Read Библия Церковнославянская Ѿ ма́рка 11 Bible Online

Ѿ ма́рка 11 - Библия Церковнославянская bible

Ѿ ма́рка 11

¹И҆ є҆гда̀ прибли́жи[ша]сѧ во ї҆ер҇ли́мъ, въ виѳсфагі́ю и҆ виѳа́нїю, къ горѣ̀ є҆леѡ́нстѣй, посла̀ два̀ ѿ ѹ҆чн҃къ свои́хъ

²и҆ гл҃а и҆́ма: и҆ди́та въ ве́сь, ѩ҆́же є҆́сть прѧ́мѡ ва́ма: и҆ а҆́бїе вхѡдѧ́ща въ ню̀, ѡ҆брѧ́щета жребѧ̀ привѧ́зано, на не́же никто́же ѿ человѣ҄къ всѣ́де: ѿрѣ́шша є҆̀, приведи́та:

³и҆ а҆́ще кто̀ ва́ма рече́тъ: что̀ твори́та сїѐ; рцы́та, ѩ҆́кѡ гд҇ь тре́бѹетъ є҆̀: и҆ а҆́бїе по́слетъ є҆̀ сѣ́мѡ.

⁴И҆до́ста же, и҆ ѡ҆брѣто́ста жребѧ̀ привѧ́зано при две́рехъ внѣ̀ на распѹ́тїи, и҆ ѿрѣши́ста є҆̀.

⁵И҆ нѣ́цыи ѿ стоѧ́щихъ тѹ̀ глаго́лахѹ и҆́ма: что̀ дѣ́ета ѿрѣша҄юща жребѧ̀;

⁶Ѡ҆́на же рѣ́ста и҆̀мъ, ѩ҆́коже заповѣ́да и҆́ма ї҆и҃съ: и҆ ѡ҆ста́виша ѧ҆̀.

⁷И҆ приведо́ста жребѧ̀ ко ї҆и҃сови: и҆ возложи́ша на нѐ ри҄зы своѧ҄, и҆ всѣ́де на нѐ.

⁸Мно́зи же ри҄зы своѧ҄ постла́ша по пѹтѝ: дрѹзі́и же ва҄їа рѣ́захѹ ѿ дре́вїѧ и҆ постила́хѹ по пѹтѝ.

⁹И҆ предходѧ́щїи и҆ в̾слѣ́дъ грѧдѹ́щїи вопїѧ́хѹ, глаго́люще: ѡ҆са́нна, блг҇ве́нъ грѧды́й во и҆́мѧ гд҇не,

¹⁰блг҇ве́но грѧдѹ́щее цр҇тво во и҆́мѧ гд҇а ѻ҆тца̀ на́шегѡ дв҃да: ѡ҆са́нна въ вы́шнихъ.

¹¹(За҄ 50.) И҆ вни́де во ї҆ер҇ли́мъ ї҆и҃съ и҆ въ це́рковь: и҆ соглѧ́давъ всѧ҄, по́здѣ ѹ҆жѐ сѹ́щѹ часѹ̀, и҆зы́де въ виѳа́нїю со ѻ҆бѣмана́десѧте.

¹²И҆ наѹ́трїе и҆зше́дшымъ и҆̀мъ ѿ виѳа́нїи, взалка̀:

¹³и҆ ви́дѣвъ смоко́вницѹ и҆здале́ча, и҆мѹ́щѹ ли́ствїе, прїи́де, а҆́ще ѹ҆́бѡ что̀ ѡ҆брѧ́щетъ на не́й: и҆ прише́дъ къ не́й, ничесѡ́же ѡ҆брѣ́те, то́кмѡ ли́ствїе: не ѹ҆̀ бо бѣ̀ вре́мѧ смо́квамъ.

¹⁴И҆ ѿвѣща́въ ї҆и҃съ речѐ є҆́й: да не ктомѹ̀ ѿ тебє̀ во вѣ́ки никто́же плода̀ снѣ́сть. И҆ слы́шахѹ ѹ҆чн҃цы̀ є҆гѡ̀.

¹⁵И҆ прїидо́ша (па́ки) во ї҆ер҇ли́мъ. И҆ вше́дъ ї҆и҃съ въ це́рковь, нача́тъ и҆згони́ти продаю́щыѧ и҆ кѹпѹ́ющыѧ въ це́ркви: и҆ трапє́зы торжникѡ́мъ и҆ сѣда҄лища продаю́щихъ гѡ́лѹби и҆спрове́рже:

¹⁶и҆ не даѧ́ше, да кто̀ мимонесе́тъ сосѹ́дъ сквозѣ̀ це́рковь.

¹⁷И҆ ѹ҆ча́ше, гл҃ѧ и҆̀мъ: нѣ́сть ли пи́сано, ѩ҆́кѡ хра́мъ мо́й хра́мъ моли́твы нарече́тсѧ всѣ҄мъ ѩ҆зы́кѡмъ; вы́ же сотвори́сте є҆го̀ верте́пъ разбо́йникѡмъ.

