Read Библия Церковнославянская г҃ е҆́здры 6 Bible Online

г҃ е҆́здры 6 - Библия Церковнославянская bible

г҃ е҆́здры 6

¹И҆ речѐ ко мнѣ̀: ѿ нача́ла крѹ́га земна́гѡ и҆ пре́жде ѡ҆снова́нїѧ и҆схо́дѡвъ вѣ́ка, и҆ пре́жде не́же бы́ша ды́шѹще собра҄нїѧ вѣ́трѡвъ

²и҆ пре́жде не́же возшѹмѣ́ша гла́си гро́мнїи, и҆ пре́жде не́же возсїѧ́ша свѣ́тлѡсти блиста́нїй и҆ пре́жде не́же ѹ҆тверди́шасѧ ѡ҆снова҄нїѧ ра҄йскаѧ,

³и҆ пре́жде не́же ви́дѣни бы́ша кра́снїи цвѣ́ти и҆ пре́жде не́же ѹ҆крѣпи́шасѧ си҄лы подви́жєныѧ, и҆ пре́жде не́же собра́шасѧ безчи́слєннаѧ вѡ́инства а҆́гг҃лскаѧ

⁴и҆ пре́жде не́же вознесо́шасѧ высѡты̀ воздѹ҄шныѧ, и҆ пре́жде не́жели наименова́хѹсѧ мѣ҄ры тве́рдей и҆ пре́жде не́жели возгорѣ́шасѧ пє́щи въ сїѡ́нѣ,

⁵и҆ пре́жде не́же и҆зслѣ҄дована бы́ша настоѧ҄щаѧ лѣ҄та и҆ пре́жде не́же ѿчѹжди́шасѧ си́хъ, и҆̀же нн҃ѣ согрѣша́ютъ, начина҄нїѧ, и҆ пре́жде не́же назна́менани бы́ша ті́и, и҆̀же вѣ́рѹ сокро́виществоваша:

⁶тогда̀ а҆́зъ помы́слихъ, и҆ сотворє́на сѹ́ть чрез̾ менѐ є҆ди́наго, а҆ не чрез̾ и҆но́го, и҆ коне́цъ бѹ́детъ мно́ю, а҆ не и҆ны́мъ.

⁷И҆ ѿвѣща́хъ и҆ реко́хъ: ко́е бѹ́детъ раздѣле́нїе време́нъ; и҆лѝ когда̀ пе́рвомѹ коне́цъ, а҆ дрѹго́мѹ нача́ло;

⁸И҆ речѐ ко мнѣ̀: ѿ а҆враа́ма да́же до ї҆саа́ка, є҆гда̀ рожде́ни сѹ́ть ѿ негѡ̀ ї҆а́кѡвъ и҆ и҆са́ѵъ, рѹка̀ ї҆а́кѡвлѧ держа́ше ѿ нача́ла пѧ́тѹ и҆са́ѵовѹ:

⁹коне́цъ бо вѣ́ка сегѡ̀ и҆са́ѵъ, а҆ дрѹга́гѡ нача́ло ї҆а́кѡвъ:

¹⁰человѣ́ка рѹка̀ междѹ̀ пѧто́ю и҆ рѹко́ю, и҆но́гѡ не и҆щѝ, є҆́здро.

¹¹И҆ ѿвѣща́хъ и҆ реко́хъ: ѽ, влдко гд҇и, а҆́ще ѡ҆брѣто́хъ благода́ть пред̾ ѻ҆чи́ма твои́ма,

¹²молю́ тѧ, да пока́жеши рабѹ̀ твоемѹ̀ коне́цъ зна́менїй твои́хъ, и҆́хже ча́сть показа́лъ є҆сѝ мнѣ̀ но́щи преше́дшїѧ.

¹³И҆ ѿвѣща̀ и҆ рече́ ми: воста́ни на но́ги твоѧ҄ и҆ ѹ҆слы́ши гла́съ и҆спо́лненъ шѹ́ма:

¹⁴и҆ бѹ́детъ а҆́ки колеба́нїе, а҆ не поколе́блетсѧ мѣ́сто, на не́мже стои́ши:

¹⁵сегѡ̀ ра́ди, є҆гда̀ гл҃етъ, ты̀ не ѹ҆жаса́йсѧ, и҆́бо ѡ҆ концы̀ сло́во и҆ ѡ҆снова́нїе землѝ разѹмѣ́етсѧ:

¹⁶поне́же ѡ҆ си́хъ ве́щехъ сло́во, трѧсе́тсѧ и҆ коле́блетсѧ: вѣ́сть бо, ѩ҆́кѡ коне́цъ и҆́хъ и҆́мать и҆змѣни́тисѧ.

