Read Библия Церковнославянская Ѿ лѹкѝ 10 Bible Online

Ѿ лѹкѝ 10 - Библия Церковнославянская bible

Ѿ лѹкѝ 10

¹По си́хъ же ѩ҆вѝ гд҇ь и҆ и҆нѣ́хъ се́дмьдесѧтъ, и҆ посла̀ и҆̀хъ по двѣма̀ пред̾ лице́мъ свои́мъ во всѧ́къ гра́дъ и҆ мѣ́сто, а҆́може хотѧ́ше са́мъ и҆тѝ:

²гл҃аше же къ ни҄мъ: жа́тва ѹ҆́бѡ мно́га, дѣ́лателей же ма́лѡ: моли́тесѧ ѹ҆̀бо гд҇и́нѹ жа́твѣ, да и҆зведе́тъ дѣ́латєли на жа́твѹ свою̀.

³И҆ди́те: сѐ а҆́зъ посыла́ю вы̀ ѩ҆́кѡ а҆́гнцы посредѣ̀ волкѡ́въ.

⁴Не носи́те влага́лища, ни пи́ры, ни сапѡ́гъ и҆ ни кого́же на пѹтѝ цѣлѹ́йте.

⁵Во́ньже а҆́ще до́мъ вни́дете, пе́рвѣе глаго́лите: ми́ръ до́мѹ семѹ̀:

⁶и҆ а҆́ще ѹ҆́бѡ бѹ́детъ тѹ̀ сы́нъ ми́ра, почі́етъ на не́мъ ми́ръ ва́шъ: а҆́ще ли же нѝ, къ ва́мъ возврати́тсѧ.

⁷Въ то́мъ же домѹ̀ пребыва́йте, ѩ҆дѹ́ще и҆ пїю́ще, ѩ҆́же сѹ́ть ѹ҆ ни́хъ: досто́инъ бо є҆́сть дѣ́латель мзды̀ своеѧ̀: не преходи́те и҆з̾ до́мѹ въ до́мъ.

⁸И҆ во́ньже а҆́ще гра́дъ вхо́дите, и҆ прїе́млютъ вы̀, ѩ҆ди́те предлага́ємаѧ ва́мъ:

⁹и҆ и҆сцѣли́те недѹ҄жныѧ, и҆̀же сѹ́ть въ не́мъ, и҆ глаго́лите и҆̀мъ: прибли́жисѧ на вы̀ цр҇твїе бж҃їе.

¹⁰И҆ во́ньже а҆́ще гра́дъ вхо́дите, и҆ не прїе́млютъ ва́съ, и҆зше́дше на распѹ҄тїѧ є҆гѡ̀, рцы́те:

¹¹и҆ пра́хъ прилѣ́пшїй на́мъ ѿ гра́да ва́шегѡ, ѿтрѧса́емъ ва́мъ. Ѻ҆ба́че сїѐ вѣ́дите, ѩ҆́кѡ прибли́жисѧ на вы̀ цр҇твїе бж҃їе.

¹²Глаго́лю ва́мъ, ѩ҆́кѡ содо́млѧнѡмъ въ де́нь то́й ѿра́днѣе бѹ́детъ, не́же гра́дѹ томѹ̀.

¹³Го́ре тебѣ̀, хоразі́не, го́ре тебѣ̀, виѳсаі́до: ѩ҆́кѡ а҆́ще въ тѵ́рѣ и҆ сїдѡ́нѣ бы́ша си҄лы бы́ли бы́вшыѧ въ ва́ю, дре́вле ѹ҆́бѡ во вре́тищи и҆ пе́пелѣ сѣдѧ́ще покаѧ́лисѧ бы́ша:

¹⁴ѻ҆ба́че тѵ́рѹ и҆ сїдѡ́нѹ ѿра́днѣе бѹ́детъ на сѹдѣ̀, не́же ва́ма.

¹⁵И҆ ты̀, капернаѹ́ме, и҆́же до небе́съ вознесы́йсѧ, до а҆́да низведе́шисѧ.

