ́си, ѩ҆́кѡ тебѣ̀ ввѣ́ренъ є҆́сть ї҆и҃ль во странѣ̀ преселе́нїѧ и҆́хъ;

¹⁸воста́ни ѹ҆́бѡ и҆ вкѹсѝ хлѣ́ба, и҆ не ѡ҆ста́ви на́съ, ѩ҆́коже па́стырь ста́до своѐ въ рѹка́хъ волкѡ́въ лѹка́выхъ.

¹⁹И҆ реко́хъ є҆мѹ̀: и҆дѝ ѿ менє̀ и҆ не приближа́йсѧ ко мнѣ̀. И҆ ѹ҆слы́ша, ѩ҆́коже реко́хъ, и҆ ѿи́де ѿ менє̀.

²⁰И҆ а҆́зъ пости́хсѧ дні́й се́дмь стенѧ̀ и҆ пла́чѧ, ѩ҆́коже мнѣ̀ заповѣ́да ѹ҆рїи́лъ а҆́гг҃лъ.

²¹И҆ бы́сть по дне́хъ седми́хъ, и҆ па́ки помышлє́нїѧ се́рдца моегѡ̀ трѹ҄дна бѧ́хѹ мнѣ̀ ѕѣлѡ̀:

²²и҆ воспрїѧ̀ дѹша̀ моѧ̀ дѹ́хъ ра́зѹма, и҆ па́ки нача́хъ глаго́лати пред̾ вы́шнимъ словеса̀

²³и҆ рѣ́хъ: ѽ, влдко гд҇и! ѿ всѣ́хъ дѹбра́въ землѝ и҆ ѿ всѣ́хъ древе́съ є҆ѧ̀ и҆збра́лъ є҆сѝ вїногра́дъ є҆ди́нъ,

²⁴и҆ ѿ всегѡ̀ крѹ́га земна́гѡ и҆збра́лъ є҆сѝ себѣ̀ ю҆до́ль є҆ди́нѹ, и҆ ѿ всѣ́хъ цвѣтѡ́въ вселе́нныѧ и҆збра́лъ є҆сѝ себѣ̀ крі́нъ є҆ди́нъ,

²⁵и҆ ѿ всѣ́хъ бе́зднъ морски́хъ и҆спо́лнилъ є҆сѝ себѣ̀ и҆сто́чникъ є҆ди́нъ, и҆ ѿ всѣ́хъ созда́нныхъ градѡ́въ ѡ҆ст҃и́лъ є҆сѝ себѣ̀ сїѡ́нъ,

²⁶и҆ ѿ всѣ́хъ сотворе́нїй лета́ющихъ и҆менова́лъ є҆сѝ себѣ̀ голѹби́цѹ є҆ди́нѹ, и҆ ѿ всѣ́хъ сотворе́нныхъ скотѡ́въ промы́слилъ є҆сѝ себѣ̀ ѻ҆́вцѹ є҆ди́нѹ,

²⁷и҆ ѿ всѣ́хъ ѹ҆мно́женныхъ люді́й взыска́лъ є҆сѝ себѣ̀ наро́дъ є҆ди́нъ, и҆ ѿ всѣ́хъ и҆скѹше́нъ зако́нъ да́лъ є҆сѝ си҄мъ, и҆̀хже возлюби́лъ є҆сѝ, лю́демъ:

²⁸и҆ нн҃ѣ, гд҇и, вскѹ́ю преда́лъ є҆сѝ є҆ди́наго мнѡ́гимъ и҆ ѹ҆гото́валъ є҆сѝ на є҆ди́нъ ко́рень мнѡ́ги и҆ны҄ѧ и҆ расточи́лъ є҆сѝ є҆ди́нъ тво́й во мнѡ́ги;

²⁹и҆ потопта́ша є҆го̀, и҆̀же проти́вѹ глаго́лаша ѡ҆бѣтова́нїємъ твои҄мъ и҆ и҆̀же твои҄мъ завѣ́тѡмъ не вѣ́ровахѹ:

³⁰и҆ а҆́ще ненави́дѧщь возненави́дѣлъ є҆сѝ лю́ди твоѧ҄, твои́ми рѹка́ми до́лженствѹютъ наказа́тисѧ.