¹⁸И҆ слы́шаша кни́жницы и҆ а҆рхїере́є, и҆ и҆ска́хѹ, ка́кѡ є҆го̀ погѹбѧ́тъ: боѧ́хѹбосѧ є҆гѡ̀, ѩ҆́кѡ ве́сь наро́дъ дивлѧ́шесѧ ѡ҆ ѹ҆ч҃нїи є҆гѡ̀.

¹⁹И҆ ѩ҆́кѡ по́здѣ бы́сть, и҆схожда́ше во́нъ и҆з̾ гра́да.

²⁰И҆ ѹ҆́трѡ мимоходѧ́ще, ви́дѣша смоко́вницѹ и҆зсо́хшѹ и҆з̾ коре́нїѧ.

²¹И҆ воспомѧнѹ́въ пе́тръ глаго́ла є҆мѹ̀: раввї̀, ви́ждь, смоко́вница, ю҆́же проклѧ́лъ є҆сѝ, ѹ҆́сше.

²²И҆ ѿвѣща́въ ї҆и҃съ гл҃а и҆̀мъ:

²³(За҄ 51.) и҆мѣ́йте вѣ́рѹ бж҃їю: а҆ми́нь бо гл҃ю ва́мъ, ѩ҆́кѡ, и҆́же а҆́ще рече́тъ горѣ̀ се́й: дви́гнисѧ и҆ ве́рзисѧ въ мо́ре: и҆ не размы́слитъ въ се́рдцы свое́мъ, но вѣ́рѹ и҆́метъ, ѩ҆́кѡ є҆́же глаго́летъ, быва́етъ: бѹ́детъ є҆мѹ̀, є҆́же а҆́ще рече́тъ:

²⁴сегѡ̀ ра́ди гл҃ю ва́мъ: всѧ҄ є҆ли҄ка а҆́ще молѧ́щесѧ про́сите, вѣ́рѹйте, ѩ҆́кѡ прїе́млете: и҆ бѹ́детъ ва́мъ:

²⁵и҆ є҆гда̀ стоитѐ молѧ́щесѧ, ѿпѹща́йте, а҆́ще что̀ и҆́мате на кого̀, да и҆ ѻ҆ц҃ъ ва́шъ, и҆́же є҆́сть на нб҃сѣ́хъ, ѿпѹ́ститъ ва́мъ согрѣшє́нїѧ ва҄ша:

²⁶а҆́ще ли же вы̀ не ѿпѹща́ете, ни ѻ҆ц҃ъ ва́шъ, и҆́же є҆́сть на нб҃сѣ́хъ, ѿпѹ́ститъ ва́мъ согрѣше́нїй ва́шихъ.

²⁷(За҄ 52.) И҆ прїидо́ша па́ки во ї҆ер҇ли́мъ. И҆ въ це́ркви ходѧ́щѹ є҆мѹ̀, прїидо́ша къ немѹ̀ а҆рхїере́є и҆ кни́жницы и҆ ста́рцы

²⁸и҆ глаго́лаша є҆мѹ̀: ко́ею ѡ҆́бластїю сїѧ҄ твори́ши; и҆ кто̀ тѝ ѡ҆́бласть сїю̀ дадѐ, да сїѧ҄ твори́ши;

²⁹Ї҆и҃съ же ѿвѣща́въ речѐ и҆̀мъ: вопрошѹ́ вы и҆ а҆́зъ словесѐ є҆ди́нагѡ, и҆ ѿвѣща́йте мѝ: и҆ рекѹ̀ ва́мъ, ко́ею ѡ҆́бластїю сїѧ҄ творю̀:

³⁰кр҃ще́нїе ї҆ѡа́нново съ нб҃се́ ли бѣ̀, и҆лѝ ѿ человѣ҄къ; ѿвѣща́йте мѝ.

³¹И҆ мы́слѧхѹ въ себѣ̀, глаго́люще: а҆́ще рече́мъ, съ нб҃сѐ, рече́тъ: почто̀ ѹ҆̀бо не вѣ́ровасте є҆мѹ̀;

³²но а҆́ще рече́мъ, ѿ человѣ҄къ: боѧ́хѹсѧ люді́й: вси́ бо и҆мѣ́ѧхѹ ї҆ѡа́нна, ѩ҆́кѡ вои́стиннѹ про҇ро́къ бѣ̀.

³³И҆ ѿвѣща́вше глаго́лаша ї҆и҃сови: не вѣ́мы. И҆ ѿвѣща́въ ї҆и҃съ гл҃а и҆̀мъ: ни а҆́зъ гл҃ю ва́мъ, ко́ею ѡ҆́бластїю сїѧ҄ творю̀.