¹⁷И҆ бы́сть є҆гда̀ слы́шахъ, воста́хъ на но́зѣ моѝ и҆ слы́шахъ: и҆ сѐ, гла́съ глаго́лющь, и҆ шѹ́мъ є҆гѡ̀ ѩ҆́кѡ шѹ́мъ во́дъ мно́гихъ.

¹⁸И҆ речѐ: сѐ, дні́е грѧдѹ́тъ, и҆ бѹ́детъ, внегда̀ приближа́тисѧ начнѹ̀, да посѣщѹ̀ ѡ҆бита́ющихъ на землѝ,

¹⁹и҆ є҆гда̀ и҆ска́ти начнѹ̀ ѿ си́хъ, и҆̀же непра́веднѡ повреди́ша непра́вдою свое́ю, и҆ є҆гда̀ и҆спо́лнитсѧ смире́нїе сїѡ́не,

²⁰и҆ є҆гда̀ назна́менаетсѧ вѣ́къ, и҆́же начина́етъ преходи́ти, сїѧ҄ зна́мєнїѧ сотворю̀: кни҄ги разгнѹ́тсѧ пред̾ лице́мъ тве́рди, и҆ всѝ ѹ҆́зрѧтъ вкѹ́пѣ,

²¹и҆ є҆динолѣ́тнїи младе́нцы возглаго́лютъ гла҄сы свои́ми, и҆ чрева҄тыѧ недозрѣ́лыхъ родѧ́тъ младе́нцевъ, трїе́хъ и҆ четы́рехъ мц҇ей, и҆ поживѹ́тъ и҆ воздви́жѹтсѧ:

²²и҆ а҆́бїе ѩ҆вѧ́тсѧ мѣста̀ насѣ҄ѧннаѧ ненасѣ҄ѧна, и҆ пѡ́лнаѧ храни҄лища внеза́пѹ ѡ҆брѧ́щѹтсѧ пра҄здна:

²³и҆ трѹба̀ вострѹ́битъ съ шѹ́момъ, ю҆́же є҆гда̀ всѝ ѹ҆слы́шатъ, а҆́бїе ѹ҆жа́снѹтсѧ:

²⁴и҆ бѹ́детъ въ то̀ вре́ м, воѡрѹжа́тсѧ прїѧ́телє на прїѧ́телей а҆́ки вразѝ, и҆ ѹ҆жа́снетсѧ землѧ̀ съ ни́ми, и҆ жи҄лы и҆сто́чникѡвъ ста́нѹтъ и҆ не стекѹ́тъ въ часѣ́хъ трїе́хъ:

²⁵и҆ бѹ́детъ, всѧ́къ, и҆́же ѡ҆ста́вленъ бѹ́детъ ѿ всѣ́хъ си́хъ, и҆́миже предреко́хъ тебѣ̀, то́й спасе́тсѧ и҆ ѹ҆́зритъ сп҇нїе моѐ и҆ коне́цъ вѣ́ка ва́шегѡ:

²⁶и҆ ѹ҆́зрѧтъ, и҆̀же прїѧ́ти сѹ́ть лю́дїе, и҆̀же сме́рти не вкѹси́ша ѿ рожде́нїѧ своегѡ̀, и҆ премѣни́тсѧ се́рдце ѡ҆бита́ющихъ и҆ ѡ҆брати́тсѧ въ чѹ́вство и҆но́е:

²⁷загла́дитбосѧ лѹка́вое, и҆ погаси́тсѧ ле́сть,

²⁸процвѣте́тъ же вѣ́ра, и҆ побѣди́тсѧ растлѣ́нїе, и҆ ѩ҆ви́тсѧ и҆́стина, ѩ҆́же без̾ плода̀ бѧ́ше дни҄ толи҄ки.