³¹И҆ бы́сть є҆гда̀ глаго́лахъ словеса̀, и҆ по́сланъ є҆́сть а҆́гг҃лъ ко мнѣ̀, и҆́же пре́жде прїи́де ко мнѣ̀ въ преше́дшѹю но́щь,

³²и҆ рече́ ми: послѹ́шай мѧ̀, и҆ наѹчѹ́ тѧ: и҆ вонми́ ми, и҆ предложѹ̀ пред̾ тобо́ю.

³³И҆ реко́хъ: глаго́ли, го́споди мо́й. И҆ речѐ ко мнѣ̀: ѕѣлѡ̀ ты̀ во ѹ҆́жасѣ ѹ҆ма̀ сотвори́лсѧ є҆сѝ ра́ди ї҆и҃лѧ: и҆лѝ па́че возлюби́лъ є҆сѝ є҆го̀, не́же сотвори́вый є҆го̀;

³⁴И҆ рѣ́хъ къ немѹ̀: нѝ, го́споди, но болѧ́щь глаго́лалъ є҆́смь: мѹ́чатъ бо мѧ̀ лѧ҄двїѧ моѧ҄ по всѧ҄ часы̀ и҆́щѹщаго пости́гнѹти стезю̀ вы́шнѧгѡ, и҆зслѣ́довати ча́сть сѹда̀ є҆гѡ̀.

³⁵И҆ речѐ ко мнѣ̀: не мо́жеши. И҆ реко́хъ: чесѡ̀ ра́ди, го́споди; почто̀ роди́хсѧ; и҆лѝ вскѹ́ю не сотвори́сѧ ѹ҆тро́ба ма́тере моеѧ̀ мнѣ̀ гро́бъ, да не ви́дѣлъ бы́хъ трѹда̀ ї҆а́кѡвлѧ и҆ и҆знеможе́нїѧ ро́да ї҆и҃лева;

³⁶И҆ речѐ ко мнѣ̀: сочтѝ мѝ сїѧ҄, ѩ҆̀же є҆щѐ не прїидо́ша, и҆ собери́ ми разсѣ҄ѧнныѧ ка҄пли, и҆ ѡ҆зелени́ ми сѹхї҄ѧ цвѣты̀,

³⁷и҆ ѿве́рзи мѝ запє́ртаѧ храни́лища, и҆ и҆зведи́ ми заключє́нныѧ въ ни́хъ вѣ́тры: покажи́ ми гла́са ѡ҆́бразъ, и҆ тогда̀ покажѹ́ ти трѹ́дъ, є҆гѡ́же жада́еши ви́дѣти.

³⁸И҆ рѣ́хъ: ѽ, влдко гд҇и! кто́ бо є҆́сть, и҆́же мо́жетъ сїѧ҄ вѣ́дѣти, ра́звѣ то́й, и҆́же съ челѡвѣ́ки ѡ҆бита́нїѧ не и҆́мать;

³⁹а҆́зъ же безѹ́менъ, и҆ ка́кѡ могѹ̀ глаго́лати ѡ҆ си́хъ, ѡ҆ ни́хже менѐ вопроси́лъ є҆сѝ;

⁴⁰И҆ речѐ ко мнѣ̀: ѩ҆́коже не мо́жеши сотвори́ти є҆ди́но ѿ си́хъ, ѩ҆̀же глагѡ́лана сѹ́ть, та́кѡ не мо́жеши ѡ҆брѣстѝ сѹда̀ моегѡ̀, и҆лѝ въ коне́цъ любвѐ, ю҆́же лю́демъ ѡ҆бѣща́хъ.

⁴¹И҆ рѣ́хъ: но сѐ, гд҇и, ты̀ бли́з̾ є҆сѝ си́хъ, и҆̀же при концы̀ сѹ́ть, и҆ что̀ сотворѧ́тъ, и҆̀же пре́жде менє̀ бы́ша, и҆лѝ мы̀, и҆лѝ и҆̀же послѣдѝ на́съ;

⁴²И҆ гл҃а ко мнѣ̀: вѣнцѹ̀ ѹ҆подо́блю сѹ́дъ мо́й: ѩ҆́коже не послѣ́днихъ ѹ҆медле́нїе, та́кѡ нижѐ пе́рвыхъ ѹ҆скоре́нїе.

