Read Библия Церковнославянская Ѿ лѹкѝ 3 Bible Online

Ѿ лѹкѝ 3 - Библия Церковнославянская bible

Ѿ лѹкѝ 3

¹Въ пѧ́тое же на́десѧте лѣ́то влады́чества тїве́рїа ке́сарѧ, ѡ҆блада́ющѹ понті́йскомѹ пїла́тѹ ї҆ѹде́ею, и҆ четвертовла́ствѹющѹ галїле́ею и҆́рѡдѹ, фїлі́ппѹ же бра́тѹ є҆гѡ̀ четвертовла́ствѹющѹ ї҆тѹре́ею и҆ трахѡні́тскою страно́ю, и҆ лѷса́нїю а҆вїлині́ею четвертовла́ствѹющѹ,

²при а҆рхїере́и а҆́ннѣ и҆ каїа́фѣ, бы́сть гл҃го́лъ бж҃їй ко ї҆ѡа́ннѹ заха́рїинѹ сы́нѹ въ пѹсты́ни.

³И҆ прїи́де во всю̀ странѹ̀ ї҆ѻрда́нскѹю, проповѣ́даѧ креще́нїе покаѧ́нїѧ во ѡ҆ставле́нїе грѣхѡ́въ:

⁴ѩ҆́коже є҆́сть пи́сано въ кни́зѣ слове́съ и҆са́їи про҇ро́ка, глаго́люща: гла́съ вопїю́щаго въ пѹсты́ни: ѹ҆гото́вайте пѹ́ть гд҇нь: пра҄вы твори́те стєзѝ є҆гѡ̀:

⁵всѧ́ка де́брь и҆спо́лнитсѧ, и҆ всѧ́ка гора̀ и҆ хо́лмъ смири́тсѧ: и҆ бѹ́дѹтъ стро́пѡтнаѧ въ пра҄ваѧ, и҆ ѻ҆́стрїи въ пѹти҄ гла҄дки:

⁶и҆ ѹ҆́зритъ всѧ́ка пло́ть сп҇нїе бж҃їе.

⁷Глаго́лаше же и҆сходѧ́щымъ наро́дѡмъ крести́тисѧ ѿ негѡ̀: порождє́нїѧ є҆хі́днѡва, кто̀ сказа̀ ва́мъ бѣжа́ти ѿ грѧдѹ́щагѡ гнѣ́ва;

⁸Сотвори́те ѹ҆̀бо плоды̀ достѡ́ины покаѧ́нїѧ: и҆ не начина́йте глаго́лати въ себѣ̀: ѻ҆тца̀ и҆́мамы а҆враа́ма: глаго́лю бо ва́мъ, ѩ҆́кѡ мо́жетъ бг҃ъ ѿ ка́менїѧ сегѡ̀ воздви́гнѹти ча҄да а҆враа́мѹ.

⁹Ѹ҆же́ бо и҆ сѣки́ра при ко́рени дре́ва лежи́тъ: всѧ́ко ѹ҆̀бо дре́во, не творѧ́щее плода̀ добра̀, посѣка́етсѧ и҆ во ѻ҆́гнь вмета́етсѧ.

¹⁰И҆ вопроша́хѹ є҆го̀ наро́ди, глаго́люще: что̀ ѹ҆̀бо сотвори́мъ;

¹¹Ѿвѣща́въ же глаго́ла и҆́мъ: и҆мѣ́ѧй двѣ̀ ри҄зѣ, да пода́стъ не и҆мѹ́щемѹ: и҆ и҆мѣ́ѧй бра҄шна, та́кожде да твори́тъ.

¹²Прїидо́ша же и҆ мы́тари крести́тисѧ ѿ негѡ̀, и҆ рѣ́ша къ немѹ̀: ѹ҆чи́телю, что̀ сотвори́мъ;

¹³Ѻ҆́нъ же речѐ къ ни҄мъ: ничто́же бо́лѣе ѿ повелѣ́ннагѡ ва́мъ твори́те.

¹⁴Вопроша́хѹ же є҆го̀ и҆ во́ини, глаго́люще: и҆ мы̀ что̀ сотвори́мъ; И҆ речѐ къ ни҄мъ: ни кого́же ѡ҆би́дите, ни ѡ҆клеветава́йте: и҆ дово́лни бѹ́дите ѡ҆брѡ́ки ва́шими.