²⁹И҆ бы́сть, є҆гда̀ мѝ гл҃а, и҆ сѐ, ти́хѡ смотрѣ́хъ на́нь, пред̾ ни́мже стоѧ́хъ,

³⁰и҆ речѐ ко мнѣ̀ сїѧ҄: прїидо́хъ къ тебѣ̀ показа́ти вре́мѧ бѹ́дѹщїѧ но́щи:

³¹а҆́ще ѹ҆́бѡ па́ки помо́лишисѧ и҆ па́ки попости́шисѧ се́дмь дні́й, па́ки тебѣ̀ возвѣщѹ̀ ѿ си́хъ бо́лшыѧ ве́щы, въ де́нь въ ѻ҆́ньже слы́шахъ:

³²слы́шанъ бо є҆́сть гла́съ тво́й пред̾ вы́шнимъ: ви́дѣ бо крѣ́пкїй и҆справле́нїе твоѐ и҆ прови́дѣ чистотѹ̀, ю҆́же ѿ ю҆́ности твоеѧ̀ и҆мѣ́лъ є҆сѝ,

³³и҆ сегѡ̀ ра́ди посла́ мѧ показа́ти тебѣ̀ всѧ҄ ве́щы сїѧ҄ и҆ рещѝ тебѣ̀: дерза́й и҆ не бо́йсѧ,

³⁴и҆ не тщи́сѧ съ пе́рвыми времены̀ мы́слити сѹ́єтнаѧ, да не поспѣши́ши ѿ послѣ́днихъ време́нъ.

³⁵И҆ бы́сть по си́хъ, и҆ пла́кахсѧ па́ки и҆ та́кожде постѧ́хсѧ се́дмь дні́й, да и҆спо́лню трѝ седми҄цы, ѩ҆̀же речє́ны сѹ́ть мнѣ̀.

³⁶И҆ бы́сть во ѻ҆смѹ́ю но́щь, и҆ се́рдце моѐ смѹща́шесѧ па́ки во мнѣ̀, и҆ нача́хъ глаго́лати пред̾ вы́шнимъ:

³⁷распала́шесѧ бо дѹ́хъ мо́й ѕѣлѡ̀, и҆ дѹша̀ моѧ̀ ѹ҆ныва́ше.

³⁸И҆ реко́хъ: ѽ, гд҇и! гл҃ѧ гл҃алъ є҆сѝ ѿ нача́ла сотворе́нїѧ въ пе́рвый де́нь (гл҃ющь): да бѹ́детъ не́бо и҆ землѧ̀, и҆ твоѐ сло́во дѣ́ло соверше́нно:

³⁹и҆ бы́сть тогда̀ дх҃ъ, и҆ тма̀ ѡ҆́крестъ ноша́шесѧ и҆ молча́нїе: шѹ́мъ гла́са человѣ́ча є҆щѐ не бѣ̀ (сотворе́нъ) ѿ тебє̀:

⁴⁰тогда̀ гл҃алъ є҆сѝ, да ѿ сокро́вищъ твои́хъ произнесе́тсѧ свѣ́тъ свѣ́тлый, и҆́мже бы ѩ҆ви́лосѧ дѣ́ло твоѐ.

⁴¹И҆ въ де́нь вторы́й созда́лъ є҆сѝ дѹ́хъ тве́рди и҆ повелѣ́лъ є҆сѝ є҆́й, да раздѣли́тъ и҆ раздѣле́нїе сотвори́тъ междѹ̀ вода́ми, да ча́сть нѣ́каѧ вы́ше ѹ҆стѹ́питъ и҆ ча́сть втора́ѧ ни́зѹ пребыва́етъ.

⁴²И҆ въ тре́тїй де́нь повелѣ́лъ є҆сѝ вода́мъ собра́тисѧ въ седмѹ́ю ча́сть землѝ, ше́сть же часте́й ѡ҆сѹши́лъ и҆ сохрани́лъ є҆сѝ, є҆́же бы пред̾ тобо́ю слѹжи́ли насѣ҄ѧны ѿ бг҃а и҆ ѹ҆стро́єны:

⁴³сло́во бо твоѐ и҆зы́де, и҆ дѣ́ло а҆́бїе творѧ́шесѧ:

⁴⁴и҆зы́де бо а҆́бїе пло́дъ мно́жества безмѣ́рнагѡ, и҆ жела҄нїѧ вкѹше́нїѧ разли҄чнаѧ, и҆ цвѣ́ти ви́домъ непремѣ́ннымъ, и҆ благово́нїе ѡ҆бонѧ́нїѧ неизслѣ́дованнагѡ, и҆ въ де́нь тре́тїй сїѧ҄ сотворє́на сѹ́ть.

⁴⁵Въ четве́ртый же де́нь повелѣ́лъ є҆сѝ со́лнечнѣй бы́ти свѣ́тлости, лѹ́нномѹ свѣ́тѹ и҆ ѕвѣ́здъ расположе́нїю:

⁴⁶и҆ повелѣ́лъ є҆сѝ и҆̀мъ, да слѹ́жатъ и҆мѹ́щемѹ бы́ти созда́нномѹ человѣ́кѹ.