⁴³И҆ ѿвѣща́хъ и҆ реко́хъ: не мо́глъ ли є҆сѝ сотвори́ти си́хъ, и҆̀же сотворе́ни бы́ша, и҆ и҆̀же сѹ́ть, и҆ и҆̀же бѹ́дѹтъ вкѹ́пѣ, дабы̀ сеорѣ́е сѹ́дъ тво́й показа́лъ є҆сѝ;

⁴⁴И҆ ѿвѣща̀ ко мнѣ̀ и҆ речѐ: не мо́жетъ ѹ҆скори́ти творе́нїе над̾ творца̀, нижѐ снестѝ вѣ́къ си́хъ, и҆̀же въ не́мъ твори́ми сѹ́ть вкѹ́пѣ.

⁴⁵И҆ рѣ́хъ: ка́кѡ ре́клъ є҆сѝ рабѹ̀ твоемѹ̀, поне́же ѡ҆живлѧ́ѧ ѡ҆живи́лъ є҆сѝ ѿ тебє̀ сотворе́ное творе́нїе во є҆ди́но, и҆ сноси́ло творе́нїе: мо́жетъ и҆ нн҃ѣ носи́ти настоѧ́щихъ во є҆ди́но.

⁴⁶И҆ речѐ ко мнѣ̀: вопросѝ ложе́снъ же́нскихъ и҆ рече́ши къ не́й: и҆ а҆́ще роди́ши, вскѹ́ю по вре́мени; молѝ ѹ҆̀бо ю҆̀, да роди́тъ де́сѧть во є҆ди́но.

⁴⁷И҆ реко́хъ: не мо́жетъ, но по вре́мени.

⁴⁸И҆ речѐ ко мнѣ̀: и҆ а҆́зъ да́хъ ложесна̀ землѝ си҄мъ, и҆̀же посѣ́ѧни сѹ́ть на не́й по вре́мени:

⁴⁹и҆́мже бо ѡ҆́бразомъ младе́нецъ не роди́тъ тѣ́хъ, ѩ҆̀же ста́рыхъ сѹ́ть, та́кѡ а҆́зъ ѹ҆стро́ихъ ѿ менє̀ сотворе́ный вѣ́къ.

⁵⁰И҆ вопроси́хъ и҆ реко́хъ: поне́же ѹ҆жѐ дае́ши мѝ пѹ́ть, возглаго́лю пред̾ тобо́ю: и҆́бо ма́ти на́ша, ѡ҆ не́йже гл҃алъ є҆сѝ мнѣ̀, є҆щѐ млада̀ є҆́сть, а҆ ѹ҆жѐ къ ста́рости приближа́етсѧ.

⁵¹И҆ ѿвѣща̀ ко мнѣ̀ и҆ речѐ: вопросѝ тоѧ̀, ѩ҆́же роди́тъ, и҆ рече́тъ тебѣ̀.

⁵²Рече́ши бо є҆́й: вскѹ́ю, ко́ихъ родила̀ є҆сѝ, нн҃ѣ не сѹ́ть подо́бни тѣ҄мъ, и҆̀же пре́жде тебє̀, но ме́нши во́зрастомъ;

⁵³И҆ рече́тъ тебѣ̀ и҆ та̀: и҆ні́и сѹ́ть, и҆̀же въ ю҆́ности си́лы рожде́ни сѹ́ть, и҆ и҆ні́и и҆̀же под̾ вре́мѧ ста́рости ѡ҆скѹдѣва́ющымъ ложесна́мъ роди́шасѧ.

⁵⁴Разѹмѣ́й ѹ҆́бѡ и҆ ты̀, ѩ҆́кѡ ме́нши во́зрастомъ є҆стѐ ѿ тѣ́хъ, и҆̀же пре́жде ва́съ,

⁵⁵и҆ и҆̀же послѣдѝ ва́съ, ме́нши не́же вы̀, а҆́ки ѹ҆жѐ старѣ҄ющаѧсѧ творє́нїѧ, и҆ крѣ́пость ю҆́ности преминѹ́ющаѧ.

⁵⁶И҆ реко́хъ: молю̀, гд҇и, а҆́ще ѡ҆брѣто́хъ благода́ть пред̾ ѻ҆чи́ма твои́ма, покажѝ рабѹ̀ твоемѹ̀, и҆́мже посѣти́ши творе́нїе твоѐ.