¹⁶(За҄ 51.) Слѹ́шаѧй ва́съ, менє̀ слѹ́шаетъ: и҆ ѿмета́ѧйсѧ ва́съ, менє̀ ѿмета́етсѧ: ѿмета́ѧйсѧ же менє̀, ѿмета́етсѧ посла́вшагѡ мѧ̀.

¹⁷Возврати́шасѧ же се́дмьдесѧтъ съ ра́достїю, глаго́люще: гд҇и, и҆ бѣ́си повинѹ́ютсѧ на́мъ ѡ҆ и҆́мени твое́мъ.

¹⁸Рече́ же и҆̀мъ: ви́дѣхъ сатанѹ̀ ѩ҆́кѡ мо́лнїю съ небесѐ спа́дша.

¹⁹(За҄.) Сѐ, даю̀ ва́мъ вла́сть настѹпа́ти на ѕмїю̀ и҆ на скорпі́ю и҆ на всю̀ си́лѹ вра́жїю: и҆ ничесѡ́же ва́съ вреди́тъ.

²⁰Ѻ҆ба́че ѡ҆ се́мъ не ра́дѹйтесѧ, ѩ҆́кѡ дѹ́си ва́мъ повинѹ́ютсѧ: ра́дѹйтесѧ же, ѩ҆́кѡ и҆мена̀ ва҄ша напи҄сана сѹ́ть на нб҃сѣ́хъ.

²¹Въ то́й ча́съ возра́довасѧ дѹ́хомъ ї҆и҃съ и҆ речѐ: и҆сповѣ́даютисѧ, ѻ҆́ч҃е, гд҇и нб҃сѐ и҆ землѝ, ѩ҆́кѡ ѹ҆таи́лъ є҆сѝ сїѧ҄ ѿ премѹ́дрыхъ и҆ разѹ́мныхъ, и҆ ѿкры́лъ є҆сѝ та҄ младе́нцємъ: є҆́й, ѻ҆́ч҃е, ѩ҆́кѡ та́кѡ бы́сть бл҃говоле́нїе пред̾ тобо́ю.

²²И҆̀ ѡ҆бра́щьсѧ ко ѹ҆чн҃кѡ́мъ, речѐ: всѧ҄ мнѣ̀ предана҄ бы́ша ѿ ѻ҆ц҃а̀ моегѡ̀: и҆ никто́же вѣ́сть, кто̀ є҆́сть сн҃ъ, то́кмѡ ѻ҆ц҃ъ: и҆ кто̀ є҆́сть ѻ҆ц҃ъ, то́кмѡ сн҃ъ, и҆ є҆мѹ́же а҆́ще хо́щетъ сн҃ъ ѿкры́ти.

²³(За҄ 52.) И҆̀ ѡ҆бра́щьсѧ ко ѹ҆чн҃кѡ́мъ, є҆ди́нъ {ѡ҆со́бь} речѐ: блаже́ни ѻ҆́чи ви́дѧщїи, ѩ҆̀же ви́дите:

²⁴глаго́лю бо ва́мъ, ѩ҆́кѡ мно́зи про҇ро́цы и҆ ца́рїе восхотѣ́ша ви́дѣти, ѩ҆̀же вы̀ ви́дите, и҆ не ви́дѣша: и҆ слы́шати, ѩ҆̀же слы́шите, и҆ не слы́шаша.

²⁵(За҄ 53.) И҆ сѐ, зако́нникъ нѣ́кїй воста̀, и҆скѹша́ѧ є҆го̀ и҆ глаго́лѧ: ѹ҆чи́телю, что̀ сотвори́въ, живо́тъ вѣ́чный наслѣ́дѹю;

²⁶Ѻ҆́нъ же речѐ къ немѹ̀: въ зако́нѣ что̀ пи́сано є҆́сть; ка́кѡ чте́ши;

²⁷Ѻ҆́нъ же ѿвѣща́въ речѐ: возлю́биши гд҇а бг҃а твоего̀ ѿ всегѡ̀ се́рдца твоегѡ̀, и҆ ѿ всеѧ̀ дѹшѝ твоеѧ̀, и҆ все́ю крѣ́постїю твое́ю, и҆ всѣ́мъ помышле́нїемъ твои́мъ: и҆ бли́жнѧго своего̀ ѩ҆́кѡ са́мъ себѐ.