⁴⁷Въ пѧ́тый же де́нь ре́клъ є҆сѝ седмѣ́й ча́сти, и҆дѣ́же бѧ́ше вода̀ собрана̀, да произведе́тъ живѡ́тнаѧ и҆ лета҄ющаѧ и҆ ры҄бы, и҆ та́кѡ творѧ́шесѧ:

⁴⁸вода̀ нѣма̀ и҆ бездѹ́шна, ѩ҆̀же бж҃їимъ манове́нїемъ повелѣва́хѹсѧ, живѡ́тнаѧ творѧ́ше, да ѿ сегѡ̀ ди҄внаѧ твоѧ҄ ро́дове возвѣща́ютъ:

⁴⁹и҆ тогда̀ сохрани́лъ є҆сѝ двѣ̀ дѹши҄: и҆́мѧ є҆ди́нѣй назва́лъ є҆сѝ є҆нѡ́хъ, и҆ и҆́мѧ вторѣ́й назва́лъ є҆сѝ леѵїаѳа́мъ,

⁵⁰и҆ разлѹчи́лъ є҆сѝ ѧ҆̀ є҆ди́но ѿ дрѹга́гѡ: не бо̀ можа́ше седма́ѧ ча́сть, и҆дѣ́же бѧ́ше вода̀ собрана̀, вмѣсти́ти и҆̀хъ:

⁵¹и҆ да́лъ є҆сѝ є҆нѡ́хѹ є҆ди́нѹ ча́сть, ѩ҆́же ѡ҆сѹшена̀ є҆́сть въ тре́тїй де́нь, да ѡ҆бита́етъ на не́й, и҆дѣ́же сѹ́ть го́ръ ты́сѧща:

⁵²леѵїаѳа́мѹ же да́лъ є҆сѝ седмѹ́ю ча́сть мо́крѹю и҆ сохрани́лъ є҆сѝ ю҆̀, да бѹ́детъ въ снѣ́дь, и҆̀мже хо́щеши и҆ когда̀ хо́щеши.

⁵³Въ шесты́й же де́нь повелѣ́лъ є҆сѝ землѝ, да сотвори́тъ пред̾ тобо́ю скоты̀ и҆ ѕвѣ҄ри и҆ га́ды,

⁵⁴и҆ свы́ше си́хъ (сотвори́лъ є҆сѝ) а҆да́ма, є҆го́же поста́вилъ є҆сѝ вожда̀ и҆ кнѧ́зѧ над̾ всѣ́ми сотворе́нными, ѩ҆̀же сотвори́лъ є҆сѝ, и҆ ѿ негѡ̀ роди́мсѧ мы̀ всѝ, и҆̀хже и҆збра́лъ є҆сѝ лю́ди.

⁵⁵Сїѧ҄ же всѧ҄ реко́хъ пред̾ тобо́ю, гд҇и, ѩ҆́кѡ ра́ди на́съ созда́лъ є҆сѝ вѣ́къ:

⁵⁶про́чыѧ же ѩ҆зы́ки ѿ а҆да́ма рождє́ны, ре́клъ є҆сѝ ѡ҆́ныѧ ничто́же бы́ти: ѩ҆́кѡ сли́нѣ ѹ҆подо́блени сѹ́ть, и҆ ѩ҆́кѡ ка́пленїе ѿ сосѹ́да ѹ҆подо́билъ є҆сѝ мно́жество и҆́хъ:

⁵⁷и҆ нн҃ѣ, гд҇и, сѐ, ті́и ѩ҆зы́цы, и҆̀же ни во что́же вмѣне́ни сѹ́ть, нача́ша владѣ́ти на́ми и҆ пожира́ти на́съ:

⁵⁸мы́ же лю́дїе твоѝ, и҆̀хже наре́клъ є҆сѝ пе́рвенцемъ є҆диноро́днымъ возлю́бленнымъ твои́мъ, пре́дани є҆смы̀ въ рѹ́ки и҆́хъ:

⁵⁹и҆ а҆́ще ра́ди на́съ сотворе́нъ бы́сть вѣ́къ, вскѹ́ю достоѧ́нїѧ не ѡ҆держи́мъ съ вѣ́комъ; доко́лѣ сїѧ҄ (бѹ́дѹтъ);