Read Библия Церковнославянская г҃ е҆́здры 7 Bible Online

г҃ е҆́здры 7 - Библия Церковнославянская bible

г҃ е҆́здры 7

¹И҆ бы́сть є҆гда̀ сконча́хъ глаго́лати словеса̀ сїѧ҄, по́сланъ є҆́сть ко мнѣ̀ а҆́гг҃лъ, и҆́же по́сланъ бѣ̀ ко мнѣ̀ въ прє́жнїѧ но́щы,

²и҆ речѐ ко мнѣ̀: воста́ни, є҆́здро, и҆ слы́ши словеса̀, ѩ҆̀же прїидо́хъ глаго́лати къ тебѣ̀.

³И҆ реко́хъ: глаго́ли, го́споди мо́й. И҆ речѐ ко мнѣ̀: мо́ре поста́влено є҆́сть въ простра́ннѣ мѣ́стѣ, дабы̀ бы́ло глѹбо́ко и҆ безмѣ́рно,

⁴бѹ́детъ же є҆мѹ̀ вхо́дъ въ тѣ́снѣ мѣ́стѣ поста́вленъ, дабы̀ подо́бно рѣка́мъ бы́ло:

⁵кто́ бо хотѧ́й восхо́щетъ вни́ти въ мо́ре и҆ ви́дѣти є҆̀, и҆лѝ госпо́дствовати и҆́мъ, а҆́ще не про́йдетъ тѣсноты̀, въ широтѹ̀ ка́кѡ прїитѝ мо́жетъ;

⁶и҆ па́ки и҆́но: гра́дъ со́зданъ є҆́сть и҆ поста́вленъ на мѣ́стѣ полево́мъ, є҆́сть же и҆спо́лненъ всѣ́ми благи́ми:

⁷вхо́дъ є҆гѡ̀ тѣ́сенъ и҆ въ стремни́нѣ поста́вленъ, дабы̀ ѡ҆деснѹ́ю ѻ҆́гнь бы́лъ, ѡ҆шѹ́юю же вода̀ глѹбока̀:

⁸стезѧ́ же є҆́сть є҆ди́на то́кмѡ междѹ̀ и҆́ма проложена̀, си́рѣчь междѹ̀ ѻ҆гне́мъ и҆ водо́ю, є҆ди́нѹ то́кмѡ стѹпе́нь человѣ́чѹ могѹ́щаѧ вмѣсти́ти:

⁹є҆гда̀ ѹ҆́бѡ да́стсѧ гра́дъ се́й человѣ́кѹ въ достоѧ́нїе, а҆́ще не про́йдетъ когда̀ предположе́ннагѡ бѣ́дства, ка́кѡ прїи́метъ достоѧ́нїе своѐ;

¹⁰И҆ реко́хъ: та́кѡ, гд҇и. И҆ речѐ ко мнѣ̀: та́кѡ є҆́сть и҆ ї҆и҃лева ча́сть:

¹¹и҆́хъ бо ра́ди сотвори́хъ вѣ́къ, и҆ є҆гда̀ престѹпи́лъ є҆́сть а҆да́мъ законоположє́нїѧ моѧ҄, сѹжде́но бы́сть є҆́же сотворе́но є҆́сть:

¹²и҆ сотвори́шасѧ вхо́ди сегѡ̀ вѣ́ка тѣ́сни и҆ болѣ́зненни и҆ трѹ́дни, ма́ли же и҆ лѹка́ви, и҆ бѣ́дствъ по́лни и҆ трѹдо́мъ вели́кимъ ѹ҆твержде́нни,

¹³и҆́бо бо́лшагѡ вѣ́ка вхо́ди простра́нни и҆ без̾ѡпа́сни и҆ творѧ́щїи безсме́ртный пло́дъ:

¹⁴а҆́ще ѹ҆́бѡ входѧ́щїи не вни́дѹтъ, и҆̀же живѹ́тъ, въ тѣ҄снаѧ и҆ сѹ́єтнаѧ сїѧ҄, не возмо́гѹтъ прїѧ́ти, ѩ҆̀же сѹ́ть ѹ҆готѡ́вана:

¹⁵нн҃ѣ ѹ҆́бѡ вскѹ́ю ты̀ смѹща́ешисѧ, є҆гда̀ є҆сѝ тлѣ́ненъ, и҆ что̀ мѧте́шисѧ ты̀, є҆гда̀ є҆сѝ сме́ртенъ;

¹⁶и҆ вскѹ́ю не прїѧ́лъ є҆сѝ въ се́рдцы твое́мъ, є҆́же є҆́сть бѹ́дѹщее, но є҆́же настоѧ́щее;

¹⁷Ѿвѣща́хъ и҆ рѣ́хъ: влдко гд҇и! сѐ, ѹ҆стро́илъ є҆сѝ зако́номъ твои́мъ, ѩ҆́кѡ пра́веднїи наслѣ́дѧтъ сїѧ҄, нечести́вїи же поги́бнѹтъ:

¹⁸пра́веднїи же понесѹ́тъ тѣснотѹ̀ надѣ́ющесѧ простра́нныхъ: и҆̀же бо нечести́вѡ сотвори́ша, и҆ тѣснотѹ̀ пострада́вше простра́нныхъ не ѹ҆́зрѧтъ.