¹⁵Ча́ющымъ же лю́демъ, и҆ помышлѧ́ющымъ всѣ҄мъ въ сердца́хъ свои́хъ ѡ҆ ї҆ѡа́ннѣ, є҆да̀ то́й є҆́сть хр҇то́съ,

¹⁶ѿвѣщава́ше ї҆ѡа́ннъ всѣ҄мъ, глаго́лѧ: а҆́зъ ѹ҆́бѡ водо́ю креща́ю вы̀: грѧде́тъ же крѣ́плїй менє̀, є҆мѹ́же нѣ́смь досто́инъ ѿрѣши́ти реме́нь сапѡгѹ̀ є҆гѡ̀: то́й вы̀ крести́тъ дх҃омъ ст҃ы́мъ и҆ ѻ҆гне́мъ:

¹⁷є҆мѹ́же лопа́та въ рѹкѹ̀ є҆гѡ̀, и҆ ѡ҆треби́тъ гѹмно̀ своѐ, и҆ собере́тъ пшени́цѹ въ жи́тницѹ свою̀, пле́вы же сожже́тъ ѻ҆гне́мъ негаса́ющимъ.

¹⁸Мнѡ́га же ѹ҆̀бо и҆ и҆́на, ѹ҆тѣша́ѧ благовѣствова́ше лю́демъ.

¹⁹(За҄ 10.) И҆́рѡдъ же четвертовла́стникъ, ѡ҆блича́емъ ѿ негѡ̀ ѡ҆ и҆рѡдїа́дѣ женѣ̀ бра́та своегѡ̀, и҆ ѡ҆ всѣ́хъ, ѩ҆̀же сотворѝ ѕла҄ѧ и҆́рѡдъ,

²⁰приложѝ и҆ сїѐ над̾ всѣ́ми, и҆ затворѝ ї҆ѡа́нна въ темни́цѣ.

²¹Бы́сть же є҆гда̀ кр҇ти́шасѧ всѝ лю́дїе, и҆ ї҆и҃сѹ кр҃щшѹсѧ и҆ молѧ́щѹсѧ, ѿве́рзесѧ не́бо,

²²и҆ сни́де дх҃ъ ст҃ы́й тѣле́снымъ ѡ҆́бразомъ, ѩ҆́кѡ го́лѹбь, на́нь: и҆ гла́съ съ небесѐ бы́сть, глаго́лѧ: ты̀ є҆сѝ сн҃ъ мо́й возлю́бленный, ѡ҆ тебѣ̀ бл҃говоли́хъ.

²³(За҄ 11.) И҆ то́й бѣ̀ ї҆и҃съ ѩ҆́кѡ лѣ́тъ три́десѧть начина́ѧ, сы́й, ѩ҆́кѡ мни́мь, сн҃ъ ї҆ѡ́сифовъ, и҆лі́евъ,

²⁴матѳа́товъ, леѵі́инъ, мелхі́инъ, ї҆анна́евъ, ї҆ѡ́сифовъ,

²⁵маттаѳі́евъ, а҆мѡ́совъ, наѹ́мовъ, є҆слі́мовъ, нагге́овъ,

²⁶маа́ѳовъ, маттаѳі́евъ, семеі́евъ, ї҆ѡ́сифовъ, ї҆ѹ́динъ,

²⁷ї҆ѡа́ннановъ, риса́евъ, зорова́велевъ, салаѳїи́левъ, нирі́евъ,

²⁸мелхі́евъ, а҆дді́евъ, кѡса́мовъ, є҆лмѡда́мовъ, и҆́ровъ,

²⁹ї҆ѡсі́евъ, є҆лїезе́ровъ, ї҆ѡрі́мовъ, матѳа́товъ, леѵі́инъ,

³⁰сѷмеѡ́новъ, ї҆ѹ́динъ, ї҆ѡ́сифовъ, ї҆ѡна́новъ, є҆лїакі́мовъ,

³¹мелеа́евъ, маїна́новъ, маттаѳа́евъ, наѳа́новъ, дв҃довъ,

³²ї҆ессе́овъ, ѡ҆ви́довъ, воо́зовъ, салмѡ́новъ, наассѡ́новъ,

³³а҆мїнада́вовъ, а҆ра́мовъ, є҆срѡ́мовъ, фаре́совъ, ї҆ѹ́динъ,

³⁴ї҆а́кѡвль, ї҆саа́ковъ, а҆враа́мовъ, ѳа́ринъ, нахѡ́ровъ,

³⁵серѹ́ховъ, рага́вовъ, фале́ковъ, є҆ве́ровъ, сала́новъ,

³⁶каїна́новъ, а҆рфаѯа́довъ, си́мовъ, нѡ́евъ, ла́меховъ,

³⁷маѳѹса́левъ, є҆нѡ́ховъ, ї҆а́редовъ, малелеи́ловъ, каїна́новъ,

³⁸є҆нѡ́совъ, си́ѳовъ, а҆да́мовъ, бж҃їй.