²⁸Рече́ же є҆мѹ̀: пра́вѡ ѿвѣща́лъ є҆сѝ: сїѐ сотворѝ, и҆ жи́въ бѹ́деши.

²⁹Ѻ҆́нъ же хотѧ̀ ѡ҆правди́тисѧ са́мъ, речѐ ко ї҆и҃сѹ: и҆ кто̀ є҆́сть бли́жнїй мо́й;

³⁰Ѿвѣща́въ же ї҆и҃съ речѐ: человѣ́къ нѣ́кїй схожда́ше ѿ ї҆ер҇ли́ма во ї҆ерїхѡ́нъ, и҆ въ разбо́йники впадѐ, и҆̀же совле́кше є҆го̀, и҆ ѩ҆́звы возло́жше ѿидо́ша, ѡ҆ста́вльше є҆два̀ жи́ва сѹ́ща.

³¹По слѹ́чаю же свѧще́нникъ нѣ́кїй схожда́ше пѹте́мъ тѣ́мъ, и҆ ви́дѣвъ є҆го̀, мимои́де.

³²Та́кожде же и҆ леѵі́тъ, бы́въ на то́мъ мѣ́стѣ, прише́дъ и҆ ви́дѣвъ, мимои́де.

³³Самарѧ́нинъ же нѣ́кто грѧды́й, прїи́де над̾ него̀, и҆ ви́дѣвъ є҆го̀, милосе́рдова:

³⁴и҆ пристѹ́пль ѡ҆бвѧза̀ стрѹ́пы є҆гѡ̀, возлива́ѧ ма́сло и҆ вїно̀: всади́въ же є҆го̀ на сво́й ско́тъ, приведѐ є҆го̀ въ гости́нницѹ, и҆ прилѣжа̀ є҆мѹ̀:

³⁵и҆ наѹ́трїѧ и҆зше́дъ, и҆з̾е́мъ два̀ сре́брєника, дадѐ гости́нникѹ, и҆ речѐ є҆мѹ̀: прилѣжѝ є҆мѹ̀: и҆, є҆́же а҆́ще прїиждиве́ши, а҆́зъ є҆гда̀ возвращѹ́сѧ, возда́мъ тѝ.

³⁶Кто̀ ѹ҆̀бо ѿ тѣ́хъ трїе́хъ бли́жнїй мни́ттисѧ бы́ти впа́дшемѹ въ разбо́йники;

³⁷Ѻ҆́нъ же речѐ: сотвори́вый ми́лость съ ни́мъ. Рече́ же є҆мѹ̀ ї҆и҃съ: и҆дѝ, и҆ ты̀ творѝ та́кожде.

³⁸(За҄ 54.) Бы́сть же ходѧ́щымъ и҆̀мъ, и҆ са́мъ вни́де въ ве́сь нѣ́кѹю: жена́ же нѣ́каѧ и҆́менемъ ма́рѳа прїѧ́тъ є҆го̀ въ до́мъ сво́й.

³⁹И҆ сестра̀ є҆́й бѣ̀ нарица́емаѧ марі́а, ѩ҆́же и҆ сѣ́дши при ногѹ̀ ї҆и҃сѡвѹ, слы́шаше сло́во є҆гѡ̀.

⁴⁰Ма́рѳа же мо́лвѧше ѡ҆ мно́зѣ слѹ́жбѣ, ста́вши же речѐ: гд҇и, не бреже́ши ли, ѩ҆́кѡ сестра̀ моѧ̀ є҆ди́нѹ мѧ̀ ѡ҆ста́ви слѹжи́ти; рцы̀ ѹ҆̀бо є҆́й, да мѝ помо́жетъ.

⁴¹Ѿвѣща́въ же ї҆и҃съ речѐ є҆́й: ма́рѳо, ма́рѳо, пече́шисѧ, и҆ мо́лвиши ѡ҆ мно́зѣ,

⁴²є҆ди́но же є҆́сть на потре́бѹ: марі́а же бл҃гѹ́ю ча́сть и҆збра̀, ѩ҆́же не ѿи́метсѧ ѿ неѧ̀.