¹⁹И҆ речѐ ко мнѣ̀: нѣ́сть сѹдїѧ̀ па́че бг҃а, ни разѹмѣва́ѧй па́че вы́шнѧгѡ:

²⁰погиба́ютъ бо мно́зи настоѧ́щїи, поне́же не радѧ́тъ ѡ҆ предположе́ннѣмъ бж҃їи зако́нѣ:

²¹повелѣва́ѧ бо повелѣ̀ бг҃ъ приходѧ́щымъ, є҆гда̀ прїидо́ша, что̀ творѧ́ще жи́ви бѹ́дѹтъ, и҆ что̀ хранѧ́ще казни́ми не бѹ́дѹтъ:

²²ті́и бо не сѹ́ть ѹ҆вѣща́ни, и҆ проти́вишасѧ є҆мѹ̀, и҆ положи́ша себѣ̀ помышле́нїе сѹ́етное,

²³и҆ предста́виша себѣ̀ ѡ҆бхожде́нїе грѣхѡ́въ, и҆ глаго́лаша вы́шнемѹ не бы́ти, и҆ пѹті́й є҆гѡ̀ не позна́ша,

²⁴и҆ зако́нъ є҆гѡ̀ ѹ҆ничижи́ша, и҆ ѡ҆бѣтѡва́нїѧ є҆гѡ̀ ѿверго́ша, и҆ въ зако́нѣхъ є҆гѡ̀ вѣ́ры не и҆мѣ́ша, и҆ дѣ́лъ є҆гѡ̀ не соверши́ша:

²⁵тогѡ̀ ра́ди, є҆́здро, тшє́тнаѧ тщє́тнымъ и҆ пѡ́лнаѧ пѡ́лнымъ:

²⁶сѐ, вре́мѧ прїи́детъ, и҆ бѹ́детъ, є҆гда̀ прїи́дѹтъ зна́мєнїѧ, ѩ҆̀же предреко́хъ тебѣ̀, и҆ ѩ҆ви́тсѧ невѣ́ста, и҆ ѩ҆влѧ́ющисѧ пока́жетсѧ, ѩ҆́же нн҃ѣ кры́етсѧ ѿ землѝ,

²⁷и҆ всѧ́къ, и҆́же и҆зба́вленъ є҆́сть ѿ предрѣче́нныхъ ѕлы́хъ, то́й ѹ҆́зритъ ди҄внаѧ моѧ҄:

²⁸ѿкры́етбосѧ сн҃ъ мо́й ї҆и҃съ съ тѣ́ми, и҆̀же съ ни́мъ сѹ́ть, и҆ насладѧ́тсѧ, и҆̀же ѡ҆ста́влени сѹ́ть, въ лѣ́тѣхъ четы́рехъ стѣ́хъ:

²⁹и҆ бѹ́детъ по лѣ́тѣхъ си́хъ, и҆ ѹ҆́мретъ сн҃ъ мо́й хр҇то́съ, и҆ всѝ и҆̀же дыха́нїе и҆́мѹтъ человѣ́цы,

³⁰и҆ ѡ҆брати́тсѧ вѣ́къ въ дре́внее молча́нїе дні́й се́дмь, ѩ҆́коже въ пре́жнихъ сѹдѣ́хъ, та́кѡ ѩ҆́кѡ да никто̀ ѡ҆ста́нетсѧ:

³¹и҆ бѹ́детъ по дне́хъ седмѝ, и҆ возбѹ́дитсѧ, и҆́же не ѹ҆̀ бди́тъ, вѣ́къ и҆ ѹ҆́мретъ растлѣ́нный,

³²и҆ землѧ̀ и҆зда́стъ тѣ́хъ, и҆̀же въ не́й спѧ́тъ, и҆ пра́хъ, и҆̀же въ не́мъ молча́нїемъ ѡ҆бита́ютъ, и҆ храни҄лища и҆здадѹ́тъ вда҄нныѧ и҆̀мъ дѹ́шы:

³³и҆ ѿкры́етсѧ вы́шнїй на пр҇то́лѣ сѹда̀, и҆ про́йдѹтъ бѣды҄, и҆ долготерпѣ́нїе собере́тсѧ:

³⁴сѹ́дъ же є҆ди́нъ пребѹ́детъ, и҆́стина ста́нетъ, и҆ вѣ́ра возмо́жетъ,

³⁵и҆ дѣ́ло послѣ́довати бѹ́детъ, и҆ мзда̀ пока́жетсѧ, и҆ пра҄вды воспрѧ́нѹтъ, и҆ непра҄вды не воз̾ѡблада́ютъ.

³⁶И҆ реко́хъ: пе́рвый а҆враа́мъ ѡ҆ содо́млѧнѣхъ моли́лсѧ, и҆ мѡѷсе́й за ѻ҆тцы̀ согрѣ́шшыѧ въ пѹсты́ни,

³⁷и҆ и҆̀же по не́мъ за ї҆и҃лѧ во дни҄ а҆ха́за и҆ самѹи́ла,

³⁸даві́дъ ѡ҆ сокрѹше́нїи, и҆ соломѡ́нъ за си́хъ, и҆̀же прїидо́ша во ѡ҆свѧще́нїе,

³⁹и҆ и҆лїа̀ за тѣ́хъ, и҆̀же до́ждь прїѧ́ша, и҆ за ме́ртва, да ѡ҆живе́тъ,

⁴⁰и҆ є҆зекі́а за лю́ди во дни҄ сеннахирі́ма, и҆ мно́зи за мно́гихъ:

⁴¹а҆́ще ѹ҆̀бо нн҃ѣ, є҆гда̀ тлѣ́нное возрастѐ, и҆ непра́вда ѹ҆мно́жена є҆́сть, и҆ моли́шасѧ пра́веднїи за нечести́выхъ, вскѹ́ю и҆ нн҃ѣ та́кѡ не бѹ́детъ;

⁴²И҆ ѿвѣща̀ ко мнѣ̀ и҆ речѐ: настоѧ́щїй вѣ́къ не є҆́сть коне́цъ, сла́ва въ не́мъ ча́стаѧ пребыва́етъ: тогѡ̀ ра́ди моли́шасѧ за немощны́хъ:

⁴³де́нь бо сѹ́дный бѹ́детъ коне́цъ вре́мене сегѡ̀ и҆ нача́ло вре́мене бѹ́дѹщагѡ безсме́ртїѧ, въ не́мже мимои́де тлѣ́нїе,

⁴⁴разрѹши́сѧ невозде́ржность, ѿсѣ́чено є҆́сть невѣ́рїе, возрасте́ же пра́вда, возсїѧ̀ и҆́стина:

⁴⁵тогда̀ бо никто́же мо́жетъ спастѝ того̀, и҆́же поги́бе, ни потопи́ти того̀, и҆́же побѣдѝ.

⁴⁶И҆ ѿвѣща́хъ и҆ реко́хъ: сїѐ є҆́сть сло́во моѐ пе́рвое и҆ послѣ́днее, ѩ҆́кѡ лѹ́чше бѣ̀ не да́ти землѝ а҆да́мѹ, и҆лѝ є҆гда̀ ѹ҆жѐ дана̀ бы́сть, ѹ҆держа́ти є҆го̀, да не согрѣши́тъ:

⁴⁷что́ бо по́льзѹетъ человѣ́кѡмъ въ настоѧ́щемъ вѣ́цѣ жи́ти въ ско́рби, и҆ мє́ртвымъ ча́ѧти ка́зни;

⁴⁸ѽ, что̀ сотвори́лъ є҆сѝ, а҆да́ме; а҆́ще бо ты̀ согрѣши́лъ є҆сѝ, не є҆ди́нагѡ тебє̀ сотвори́сѧ паде́нїе, но и҆ на́ше, и҆̀же ѿ тебє̀ произыдо́хомъ:

⁴⁹что́ бо по́льзѹетъ на́мъ, а҆́ще ѡ҆бѣща́но є҆́сть на́мъ безсме́ртное вре́мѧ, мы́ же смє́ртнаѧ дѣла̀ содѣ́лахомъ;

⁵⁰и҆ ѩ҆́кѡ предрѣче́нно є҆́сть на́мъ вѣ́чное ѹ҆пова́нїе, мы́ же стропти́вїи сѹ́етни сотвори́хомсѧ;

⁵¹и҆ ѩ҆́кѡ ѿложє́на сѹ́ть на́мъ жили҄ща здра́вїѧ и҆ поко́ѧ, мы́ же лѹка́вѡ жи́ли є҆смы̀;

⁵²и҆ ѩ҆́кѡ пред̾ѹгото́вана є҆́сть сла́ва вы́шнѧгѡ защити́ти тѣ́хъ, и҆̀же по́здѣ пожи́ша, мы́ же по стро́пѡтнымъ пѹтє́мъ ходи́хомъ;

⁵³и҆ ѩ҆́кѡ пока́занъ бѹ́детъ ра́й, є҆гѡ́же пло́дъ нерастлѣ́нъ пребыва́етъ, въ не́мже є҆́сть поко́й и҆ врачба̀,

⁵⁴мы́ же не вни́демъ, въ неблагода́рныхъ бо мѣ́стѣхъ пожи́хомъ;

⁵⁵и҆ ѩ҆́кѡ па́че ѕвѣ́здъ возблиста́ютъ ли́ца тѣ́хъ, и҆̀же воздержа́нїе и҆мѣ́ѧхѹ, на҄ша же ли́ца па́че тмы̀ чє́рна;

⁵⁶и҆́бо не помышлѧ́хомъ живѹ́ще, є҆гда̀ беззако́нїе твори́хомъ, ѩ҆́кѡ и҆́мамы по сме́рти терпѣ́ти.

⁵⁷И҆ ѿвѣща̀ и҆ речѐ: сїѐ є҆́сть помышле́нїе по́двига, и҆́мже подвиза́тисѧ бѹ́детъ на землѝ рожде́нный человѣ́къ,

⁵⁸да а҆́ще побѣжде́нъ бѹ́детъ, претерпи́тъ є҆́же ре́клъ є҆сѝ, а҆́ще же побѣди́тъ, воспрїи́метъ є҆́же гл҃ю:

⁵⁹поне́же се́й є҆́сть живо́тъ, ѡ҆ не́мже мѡѷсе́й речѐ, є҆гда̀ живѧ́ше, къ лю́демъ, глаго́лѧ: и҆зберѝ себѣ̀ живо́тъ, да живе́ши:

⁶⁰не вѣ́роваша же є҆мѹ̀, но ни по́слѣ є҆гѡ̀ про҇ро́кѡмъ, нижѐ мнѣ̀, и҆́же гл҃алъ є҆́смь и҆̀мъ,

⁶¹ѩ҆́кѡ не была́ бы ско́рбь въ погѹбле́нїе и҆́хъ, ѩ҆́коже бѹ́детъ ра́дость тѣ҄мъ, и҆̀мже ѹ҆совѣ́товано є҆́сть сп҇нїе.

⁶²И҆ ѿвѣша́хъ и҆ реко́хъ: вѣ́мъ, гд҇и, ѩ҆́кѡ назва́нъ є҆́сть вы́шнїй мл҇рдъ, поне́же поми́лѹетъ тѣ́хъ, и҆̀же не ѹ҆̀ въ вѣ́къ прїидо́ша,

⁶³и҆ ѩ҆́кѡ ми́лѹетъ тѣ́хъ, и҆̀же житїѐ творѧ́тъ по зако́нѹ є҆гѡ̀,

⁶⁴и҆ долготерпѣли́въ є҆́сть, ѩ҆́кѡ долготерпи́тъ си҄мъ, и҆̀же согрѣши́ша, ѩ҆́кѡ своемѹ̀ творе́нїю,

⁶⁵и҆ ще́дръ є҆́сть да́тель, ѩ҆́кѡ даѧ́ти хо́щетъ по тре́бованїємъ,

⁶⁶и҆ многомл҇рдъ, поне́же ѹ҆множа́етъ мл҇рдїе тѣ҄мъ, и҆̀же и҆ настоѧ́щїи сѹ́ть, и҆ и҆̀же минѹ́ша, и҆ и҆̀же бѹ́дѹтъ:

⁶⁷а҆́ще бо не ѹ҆мно́житъ мл҇рдїѧ своегѡ̀, не ѡ҆живе́тъ вѣ́къ съ тѣ́ми, и҆̀же наслѣ́дѧтъ въ не́мъ, и҆ да́рствѹетъ:

⁶⁸поне́же а҆́ще бы не да́рствовалъ ѿ бл҃гости своеѧ̀, да ѡ҆блегча́тсѧ сі́и, и҆̀же беззако́нїе сотвори́ша ѿ свои́хъ беззако́нїй, то не возмогла́ бы десѧтоты́сѧщнаѧ ча́сть жива̀ бы́ти человѣ́кѡвъ:

⁶⁹и҆ сѹдїѧ̀, а҆́ще бы не прости́лъ ѡ҆́нымъ, и҆̀же и҆зцѣле́ни сѹ́ть сло́вомъ є҆гѡ̀, и҆ потреби́лъ бы мно́жество ра́спрей,

⁷⁰не бы̀ ѡ҆ста́лисѧ бы́ша въ безчи́сленнѣмъ мно́жествѣ, ра́звѣ ма́ли ѕѣлѡ̀.